Bìoball air-loidhne

列王紀上卷 19 - 現代台語譯本羅馬字版

Í-lī-a tī Hô-lia̍t-soaⁿ Soaⁿ-téng

¹ A-hap chiong Í-lī-a só͘ chòe it-chhè ê sū, kap i ēng to thâi-sí Pa-le̍k só͘-ū ê sian-ti ê tāi-chì, lóng kā Iâ-sé-phek kóng.

² Iâ-sé-phek chiū phài sù-chiá khì kā Í-lī-a kóng, “Bîn-á-chài chit-ê sî, góa nā bô chhú lí ê sìⁿ-miā chhin-chhiūⁿ lí chhú in ta̍k-ê lâng ê sìⁿ-miā, goān sîn-bêng ka-pē chek-hoa̍t góa.”

³ Í-lī-a kiaⁿ--tio̍h, chiū kóaⁿ-kín tô-miā, lâi kàu Iû-tāi ê Pia̍t-sī-pa, chiong po̍k-jîn lâu tī hia.

⁴ I ka-kī tī khòng-iá kiâⁿ chi̍t ji̍t, lâi kàu chi̍t châng lô-têng-chhiū kha, chiū chē tī hia kiû sí, kóng, “Kàu-gia̍h lah! Siōng Chú ah, taⁿ kiû lí chhú góa ê sìⁿ-miā, in-ūi góa bô pí góa ê lia̍t-chó͘ khah kiông.”

⁵ I chiū tó tī lô-têng-chhiū kha, khùn--khì; ū thiⁿ-sài lâi tah i, kóng, “Khí-lâi chia̍h.”

⁶ Í-lī-a chi̍t-ē khòaⁿ, khòaⁿ-tio̍h thâu-khak piⁿ ū ēng jia̍t ê chio̍h-thâu hang ê piáⁿ, koh ū chi̍t pân chúi; i chiū chia̍h chiū lim, koh tó lo̍h-khì khùn.

⁷ Siōng Chú ê sù-chiá tē-jī piàn koh lâi kā tah, kóng, “Khí-lâi chia̍h, in-ūi lō͘ iáu chin hn̄g.”

⁸ I chiū khí-lâi chia̍h, khí-lâi lim; khò chit-piàn chia̍h ê la̍t, kiâⁿ sì-cha̍p mî, sì-cha̍p ji̍t, kàu Siōng-tè ê soaⁿ, chiū-sī Hô-lia̍t-soaⁿ.

⁹ I kàu hia, ji̍p-khì chi̍t ê tōng, tī hia kè-mî; hut-jiân, Siōng Chú ê ōe lîm-kàu i, tùi i kóng, “Í-lī-a, lí tī chia teh chhòng sím-mi̍h?”

¹⁰ I ìn kóng, “Góa ūi-tio̍h Siōng Chú — Bān-kun ê Thóng-sòe Siōng-tè tōa jia̍t-sim; in-ūi Í-sek-lia̍t-lâng khì-sak lí ê iok, húi-hoāi lí ê chè-tôaⁿ, ēng to thâi lí ê sian-ti, chí-ū chhun góa chi̍t lâng; in iáu siàu-siūⁿ góa ê sìⁿ-miā, beh thâi góa.”

¹¹ Siōng Chú kóng, “Lí chhut-lâi khiā tiàm soaⁿ-téng, tī góa ê bīn-chêng.” Hit-sî, Siōng Chú keng-kè, tī I bīn-chêng ū tōa koh kiông ê hong, soaⁿ-pang chio̍h-li̍h, m̄-kú Siōng Chú bô tī hong ê lāi-bīn; hong liáu-āu ū tōe-tāng, Siōng Chú mā bô tī tōe-tāng ê tiong-kan;

¹² tōe-tāng liáu-āu ū hé, Siōng Chú mā bô tī hé-tiong; hé liáu-āu, ū sòe koh khin ê siaⁿ.

¹³ Í-lī-a thiaⁿ--kìⁿ, chiū ēng gōa-saⁿ ng-bīn, chhut-khì khiā tī tōng-kháu. Hut-jiân, ū siaⁿ lîm-kàu i kóng, “Í-lī-a, lí tī chia teh chhòng sím-mi̍h?”

¹⁴ I kóng, “Góa ūi-tio̍h Siōng Chú — Bān-kun ê Thóng-sòe Siōng-tè tōa jia̍t-sim; in-ūi Í-sek-lia̍t-lâng khì-sak lí ê iok, húi-hoāi lí ê chè-tôaⁿ, ēng to thâi lí ê sian-ti, chí-ū chhun góa chi̍t ê; in iáu siàu-siūⁿ góa ê sìⁿ-miā, beh thâi góa.”

¹⁵ Siōng Chú kā i kóng, “Lí khì, chiàu goân-lō͘ tò--khì, khì Tāi-má-sū-kek ê khòng-iá; kàu hia liáu-āu, tio̍h ēng iû boah Hap-sih chòe Sū-lī-a-ông,

¹⁶ boah Lêng-sī ê sun Iâ-hō͘ chòe Í-sek-lia̍t-ông, koh boah A-pek Bí-hô-la-lâng Sa-hoat ê kiáⁿ Í-lī-sa chòe sian-ti sòa-chiap lí.

¹⁷ Chiong-lâi, bô hō͘ Hap-sih thâi-sí--ê, ōe hō͘ Iâ-hō͘ thâi-sí; bô hō͘ Iâ-hō͘ thâi-sí--ê, ōe hō͘ Í-lī-sa thâi-sí.

¹⁸ Chóng-sī, góa tī Í-sek-lia̍t tiong ū lâu chhit-chheng lâng, in ê kha-thâu-u m̄-bat kūi-pài Pa-le̍k, m̄-bat ēng chhùi kā chim.”

Í-lī-sa Siū Soán-tiàu

¹⁹ Í-lī-a chiū lī-khui hia; āu-lâi, chhē-tio̍h Sa-hoat ê kiáⁿ Í-lī-sa. Í-lī-sa tú-teh lôe-chhân; tī i ê thâu-chêng ū cha̍p-jī tùi gû, i ka-kī kóaⁿ tē-cha̍p-jī tùi. Í-lī-a keng-kè hia, chiong ka-kī ê gōa-saⁿ phoa̍h tī Í-lī-sa ê sin-chiūⁿ.

²⁰ Í-lī-sa chiū chiong hiah-ê gû pàng--teh, cháu-khì jip Í-lī-a, tùi i kóng, “Chhiáⁿ hō͘ góa tāi-seng kap góa ê pē-bú saⁿ-sî, āu-lâi chiū lâi tè lí.” Í-lī-a kā i kóng, “Lí thang tò--khì. Tio̍h ōe-kì-tit góa ū tùi lí chòe sím-mi̍h.”

²¹ Í-lī-sa chiū tùi hia tò--khì, thâi chi̍t tùi gû, ēng thò gû ê khì-khū chòe chhâ chú bah, hō͘ chèng-lâng chia̍h. Āu-lâi, Í-lī-sa chiū khí-lâi tè Í-lī-a, ho̍k-sāi i.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan