Bìoball air-loidhne

列王紀上卷 18 - 現代台語譯本羅馬字版

Í-lī-a kap Pa-le̍k ê Sian-ti

¹ Keng-kè chi̍t tōaⁿ sî-kan, kàu tē-saⁿ nî, Siōng Chú ê ōe lîm-kàu Í-lī-a kóng, “Lí khì kìⁿ A-hap; góa beh lo̍h-hō͘ tī tōe-bīn-chiūⁿ.”

² Í-lī-a chiū khì, beh kìⁿ A-hap; hit-sî Sat-má-lī-a ki-hng chin giâm-tiōng.

³ A-hap chiū kiò i ê koán-ke Gô-pa-tí-a lâi. (Gô-pa-tí-a put-chí kèng-ùi Siōng Chú.

⁴ Iâ-sé-phek teh thâi Siōng Chú ê sian-ti ê sî, Gô-pa-tí-a chiong sian-ti chi̍t-pah lâng chhàng--khí-lâi, múi gō͘-cha̍p lâng chhàng tī chi̍t ê tōng-lāi, ēng piáⁿ kap chúi kiong-kip in.)

⁵ A-hap kā Gô-pa-tí-a kóng, “Lí tio̍h sì-kòe khì chhē, kàu só͘-ū ê chúi-chôaⁿ piⁿ kap khoe-piⁿ, khòaⁿ ōe-tàng chhē-tio̍h chhiⁿ-chháu bōe, thang hō͘ bé, lô oa̍h--teh, chiah bián cheng-siⁿ sí--khì.”

⁶ In chiū pun khu-he̍k khì chhē. A-hap kiâⁿ chi̍t tiâu lō͘, Gô-pa-tí-a ka-kī kiâⁿ lēng-gōa chi̍t tiâu lō͘.

⁷ Gô-pa-tí-a tī lō͘--ni̍h tú-tio̍h Í-lī-a; Gô-pa-tí-a jīn-tio̍h i, chiū phak--lo̍h-khì, kóng, “Lí sī góa ê chú Í-lī-a sī--bô?”

⁸ I ìn kóng, “Sī. Khì kā lí ê chú-lâng kóng, Í-lī-a tī chia.”

⁹ Gô-pa-tí-a kóng, “Lí ê po̍k-jîn ū hoān sím-mi̍h chōe, lí kèng-jiân beh hāi góa hō͘ A-hap thâi-sí?

¹⁰ Góa kí éng-oa̍h ê Siōng Chú — lí ê Siōng-tè chiù-chōa: Ta̍k-cho̍k, ta̍k-kok, góa ê chú lóng phài lâng khì teh chhē lí; in nā kóng ‘I bô tī chia’, chiū kiò hit-kok hit-cho̍k ê lâng chiù-chōa kóng, in si̍t-chāi chhē bōe tio̍h lí.

¹¹ Taⁿ lí kóng, ‘Khì kā lí ê chú-lâng kóng: Í-lī-a tī chia.’

¹² Góa chi̍t-ē lī-khui, Siōng Chú ê sîn m̄-chai beh kā lí tòa-khì sím-mi̍h só͘-chāi. Góa nā khì kā A-hap kóng lí tī chia, i lâi nā chhē bô lí, chiū ōe kā góa thâi-sí. M̄-kú lí ê po̍k-jîn tùi siàu-liân chiū kèng-ùi Siōng Chú.

¹³ Tng Iâ-sé-phek teh thâi Siōng Chú ê sian-ti ê sî, góa só͘ chòe--ê kiám bô lâng kā góa ê chú kóng? Góa ū chiong chi̍t-pah ê Siōng Chú ê sian-ti chhàng--khí-lâi, múi gō͘-cha̍p lâng chhàng tī chi̍t ê tōng-lāi, ēng piáⁿ kap chúi kiong-kip in.

¹⁴ Taⁿ lí kóng, ‘Khì kā lí ê chú-lâng kóng: Í-lī-a tī chia.’ I it-tēng ōe kā góa thâi-sí.”

¹⁵ Í-lī-a kóng, “Góa kí góa só͘ ho̍k-sāi ê Siōng Chú — Bān-kun ê Thóng-sòe chiù-chōa kóng, kin-á-ji̍t góa it-tēng beh hō͘ A-hap khòaⁿ-tio̍h góa.”

¹⁶ Gô-pa-tí-a chiū khì kìⁿ A-hap, kā i pò-kò. A-hap chiū lâi kìⁿ Í-lī-a.

¹⁷ A-hap khòaⁿ-tio̍h Í-lī-a chiū kā i kóng, “Lí chit-ê hāi Í-sek-lia̍t chhiⁿ-chhám-lo̍k-phek--ê!”

¹⁸ Í-lī-a ìn kóng, “Hāi Í-sek-lia̍t chhiⁿ-chhám-lo̍k-phek--ê m̄-sī góa, sī lí kap lí ê lāu-pē ê ke; in-ūi lín khì-sak Siōng Chú ê kài-bēng, khì tè Pa-le̍k.

¹⁹ Taⁿ lí tio̍h phài lâng khì tiàu-chi̍p Í-sek-lia̍t chèng-lâng, í-ki̍p chia̍h Iâ-sé-phek ê pn̄g ê Pa-le̍k sian-ti sì-pah gō͘-cha̍p lâng, kap A-sià-la ê sian-ti sì-pah lâng, kiò in lóng khì Ka-bi̍t-soaⁿ góa hia.”

²⁰ A-hap chiū phài lâng khì Í-sek-lia̍t chèng-lâng hia, tiàu-chi̍p sian-ti khì Ka-bi̍t-soaⁿ.

²¹ Í-lī-a kiâⁿ-óa chèng-lâng, tùi in kóng, “Lín sim chûn lióng-ì bô beh koat-toàn, beh kàu sím-mi̍h sî? Nā Siōng Chú sī Siōng-tè, chiū tio̍h sūn-thàn Siōng Chú; nā Pa-le̍k sī Siōng-tè, chiū tio̍h sūn-thàn Pa-le̍k.” Chèng-lâng chi̍t kù ōe to bô ìn.

²² Í-lī-a koh kā chèng-lâng kóng, “Siōng Chú ê sian-ti chí-ū chhun góa chi̍t ê, m̄-kú Pa-le̍k ê sian-ti ū sì-pah gō͘-cha̍p lâng.

²³ Kā goán khan nn̄g chiah gû-káng-á lâi, Pa-le̍k ê sian-ti seng kéng chi̍t chiah, chhiat kui-tè kui-tè, hē tī chhâ-téng, m̄-thang khí-hé; góa mā ōe chún-pī lēng-gōa hit-chiah gû, hē tī chhâ-téng, mā bōe khí-hé.

²⁴ Hō͘ Pa-le̍k ê sian-ti kiû-kiò in sîn-bêng ê miâ, góa kiû-kiò Siōng Chú ê miâ. Tó chi̍t ê ēng hé hôe-èng kî-tó, hit-ê chiū-sī Siōng-tè.” Chèng-lâng lóng chàn-sêng.

²⁵ Í-lī-a tùi Pa-le̍k ê sian-ti kóng, “Lín kéng chi̍t chiah gû-káng-á, seng khì chún-pī, in-ūi lín lâng khah chōe, lín kiû-kiò lín ê sîn-bêng ê miâ, m̄-kú m̄-thang khí-hé.”

²⁶ Hiah-ê sian-ti chiong hō͘ in ê gû-káng-á chhoân hó-sè; tùi chá-khí kàu ji̍t-tàu kiû-kiò Pa-le̍k ê miâ, kóng, “Pa-le̍k ah, tio̍h ìn goán.” M̄-kú bô-siaⁿ-bô-seh, lóng bô ìn-tap; in tī só͘ khí ê tôaⁿ chiu-ûi tiô-thiàu.

²⁷ Kàu tiong-tàu, Í-lī-a ki-chhì in kóng, “Hoah khah tōa-siaⁿ leh! I sī sîn-bêng, khó-lêng i sī teh be̍k-sióng, á-sī teh bô-êng, á-sī chhut-gōa khì lú-iû, á-sī teh khùn, lín tio̍h kā i kiò-chhíⁿ.”

²⁸ In tōa-siaⁿ kiû-kiò, chiàu in ê gî-sek, ēng to phut, ēng chhiuⁿ chha̍k ka-kī, tì-kàu kui seng-khu lâu-huih.

²⁹ Tùi kè-tàu kàu hiàn ē-hng-chè ê sî, in tōa-siaⁿ jióng, o͘-pe̍h hoah; m̄-kú lóng bô ìn-tap, bô tōng-chēng, mā bô sím-mi̍h hôe-èng.

³⁰ Í-lī-a kā chèng-lâng kóng, “Lín óa-lâi góa chia.” Chèng-lâng chiū kūn-óa lâi i hia; i chiū chéng-siu tó-hoāi ê Siōng Chú ê chè-tôaⁿ.

³¹ Í-lī-a chiàu Ngá-kok kiáⁿ-sun cha̍p-jī chi-cho̍k ê sò͘-bo̍k the̍h cha̍p-jī tè chio̍h; Siōng Chú bat tùi Ngá-kok kóng, “Lí ê miâ beh kiò-chòe Í-sek-lia̍t.”

³² Í-lī-a ēng chiah-ê chio̍h-thâu, hōng Siōng Chú ê miâ khí chi̍t chō tôaⁿ, tī tôaⁿ ê chiu-ûi khui ōe-tóe-tit cha̍p-sì kong-seng chéng-chí ê kau.

³³ Koh pâi chhâ, chiong gû chhiat chi̍t-tè chi̍t-tè, hē tī chhâ-téng; kóng, “Ēng sì tháng tóe-tīⁿ-tīⁿ ê chúi, piàⁿ tī sio-hòa-chè kap chhâ ê téng-bīn.”

³⁴ Koh kóng, “Piàⁿ tē-jī piàn.” In chiū piàⁿ tē-jī piàn; koh kóng, “Piàⁿ tē-saⁿ piàn.” In chiū piàⁿ tē-saⁿ piàn.

³⁵ Chúi lâu tī tôaⁿ ê sì-ûi, kau mā ū chúi móa-móa.

³⁶ Kàu hiàn ē-hng-chè ê sî, sian-ti Í-lī-a kiâⁿ-óa chè-tôaⁿ, kóng, “Siōng Chú — A-pek-la-hán, Í-sat, Ngá-kok ê Siōng-tè, kiû lí kin-á-ji̍t hō͘ lâng chai lí sī Í-sek-lia̍t ê Siōng-tè, mā chai góa sī lí ê po̍k-jîn, koh chiàu lí ê ōe chòe chiah-ê it-chhè ê tāi-chì.

³⁷ Siōng Chú ah, tio̍h ìn góa, tio̍h ìn góa, hō͘ chiah-ê jîn-bîn chai Siōng Chú lí chiū-sī Siōng-tè, hō͘ in ê sim oa̍t tò-tńg.”

³⁸ Siōng Chú chiū kàng-hé, chiong sio-hòa-chè, chhâ, chio̍h-thâu, kap thô͘ sio-liáu-liáu, kau-lāi ê chúi lóng sio kah ta-ta.

³⁹ Chèng-lâng khòaⁿ--tio̍h, chiū phak tī thô͘-kha kóng, “Siōng Chú, I sī Siōng-tè! Siōng Chú, I sī Siōng-tè.”

⁴⁰ Í-lī-a kā in kóng, “Kā Pa-le̍k ê sian-ti lia̍h--khí-lâi, liân chi̍t ê to m̄-thang hō͘ cháu--khì.” Chèng-lâng chiū lia̍h in; Í-lī-a chiū tòa in lo̍h-khì Ki-sūn khoe-piⁿ, tī hia kā in thâi-sí.

Hān-chai Kiat-sok

⁴¹ Í-lī-a kā A-hap kóng, “Taⁿ lí thang khì lim-chia̍h; in-ūi ū thiaⁿ-tio̍h tōa-hō͘ ê siaⁿ.”

⁴² A-hap chiū khì lim-chia̍h. Í-lī-a chiūⁿ-khì Ka-bi̍t-soaⁿ téng, kūi tī thô͘-kha, bīn àⁿ tī nn̄g ê kha-thâu-u ê tiong-ng.

⁴³ Í-lī-a tùi i ê po̍k-jîn kóng, “Lí chiūⁿ--khì, khòaⁿ hái hit-pêng.” Po̍k-jîn chiū chiūⁿ-khì khòaⁿ, kóng, “Bô khòaⁿ-tio̍h sím-mi̍h.” Í-lī-a kóng, “Lí koh khì.” I liân-sòa kiò i khì khòaⁿ chhit piàn.

⁴⁴ Kàu tē-chhit piàn, po̍k-jîn kā i kóng, “Ū khòaⁿ-tio̍h hûn tùi hái--ni̍h khí--lâi, chhin-chhiūⁿ chhiú-pôaⁿ hiah sòe.” Í-lī-a kóng, “Lí khì tùi A-hap kóng, ‘Tio̍h chún-pī chhia lo̍h--khì, chiah bián hō͘ hō͘ chó͘-tòng.’”

⁴⁵ Chi̍t-sî-á kú, thiⁿ in-ūi hong kap hûn piàn o͘-àm, lo̍h tōa-hō͘. A-hap chiū chē-chhia khì Iâ-su-lia̍t.

⁴⁶ Siōng Chú ê khùi-la̍t lîm-kàu Í-lī-a, i chiū io-tòa pa̍k hó-sè, kui-chōa lō͘ cháu tī A-hap ê thâu-chêng, ti̍t-kàu Iâ-su-lia̍t ê siâⁿ-mn̂g.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan