Bìoball air-loidhne

列王紀上卷 16 - 現代台語譯本羅馬字版

¹ Siōng Chú ê ōe lîm-kàu Hap-ná-nî ê kiáⁿ Iâ-hō͘, kiò i chek-pī Pa-sa, kóng,

² “Góa ū tùi thô͘-hún ê tiong-kan thê-poa̍t lí, siat-li̍p lí chòe góa chú-bîn Í-sek-lia̍t ê thóng-tī-chiá, lí kèng-jiân kiâⁿ Iâ-lô-pho-an ê lō͘, hō͘ góa ê chú-bîn Í-sek-lia̍t hām-lo̍h chōe, kek góa siū-khì.

³ Khòaⁿ leh, góa beh tû-bia̍t lí kap lí ê ke, mā beh hō͘ lí ê ke kap Nî-pat ê kiáⁿ Iâ-lô-pho-an ê ke kâng-khoán.

⁴ Só͘-ū sio̍k Pa-sa ê lâng, sí tī siâⁿ-lāi--ê, káu ōe kā chia̍h; sí tī iá-gōa--ê, khong-tiong ê chiáu ōe pe-lâi chia̍h.”

⁵ Pa-sa kî-tha ê sū-chek, i só͘ chòe ê sū kap i ê sêng-chiū, lóng kì-chài tī Í-sek-lia̍t Lia̍t-ông-sú.

⁶ Pa-sa tńg-khì i ê lia̍t-chó͘ hia liáu-āu, an-chòng tī Tek-sat; i ê kiáⁿ Í-la sòa-chiap i choh-ông.

⁷ Siōng Chú thong-kè Hap-ná-nî ê kiáⁿ sian-ti Iâ-hō͘ chek-pī Pa-sa kap i ê ke, in-ūi i kap Iâ-lô-pho-an ê ke kâng-khoán, chòe Siōng Chú khòaⁿ-chòe pháiⁿ ê sū, koh in-ūi i thâi-sí Iâ-lô-pho-an choân-ke, kek-tōng Siōng Chú siū-khì.

Í-sek-lia̍t-ông Í-la

⁸ Iû-tāi-ông A-sat tē-jī-cha̍p-la̍k nî, Pa-sa ê kiáⁿ Í-la tī Tek-sat choh-ông thóng-tī Í-sek-lia̍t nn̄g nî.

⁹ I ê jîn-sîn Sim-lī, chiū-sī chí-hui chiàn-chhia-tūi chi̍t-pòaⁿ ê kun-koaⁿ, pōe-poān i. Í-la tī Tek-sat, tī ông-kiong ê koán-ke A-cha̍p in tau chia̍h chiú-chùi ê sî,

¹⁰ Sim-lī ji̍p-khì kā i thâi-sí, chhoàn i ê ūi; che sī Iû-tāi-ông A-sat tē-jī-cha̍p-chhit nî ê sū.

¹¹ Sim-lī chi̍t-ē chē-ūi thóng-tī, chiū thâi-sí Pa-sa choân-ke, pau-koat chhin-lâng pêng-iú, lóng bô lâu chi̍t ê ta-po͘-lâng.

¹² Án-ni, Sim-lī tû-bia̍t Pa-sa choân-ke, tú-tú chiàu Siōng Chú thong-kè sian-ti Iâ-hō͘ kong-kek Pa-sa ê ōe.

¹³ Che sī in-ūi Pa-sa só͘-ū ê chōe, kap i ê kiáⁿ Í-la ê chōe; in nn̄g ê lâng hō͘ Í-sek-lia̍t-lâng hām-lo̍h chōe, khì pài hu-ké ê sîn-bêng, kek-tōng Siōng Chú — Í-sek-lia̍t ê Siōng-tè siū-khì.

¹⁴ Í-la kî-tha ê sū-chek, kap i só͘ chòe ê sū, lóng kì-chài tī Í-sek-lia̍t Lia̍t-ông-sú.

Í-sek-lia̍t-ông Sim-lī

¹⁵ Iû-tāi-ông A-sat tē-jī-cha̍p-chhit nî, Sim-lī tī Tek-sat choh-ông chhit ji̍t; hit-sî kun-peng tú-á chat-iâⁿ ûi-kong Hui-lī-sū ê Ki-pí-tùn-siâⁿ.

¹⁶ Iâⁿ-tiong ê kun-peng thiaⁿ-tio̍h Sim-lī pōe-poān, koh thâi-sí ông, hit-ji̍t, Í-sek-lia̍t jîn-bîn chiū tī iâⁿ-tiong siat-li̍p goân-sòe Àm-lī chòe Í-sek-lia̍t-ông.

¹⁷ Àm-lī kap Í-sek-lia̍t kun-peng tùi Ki-pí-tùn chiūⁿ--khì, ûi-khùn Tek-sat.

¹⁸ Sim-lī khòaⁿ-tio̍h siâⁿ í-keng phòa, chiū ji̍p ông-kiong lāi-bīn ê pó-lúi, pàng-hé sio ông-kiong, ka-kī sí tī lāi-bīn.

¹⁹ Che sī in-ūi i ū hoān-chōe, chòe Siōng Chú khòaⁿ-chòe pháiⁿ ê sū, kiâⁿ Iâ-lô-pho-an ê lō͘, koh hō͘ Í-sek-lia̍t-lâng hām-lo̍h chōe.

²⁰ Sim-lī kî-tha ê sū-chek, kap i ê pōe-poān, lóng kì-chài tī Í-sek-lia̍t Lia̍t-ông-sú.

Í-sek-lia̍t-ông Àm-lī

²¹ Hit-sî, Í-sek-lia̍t jîn-bîn hun-chòe nn̄g pêng: chi̍t-pòaⁿ tè Ki-la̍p ê kiáⁿ Thê-pí-nî, beh siat-li̍p i choh-ông; chi̍t-pòaⁿ tè Àm-lī.

²² M̄-kú tè Àm-lī ê jîn-bîn pí tè Ki-la̍p ê kiáⁿ Thê-pí-nî ê lâng khah kiông; Thê-pí-nî sí, Àm-lī chiū choh-ông.

²³ Iû-tāi-ông A-sat tē-saⁿ-cha̍p-it nî, Àm-lī chòe Í-sek-lia̍t-ông, kiōng cha̍p-jī nî; chêng la̍k nî tī Tek-sat choh-ông.

²⁴ Àm-lī ēng chhit-cha̍p kong-kun ê gûn tùi Sat-má bóe Sat-má-lī-a-soaⁿ, tī soaⁿ-téng khí-siâⁿ; chiū chiàu hit-ê soaⁿ ê tōe-chú Sat-má ê miâ, kā só͘ khí ê siâⁿ hō-miâ kiò-chòe Sat-má-lī-a.

²⁵ Àm-lī kiâⁿ Siōng Chú khòaⁿ-chòe pháiⁿ ê sū, pí í-chêng só͘-ū ê ông koh-khah pháiⁿ.

²⁶ In-ūi i kiâⁿ Nî-pat ê kiáⁿ Iâ-lô-pho-an ê lō͘, hō͘ Í-sek-lia̍t-lâng hām-lo̍h chōe, khì pài hu-ké ê sîn-bêng, kek-tōng Siōng Chú — Í-sek-lia̍t ê Siōng-tè siū-khì.

²⁷ Àm-lī kî-tha ê sū-chek, kap i ê sêng-chiū, lóng kì-chài tī Í-sek-lia̍t Lia̍t-ông-sú.

²⁸ Àm-lī tńg-khì i ê lia̍t-chó͘ hia liáu-āu, an-chòng tī Sat-má-lī-a; i ê kiáⁿ A-hap sòa-chiap i choh-ông.

Í-sek-lia̍t-ông A-hap

²⁹ Iû-tāi-ông A-sat tē-saⁿ-cha̍p-poeh nî, Àm-lī ê kiáⁿ A-hap chòe Í-sek-lia̍t-ông, tī Sat-má-lī-a choh-ông jī-cha̍p-jī nî.

³⁰ Àm-lī ê kiáⁿ A-hap chòe Siōng Chú khòaⁿ-chòe pháiⁿ ê sū, pí í-chêng só͘-ū ê ông koh-khah pháiⁿ.

³¹ I hoān Nî-pat ê kiáⁿ Iâ-lô-pho-an ê chōe, m̄-kú iáu khòaⁿ che chòe sió-sū; i koh chhōa Se-tùn-ông Iat-pa-le̍k ê cha-bó͘-kiáⁿ Iâ-sé-phek chòe bó͘, khì ho̍k-sāi kūi-pài Pa-le̍k.

³² I tī Sat-má-lī-a ūi-tio̍h Pa-le̍k khí biō, tī biō-lāi kā Pa-le̍k khí chè-tôaⁿ.

³³ A-hap koh chō A-sià-la lú-sîn. A-hap ê só͘-chòe kek Siōng Chú — Í-sek-lia̍t ê Siōng-tè siū-khì, pí í-chêng ê Í-sek-lia̍t lia̍t-ông koh-khah giâm-tiōng.

³⁴ A-hap choh-ông ê sî, Pek-te̍k-lī-lâng Hi-i-le̍k tiông-kiàn Iâ-lī-ko-siâⁿ; i hē tōe-ki ê sî, sí tōa-kiáⁿ A-pí-lân, an mn̂g-sìⁿ ê sî, sí soah-bé-kiáⁿ Se-kat; tú-tú chiàu Siōng Chú thong-kè Lūn ê kiáⁿ Iok-su-a só͘ kóng ê ōe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan