Bìoball air-loidhne

列王紀上卷 13 - 現代台語譯本羅馬字版

¹ Hit-sî, ū chi̍t ê Siōng-tè tiōng-iōng ê lâng chiàu Siōng Chú ê ōe tùi Iû-tāi lâi kàu Pek-te̍k-lī; Iâ-lô-pho-an tú-á khiā tī chè-tôaⁿ piⁿ teh sio-hiuⁿ.

² Siōng-tè tiōng-iōng ê lâng chiàu Siōng Chú ê ōe, tùi hit-ê chè-tôaⁿ tōa-siaⁿ hoah kóng, “Chè-tôaⁿ ah, chè-tôaⁿ ah, Siōng Chú án-ni kóng, ‘Khòaⁿ leh, Tāi-pi̍t-ke ōe ū chi̍t ê kiáⁿ chhut-sì, kiò-chòe Iok-se-a, i beh chiong hiah-ê tī soaⁿ-thâu-tôaⁿ sio-hiuⁿ ê chè-si thâi-sí tī lí téng-bīn; mā ōe tī lí téng-bīn sio lâng ê kut-thâu.’”

³ Siâng hit-ji̍t, i koh hō͘ Iâ-lô-pho-an chi̍t ê tiāu-thâu, kóng, “Khòaⁿ leh, chit-ê chè-tôaⁿ beh siū thiah-húi, tôaⁿ-téng ê hé-hu beh iā kah kui thô͘-kha; che chiū-sī Siōng Chú só͘ kóng ê tiāu-thâu.”

⁴ Iâ-lô-pho-an-ông thiaⁿ-tio̍h Siōng-tè tiōng-iōng ê lâng tùi Pek-te̍k-lī ê chè-tôaⁿ só͘ kóng ê ōe, chiū tùi tôaⁿ-téng chhun-chhiú, kóng, “Kā i lia̍h--khí-lâi!” I chhun--chhut-lâi ê chhiú soah ngī--khì, bōe-tàng kiu tò-tńg;

⁵ tôaⁿ chiū phòa-li̍h, tôaⁿ-téng ê hé-hu mā iā kah kui thô͘-kha, tú chiàu Siōng-tè tiōng-iōng ê lâng hōng Siōng Chú ê ōe só͘ kóng ê tiāu-thâu si̍t-hiān.

⁶ Ông tùi Siōng-tè tiōng-iōng ê lâng kóng, “Chhiáⁿ lí ūi góa kî-kiû Siōng Chú — lí ê Siōng-tè si-un, hō͘ góa ê chhiú ho̍k-goân.” Siōng-tè tiōng-iōng ê lâng kî-kiû Siōng Chú si-un, ông ê chhiú chiū ho̍k-goân.

⁷ Ông kā Siōng-tè tiōng-iōng ê lâng kóng, “Chhiáⁿ lí kap góa lâi-khì goán tau, chia̍h kóa mi̍h-kiāⁿ, hôe-ho̍k goân-khì; góa mā beh sàng lé-mi̍h hō͘ lí.”

⁸ Siōng-tè tiōng-iōng ê lâng tùi ông kóng, “Lí chiū-sī chiong lí ông-kiong ê chi̍t-pòaⁿ hō͘ góa, góa mā bōe kap lí khì, mā bōe tī chia chia̍h-pn̄g lim-chúi.

⁹ In-ūi Siōng Chú ū kā góa hoan-hù kóng, ‘Lí m̄-thang chia̍h-pn̄g, m̄-thang lim-chúi, mā m̄-thang tùi goân-lō͘ tò--khì.’”

¹⁰ Siōng-tè tiōng-iōng ê lâng chiū kiâⁿ pa̍t-tiâu lō͘, bô tùi lâi Pek-te̍k-lī hit-tiâu tò--khì.

Pek-te̍k-lī ê Lāu Sian-ti

¹¹ Pek-te̍k-lī ū chi̍t ê lāu sian-ti, i ê kiáⁿ lâi, chiong hit-ji̍t Siōng-tè tiōng-iōng ê lâng tī Pek-te̍k-lī só͘ chòe ê tāi-chì, kap tùi ông kóng ê ōe, lóng kā in lāu-pē kóng.

¹² Lāu-pē tùi in kóng, “I tùi tó chi̍t tiâu lō͘ tò--khì?” I ê kiáⁿ chiū pò in lāu-pē chai tùi Iû-tāi lâi Siōng-tè tiōng-iōng ê lâng tò--khì ê lō͘.

¹³ I chiū hoan-hù i ê kiáⁿ kóng, “Lín kā góa chún-pī lû.” In chún-pī hó-sè, i chiū khiâ-lû

¹⁴ khì jip Siōng-tè tiōng-iōng ê lâng, khòaⁿ-tio̍h i chē tī siōng-chhiū kha, chiū mn̄g i kóng, “Lí sī tùi Iû-tāi lâi hit-ê Siōng-tè tiōng-iōng ê lâng sī--bô?” I kóng, “Góa chiū-sī.”

¹⁵ Lāu sian-ti kā i kóng, “Chhiáⁿ lí kap góa tò-khì goán tau chia̍h-pn̄g.”

¹⁶ Siōng-tè tiōng-iōng ê lâng chiū kóng, “Góa bōe-tàng kap lí khì lín tau, mā bōe-tàng tī chit só͘-chāi kap lí chia̍h-pn̄g lim-chúi.

¹⁷ In-ūi Siōng Chú ê ōe hoan-hù góa kóng, ‘Lí tī hia m̄-thang chia̍h-pn̄g, m̄-thang lim-chúi, mā m̄-thang tùi lí khì hit-tiâu lō͘ tò--lâi.’”

¹⁸ Lāu sian-ti chiū kā i kóng, “Góa kap lí kâng-khoán sī sian-ti, ū thiⁿ-sài hōng Siōng Chú ê bēng-lēng kā góa kóng, ‘Lí chhōa i kap lí tò-khì lín tau, hō͘ i chia̍h-pn̄g lim-chúi.’” Lāu sian-ti sī teh phiàn i.

¹⁹ I chiū kap i tò--khì, tī in tau chia̍h-pn̄g lim-chúi.

²⁰ In nn̄g ê lâng chòe-hé chia̍h ê sî, Siōng Chú ê ōe lîm-kàu hit-ê chhōa i tò--lâi ê lāu sian-ti.

²¹ I chiū kā hit-ê tùi Iû-tāi lâi Siōng-tè tiōng-iōng ê lâng kóng, “Siōng Chú án-ni kóng, ‘In-ūi lí ū ûi-pōe Siōng Chú ê ōe, bô chun-siú Siōng Chú — lí ê Siōng-tè tùi lí ê bēng-lēng,

²² tò-lâi I kìm-chí lí m̄-thang chia̍h-pn̄g lim-chúi ê só͘-chāi lim-chia̍h, só͘-í lí ê sin-si bōe-tàng tâi tī lí lia̍t-chó͘ ê bōng.’”

²³ Chia̍h-pn̄g lim-chúi liáu-āu, lāu sian-ti kā i tòa--tò-lâi ê sian-ti chún-pī lû.

²⁴ Hit-ê sian-ti khiâ-lû lī-khui liáu-āu, tī lō͘--ni̍h tú-tio̍h chi̍t chiah sai, sai chiū kā i kā-sí; i ê sin-si tó tī lō͘--ni̍h, lû kap sai lóng khiā tī sin-si ê piⁿ--á.

²⁵ Ū lâng tùi hia keng-kè, khòaⁿ-tio̍h sin-si tó tī lō͘--ni̍h, sai khiā tī sin-si ê piⁿ--á, chiū lâi lāu sian-ti só͘ tòa ê siâⁿ, kóng-khí chit-ê tāi-chì.

²⁶ Hit-ê chhōa Siōng-tè tiōng-iōng ê lâng tùi lō͘--ni̍h tò--lâi ê lāu sian-ti thiaⁿ--tio̍h chiū kóng, “Chit-ê Siōng-tè tiōng-iōng ê lâng ûi-pōe Siōng Chú ê bēng-lēng, só͘-í Siōng Chú kiò sai lâi kā i; sai kā i thiah-li̍h, kā i kā-sí, tú chiàu Siōng Chú tùi i kóng ê ōe.”

²⁷ Lāu sian-ti chiū hoan-hù i ê kiáⁿ kóng, “Lín kā góa chún-pī lû.” In chiū khì chún-pī.

²⁸ I khiâ lû-á chhut--khì, khòaⁿ-tio̍h Siōng-tè tiōng-iōng ê lâng ê sin-si tó tī lō͘--ni̍h, lû kap sai khiā tī sin-si ê piⁿ--á, sai bô chia̍h sin-si, mā bô kā lû thiah-li̍h.

²⁹ Lāu sian-ti chiū chiong Siōng-tè tiōng-iōng ê lâng ê sin-si hē tī lû ê téng-bīn, chài tò-lâi ka-kī ê siâⁿ, beh ūi-tio̍h i thî-khàu, kā i bâi-chòng.

³⁰ Lāu sian-ti chiong Siōng-tè tiōng-iōng ê lâng ê sin-si chòng tī i ka-kī ê bōng, i kap i ê kiáⁿ chiū ūi-tio̍h Siōng-tè tiōng-iōng ê lâng thî-khàu, kóng, “Ài ah, góa ê hiaⁿ-tī ah!”

³¹ Bâi-chòng liáu-āu, i chiū kā i ê kiáⁿ kóng, “Góa sí liáu-āu, tio̍h kā góa tâi tī an-chòng Siōng-tè tiōng-iōng ê lâng ê bōng-lāi, hō͘ góa ê kut-thâu óa i kut-thâu ê piⁿ--á.

³² In-ūi i hōng Siōng Chú ê bēng-lēng, tùi Pek-te̍k-lī ê chè-tôaⁿ kap Sat-má-lī-a choân-siâⁿ só͘-ū ê soaⁿ-thâu-tôaⁿ soan-pò͘ ê ōe, it-tēng si̍t-hiān.”

Iâ-lô-pho-an Kè-sio̍k Hoān-chōe

³³ Chit-ê tāi-chì liáu-āu, Iâ-lô-pho-an iû-goân bô beh lī-khui i ê pháiⁿ-lō͘, kè-sio̍k siat-li̍p it-poaⁿ-lâng chòe soaⁿ-thâu-tôaⁿ ê chè-si; ū ì-goān--ê, chiū kā in hong-li̍p chòe chè-si.

³⁴ Chit-ê tāi-chì hō͘ Iâ-lô-pho-an ông-tiâu hām-lo̍h chōe, tì-kàu in tùi tōe-chiūⁿ oân-choân siau-bia̍t.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan