Bìoball air-loidhne

列王紀上卷 11 - 現代台語譯本羅馬字版

Só͘-lô-bûn Lī-khui Siōng Chú

¹ Hoat-ló ê cha-bó͘-kiáⁿ í-gōa, Só͘-lô-bûn-ông mā ài chin chōe gōa-pang ê cha-bó͘ gín-á, pau-hâm Mô͘-ap, A-bûn, Í-tong, Se-tùn, kap Hek-lâng ê cha-bó͘ gín-á.

² Siōng Chú bat bēng-lēng Í-sek-lia̍t-lâng, kóng, “Lín m̄-thang kap hiah-ê gōa-cho̍k-lâng thong-hun, in-ūi in ōe ín-iú lín ê sim khì tè pa̍t-ê sîn-bêng.” M̄-kú Só͘-lô-bûn tham-loân hiah-ê cha-bó͘ gín-á.

³ I ū chhōa chhit-pah ê kong-chú chòe bó͘, koh ū pîn-hui saⁿ-pah; chiah-ê lú-chú iú-he̍k i ê sim.

⁴ Só͘-lô-bûn nî-lāu ê sî, chiah-ê bó͘ iú-he̍k i khì tè pa̍t-ê sîn-bêng; i ê sim bô chhin-chhiūⁿ i ê lāu-pē Tāi-pi̍t ê sim oân-choân sūn-ho̍k Siōng Chú — i ê Siōng-tè.

⁵ Só͘-lô-bûn khì tè Se-tùn-lâng ê lú-sîn A-su-tha-lio̍k, kap A-bûn-lâng thang iàm-ò͘ⁿ ê sîn-bêng Mô͘-lo̍k.

⁶ Só͘-lô-bûn chòe Siōng Chú khòaⁿ-chòe pháiⁿ ê sū, bô chhin-chhiūⁿ i ê lāu-pē Tāi-pi̍t choân-sim sūn-ho̍k Siōng Chú.

⁷ Hit-sî, Só͘-lô-bûn ūi-tio̍h Mô͘-ap thang iàm-ò͘ⁿ ê sîn-bêng Ki-boat, kap A-bûn-lâng thang iàm-ò͘ⁿ ê sîn-bêng Mô͘-lo̍k, tī Iâ-lō͘-sat-léng tùi-bīn ê soaⁿ-téng khí soaⁿ-thâu-tôaⁿ.

⁸ Hiah-ê gōa-pang ê bó͘ lóng tùi in ê sîn-bêng sio-hiuⁿ hiàn-chè; Só͘-lô-bûn mā ūi-tio̍h in án-ni chòe.

⁹ Siōng Chú tùi Só͘-lô-bûn siū-khì, in-ūi i ê sim lī-khui bat nn̄g piàn tùi i chhut-hiān ê Siōng Chú — Í-sek-lia̍t ê Siōng-tè;

¹⁰ Siōng Chú bat bēng-lēng i m̄-thang pài pa̍t-ê sîn-bêng. M̄-kú Só͘-lô-bûn bô chun-siú Siōng Chú ê bēng-lēng.

¹¹ Siōng Chú chiū tùi Só͘-lô-bûn kóng, “In-ūi lí í-keng chòe chit-khoán tāi-chì, bô chun-siú góa ê iok, kap góa bēng-lēng lí ê kui-lē, só͘-í góa it-tēng beh thiah-li̍h lí ê ông-kok, chiong i sù hō͘ lí ê jîn-sîn.

¹² M̄-kú in-ūi lí ê lāu-pē Tāi-pi̍t ê iân-kò͘, góa bōe tī lí oa̍h--teh ê sî chòe chit-ê tāi-chì; góa beh tùi lí ê kiáⁿ ê chhiú thiah-li̍h chit-ê kok.

¹³ Chóng-sī góa bô beh chiong choân-kok thiah-li̍h, ōe in-ūi góa ê po̍k-jîn Tāi-pi̍t kap góa só͘ kéng ê Iâ-lō͘-sat-léng ê iân-kò͘, lâu chi̍t chi-cho̍k hō͘ lí ê kiáⁿ.”

Só͘-lô-bûn ê Tùi-te̍k

¹⁴ Siōng Chú heng-khí chi̍t ê tùi-te̍k kong-kek Só͘-lô-bûn, chiū-sī Í-tong-lâng Hap-ta̍t, i sī Í-tong-ông ê hō͘-tāi.

^15-16 Chá-chêng Tāi-pi̍t phah Í-tong ê sî, goân-sòe Iok-ap khì bâi-chòng chiàn-sí ê Í-sek-lia̍t-lâng. Iok-ap kap Í-sek-lia̍t kun-peng tiàm hia la̍k kò-ge̍h ê tiong-kan, thâi-sí Í-tong só͘-ū ê ta-po͘-lâng.

¹⁷ Hit-sî Hap-ta̍t iáu koh sī gín-á. Hap-ta̍t kap i ê lāu-pē jîn-sîn tiong kúi-nā ê Í-tong-lâng, cháu-khì Ai-ki̍p.

¹⁸ In tùi Bí-tiân chhut-hoat khì Pa-lân; tùi Pa-lân tòa kúi-nā lâng kap in khì Ai-ki̍p, kàu Ai-ki̍p-ông Hoat-ló hia. Hoat-ló chiū kiong-kip chhù, bí-niû, kap thó͘-tōe hō͘ in.

¹⁹ Hap-ta̍t tī Hoat-ló bīn-chêng tit-tio̍h chin tōa ê un-hūi; Hoat-ló koh ēng ông-hō͘ Tap-pí-nî ê sió-bē hō͘ i chòe bó͘.

²⁰ Tap-pí-nî ê sió-bē kā i siⁿ chi̍t ê kiáⁿ, hō-miâ kiò-chòe Ki-ló͘-poa̍t. Tap-pí-nî tī Hoat-ló ê ông-kiong kā Ki-lô͘-poa̍t chhī tōa-hàn, koh hō͘ i kap Hoat-ló ê kiáⁿ-jî chòe-hé tòa tī ông-kiong.

²¹ Hap-ta̍t tī Ai-ki̍p thiaⁿ-tio̍h Tāi-pi̍t tńg-khì i ê lia̍t-chó͘ hia, goân-sòe Iok-ap mā í-keng sí. Hap-ta̍t chiū tùi Hoat-ló kóng, “Chhiáⁿ chún góa lī-khui, hō͘ góa tò-khì góa ê pún-kok.”

²² Hoat-ló kā i kóng, “Lí tī góa chia kiám ū khiàm-kheh sím-mi̍h, lí ná siūⁿ-beh tò-khì lí pún-kok?” I ìn kóng, “Góa bô khiàm sím-mi̍h, m̄-kú chhiáⁿ chún góa tò--khì.”

²³ Siōng-tè koh heng-khí chi̍t ê tùi-te̍k kong-kek Só͘-lô-bûn, chiū-sī Í-lī-ngá-tāi ê kiáⁿ Lī-sùn; i sī tùi i ê chú Só-pa-ông Hap-tāi-tí-siā hia tô-cháu--chhut-lâi.

²⁴ Tāi-pi̍t thâi Só-pa-lâng ê sî, Lī-sùn chio-chi̍p chi̍t kûn lâng, chòe hit-tóng ê thâu-ba̍k khì tòa tī Tāi-má-sū-kek, tī Tāi-má-sū-kek choh-ông.

²⁵ Só͘-lô-bûn oa̍h--teh ê sî, Lī-sùn kap Hap-ta̍t siâng-khoán chòe Í-sek-lia̍t ê tùi-te̍k. Lī-sùn thóng-tī Sū-lī-a; i oàn-hūn Í-sek-lia̍t.

Siōng-tè tùi Iâ-lô-pho-an ê Èng-ún

²⁶ Nî-pat ê kiáⁿ Iâ-lô-pho-an mā khí-lâi hoán-poān ông; i sī Só͘-lô-bûn ê jîn-sîn, sī Í-hoat-liân chi-cho̍k ê Sé-lī-ta̍t-lâng; i ê lāu-bú sī kóaⁿ-hū, kiò-chòe Sé-ló͘-ngá.

²⁷ I chhut-chhiú kong-kek ông ê goân-in sī án-ni: Só͘-lô-bûn khí-chō Bí-lô, siu-pó͘ i ê lāu-pē Tāi-pi̍t-siâⁿ ê phòa-khiah.

²⁸ Iâ-lô-pho-an chin ū châi-lêng. Só͘-lô-bûn khòaⁿ-tio̍h chit-ê siàu-liân-lâng un-khûn, chiū phài i koán-lí Iok-sek-ke só͘-ū ê kang-thêng.

²⁹ Ū chi̍t ji̍t Iâ-lô-pho-an lī-khui Iâ-lō͘-sat-léng, Sī-lô-lâng sian-ti A-hi-ngá tī lō͘--ni̍h tú-tio̍h i. Hit-sî A-hi-ngá chhēng chi̍t niá sin-saⁿ; in nn̄g lâng tī chhân--ni̍h, í-gōa bô pa̍t-lâng.

³⁰ A-hi-ngá the̍h i chhēng ê sin-saⁿ, thiah chòe cha̍p-jī tè,

³¹ kā Iâ-lô-pho-an kóng, “Lí thang the̍h cha̍p tè, in-ūi Siōng Chú — Í-sek-lia̍t ê Siōng-tè án-ni kóng, ‘Lí khòaⁿ, góa beh tùi Só͘-lô-bûn ê chhiú thiah-li̍h i ê ông-kok, chiong cha̍p chi-cho̍k hō͘ lí.

³² M̄-kú in-ūi góa ê po̍k-jîn Tāi-pi̍t, í-ki̍p góa tī Í-sek-lia̍t chèng chi-cho̍k tiong só͘ kéng ê Iâ-lō͘-sat-léng ê iân-kò͘, i iáu ū chi̍t chi-cho̍k.

³³ In-ūi in khì-sak góa, khì pài Se-tùn-lâng ê sîn-bêng A-su-tha-lio̍k, Mô͘-ap ê sîn-bêng Ki-boat, kap A-bûn-lâng ê sîn-bêng Mô͘-lo̍k, bô chhin-chhiūⁿ i ê lāu-pē Tāi-pi̍t kiâⁿ góa ê tō-lō͘, chòe góa khòaⁿ-chòe chèng-ti̍t ê sū, siú góa ê kui-lē kap bēng-lēng.

³⁴ M̄-kú, góa bô beh tùi i ê chhiú siu-hôe i choân-pō͘ ê ông-kok, iû-goân beh hō͘ i chi̍t-sì-lâng choh-ông, lóng sī in-ūi góa ê po̍k-jîn Tāi-pi̍t ê iân-kò͘, i sī góa só͘ kéng-soán--ê, ū siú góa ê kài-bēng kap kui-lē.

³⁵ Chóng-sī góa beh tùi i ê kiáⁿ siu-hôe ông-kok, ēng cha̍p chi-cho̍k hō͘ lí;

³⁶ lâu chi̍t chi-cho̍k hō͘ i ê kiáⁿ, thang hō͘ góa ê po̍k-jîn Tāi-pi̍t, tī góa só͘ kéng-soán hō͘ lâng lâi kèng-pài góa ê siâⁿ Iâ-lō͘-sat-léng, put-sî ū chi̍t pha teng tī góa ê bīn-chêng.

³⁷ Góa kéng-soán lí, chiàu lí só͘ ài--ê hō͘ lí chòe Í-sek-lia̍t ê ông.

³⁸ Lí nā chhin-chhiūⁿ góa ê po̍k-jîn Tāi-pi̍t, thiaⁿ góa só͘-ū ê bēng-lēng, kiâⁿ góa ê tō-lō͘, chòe góa khòaⁿ-chòe chèng-ti̍t ê sū, siú góa ê kui-lē kap kài-bēng, góa chiū kap lí tông-chāi, chiong Í-sek-lia̍t kau hō͘ lí, kā lí kiàn-li̍p ún-kò͘ ê ông-tiâu, chhin-chhiūⁿ góa ūi Tāi-pi̍t só͘ chòe--ê siâng-khoán.

³⁹ Góa beh in-ūi án-ni hêng-hoa̍t Tāi-pi̍t ê hō͘-tāi, m̄-kú bōe kàu éng-oán.’”

⁴⁰ Só͘-lô-bûn ài-beh thâi-sí Iâ-lô-pho-an, Iâ-lô-pho-an chiū tô-cháu khì Ai-ki̍p, kàu Ai-ki̍p-ông Sī-sat hia; i chiū tiàm tī Ai-ki̍p kàu Só͘-lô-bûn sí.

Só͘-lô-bûn Sí
( 2 Tāi 9.29-31 )

⁴¹ Só͘-lô-bûn kî-tha ê sū-chek kap i ê tì-hūi, lóng kì-chài tī Só͘-lô-bûn-kì.

⁴² Só͘-lô-bûn tī Iâ-lō͘-sat-léng chòe Í-sek-lia̍t choân-kok ê ông, kiōng sì-cha̍p nî.

⁴³ Só͘-lô-bûn tńg-khì i ê lia̍t-chó͘ hia liáu-āu, bâi-chòng tī i ê lāu-pē Tāi-pi̍t ê siâⁿ. I ê kiáⁿ Lô-pho-an sòa-chiap i choh-ông.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan