Bìoball air-loidhne

列王紀上卷 10 - 現代台語譯本羅馬字版

Sī-pa Lú-ông Lâi Pài-hóng
( 2 Tāi 9.1-12 )

¹ Sī-pa ê lú-ông thiaⁿ-kìⁿ Só͘-lô-bûn in-ūi Siōng Chú ê miâ só͘ tit--tio̍h ê miâ-siaⁿ, chiū lâi beh ēng lân-tôe kā i khó.

² I chhōa chin chōe jîn-sîn lâi kàu Iâ-lō͘-sat-léng, koh ū lo̍k-tô chài hiuⁿ-liāu, chin chōe n̂g-kim kap pó-chio̍h. I kìⁿ Só͘-lô-bûn ê sî, chiū chiong sim-lāi só͘-ū ê lân-tôe kā i mn̄g.

³ Só͘-lô-bûn chiàu i só͘ mn̄g--ê it-it kā i hôe-tap, bô chi̍t hāng khùn-lân kah ông bōe-hiáu ìn.

⁴ Sī-pa lú-ông kiàn-sek-tio̍h Só͘-lô-bûn só͘-ū ê tì-hūi, khòaⁿ-tio̍h i khí ê kiong-tiān,

⁵ toh-téng ê chia̍h-mi̍h, pâi-lia̍t chē--teh ê jîn-sîn, kun-sûi ho̍k-sāi ê lô͘-po̍k, kap in ê i-ho̍k, í-ki̍p thîn-chiú ê lô͘-po̍k, koh khòaⁿ-tio̍h i tī Siōng Chú ê sèng-tiān só͘ hiàn ê sio-hòa-chè, chiū kui-ê lâng lóng gāng--khì.

⁶ Sī-pa lú-ông chiū tùi ông kóng, “Góa tī goán pún-kok só͘ thiaⁿ--tio̍h lí ê sū-chek kap lí ê tì-hūi, lóng sī chin--ê!

⁷ Pún-lâi góa m̄ sìn hiah-ê ōe, kàu góa chhin-ba̍k khòaⁿ--tio̍h chiah siong-sìn. Lâng kā góa kóng--ê iáu bô sū-si̍t ê chi̍t-pòaⁿ; lí ê tì-hūi kap lí ê hù-chiok chhiau-kè góa só͘ thiaⁿ--tio̍h-ê.

⁸ Lí ê pō͘-sio̍k chin ū hok-khì! Lí ê jîn-sîn chin ū hok-khì! In put-sî tī lí ê bīn-chêng thiaⁿ lí tì-hūi ê ōe.

⁹ Siōng Chú — lí ê Siōng-tè eng-kai siū chheng-chàn! I ì-ài lí, hō͘ lí chē Í-sek-lia̍t ê ông-ūi; in-ūi Siōng Chú éng-oán thiàⁿ Í-sek-lia̍t, só͘-í soán-li̍p lí choh-ông, hō͘ lí thang péng-kong-hêng-gī.”

¹⁰ Sī-pa lú-ông chiong tāi-iok sì-chheng kong-kun ê kim, chin chōe hiuⁿ-liāu, kap pó-chio̍h sàng hō͘ ông; chêng-kàu-taⁿ m̄-bat ū lâng chhin-chhiūⁿ Sī-pa lú-ông sàng hiah chōe hiuⁿ-liāu hō͘ Só͘-lô-bûn-ông.

¹¹ Hi-lân ê chûn tùi Gô-hui ūn kim lâi, koh tòa chin chōe tôaⁿ-hiuⁿ-chhâ kap pó-chio̍h lâi.

¹² Ông ēng chiah-ê tôaⁿ-hiuⁿ-chhâ chòe Siōng Chú ê tiān kap ông-kiong ê lân-kan, mā ūi chhiùⁿ-koa ê lâng chòe khîm kap sek; chêng-kàu-taⁿ m̄-bat ū lâng khòaⁿ-kìⁿ hiah chōe tôaⁿ-hiuⁿ-chhâ ūn--lâi.

¹³ Só͘-lô-bûn ēng chin chōe lé-mi̍h sàng Sī-pa lú-ông; í-gōa koh chiàu lú-ông só͘ ì-ài, só͘ iau-kiû--ê lóng sàng hō͘ i. Lú-ông kap i ê jîn-sîn chiū tò-khì in pún-kok.

Só͘-lô-bûn ê Châi-hù
( 2 Tāi 9.13-28 ; 1.14-17 )

¹⁴ Só͘-lô-bûn ta̍k-nî siu--tio̍h ê kim kiōng nn̄g-bān saⁿ-chheng kong-kun,

¹⁵ í-gōa iáu ū tùi seng-lí-lâng kap bō͘-e̍k-siong siu ê sè-kim, í-ki̍p tùi A-la-pek chiah-ê ông kap kok-lāi chiah-ê séng-tiúⁿ só͘ siu--ê.

¹⁶ Só͘-lô-bûn-ông phah tōa tún-pâi nn̄g-pah bīn, múi chi̍t bīn ēng kim chhit kong-kun;

¹⁷ koh phah sió tún-pâi saⁿ-pah bīn, múi chi̍t bīn ēng kim nn̄g kong-kun. Ông chiong chiah-ê tún-pâi hē tī Lê-pa-lūn Lîm-kiong.

¹⁸ Ông koh ēng chhiūⁿ-gê chòe chi̍t ê tōa pó-chō, ēng sûn-kim tah--teh.

¹⁹ Pó-chō chêng ū la̍k chàn kiā-á; chō-ūi-the ê téng-bīn sī îⁿ--ê, siang-pêng ū chhiú-hōaⁿ, chhiú-hōaⁿ ê piⁿ--á kok ū chi̍t chō sai khiā--teh;

²⁰ koh ū cha̍p-jī chō sai khiā tī la̍k chàn kiā-á ta̍k-chàn ê siang-pêng-piⁿ; pa̍t-ê ông-kok lóng m̄-bat án-ni chòe.

²¹ Só͘-lô-bûn-ông só͘-ū lim ê khì-khū lóng sī kim--ê; Lê-pa-lūn Lîm-kiong it-chhè ê khì-khū mā-sī sûn-kim--ê; tī Só͘-lô-bûn ê sî-tāi, gûn bô hō͘ lâng khòaⁿ-chòe chin ū kè-ta̍t.

²² Ông ū Tha-si ê chûn-tūi, kap Hi-lân ê chûn-tūi chòe-hé hâng-hái; chiah-ê Tha-si ê chûn-tūi ūn kim, gûn, chhiūⁿ-gê, kâu, khóng-chhiok, múi saⁿ nî tò-lâi chi̍t piàn.

²³ Só͘-lô-bûn-ông ê châi-hù kap tì-hūi iâⁿ-kè thian-hā chu-ông.

²⁴ Choân sè-kài ê lâng lóng siūⁿ-beh lâi kìⁿ Só͘-lô-bûn ê bīn, thiaⁿ Siōng-tè sù hō͘ i ê tì-hūi.

²⁵ In ta̍k-ê tòa chìn-kòng ê lé-mi̍h, chiū-sī kim-khì, gûn-khì, i-ho̍k, kun-khì, hiuⁿ-liāu, bé, kap lô; ta̍k-nî lóng ū it-tēng ê sò͘-liōng.

²⁶ Só͘-lô-bûn-ông ū kiàn-li̍p kun-tūi, chiàn-chhia chi̍t-chheng sì-pah tâi, bé-peng chi̍t-bān nn̄g-chheng miâ; an-tì in tī hiah-ê tún chiàn-chhia ê siâⁿ, kap Iâ-lō͘-sat-léng ông hia.

²⁷ Ông thóng-tī ê kî-kan, Iâ-lō͘-sat-léng ê gûn chhin-chhiūⁿ chio̍h-thâu hiah chōe, pek-hiuⁿ-chhâ chhin-chhiūⁿ soaⁿ-po͘ ê sng-châi-chhiū hiah chōe.

²⁸ Só͘-lô-bûn ê bé lóng tùi Ai-ki̍p kap Kho-ui chìn-kháu, sī ông ê seng-lí-lâng tùi Kho-ui chiàu chhī-kè bóe--lâi-ê.

²⁹ Tùi Ai-ki̍p chìn-kháu ê chiàn-chhia, ta̍k-tâi tāi-iok chhit kong-kun ê gûn; chiàn-bé ta̍k-chiah tāi-iok nn̄g kong-kun ê gûn. Só͘-lô-bûn ê seng-lí-lâng mā keng-chhiú chiong chiah-ê chhut-kháu bōe hō͘ Hek-lâng kap Sū-lī-a-lâng hiah-ê ông.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan