Bìoball air-loidhne

出埃及記 9 - 現代台語譯本羅馬字版

5. Un-e̍k ê Chai-lān

¹ Siōng Chú tùi Mô͘-se kóng, “Lí khì kìⁿ Ai-ki̍p-ông, kā i kóng, ‘Siōng Chú — Hi-pek-lâi-lâng ê Siōng-tè án-ni kóng: Tio̍h pàng góa ê chú-bîn lī-khui, hō͘ in thang kèng-pài góa.

² Lí nā m̄ pàng in khì, iû-goân beh kiông-pek in lâu--teh,

³ Siōng Chú chiū beh ēng I ê koân-lêng kàng giâm-tiōng ê un-e̍k tī lí chhân-iá ê cheng-siⁿ, bé, lû, lo̍k-tô, gû-kûn, iûⁿ-kûn.

⁴ Siōng Chú beh hun-pia̍t Í-sek-lia̍t-lâng ê cheng-siⁿ kap Ai-ki̍p-lâng ê cheng-siⁿ; só͘-ū sio̍k Í-sek-lia̍t-lâng ê cheng-siⁿ, liân chi̍t chiah to bōe sí.’”

⁵ Siōng Chú chiū siat-tēng beh kàng un-e̍k ê sî-kan, kóng, “Bîn-á-chài Siōng Chú beh tī chit-ê tōe chòe chit-hāng sū.”

⁶ Keh-ji̍t Siōng Chú chiū chòe chit-ê sū; Ai-ki̍p ê cheng-siⁿ lóng sí, m̄-kú, Í-sek-lia̍t-lâng ê cheng-siⁿ liân chi̍t chiah to bô sí.

⁷ Ai-ki̍p-ông phài lâng khì khòaⁿ, Í-sek-lia̍t-lâng ê cheng-siⁿ liân chi̍t chiah to bô sí. M̄-kú Ai-ki̍p-ông ê sim kò͘-chip, m̄ pàng chit-ê bîn-cho̍k lī-khui.

6. Lia̍p-á ê Chai-lān

⁸ Siōng Chú tùi Mô͘-se kap A-lûn kóng, “Lín tio̍h phóng kui-phóng hé-lô͘ ê hé-hu; Mô͘-se tio̍h tī Ai-ki̍p-ông ê bīn-chêng chiong hé-hu ǹg thiⁿ iā--khì.

⁹ Hé-hu ōe tī Ai-ki̍p choân-tōe pìⁿ-chòe tîn-ai, lak tī Ai-ki̍p choân-tōe ê lâng kap cheng-siⁿ ê seng-khu, siⁿ lia̍p-á, chiâⁿ-chòe chhng.”

¹⁰ In nn̄g lâng chiū phóng hé-hu, khì tī Ai-ki̍p-ông ê bīn-chêng; Mô͘-se ǹg thiⁿ iā--khì, lâng kap cheng-siⁿ ê seng-khu chiū siⁿ lia̍p-á, chiâⁿ-chòe chhng.

¹¹ Su̍t-sū bô hoat-tō͘ tī Mô͘-se bīn-chêng chòe chit-ê sū; in kap só͘-ū ê Ai-ki̍p-lâng lóng siⁿ lia̍p-á.

¹² Siōng Chú hō͘ Ai-ki̍p-ông ê sim ngī, m̄ thiaⁿ Mô͘-se kap A-lûn ê ōe; tú-tú chiàu Siōng Chú tùi Mô͘-se kóng--ê.

7. Peng-pha̍uh ê Chai-lān

¹³ Siōng Chú tùi Mô͘-se kóng, “Bîn-á-chài lí tio̍h thàu-chá khí--lâi, khì khiā tī Ai-ki̍p-ông ê bīn-chêng, tùi i kóng, ‘Siōng Chú — Hi-pek-lâi-lâng ê Siōng-tè án-ni kóng: Tio̍h pàng góa ê chú-bîn lī-khui, hō͘ in thang kèng-pài góa.

¹⁴ Chit-piàn, góa beh hō͘ koh-khah giâm-tiōng ê chai-lān lîm-kàu lí kap lí ê jîn-sîn, í-ki̍p jîn-bîn, hō͘ lí chai, tī phó͘-thiⁿ-ē bô chi̍t ê ōe-tàng kap góa pí.

¹⁵ Hiān-chāi, góa nā chhun-chhiú ēng un-e̍k kong-kek lí kap lí ê jîn-bîn, lí chiū ōe tùi tōe-chiūⁿ siū siau-bia̍t;

¹⁶ chóng-sī ūi-tio̍h beh hō͘ lí khòaⁿ-kìⁿ góa ê koân-lêng, hō͘ góa ê miâ tī choân sè-kài siū soan-iông, góa chiah lâu lí ê sìⁿ-miā.

¹⁷ M̄-kú lí iû-goân chó͘-tòng góa ê chú-bîn, m̄ pàng in lī-khui.

¹⁸ Taⁿ, bîn-á-chài chit-ê sî, góa beh kàng ke̍k-tōa ê peng-pha̍uh, tùi Ai-ki̍p khai-kok í-lâi m̄-bat hoat-seng--kè.

¹⁹ Hiān-chāi lí tio̍h phài lâng, chiong lí só͘-ū tī chhân-iá ê lâng kap cheng-siⁿ lóng tòa-khì an-choân ê só͘-chāi; hiah-ê lâu tī sek-gōa--ê, bô-lūn lâng á-sī cheng-siⁿ, lóng ōe hō͘ peng-pha̍uh tìm--sí.’”

²⁰ Ai-ki̍p-ông hiah-ê kiaⁿ-ùi Siōng Chú ê ōe ê jîn-sîn, chiū chiong in ê lô͘-po̍k kap cheng-siⁿ tòa kàu an-choân ê só͘-chāi.

²¹ M̄-kú hiah-ê bô chiong Siōng Chú ê ōe khòaⁿ-chòe iàu-kín--ê, chiū chiong in ê lô͘-po̍k kap cheng-siⁿ lâu tī chhân-iá.

²² Siōng Chú tùi Mô͘-se kóng, “Lí ǹg thiⁿ chhun-chhiú, Ai-ki̍p choân-tōe chiū ōe ū peng-pha̍uh lo̍h tī lâng, cheng-siⁿ, kap chhân-iá só͘-ū ê chhài-soe.”

²³ Mô͘-se gia̍h i ê koáiⁿ-á kí thiⁿ, Siōng Chú chiū hō͘ Ai-ki̍p-tōe ū lûi-kong-sih-nà, lo̍h peng-pha̍uh;

²⁴ pha̍uh teh lo̍h, koh ū sih-nà, chêng-hêng hui-siông giâm-tiōng; tùi Ai-ki̍p khai-kok í-lâi m̄-bat hoat-seng--kè.

²⁵ Tī Ai-ki̍p choân-tōe, peng-pha̍uh phah só͘-ū tī chhân-iá ê lâng kap cheng-siⁿ, koh húi-hoāi hn̂g--ni̍h ê chhài-soe, phah-tn̄g iá-tōe ê chhiū-ba̍k.

²⁶ Chí-ū Í-sek-lia̍t-lâng khiā-khí ê Ko-san tōe-khu bô lo̍h-pha̍uh.

²⁷ Ai-ki̍p-ông phài lâng kiò Mô͘-se kap A-lûn lâi, tùi in kóng, “Chit-piàn góa hoān-chōe lah. Siōng Chú sī kong-gī, góa kap góa ê jîn-bîn chòe m̄-tio̍h.

²⁸ Siōng-tè ê lûi kap peng-pha̍uh í-keng kàu-gia̍h lah. Chhiáⁿ ūi-tio̍h goán kî-kiû Siōng Chú. Góa beh chún lín lī-khui; lín m̄-bián koh lâu tī chia.”

²⁹ Mô͘-se tùi i kóng, “Góa chi̍t-ē chhut-siâⁿ, chiū beh gia̍h siang-chhiú ǹg Siōng Chú kî-tó; lûi beh soah, peng-pha̍uh ōe thêng, án-ni beh hō͘ lí chai, tāi-tōe lóng sio̍k tī Siōng Chú.

³⁰ M̄-kú góa chai, lí kap lí ê jîn-sîn iáu bô chin-chiàⁿ kiaⁿ-ùi Chú Siōng-tè.”

³¹ Hit-sî, môa kap tōa-be̍h lóng siū sún-hoāi, in-ūi tōa-be̍h í-keng chhut-sūi, môa mā khui-hoe.

³² M̄-kú sió-be̍h kap chho͘-be̍h bô siū sún-hoāi, in-ūi iáu-bē tōa-châng.

³³ Mô͘-se lī-khui Ai-ki̍p-ông chhut-siâⁿ, gia̍h siang-chhiú ǹg Siōng Chú kî-tó, lûi kap peng-pha̍uh chiū thêng-chí, hō͘ mā bô koh piàⁿ-lo̍h tōe-bīn.

³⁴ Ai-ki̍p-ông khòaⁿ-tio̍h hō͘, peng-pha̍uh, kap lûi lóng thêng-chí, chiū koh hoān-chōe; i kap i ê jîn-sîn lóng ngī in ê sim.

³⁵ Ai-ki̍p-ông sim ngī, m̄ pàng Í-sek-lia̍t-lâng lī-khui, tú-tú chiàu Siōng Chú tùi Mô͘-se kóng--ê.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan