Bìoball air-loidhne

出埃及記 8 - 現代台語譯本羅馬字版

2. Chúi-koe ê Chai-lān

¹ Siōng Chú tùi Mô͘-se kóng, “Lí khì Ai-ki̍p-ông hia, kā i kóng, ‘Siōng Chú án-ni kóng: Pàng góa ê chú-bîn lī-khui, hō͘ in thang kèng-pài góa.

² Lí nā m̄ pàng in khì, góa beh ēng chúi-koe jiáu-loān lín choân-kok.

³ Nî-lô-hô beh siⁿ chiok chōe chúi-koe, in beh tùi hô--ni̍h khí--lâi, ji̍p-khì lí ê kiong-tiān, lí ê pâng-keng, peh-chiūⁿ lí ê bîn-chhn̂g, koh beh chìn-ji̍p lí ê jîn-sîn ê chhù, thiàu-chiūⁿ lí ê jîn-bîn ê seng-khu, chìn-ji̍p lí ê chàu kap chhiau mī-hún ê khì-khū.

⁴ Chúi-koe koh beh thiàu-chiūⁿ lí, lí ê jîn-bîn, kap só͘-ū jîn-sîn ê seng-khu.’”

⁵ Siōng Chú koh tùi Mô͘-se kóng, “Lí kā A-lûn kóng, ‘Gia̍h lí ê koáiⁿ-á kí Nî-lô-hô, khoe, kap chúi-tî, hō͘ chúi-koe peh khí-lâi Ai-ki̍p-tōe.’”

⁶ A-lûn chhun-chhiú kí Ai-ki̍p choân-tōe ê chúi; chúi-koe chiū thiàu--khí-lâi, khàm-móa Ai-ki̍p-tōe.

⁷ Ai-ki̍p ê su̍t-sū ēng in ê hoat-su̍t mā án-ni chòe, hō͘ chúi-koe chiūⁿ-lâi Ai-ki̍p-tōe.

⁸ Ai-ki̍p-ông kiò Mô͘-se kap A-lûn lâi, kóng, “Chhiáⁿ lín kiû Siōng Chú hō͘ chiah-ê chúi-koe lī-khui góa kap góa ê jîn-bîn; góa chiū beh hō͘ chit-ê bîn-cho̍k lī-khui, khì ǹg Siōng Chú hiàn-chè.”

⁹ Mô͘-se tùi Ai-ki̍p-ông kóng, “Hó! Chhiáⁿ kā góa kóng, sím-mi̍h sî thang ūi-tio̍h lí, lí ê jîn-sîn, kap jîn-bîn kî-tó, chiong chúi-koe tùi lí kap ông-kiong tû-bia̍t, hō͘ chúi-koe chí-ū lâu tī Nî-lô-hô.”

¹⁰ I kóng, “Bîn-á-chài.” Mô͘-se kóng, “Góa ōe chiàu lí ê iau-kiû chòe, án-ni lí chiū chai, bô chi̍t ê ōe-tàng kap Siōng Chú — goán ê Siōng-tè pí.

¹¹ Chúi-koe ōe lī-khui lí kap ông-kiong, lī-khui lí ê jîn-sîn kap jîn-bîn, chí-ū lâu tī Nî-lô-hô.”

¹² Mô͘-se kap A-lûn lī-khui Ai-ki̍p-ông chhut--khì; Mô͘-se ūi-tio̍h Siōng Chú phài-lâi sún-hoāi Ai-ki̍p-ông ê chúi-koe, kiû-kiò Siōng Chú.

¹³ Siōng Chú chiàu Mô͘-se ê khún-kiû khì chòe, hō͘ tī chhù-lāi, tiâⁿ--ni̍h, kap chhân-iá ê chúi-koe lóng sí.

¹⁴ Lâng kā in khioh chi̍t-tui chi̍t-tui; Ai-ki̍p choân-tōe lóng sī chhàu-bī.

¹⁵ Ai-ki̍p-ông khòaⁿ-tio̍h tāi-chì ū kái-koat, chiū ngī i ê sim, m̄ thiaⁿ Mô͘-se kap A-lûn ê ōe; tú-tú chiàu Siōng Chú só͘ kóng--ê.

3. Sat-bú ê Chai-lān

¹⁶ Siōng Chú tùi Mô͘-se kóng, “Lí tio̍h kā A-lûn kóng, ‘Gia̍h lí ê koáiⁿ-á phah thô͘-hún, hō͘ Ai-ki̍p choân-tōe ê thô͘-hún pìⁿ-chòe sat-bú.’”

¹⁷ In chiū án-ni chòe; A-lûn gia̍h koáiⁿ-á phah thô͘-hún, lâng kap cheng-siⁿ ê seng-khu chiū lóng ū sat-bú. Ai-ki̍p choân-tōe ê thô͘-hún lóng pìⁿ-chòe sat-bú.

¹⁸ Lâng kap cheng-siⁿ ê seng-khu lóng ū sat-bú. Su̍t-sū ēng in ê hoat-su̍t mā beh hō͘ thô͘-hún pìⁿ-chòe sat-bú, m̄-kú bô hoat-tō͘.

¹⁹ Su̍t-sū tùi Ai-ki̍p-ông kóng, “Che sī Siōng-tè ê chok-ûi.” M̄-kú Ai-ki̍p-ông ê sim ngī, m̄ thiaⁿ Mô͘-se kap A-lûn ê ōe; tú-tú chiàu Siōng Chú kóng--ê.

4. Hô͘-sîn ê Chai-lān

²⁰ Siōng Chú tùi Mô͘-se kóng, “Bîn-á-chá-khí, Ai-ki̍p-ông ōe khì Nî-lô-hô; lí tio̍h khiā tī i ê bīn-chêng, tùi i kóng, ‘Siōng Chú án-ni kóng: Pàng góa ê chú-bîn lī-khui, khì kèng-pài góa.

²¹ Lí nā m̄-khéng, góa beh phài kui-kûn hô͘-sîn pe-lâi lí chia, tī lí ê jîn-sîn kap jîn-bîn ê sin-chiūⁿ, koh ji̍p ông-kiong; Ai-ki̍p-lâng ê chhù, kap in tòa ê só͘-chāi, mā beh ū kui-kûn ê hô͘-sîn.

²² Hit-ji̍t, góa beh chiong góa ê chú-bîn khiā-khí ê Ko-san tōe-khu hun-pia̍t--chhut-lâi; tī hia bô kui-kûn hô͘-sîn. Góa án-ni chòe, sī beh hō͘ lí chai góa Siōng Chú sī choân-tōe ê Chú.

²³ Góa beh chiong góa ê chú-bîn kap lí ê jîn-bîn hun-khui; bîn-á-chài chit-ê sîn-jiah it-tēng ōe hoat-seng.’”

²⁴ Siōng Chú chiū án-ni chòe. Hô͘-sîn kui-tīn pe-ji̍p Ai-ki̍p-ông ê kiong-tiān kap i ê jîn-sîn ê chhù; Ai-ki̍p choân-tōe lóng in-ūi kui-kûn ê hô͘-sîn hong-hòe.

²⁵ Ai-ki̍p-ông chiū kiò Mô͘-se kap A-lûn lâi, kóng, “Lín khì, tī góa ê kéng-lāi ǹg lín ê Siōng-tè hiàn-chè.”

²⁶ Mô͘-se ìn i kóng, “Án-ni chòe bōe thong; in-ūi goán beh hiàn hō͘ Siōng Chú — goán ê Siōng-tè ê chè-mi̍h, Ai-ki̍p-lâng khòaⁿ-chòe kìm-khī. Goán nā tī Ai-ki̍p-lâng ê bīn-chêng ēng in khòaⁿ-chòe kìm-khī ê mi̍h hiàn-chè, in kiám bōe ēng chio̍h-thâu kā goán tìm--sí?

²⁷ Goán beh kiâⁿ saⁿ ji̍t ê lō͘-thêng khì khòng-iá, chiàu Siōng Chú — goán ê Siōng-tè ê bēng-lēng hiàn-chè hō͘ I.”

²⁸ Ai-ki̍p-ông kóng, “Góa ún-chún lín lī-khui, hō͘ lín tī khòng-iá ǹg Siōng Chú — lín ê Siōng-tè hiàn-chè, m̄-kú bōe-ēng-tit khì siuⁿ hn̄g. Koh lín tio̍h thòe góa kî-tó.”

²⁹ Mô͘-se kóng, “Góa beh tùi lí chia chhut--khì, ǹg Siōng Chú kî-tó, kiû I hō͘ kui-tīn hô͘-sîn bîn-á-chài lī-khui Ai-ki̍p-ông kap lí ê jîn-sîn, í-ki̍p jîn-bîn. M̄-kú Ai-ki̍p-ông m̄-thang koh phiàn goán, m̄-chún chit-ê bîn-cho̍k lī-khui khì hiàn-chè hō͘ Siōng Chú.”

³⁰ Mô͘-se chiū tùi Ai-ki̍p-ông hia chhut--khì, ǹg Siōng Chú kî-tó.

³¹ Siōng Chú chiū chiàu Mô͘-se ê khún-kiû, hō͘ hô͘-sîn lóng lī-khui Ai-ki̍p-ông kap i ê jîn-sîn, í-ki̍p jîn-bîn, bô lâu pòaⁿ-chiah.

³² Chit-piàn Ai-ki̍p-ông koh ngī i ê sim, m̄ pàng chit-ê bîn-cho̍k lī-khui.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan