Bìoball air-loidhne

出埃及記 7 - 現代台語譯本羅馬字版

¹ Siōng Chú tùi Mô͘-se kóng, “Góa beh hō͘ lí tī Ai-ki̍p-ông ê bīn-chêng chhin-chhiūⁿ Siōng-tè; lí ê hiaⁿ-ko A-lûn beh chòe lí ê tāi-giân-jîn.

² Góa bēng-lēng lí--ê, lí lóng tio̍h kóng; lí ê hiaⁿ-ko A-lûn tio̍h kā Ai-ki̍p-ông kóng, tio̍h pàng Í-sek-lia̍t-lâng lī-khui i ê tōe.

³ Góa beh hō͘ Ai-ki̍p-ông ê sim ngī, koh beh tī Ai-ki̍p-tōe kiâⁿ chin chōe sîn-jiah kî-sū.

⁴ M̄-kú Ai-ki̍p-ông bô beh thiaⁿ lín, góa chiū beh kong-kek Ai-ki̍p, giâm-giâm hêng-hoa̍t in, chhōa góa ê chú-bîn Í-sek-lia̍t chi̍t-tūi chi̍t-tūi chhut Ai-ki̍p-tōe.

⁵ Góa chhun-chhiú kong-kek Ai-ki̍p, chhōa Í-sek-lia̍t-lâng tùi in tiong-kan chhut--lâi ê sî, Ai-ki̍p-lâng chiū ōe chai góa sī Siōng Chú.”

⁶ Mô͘-se kap A-lûn chiū chiàu Siōng Chú ê hoan-hù khì chòe.

⁷ In kap Ai-ki̍p-ông kóng-ōe ê sî, Mô͘-se poeh-cha̍p hè, A-lûn poeh-cha̍p-saⁿ hè.

A-lûn ê Koáiⁿ-á

⁸ Siōng Chú tùi Mô͘-se kap A-lûn kóng,

⁹ “Ai-ki̍p-ông nā kā lín kóng ‘Kiâⁿ chi̍t kiāⁿ kî-sū lâi khòaⁿ-bāi--leh’, lí tio̍h kiò A-lûn kā i ê koáiⁿ-á tàn tī Ai-ki̍p-ông ê bīn-chêng, koáiⁿ-á ōe pìⁿ-chòe chôa.”

¹⁰ Mô͘-se kap A-lûn ji̍p-khì kìⁿ Ai-ki̍p-ông, chiàu Siōng Chú ê hoan-hù chòe; A-lûn chiong i ê koáiⁿ-á hiat tī Ai-ki̍p-ông kap i ê jîn-sîn ê bīn-chêng, koáiⁿ-á chiū pìⁿ-chòe chôa.

¹¹ Ai-ki̍p-ông chiū tiàu ū tì-hūi ê lâng kap hoat-su lâi; chiah-ê Ai-ki̍p ê su̍t-sū ēng in ê hoat-su̍t mā án-ni chòe.

¹² In ta̍k-ê lâng chiong koáiⁿ-á hiat--lo̍h-khì, koáiⁿ-á lóng pìⁿ-chòe chôa; m̄-kú A-lûn ê koáiⁿ-á thun-chia̍h in ê koáiⁿ-á.

¹³ Chóng-sī Ai-ki̍p-ông ê sim ngī, m̄ thiaⁿ in ê ōe, tú-tú chiàu Siōng Chú kóng--ê.

Ai-ki̍p Siū Chai-lān 1. Huih ê Chai-lān

¹⁴ Siōng Chú tùi Mô͘-se kóng, “Ai-ki̍p-ông ê sim kò͘-chip, m̄-khéng pàng góa ê chú-bîn lī-khui.

¹⁵ Bîn-á-chá-khí, Ai-ki̍p-ông ōe khì Nî-lô-hô; lí tio̍h gia̍h hit-ki bat pìⁿ-chòe chôa ê koáiⁿ-á, tī hô-piⁿ tán i.

¹⁶ Lí tio̍h tùi i kóng, ‘Siōng Chú — Hi-pek-lâi-lâng ê Siōng-tè phài góa lâi tùi lí kóng: Tio̍h pàng góa ê chú-bîn lī-khui, hō͘ in khì khòng-iá kèng-pài góa; m̄-kú kàu taⁿ lí lóng m̄ thiaⁿ.

¹⁷ Siōng Chú án-ni kóng: Góa beh ēng góa ê koáiⁿ-á phah Nî-lô-hô ê hô-chúi, chúi ōe pìⁿ-chòe huih; án-ni, lí chiū ōe chai góa sī Siōng Chú.

¹⁸ Hô--ni̍h ê hî ōe sí, chúi ōe chhàu; Ai-ki̍p-lâng bōe-tàng koh lim Nî-lô-hô ê chúi.’”

¹⁹ Siōng Chú koh tùi Mô͘-se kóng, “Lí tio̍h kā A-lûn kóng, ‘Gia̍h lí ê koáiⁿ-á, kí Ai-ki̍p ê hô kap khoe, chúi-tî kap thiok-chúi-tî, hō͘ só͘-ū ê chúi lóng pìⁿ-chòe huih; Ai-ki̍p choân-tōe, liân chúi-tháng kap chio̍h-àng ê chúi mā lóng pìⁿ-chòe huih.’”

²⁰ Mô͘-se kap A-lûn chiàu Siōng Chú ê bēng-lēng khì chòe. A-lûn tī Ai-ki̍p-ông kap i ê jîn-sîn bīn-chêng gia̍h koáiⁿ-á phah Nî-lô-hô ê chúi; hô--ni̍h ê chúi lóng pìⁿ-chòe huih.

²¹ Hô--ni̍h ê hî lóng sí, hô-chúi siⁿ chhàu-bī, Ai-ki̍p-lâng bōe-tàng lim hô--ni̍h ê chúi; Ai-ki̍p choân-tōe lóng ū huih.

²² Ai-ki̍p ê su̍t-sū ēng in ê hoat-su̍t mā án-ni chòe. Ai-ki̍p-ông ê sim ngī, m̄ thiaⁿ Mô͘-se kap A-lûn, tú-tú chiàu Siōng Chú kóng--ê.

²³ Ai-ki̍p-ông tò-tńg-khì ông-kiong, bô chiong chit-ê sū khǹg tī sim-lāi.

²⁴ Só͘-ū ê Ai-ki̍p-lâng tī Nî-lô-hô hô-piⁿ ó͘ khut-á chhē chúi lim, in-ūi hô ê chúi bōe-lim--tit.

²⁵ Siōng Chú phah Nî-lô-hô liáu-āu, chit-ê chai-lān kè-sio̍k chhit ji̍t.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan