Bìoball air-loidhne

出埃及記 6 - 現代台語譯本羅馬字版

¹ Siōng Chú tùi Mô͘-se kóng, “Taⁿ, lí ōe khòaⁿ-tio̍h góa án-chóaⁿ tùi-hù Ai-ki̍p-ông; góa beh ēng tōa khùi-la̍t ê chhiú, pek i pàng góa ê chú-bîn chhut--khì, kā in kóaⁿ lī-khui i ê tōe.”

Siōng-tè Èng-ún Beh Kái-kiù Í-sek-lia̍t-lâng

² Siōng-tè koh tùi Mô͘-se kóng, “Góa sī Siōng Chú.

³ Góa sī Choân-lêng ê Siōng-tè, bat tùi A-pek-la-hán, Í-sat, Ngá-kok hián-hiān, m̄-kú góa m̄-bat hō͘ in chai góa ê miâ sī Siōng Chú.

⁴ Góa bat kap in li̍p-iok, èng-ún beh chiong in kià-ku ê Ka-lâm-tōe siúⁿ-sù hō͘ in.

⁵ Góa mā ū thiaⁿ-tio̍h Í-sek-lia̍t-lâng tī Ai-ki̍p chòe khó͘-kang só͘ hoat-chhut haiⁿ-haiⁿ-chhan ê siaⁿ, chiū ōe-kì-tit góa kap in chó͘-sian só͘ li̍p ê iok.

⁶ Só͘-í lí tio̍h kā Í-sek-lia̍t-lâng kóng, ‘Góa sī Siōng Chú. Góa beh kiù lín thoat-lī Ai-ki̍p-lâng ê ap-pek, hō͘ lín m̄-bián koh chòe in ê lô͘-lē, góa koh beh chhut-chhiú giâm-giâm hêng-hoa̍t in lâi kiù-sio̍k lín.

⁷ Góa beh chiap-la̍p lín chòe góa ê chú-bîn, góa beh chòe lín ê Siōng-tè. Góa kiù lín thoat-lī Ai-ki̍p-lâng ê ap-pek ê sî, lín ōe jīn-bat góa sī Siōng Chú — lín ê Siōng-tè.

⁸ Góa só͘ li̍p-sè èng-ún beh hō͘ A-pek-la-hán, Í-sat, Ngá-kok hit-tè tōe, góa beh chhōa lín ji̍p--khì, chiong hit-ê tōe siúⁿ-sù lín chòe sán-gia̍p. Góa sī Siōng Chú.’”

⁹ Mô͘-se chiong chiah-ê ōe kā Í-sek-lia̍t-lâng kóng, m̄-kú in in-ūi chòe khó͘-kang, sit-chì, thiaⁿ bōe ji̍p--khì.

¹⁰ Siōng Chú hoan-hù Mô͘-se kóng,

¹¹ “Lí khì kā Ai-ki̍p-ông Hoat-ló kóng, tio̍h pàng Í-sek-lia̍t-lâng lī-khui i ê tōe.”

¹² Mô͘-se tùi Siōng Chú kóng, “Í-sek-lia̍t-lâng to m̄ thiaⁿ góa, Ai-ki̍p-ông ná ōe thiaⁿ góa chit-ê han-bān kóng-ōe ê lâng?”

¹³ Siōng Chú bēng-lēng Mô͘-se kap A-lûn khì Í-sek-lia̍t-lâng kap Ai-ki̍p-ông hia, chiong Í-sek-lia̍t-lâng tùi Ai-ki̍p-tōe chhōa--chhut-lâi.

Mô͘-se kap A-lûn ê Cho̍k-phó͘

¹⁴ Ē-bīn sī Í-sek-lia̍t ê cho̍k-tiúⁿ: Ngá-kok ê tōa-kiáⁿ Lū-piān ê kiáⁿ sī Í-lo̍k, Hoat-lō͘, Hi-su-lûn, kap Ka-bí; chiah-ê sī Lū-piān ê chong-cho̍k.

¹⁵ Se-biān ê kiáⁿ sī Iâ-bō͘-lī, Ngá-bín, O-hat, Ngá-kun, Só-hat, í-ki̍p kap Ka-lâm ê lú-chú só͘ siⁿ ê Sò-lô; chiah-ê sī Se-biān ê chong-cho̍k.

¹⁶ Ē-bīn sī Lī-bī ê kiáⁿ ê miâ, chiàu in ê ka-phó͘ sī Kek-sūn, Ko-hat, kap Bí-la-lī; Lī-bī oa̍h chi̍t-pah saⁿ-cha̍p-chhit hè.

¹⁷ Kek-sūn ê kiáⁿ, chiàu in ê ka-cho̍k, sī Li̍p-nî kap Sī-múi.

¹⁸ Ko-hat ê kiáⁿ sī Àm-lân, Í-su-hap, Hi-pek-lûn, O͘-siat; Ko-hat oa̍h chi̍t-pah saⁿ-cha̍p-saⁿ hè.

¹⁹ Bí-la-lī ê kiáⁿ sī Boat-lī kap Bō͘-sī. Chiah-ê sī Lī-bī chiàu in ê ka-phó͘ só͘ kì-chài ê chong-cho̍k.

²⁰ Àm-lân chhōa i ê a-ko͘ Iok-ki-pia̍t choh-bó͘, siⁿ A-lûn kap Mô͘-se; Àm-lân oa̍h chi̍t-pah saⁿ-cha̍p-chhit hè.

²¹ Í-su-hap ê kiáⁿ sī Khó-la, Nî-húi, kap Sè-ki-lī.

²² O͘-siat ê kiáⁿ sī Bí-sa-lī, Í-lī-sat-hoán, kap Se-thê-lī.

²³ A-lûn chhōa A-bí-ná-ta̍t ê cha-bó͘-kiáⁿ, Ná-sūn ê sió-bē Í-lī-sa-pa choh-bó͘, siⁿ Ná-tap, A-pí-hō͘, Í-lī-a-sat, kap Í-tha-má.

²⁴ Khó-la ê kiáⁿ sī A-sioh, Í-lī-ka-ná, kap A-pí-a-sat; chiah-ê sī Khó-la ê ka-cho̍k.

²⁵ A-lûn ê kiáⁿ Í-lī-a-sat chhōa Phó͘-thiat chi̍t ê cha-bó͘-kiáⁿ choh-bó͘, siⁿ Hui-nî-hap; chiah-ê sī Lī-bī-lâng ta̍k-ê ka-cho̍k ê cho̍k-tiúⁿ.

²⁶ A-lûn kap Mô͘-se chiū-sī Siōng Chú bat tùi in kóng “Tio̍h chhōa Í-sek-lia̍t-lâng chi̍t-tūi chi̍t-tūi lī-khui Ai-ki̍p-tōe” hit nn̄g ê lâng.

²⁷ Tùi Ai-ki̍p-ông Hoat-ló kóng beh chhōa Í-sek-lia̍t-lâng chhut Ai-ki̍p--ê, mā-sī Mô͘-se kap A-lûn.

Siōng Chú Bēng-lēng Mô͘-se kap A-lûn

²⁸ Ū chi̍t ji̍t, Siōng Chú tī Ai-ki̍p-tōe tùi Mô͘-se kóng-ōe.

²⁹ Siōng Chú tùi Mô͘-se kóng, “Góa sī Siōng Chú. Góa tùi lí kóng ê ōe, lí lóng tio̍h kā Ai-ki̍p-ông Hoat-ló kóng.”

³⁰ Mô͘-se tùi Siōng Chú kóng, “Góa sī han-bān kóng-ōe ê lâng, Ai-ki̍p-ông ná ōe thiaⁿ góa?”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan