出埃及記 40 - 現代台語譯本羅馬字版

Tah Hōe-bō͘

¹ Siōng Chú hoan-hù Mô͘-se, kóng,

² “Chiaⁿ-ge̍h chhoe-it, lí tio̍h chiong hōe-bō͘ ê pò͘-pîⁿ tah--khí-lâi.

³ Tio̍h chiong iok-kūi hē tī hit lāi-bīn, ēng tiùⁿ-lî kā i keh-khui;

⁴ chiong pâi hiàn-chè ê piáⁿ ê toh poaⁿ--ji̍p-khì, kā toh-téng ê mi̍h-kiāⁿ pâi hó-sè; mā chiong teng-tâi poaⁿ--ji̍p-khì, kā teng tiám-to̍h.

⁵ Tio̍h chiong sio-hiuⁿ ê kim-tôaⁿ hē tī iok-kūi ê thâu-chêng, jiân-āu kòa hōe-bō͘ ji̍p-kháu ê mn̂g-lî;

⁶ chiong sio-hòa-chè ê chè-tôaⁿ hē tī hōe-bō͘ ê pò͘-pîⁿ mn̂g-kháu;

⁷ chiong sóe-tn̄g ê phûn hē tī hōe-bō͘ kap chè-tôaⁿ ê tiong-kan, lāi-bīn tóe chúi.

⁸ Sèng-só͘ ê sì-ûi tio̍h ū tiâⁿ, tiâⁿ ê ji̍p-kháu tio̍h kòa mn̂g-lî.

⁹ “Lí tio̍h ēng sèng-iû boah hōe-bō͘ kap lāi-bīn só͘-ū ê khì-khū, chiong hōe-bō͘ kap lóng-chóng ê khì-khū hun-pia̍t-choh-sèng, chiah-ê chiū lóng chiâⁿ-chòe sèng.

¹⁰ Koh boah sio-hòa-chè ê chè-tôaⁿ kap i lóng-chóng ê khì-khū, kā tôaⁿ hun-pia̍t-choh-sèng, tôaⁿ chiū chiâⁿ-chòe chì-sèng;

¹¹ mā tio̍h boah sóe-tn̄g ê phûn kap phûn-chō, kā in hun-pia̍t-choh-sèng.

¹² “Lí tio̍h chhōa A-lûn kap i ê kiáⁿ lâi hōe-bō͘ ê ji̍p-kháu, ēng chúi kā in sóe.

¹³ Mā tio̍h kā A-lûn chhēng sèng ê lé-ho̍k, kā i boah-iû, hō͘ i hun-pia̍t-choh-sèng chòe chè-si ho̍k-sāi góa.

¹⁴ Koh chhōa A-lûn ê kiáⁿ lâi, kā in chhēng lāi-phàu,

¹⁵ kā in boah-iû, chhin-chhiūⁿ kā in lāu-pē boah-iû kâng-khoán, hō͘ in chòe chè-si ho̍k-sāi góa; in siū boah-iû, chiū sè-sè-tāi-tāi éng-oán tit-tio̍h chè-si ê chit-hūn.”

¹⁶ Chiah-ê, Mô͘-se lóng chiàu Siōng chú ê hoan-hù chòe.

¹⁷ Tē-jī nî chiaⁿ-ge̍h chhoe-it, hōe-bō͘ chiū tah--khí-lâi.

¹⁸ Mô͘-se tah hōe-bō͘, hē hiah-ê chō, khiā hiah-ê pán, chhng hiah-ê hoâiⁿ-kông, chhāi hiah-ê thiāu.

¹⁹ I tī hōe-bō͘ ê téng-bīn khàm pò͘-phâng, tī pò͘-phâng ê téng-bīn koh khàm siōng-téng ê phê, lóng chiàu Siōng Chú tùi Mô͘-se ê hoan-hù chòe.

²⁰ I koh chiong hoat-pán hē tī iok-kūi lāi-bīn, kā kǹg chhng tī iok-kūi siang-pêng, chiong kòa khàm tī iok-kūi téng-bīn,

²¹ kng iok-kūi ji̍p hōe-bō͘, kòa keh-khui ê tiùⁿ-lî jia iok-kūi, lóng chiàu Siōng Chú tùi Mô͘-se ê hoan-hù chòe.

²² Mô͘-se chiong pâi hiàn-chè ê piáⁿ ê toh poaⁿ-ji̍p hōe-bō͘, hē tī pò͘-pîⁿ ê pak-pêng, tī tiùⁿ-lî gōa-bīn;

²³ toh-téng pâi hōng-hiàn hō͘ Siōng Chú ê piáⁿ, lóng chiàu Siōng Chú tùi Mô͘-se ê hoan-hù chòe.

²⁴ I koh chiong teng-tâi hē tī hōe-bō͘ lāi, tī hōe-bō͘ ê lâm-pêng, toh ê tùi-bīn,

²⁵ tī Siōng Chú ê bīn-chêng tiám-teng; lóng chiàu Siōng Chú tùi Mô͘-se ê hoan-hù chòe.

²⁶ I koh chiong kim ê hiuⁿ-tôaⁿ hē tī hōe-bō͘ lāi-bīn, tiùⁿ-lî ê thâu-chêng;

²⁷ tī hit téng-bīn sio phang-phang ê hiuⁿ; lóng chiàu Siōng Chú tùi Mô͘-se ê hoan-hù chòe.

^28-29 I tī hōe-bō͘ ê pò͘-pîⁿ ê ji̍p-kháu kòa mn̂g-lî, tī mn̂g-lî ê thâu-chêng hē sio-hòa-chè ê chè-tôaⁿ, tī hit téng-bīn hiàn sio-hòa-chè kap sò͘-chè; lóng chiàu Siōng Chú tùi Mô͘-se ê hoan-hù chòe.

³⁰ I chiong sóe-tn̄g ê phûn hē tī hōe-bō͘ kap chè-tôaⁿ ê tiong-kan, phûn-lāi tóe chúi.

^31-32 Mô͘-se, A-lûn kap i hiah-ê kiáⁿ ji̍p hōe-bō͘ á-sī óa-kūn tôaⁿ ê sî, seng tī hia sóe-chhiú, sóe-kha; lóng chiàu Siōng Chú tùi Mô͘-se ê hoan-hù chòe.

³³ Chòe-āu, Mô͘-se tī hōe-bō͘ kap chè-tôaⁿ ê chiu-ûi siat tiâⁿ, tī tiâⁿ ê ji̍p-kháu kòa mn̂g-lî. Án-ni, Mô͘-se chiū oân-sêng tah hōe-bō͘ ê kang-chok.

Siōng Chú ê Êng-kng Chhiong-móa Hōe-bō͘
( Bîn 9.15-23 )

³⁴ Hit-sî, hûn jia-khàm hōe-bō͘, Siōng Chú ê êng-kng chhiong-móa pò͘-pîⁿ.

³⁵ Mô͘-se bōe-tàng ji̍p hōe-bō͘, in-ūi hûn thêng tī hit téng-bīn, koh Siōng Chú ê êng-kng chhiong-móa pò͘-pîⁿ.

³⁶ Hûn tùi hōe-bō͘ seng-koân ê sî, Í-sek-lia̍t-lâng chiū chhut-hoat hiòng-chêng kiâⁿ.

³⁷ Hûn nā thêng--teh, in chiū bô chhut-hoat, thèng-hāu kàu hûn seng-koân.

³⁸ Ji̍t--sî, Siōng Chú ê hûn thêng tī hōe-bō͘ téng, mî--sî hûn-tiong ū hé; tī Í-sek-lia̍t choân-ke kui-ê hêng-thêng, in lóng ū chhin-ba̍k khòaⁿ--tio̍h.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan