Bìoball air-loidhne

出埃及記 4 - 現代台語譯本羅馬字版

Siōng-tè Hō͘ Mô͘-se Kiâⁿ Sîn-jiah

¹ Mô͘-se ìn kóng, “Í-sek-lia̍t-lâng bōe siong-sìn góa, mā bōe thiaⁿ góa ê ōe; in ōe kóng, ‘Siōng Chú m̄-bat tùi lí hián-hiān.’”

² Siōng Chú tùi i kóng, “Lí ê chhiú gia̍h sím-mi̍h?” I kóng, “Koáiⁿ-á.”

³ Siōng Chú kóng, “Kā koáiⁿ-á hiat tiàm thô͘-kha.” Mô͘-se chi̍t-ē kā koáiⁿ-á hiat-lo̍h thô͘-kha, koáiⁿ-á chiū pìⁿ-chòe chôa, i chiū siám-cháu.

⁴ Siōng Chú tùi Mô͘-se kóng, “Chhun-chhiú lia̍h chôa-bé.” Mô͘-se chiū chhun-chhiú khì lia̍h, chôa chiū tī i ê chhiú--ni̍h pìⁿ-chòe koáiⁿ-á.

⁵ Siōng Chú koh kóng, “Góa hō͘ lí ū chit-khoán lêng-le̍k, sī beh hō͘ Í-sek-lia̍t-lâng sìn Siōng Chú — in lia̍t-chó͘ ê Siōng-tè, A-pek-la-hán ê Siōng-tè, Í-sat ê Siōng-tè, Ngá-kok ê Siōng-tè, ū tùi lí hián-hiān.”

⁶ Siōng Chú koh tùi i kóng, “Chhiú chhun ji̍p-khì saⁿ-á lāi.” I chiū kā chhiú chhun--ji̍p-khì; chhiú chi̍t-ē chhun--chhut-lâi, chhiú í-keng tì giâm-tiōng ê phê-hu-pīⁿ, pe̍h chhin-chhiūⁿ seh.

⁷ Siōng Chú koh kóng, “Koh kā lí ê chhiú chhun--ji̍p-khì.” I chiū koh chhun--ji̍p-khì; chhiú chi̍t-ē chhun--chhut-lâi, phê-hu í-keng ho̍k-goân, kap kui seng-khu ê phê-hu kâng-khoán.

⁸ Siōng Chú kóng, “In nā m̄ siong-sìn lí, mā bô beh siong-sìn tē-it ê sîn-jiah, in ōe siong-sìn tē-jī ê sîn-jiah.

⁹ Chit nn̄g ê sîn-jiah in nā lóng m̄ sìn, koh m̄ thiaⁿ lí ê ōe, lí tio̍h tùi Nî-lô-hô iúⁿ-chúi, tò tī thô͘-kha, hiah-ê chúi chiū ōe pìⁿ-chòe huih.”

¹⁰ Mô͘-se tùi Siōng Chú kóng, “Góa ê Chú ah, góa m̄-sī gâu kóng-ōe ê lâng; lí kap lí ê po̍k-jîn kóng-ōe liáu-āu mā-sī án-ni; góa sī chhùi-chi̍h tūn ê lâng.”

¹¹ Siōng Chú tùi i kóng, “Sím-mi̍h-lâng hō͘ lâng kháu-châi? Sím-mi̍h-lâng hō͘ lâng bōe kóng-ōe, bōe thiaⁿ--kìⁿ, ba̍k-kim á-sī sit-bêng? Kiám m̄-sī góa Siōng Chú?

¹² Taⁿ, lí tio̍h khì, góa beh sù lí kháu-châi, beh kà lí kóng lí tio̍h kóng ê ōe.”

¹³ Mô͘-se kóng, “Góa ê Chú ah, kiû lí phài pa̍t-lâng khì.”

¹⁴ Siōng Chú tùi Mô͘-se hoat siū-khì, kóng, “Lī-bī-lâng A-lûn kiám m̄-sī lí ê hiaⁿ-ko? Góa chai i chin gâu kóng-ōe. Hiān-chāi i lâi beh chiap lí; i khòaⁿ-tio̍h lí, sim-lāi ōe chin hoaⁿ-hí.

¹⁵ Lí tio̍h chiong eng-kai kóng ê ōe kau-tài i; góa ōe sù lí kap i kháu-châi, koh kà lín chòe eng-kai chòe ê sū.

¹⁶ I ōe thòe lí tùi jîn-bîn kóng-ōe; i chòe lí ê tāi-giân-jîn, lí chhin-chhiūⁿ i ê Siōng-tè, chí-sī i eng-kai kóng ê ōe.

¹⁷ Lí tio̍h gia̍h chit-ki koáiⁿ-á lâi kiâⁿ sîn-jiah.”

Mô͘-se Tńg-khì Ai-ki̍p

¹⁸ Mô͘-se chiū tò-khì i ê tiūⁿ-lâng Ia̍p-te̍k-lô hia, tùi i kóng, “Chhiáⁿ hō͘ góa tò-khì Ai-ki̍p, khòaⁿ góa ê chhin-lâng iáu oa̍h--teh bô.” Ia̍p-te̍k-lô kā Mô͘-se kóng, “Lí thang pêng-an khì.”

¹⁹ Siōng Chú tī Bí-tiân tùi Mô͘-se kóng, “Lí tio̍h tò-khì Ai-ki̍p, in-ūi beh hāi lí ê sìⁿ-miā hiah-ê lâng lóng sí lah.”

²⁰ Mô͘-se chhōa i ê bó͘ kap nn̄g ê kiáⁿ, hō͘ in khiâ lû-á, tò-khì Ai-ki̍p; Mô͘-se chhiú gia̍h Siōng-tè ê koáiⁿ-á.

²¹ Siōng Chú tùi Mô͘-se kóng, “Lí tò-khì Ai-ki̍p ê sî, it-tēng tio̍h ēng góa sù hō͘ lí ê lêng-le̍k, tī Ai-ki̍p-ông ê bīn-chêng kiâⁿ kî-sū; m̄-kú góa beh hō͘ i ê sim ngī, m̄-khéng pàng chit-ê bîn-cho̍k lī-khui.

²² Lí tio̍h kā Ai-ki̍p-ông kóng, ‘Siōng Chú án-ni kóng: Í-sek-lia̍t sī góa ê tōa-kiáⁿ.

²³ Góa bat kā lí kóng, tio̍h pàng góa ê kiáⁿ lī-khui, khì ho̍k-sāi góa; m̄-kú lí kū-choa̍t, só͘-í, góa beh thâi-sí lí ê tōa-kiáⁿ.’”

²⁴ Mô͘-se tī lō͘-tiong hioh-mî ê só͘-chāi, Siōng Chú tú-tio̍h i, beh thâi i.

²⁵ Se-pho-la the̍h chio̍h-to koah i ê kiáⁿ ê pau-phê, ù Mô͘-se ê kha, kóng, “Lí sī góa huih ê tiōng-hu.”

²⁶ Siōng Chú chiū pàng i soah. Se-pho-la kóng, “Lí sī kiâⁿ kat-lé lâu-huih ê sin-lông.”

²⁷ Siōng Chú tùi A-lûn kóng, “Lí ǹg khòng-iá ê hong-hiòng khì gêng-chiap Mô͘-se.” I chiū khì, tī Siōng-tè ê soaⁿ tú-tio̍h Mô͘-se, kā i chim, kā i chhéng-an.

²⁸ Mô͘-se chiong Siōng Chú hoan-hù i ê ōe, kap bēng-lēng i tio̍h kiâⁿ ê sîn-jiah, lóng kā A-lûn kóng.

²⁹ Mô͘-se kap A-lûn chiū khì chio-chi̍p Í-sek-lia̍t-lâng ê tiúⁿ-ló.

³⁰ A-lûn chiong Siōng Chú tùi Mô͘-se kóng ê ōe lóng kā in kóng, koh tī jîn-bîn ê bīn-chêng kiâⁿ hiah-ê sîn-jiah.

³¹ Jîn-bîn chiū siong-sìn; in thiaⁿ-kìⁿ Siōng Chú koàn-kò͘ Í-sek-lia̍t-lâng, koh chai-iáⁿ in ê khùn-khó͘, chiū kūi lo̍h-khì kèng-pài Siōng Chú.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan