Bìoball air-loidhne

出埃及記 36 - 現代台語譯本羅馬字版

¹ Pí-sat-lia̍t kap A-hô-lī-a-pek, í-ki̍p só͘-ū tit-tio̍h Siōng Chú siúⁿ-sù in tì-hūi chhong-bêng, hō͘ in chai án-chóaⁿ khí-chō sèng-só͘ ta̍k-khoán kang-thêng ê sai-hū, lóng chiàu Siōng Chú bēng-lēng in--ê khì chòe.

Jîn-bîn Hōng-hiàn Lé-mi̍h

² Mô͘-se tiàu-chi̍p Pí-sat-lia̍t, A-hô-lī-a-pek, kap só͘-ū siū kám-tōng, tit-tio̍h Siōng Chú siúⁿ-sù in tì-hūi, hoaⁿ-hí lâi chòe kang ê sai-hū.

³ In tùi Mô͘-se the̍h Í-sek-lia̍t-lâng ūi-tio̍h khí-chō sèng-só͘ só͘ hiàn ê lé-mi̍h. Jîn-bîn ta̍k chá-khí kè-sio̍k chiong kam-sim hōng-hiàn ê lé-mi̍h tòa-lâi hō͘ Mô͘-se.

⁴ Só͘-í hiah-ê gâu khí-chō sèng-só͘ ê sai-hū, lóng chiām-thêng in goân-lâi ê khang-khè,

⁵ lâi tùi Mô͘-se kóng, “Jîn-bîn hōng-hiàn ê lé-mi̍h hui-siông chōe, chhiau-kè Siōng Chú bēng-lēng beh khí-chō ê kang-thêng só͘ tio̍h ēng--ê.”

⁶ Tùi án-ni, Mô͘-se hā-lēng, in chiū tī choân-iâⁿ soan-pò͘, kóng, “Bô-lūn lâm-lú, lóng m̄-thang koh ūi-tio̍h sèng-só͘ ê kang-thêng hōng-hiàn lé-mi̍h.” Án-ni jîn-bîn chiah bô koh hōng-hiàn.

⁷ In hōng-hiàn ê châi-liāu, í-keng ū-kàu chòe só͘-ū ê kang-thêng, koh ū chhun.

Khí-chō Hōe-bō͘
( Chhut 26.1-37 )

⁸ In tiong-kan só͘-ū gâu ê sai-hū, ēng cha̍p pak ê pò͘ chòe hōe-bō͘; chiah-ê pò͘ sī ēng so--kè ê iù-môa, kap nâ-sek, chí-sek, chu-âng-sek ê se chit--ê, téng-bīn koh ēng chin-iù ê chhiú-lō͘ siù ki-lō͘-pek.

⁹ Múi-pak pò͘ tn̂g cha̍p-jī kong-chhioh, khoah nn̄g kong-chhioh; ta̍k-pak ê chhùn-chhioh lóng siâng-khoán.

¹⁰ In chiong gō͘ pak pò͘ chiap chòe chi̍t cho͘; lēng-gōa gō͘ pak mā án-ni.

¹¹ Koh tī ta̍k-cho͘ saⁿ-chiap ê pò͘, lō͘-bé hit-pak ê piⁿ--á chòe nâ-sek ê liú-khoân.

¹² In tī chit-cho͘ pò͘ chòe gō͘-cha̍p ê liú-khoân; tī tē-jī cho͘ pò͘ lō͘-bé hit-pak ê piⁿ--á, mā chòe gō͘-cha̍p ê liú-khoân; nn̄g cho͘ ê liú-khoân lóng nn̄g-ê nn̄g-ê sio-tùi.

¹³ In koh chòe gō͘-cha̍p ê kim kau-á, ēng kau-á chiong nn̄g cho͘ pò͘ liân chòe-hé, chiâⁿ-chòe chi̍t ê hōe-bō͘.

¹⁴ In ēng soaⁿ-iûⁿ-mn̂g chit cha̍p-it pak tiùⁿ, chòe khàm hōe-bō͘ ê pò͘-phâng;

¹⁵ múi-pak tiùⁿ tn̂g cha̍p-saⁿ kong-chhioh, khoah nn̄g kong-chhioh; cha̍p-it pak ê chhùn-chhioh lóng siâng-khoán.

¹⁶ In chiong gō͘ pak tiùⁿ liân-chòe chi̍t cho͘, lēng-gōa la̍k pak mā liân-chòe chi̍t cho͘.

¹⁷ Tī ta̍k-cho͘ sio-chiap ê tiùⁿ, lō͘-bé hit-pak ê piⁿ--á chòe gō͘-cha̍p ê liú-khoân.

¹⁸ In koh chòe gō͘-cha̍p ê tâng ê kau-á, hō͘ pò͘-phâng liân-chòe chi̍t ê.

¹⁹ In ēng ní-chòe âng-sek ê iûⁿ-káng ê phê khàm pò͘-phâng, koh ēng siōng-hó ê phê khàm tī siōng téng-bīn.

²⁰ In ēng kim-ha̍p-hoan-bo̍k chòe hōe-bō͘ ê piah-pang.

²¹ Piah-pang tn̂g sì kong-chhioh, khoah la̍k-cha̍p-la̍k kong-hun.

²² Ta̍k-tè pang ū nn̄g ê sún thang saⁿ-chiap; hōe-bō͘ só͘-ū ê pang lóng chiàu án-ni chòe.

²³ Lâm-pêng ê piah-pang chòe jī-cha̍p tè.

²⁴ Chit jī-cha̍p tè pang ê ē-bīn, chòe sì-cha̍p ê gûn ê chō; ta̍k-tè pang ê ē-bīn ū nn̄g ê khang thang tàu in ê sún.

²⁵ Hōe-bō͘ ê tē-jī bīn, chiū-sī pak-pêng, mā chòe jī-cha̍p tè piah-pang,

²⁶ kap sì-cha̍p ê gûn ê chō; ta̍k-tè pang ê ē-bīn ū nn̄g ê khang.

²⁷ Hōe-bō͘ ê āu-bīn, chiū-sī sai-pêng, chòe la̍k tè pang.

²⁸ Hōe-bō͘ āu-bīn ê kak-thâu, chòe nn̄g tè pang,

²⁹ ē-bīn thí-khui, téng-bīn saⁿ-liân ti̍t-kàu téng-bīn tē-it ê khoân; nn̄g pêng lóng sī án-ni, beh chòe kak-thâu ê lō͘-ēng.

³⁰ Ū poeh tè pang, kap cha̍p-la̍k ê gûn ê chō; ta̍k-tè pang ê ē-bīn ū nn̄g ê sún-khang.

^31-32 In ēng kim-ha̍p-hoan-bo̍k chòe hoâiⁿ-kông; lâm-pêng kap pak-pêng kok gō͘ ki, hōe-bō͘ ê āu-bīn, chiū-sī sai-pêng, mā gō͘ ki.

³³ Piah-pang tùi-tiong hit-ki hoâiⁿ-kông, tùi chit-thâu thàng kàu hit-thâu.

³⁴ Piah-pang ēng kim pau--teh, koh chòe kim-khoân thang thò hoâiⁿ-kông; hoâiⁿ-kông mā ēng kim pau.

³⁵ In koh ēng nâ-sek, chí-sek, chu-âng-sek ê se, kap so--kè ê iù-môa chit tiùⁿ-lî; chit-ê tiùⁿ-lî ēng chin iù ê chhiú-lō͘ siù ki-lō͘-pek.

³⁶ In ēng kim-ha̍p-hoan-bo̍k chòe sì ki thiāu, ēng kim pau--teh, koh ū kim-kau-á; thiāu tàu tī sì ê ū sún-khang ê gûn ê chō téng-bīn.

³⁷ In koh ēng nâ-sek, chí-sek, chu-âng-sek ê se, kap so--kè ê iù-môa, ēng chhiah-siù ê chhiú-lō͘ chòe hōe-bō͘ ê mn̂g-lî.

³⁸ In chòe gō͘ ki thiāu, thiāu ū kau-á tiàu mn̂g-lî; thiāu-táu kap hoâiⁿ-koaiⁿ ēng kim pau--teh; hit gō͘ ê ū sún-khang ê chō sī tâng--ê.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan