Bìoball air-loidhne

出埃及記 35 - 現代台語譯本羅馬字版

An-hioh-ji̍t ê Tiâu-lē

¹ Mô͘-se tiàu-chi̍p Í-sek-lia̍t choân hōe-chiòng, tùi in kóng, “Ē-bīn sī Siōng Chú bēng-lēng lín tio̍h chun-hêng ê sū.

² La̍k ji̍t tio̍h chòe kang, tē-chhit ji̍t sī sèng-ji̍t, sī hiàn hō͘ Siōng Chú ê An-hioh-ji̍t, tio̍h oân-choân hioh-khùn; nā ū lâng tī chit-ji̍t chòe kang, tio̍h hō͘ i sí.

³ An-hioh-ji̍t, lín ta̍k kháu-chàu m̄-thang khí-hé.”

Ūi Hōe-bō͘ Hōng-hiàn
( Chhut 25.1-9 )

⁴ Mô͘-se tùi Í-sek-lia̍t choân hōe-chiòng kóng, “Che sī Siōng Chú ê bēng-lēng:

⁵ Tio̍h hōng-hiàn lé-mi̍h hō͘ Siōng Chú; só͘-ū kam-sim hōng-hiàn ê lâng, lóng thang tòa lé-mi̍h lâi hiàn hō͘ Siōng Chú, chiū-sī kim, gûn, tâng,

⁶ nâ-sek chí-sek chu-âng-sek ê se, iù-môa, soaⁿ-iûⁿ-mn̂g,

⁷ ní-chòe âng-sek ê iûⁿ-káng ê phê, siōng-téng ê phê, kim-ha̍p-hoan-bo̍k,

⁸ tiám-teng ê iû, chè-chō thang boah ê sèng-iû kap phang-hiuⁿ ê phang-liāu,

⁹ âng-bé-ló, í-ki̍p beh siuⁿ tī í-hut-tek kap heng-tē ê pó-chio̍h.”

Hōe-bō͘ ê Khì-khū
( Chhut 39.32-43 )

¹⁰ “Lín tiong-kan gâu ê sai-hū lóng tio̍h lâi chòe Siōng Chú só͘ hoan-hù ê mi̍h-kiāⁿ, chiū-sī

¹¹ hōe-bō͘, pau-koat i ê pò͘-phâng kap téng-bīn ê kòa, í-ki̍p kau-á, pán, hoâiⁿ-kông, thiāu, ū sún-khang ê chō,

¹² iok-kūi kap i ê kǹg, iok-kūi ê kòa kap jia i ê tiùⁿ-lî,

¹³ pâi hiàn-chè ê piáⁿ ê toh kap i ê kǹg, toh-téng ê khì-khū kap hiàn-chè ê piáⁿ,

¹⁴ teng-tâi kap i ê khì-khū, teng-chóaⁿ kap teng-iû,

¹⁵ hiuⁿ-tôaⁿ kap i ê kǹg, thang boah ê sèng-iû kap phang ê hiuⁿ-liāu, hōe-bō͘ ê mn̂g-lî,

¹⁶ sio-hòa-chè ê chè-tôaⁿ kap i tâng ê bāng-á, chè-tôaⁿ ê kǹg kap tôaⁿ só͘-ū ê khì-khū, sóe-tn̄g ê phûn kap phûn-chō,

¹⁷ tiâⁿ ê tiùⁿ-ûi kap i ê thiāu, ū sún-khang ê chō kap tiâⁿ ê mn̂g-lî,

¹⁸ hōe-bō͘ kap tiâⁿ ê khi̍t-á kap soh-á,

¹⁹ í-ki̍p iù-kang chòe ê lé-ho̍k, chiū-sī chè-si A-lûn tī sèng-só͘ chhēng lâi ho̍k-sāi ê sèng ê lé-ho̍k, kap i ê kiáⁿ chòe chè-si teh chhēng ê lé-ho̍k.”

Jîn-bîn ê Hōng-hiàn

²⁰ Í-sek-lia̍t choân hōe-chiòng tùi Mô͘-se ê bīn-chêng chhut--khì.

²¹ Só͘-ū siū kám-tōng, sim hoaⁿ-hí ê lâng, lóng tòa lé-mi̍h lâi hiàn hō͘ Siōng Chú; chiah-ê lé-mi̍h thang ēng lâi chòe hōe-bō͘ ta̍k-chióng ê khì-khū kap sèng ê lé-ho̍k.

²² Só͘-ū kam-sim hōng-hiàn ê ta-po͘-lâng kap hū-jîn-lâng lóng chiong kim-khì, chiū-sī heng-chêng ê pín-chiam, hī-kau, chòe ìn-á ê chhiú-chí, chhiú-khoân the̍h--lâi, iô-iô--leh chòe lé-mi̍h hiàn hō͘ Siōng Chú.

²³ In nā ū nâ-sek chí-sek chu-âng-sek ê se, iù-môa, soaⁿ-iûⁿ-mn̂g, ní-chòe âng-sek ê iûⁿ-káng ê phê, kap siōng-hó ê phê, mā lóng the̍h--lâi.

²⁴ Só͘-ū ōe-tàng hōng-hiàn gûn kap tâng ê lâng, lóng tòa-lâi chòe lé-mi̍h hiàn hō͘ Siōng Chú; só͘-ū ū kim-ha̍p-hoan-bo̍k thang chòe ta̍k-khoán lō͘-ēng--ê, mā lóng tòa--lâi.

²⁵ Chhiú-gē chin gâu ê hū-lú, chiong chhin-chhiú pháng ê nâ-sek chí-sek chu-âng-sek ê se kap iù-môa, lóng the̍h--lâi.

²⁶ Chhiú-gē chin hó, sim siū kám-tōng ê hū-lú, chiū pháng soaⁿ-iûⁿ-mn̂g.

²⁷ Hiah-ê léng-siù mā chiong ōe-tàng siuⁿ tī í-hut-tek kap heng-tē ê âng-bé-ló, kap ta̍k-chióng pó-chio̍h the̍h--lâi.

²⁸ In koh chiong iû kap phang-liāu tòa-lâi chòe teng-iû kap thang boah ê sèng-iû, í-ki̍p phang-hiuⁿ.

²⁹ Ūi-tio̍h Siōng Chú hoan-hù Mô͘-se só͘ tio̍h chòe ê kang, só͘-ū siū kám-tōng sim hoaⁿ-hí ê Í-sek-lia̍t-lâng, bô-lūn lâm-lú, lóng chiong lé-mi̍h tòa-lâi hiàn hō͘ Siōng Chú.

Khí-chō Hōe-bō͘ ê Sai-hū
( Chhut 31.1-11 )

³⁰ Mô͘-se tùi Í-sek-lia̍t-lâng kóng, “Siōng Chú í-keng tùi Iû-tāi chi-cho̍k kéng-soán Hō͘-ní ê sun, O͘-lī ê kiáⁿ Pí-sat-lia̍t;

³¹ koh ēng Siōng-tè ê sîn kā i chhiong-móa, hō͘ i ū tì-hūi, chhong-bêng kap tì-sek, gâu chòe ta̍k-khoán ê kang-gē;

³² gâu siat-kè tô͘-àn, ēng kim, gûn, tâng chòe mi̍h-kiāⁿ;

³³ koh gâu khek beh siuⁿ ê pó-chio̍h, gâu ēng bo̍k-châi khek ta̍k-khoán kang-gē-phín.

³⁴ Siōng Chú koh hō͘ i kap Tān chi-cho̍k, A-hi-sat-boat ê kiáⁿ A-hô-lī-a-pek, tit-tio̍h châi-lêng, thang thoân-siū châi-gē.

³⁵ Chiah-ê lâng Siōng Chú chiong tì-hūi chhiong-móa in, hō͘ in ōe chòe ta̍k-khoán ê kang-gē, bô-lūn sī tiau-khek, tô͘-àn siat-kè, ēng nâ-sek chí-sek chu-âng-sek ê se kap iù-môa chhiah-siù, pian-chit; in chin gâu chòe kang-gē, mā chin gâu siat-kè tô͘-àn.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan