Bìoball air-loidhne

出埃及記 34 - 現代台語譯本羅馬字版

Têng Chō Chio̍h-pán
( Sin 10.1-5 )

¹ Siōng Chú tùi Mô͘-se kóng, “Lí tio̍h phah nn̄g tè kap í-chêng kâng-khoán ê chio̍h-pán; lí í-chêng siak-phòa ê chio̍h-pán téng-bīn ê ōe, góa beh koh siá tī chit nn̄g tè chio̍h-pán téng-bīn.

² Bîn-á-chá-khí lí tio̍h chún-pī hó-sè; thàu-chá chiūⁿ Se-nāi-soaⁿ, tī siōng-koân ê só͘-chāi tiâu-kìⁿ góa.

³ M̄-thang ū lâng kap lí chòe-hé lâi; kui-chō soaⁿ m̄-thang ū lâng, soaⁿ-kha mā m̄-thang ū gû-kûn iûⁿ-kûn tī hia chia̍h-chháu.”

⁴ Mô͘-se chiū phah nn̄g tè kap í-chêng kâng-khoán ê chio̍h-pán. Mô͘-se thàu-chá khí--lâi, chiàu Siōng Chú ê hoan-hù, chhiú the̍h nn̄g tè chio̍h-pán chiūⁿ Se-nāi-soaⁿ.

⁵ Siōng Chú tī hûn-tiong kàng-lîm, kap Mô͘-se khiā chòe-hé, soan-pò͘ Siōng Chú ê miâ.

⁶ Siōng Chú tùi Mô͘-se ê bīn-chêng keng-kè, soan-pò͘ kóng, “Siōng Chú, Siōng Chú, ū jîn-chû un-tián ê Siōng-tè, bô khoài siū-khì, koh ū hong-sēng ê chû-ài kap sìn-si̍t;

⁷ chhî-siú chû-ài kàu chheng bān tāi, sià-bián chōe-gia̍t, kè-sit, kap chōe-kò; it-tēng bōe kā ū-chōe--ê phòaⁿ-chòe bô-chōe, beh tui-kiù lâng ê chōe, tùi pē kàu kiáⁿ, kàu saⁿ sì tāi.”

⁸ Mô͘-se chiū sûi-sî phak-lo̍h thô͘-kha kèng-pài, kóng,

⁹ “Chú ah, góa nā tùi lí tit-tio̍h un-tián, Chú ah, kiû lí kap goán chòe-hé kiâⁿ. Goán sī sim-ngī kò͘-chip ê bîn-cho̍k, kiû lí sià-bián goán ê chōe-gia̍t kap chōe-kò, chiap-la̍p goán chòe lí ê chú-bîn.”

Têng-sin Li̍p-iok
( Chhut 23.14-19 ; Sin 7.1-5 ; 16.1-17 )

¹⁰ Siōng Chú kóng, “Taⁿ, góa beh kap lí li̍p-iok. Góa beh tī lí choân-thé jîn-bîn ê bīn-chêng chòe kî-biāu ê sū, sī tī thiⁿ-ē bān-cho̍k ê tiong-kan iáu m̄-bat chòe--kè-ê. Án-ni, lí chiu-ûi ê bîn-cho̍k chiū beh khòaⁿ-kìⁿ Siōng Chú thong-kè lí só͘ chòe ê sū sī jōa-ni̍h thang kiaⁿ-ùi.

¹¹ Góa kin-á-ji̍t só͘ bēng-lēng lí--ê, lí tio̍h chun-siú. Góa beh tùi lí ê bīn-chêng kóaⁿ-chhut A-mô͘-lī-lâng, Ka-lâm-lâng, Hek-lâng, Pí-lī-sé-lâng, Hi-bī-lâng, kap Iâ-pò͘-su-lâng.

¹² Lí tio̍h kín-sīn, m̄-thang kap lí beh khì hit-ê só͘-chāi ê chū-bîn li̍p-iok, chiah bián in chiâⁿ-chòe hāi lín ê lô-bāng.

¹³ Lí tio̍h thiah-húi in ê chè-tôaⁿ, kòng-chhùi in ê chio̍h-thiāu-siōng, chhò-tn̄g in ê A-sià-la lú-sîn ê sîn-siōng.

¹⁴ “M̄-thang kèng-pài pa̍t-ê sîn-bêng, in-ūi Siōng Chú sī iau-kiû lâng choân-chêng ho̍k-sāi I ê Siōng-tè, bô iông-ún ū pa̍t-ê sîn-bêng kap I pí-phēng.

¹⁵ Só͘-í, lí bōe-ēng-tit kap hit só͘-chāi ê chū-bîn li̍p-iok, chiah bián in ho̍k-sāi in ê sîn-bêng kiâⁿ siâ-îm, hiàn-chè hō͘ in ê sîn-bêng ê sî, lí siū iau-chhiáⁿ, chiū khì chia̍h in ê chè-mi̍h;

¹⁶ chiah bián hō͘ lí ê hāu-siⁿ chhōa in ê cha-bó͘-kiáⁿ, tī in ê cha-bó͘-kiáⁿ ho̍k-sāi in ê sîn-bêng kiâⁿ siâ-îm ê sî, ín-iú lí ê hāu-siⁿ chòe-hé ho̍k-sāi in ê sîn-bêng kiâⁿ siâ-îm.

¹⁷ “Lí m̄-thang ūi ka-kī chù-chō sîn-siōng.

¹⁸ “Lí tio̍h siú Tû-kàⁿ-choeh, chiàu góa ê bēng-lēng, tī A-pit-ge̍h só͘ chí-tēng ê ji̍t-kî, chia̍h bô-kàⁿ-piáⁿ chhit ji̍t kú, in-ūi lí tī A-pit-ge̍h chhut Ai-ki̍p.

¹⁹ “Só͘-ū thâu-chiūⁿ-siⁿ--ê lóng sī góa ê; bô-lūn sī gû, iûⁿ, thâu-chiūⁿ-siⁿ ê kang--ê lóng sī góa ê.

²⁰ Thâu-chiūⁿ-siⁿ ê lû-á, tio̍h ēng iûⁿ-á sio̍k-hôe; nā bô beh sio̍k-hôe, chiū tio̍h kòng-tn̄g lû-á ê ām-kún. Lín ê tōa-kiáⁿ lóng tio̍h sio̍k-hôe. “Lí m̄-thang khang-chhiú lâi kèng-pài góa.

²¹ “La̍k ji̍t lāi tio̍h chòe kang, tē-chhit ji̍t tio̍h hioh-khùn; chai-chèng siu-koah ê sî mā tio̍h án-ni.

²² “Chho͘-se̍k ê sió-be̍h siu-sêng ê sî, tio̍h siú Chhit-chhit Siu-koah-choeh. Koh tio̍h tī nî-bé siú Siu-khǹg-choeh.

²³ “Lín só͘-ū ê ta-po͘-lâng, tio̍h chi̍t nî saⁿ piàn lâi kèng-pài Chì-koân ê Siōng Chú — Í-sek-lia̍t ê Siōng-tè.

²⁴ Góa beh tùi lí ê bīn-chêng chiong gōa-cho̍k-lâng kóaⁿ--chhut-khì, khok-tián lí ê léng-thó͘; lí chi̍t nî saⁿ piàn lâi kìⁿ Siōng Chú — lí ê Siōng-tè ê sî, it-tēng bô lâng ōe chhim-hoān lí ê thó͘-tōe.

²⁵ “M̄-thang chiong seng-lé ê huih kap ū-kàⁿ ê mi̍h chòe-hé hiàn hō͘ góa; Pôaⁿ-kè-choeh ê chè-mi̍h mā m̄-thang lâu kàu keh-chá-khí.

²⁶ “Thó͘-tōe thâu-chúi siōng-hó ê siu-sêng, tio̍h sàng kàu Siōng Chú — lí ê Siōng-tè ê chhù. “M̄-thang ēng soaⁿ-iûⁿ-bú ê lin chú i ê kiáⁿ.”

²⁷ Siōng Chú tùi Mô͘-se kóng, “Lí tio̍h chiong chiah-ê ōe siá--khí-lâi, in-ūi góa sī chiàu chiah-ê ōe kap lí í-ki̍p Í-sek-lia̍t-lâng li̍p-iok.”

²⁸ Mô͘-se kap Siōng Chú tī hia sì-cha̍p mî-ji̍t, bô chia̍h-pn̄g bô lim-chúi. I chiong chit-ê iok ê ōe, chiū-sī cha̍p-tiâu-kài, siá tī hit nn̄g tè chio̍h-pán.

Mô͘-se Lo̍h Se-nāi-soaⁿ

²⁹ Mô͘-se lo̍h Se-nāi-soaⁿ ê sî, chhiú the̍h hit nn̄g tè iok-pán; in-ūi Siōng Chú ū kap i kóng-ōe, i ê bīn hoat-kng, m̄-kú i ka-kī m̄ chai.

³⁰ A-lûn kap Í-sek-lia̍t chèng-lâng khòaⁿ-tio̍h Mô͘-se, khòaⁿ leh, i ê bīn hoat-kng; in chiū chin kiaⁿ, m̄-káⁿ óa-kūn i.

³¹ Mô͘-se kiò in lâi, A-lûn kap hōe-chiòng ê léng-siù chiah lóng tò-tńg-khì i hia; Mô͘-se chiū kap in kóng-ōe.

³² Jiân-āu Í-sek-lia̍t chèng-lâng lóng chìn-chêng óa--lâi; Mô͘-se chiū chiong Siōng Chú tī Se-nāi-soaⁿ tùi i kóng it-chhè ê ōe, lóng hoan-hù in.

³³ Mô͘-se kap in kóng-ōe liáu-āu, chiū ēng phè tà bīn.

³⁴ M̄-kú Mô͘-se ji̍p-khì kìⁿ Siōng Chú kap Siōng Chú kóng-ōe ê sî, bīn-phè chiū the̍h--khí-lâi, kàu i chhut--lâi. I chhut--lâi, chiū chiong Siōng Chú só͘ hoan-hù--ê kā Í-sek-lia̍t-lâng kóng.

³⁵ Í-sek-lia̍t-lâng khòaⁿ-tio̍h Mô͘-se ê bīn hoat-kng; Mô͘-se ēng phè tà bīn, thèng-hāu kàu i ji̍p-khì kap Siōng Chú kóng-ōe chiah the̍h--khí-lâi.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan