Bìoball air-loidhne

出埃及記 32 - 現代台語譯本羅馬字版

Kim-gû
( Sin 9.6-29 )

¹ Í-sek-lia̍t-lâng khòaⁿ Mô͘-se it-ti̍t bô lo̍h-soaⁿ, chiū lóng óa-khì A-lûn hia, kā i kóng, “Taⁿ, lí tio̍h kā goán chō sîn-bêng, thang kā goán chhōa-lō͘; in-ūi hit-ê chhōa goán chhut Ai-ki̍p ê Mô͘-se, m̄-chai tú-tio̍h sím-mi̍h tāi-chì.”

² A-lûn kā in kóng, “Lín ê bó͘, lín ê kiáⁿ, cha-bó͘-kiáⁿ ê kim hī-kau lóng pak khí-lâi hō͘ góa.”

³ Jîn-bîn chiū chiong in ê kim hī-kau lóng pak lo̍h-lâi hō͘ A-lûn.

⁴ A-lûn chiū chòe chi̍t ê bô͘, chiong chiah-ê kim-á chù chòe chi̍t chiah gû-á. Jîn-bîn chiū kóng, “Í-sek-lia̍t-lâng ah, chit-ê chiū-sī chhōa lán chhut Ai-ki̍p ê sîn-bêng.”

⁵ A-lûn khòaⁿ-liáu, chiū tī kim gû-á ê bīn-chêng khí chè-tôaⁿ. I soan-pò͘ kóng, “Bîn-á-chài sī Siōng Chú ê choeh-ji̍t, tāi-ke tio̍h lóng lâi khèng-chiok.”

⁶ Keh-ji̍t thàu-chá, jîn-bîn khí-lâi hiàn sio-hòa-chè kap pêng-an-chè; in chē-teh tōa-chia̍h tōa-lim, khí-lâi thiàu-bú kún-chhiò.

⁷ Siōng Chú tùi Mô͘-se kóng, “Kóaⁿ-kín! Lí kóaⁿ-kín lo̍h-soaⁿ. Lí tùi Ai-ki̍p chhōa--chhut-lâi ê jîn-bîn í-keng tūi-lo̍h.

⁸ In chin kín phian-lī góa bēng-lēng in ê tō-lō͘, ūi ka-kī chù chi̍t chiah gû-á, kā i kūi-pài, hiàn-chè, koh kóng, ‘Í-sek-lia̍t-lâng, che chiū-sī chhōa lín chhut Ai-ki̍p ê sîn-bêng.’”

⁹ Siōng Chú tùi Mô͘-se kóng, “Góa khòaⁿ chit-ê bîn-cho̍k chin-chiàⁿ sī sim-ngī kò͘-chip.

¹⁰ Taⁿ lí tio̍h chhut-chāi góa, góa beh tùi in hoat tōa siū-khì, kā in siau-bia̍t; góa beh hō͘ lí chiâⁿ-chòe tōa-kok.”

¹¹ Mô͘-se chiū tùi Siōng Chú — i ê Siōng-tè kiû-chêng, kóng, “Siōng Chú ah, lí sī-án-chóaⁿ beh tùi lí ê chú-bîn hoat tōa siū-khì? In kiám m̄-sī lí ēng tōa khùi-la̍t tōa koân-lêng ê chhiú, tùi Ai-ki̍p chhōa--chhut-lâi--ê?

¹² Lí kiám beh hō͘ Ai-ki̍p-lâng kóng ‘I chhōa in chhut--khì, sī beh hāi in, tī soaⁿ--ni̍h kā in thâi--sí, hō͘ in tùi tōe-chiūⁿ siau-bia̍t’? Kiû lí hôe-sim-tńg-ì, m̄-thang tùi lí ê chú-bîn hoat tōa siū-khì, m̄-thang kàng chai-hō hō͘ in.

¹³ Kiû lí ōe-kì-tit lí ê po̍k-jîn A-pek-la-hán, Í-sat, Ngá-kok; lí bat kí ka-kī tùi in li̍p-sè, kóng, ‘Góa beh hō͘ lín ê hō͘-tāi chhin-chhiūⁿ thiⁿ-téng ê chhiⁿ hiah chōe; koh chiong góa só͘ èng-ún hit-ê tōe, choân-pō͘ siúⁿ-sù hō͘ lín ê hō͘-tāi, chòe in éng-oán ê sán-gia̍p.’”

¹⁴ Tùi án-ni, Siōng Chú chiū kái-piàn sim-ì, bô chiong só͘ kóng ê chai-hō kàng hō͘ I ê chú-bîn.

¹⁵ Mô͘-se oa̍t-tńg-sin lo̍h-soaⁿ, chhiú the̍h nn̄g tè siang-bīn ū siá-jī ê chio̍h-pán.

¹⁶ Chio̍h-pán sī Siōng-tè chòe--ê, kài-bēng sī Siōng-tè siá--ê, khek tī chio̍h-pán.

¹⁷ Iok-su-a chi̍t-ē thiaⁿ-tio̍h jîn-bîn soan-hoa ê siaⁿ, chiū tùi Mô͘-se kóng, “Tī iâⁿ-lāi ū sio-thâi ê siaⁿ.”

¹⁸ Mô͘-se kóng, “Che m̄-sī thâi-iâⁿ hoan-ho͘ ê siaⁿ, mā m̄-sī thâi-su ai-kiò ê siaⁿ; góa thiaⁿ--tio̍h-ê sī chhiùⁿ-koa ê siaⁿ.”

¹⁹ Mô͘-se kiâⁿ kūn iâⁿ-tōe, khòaⁿ-tio̍h kim gû-á, koh khòaⁿ-tio̍h lâng teh thiàu-bú, chiū hui-siông siū-khì, kā chhiú--ni̍h hit nn̄g tè chio̍h-pán hiat-lo̍h soaⁿ-kha, chio̍h-pán chhùi--khì.

²⁰ I koh chiong in chù ê gû-á-siōng ēng hé sio, géng-chòe hún, iā tī chúi-bīn, kiò Í-sek-lia̍t-lâng lim.

²¹ Mô͘-se kā A-lûn kóng, “Chit-ê jîn-bîn sī kā lí án-chóaⁿ, lí kèng-jiân hō͘ in hoān chiah tōa ê chōe?”

²² A-lûn kóng, “Góa ê chú, chhiáⁿ lí mài hiah-ni̍h siū-khì. Lí chai, chit-ê jîn-bîn koat-sim chòe pháiⁿ.

²³ In tùi góa kóng, ‘Lí tio̍h kā goán chō chi̍t ê sîn-bêng, thang kā goán chhōa-lō͘, in-ūi hit-ê chhōa goán chhut Ai-ki̍p ê Mô͘-se, m̄-chai tú-tio̍h sím-mi̍h tāi-chì.’

²⁴ Góa kā in kóng, ‘Só͘-ū ê kim-á lóng pak lo̍h-lâi hō͘ góa.’ Góa kā kim-á hiat lo̍h hé--ni̍h, chit-chiah gû-á chiū chhut-hiān.”

²⁵ Mô͘-se khòaⁿ-tio̍h jîn-bîn hòng-chhiòng, A-lûn koh chhut-chāi in, tì-kàu in siū tùi-te̍k thí-chhiò,

²⁶ chiū khiā tī iâⁿ-tōe mn̂g-kháu, kóng, “Beh khiā Siōng Chú chit-pêng--ê, tio̍h lâi góa chia.” Lī-bī-lâng chiū lóng chū-chi̍p lâi i hia.

²⁷ I tùi Lī-bī-lâng kóng, “Siōng Chú — Í-sek-lia̍t ê Siōng-tè án-ni kóng, ‘Lín ta̍k-ê lâng io tio̍h chhah to, tùi chit-ê mn̂g kàu hit-ê mn̂g, sûn-sī choân-iâⁿ, thâi-sí hiaⁿ-tī, chhù-piⁿ, kap pêng-iú.’”

²⁸ Lī-bī-lâng chiū chiàu Mô͘-se ê ōe chòe. Hit-ji̍t, jîn-bîn siū thâi-sí--ê tāi-iok ū saⁿ-chheng lâng.

²⁹ Mô͘-se kóng, “Lín chiong ka-kī hōng-hiàn hō͘ Siōng Chú, ta̍k-ê lâng kong-kek ka-kī ê kiáⁿ kap hiaⁿ-tī, kin-á-ji̍t Siōng Chú ōe sù-hok lín.”

³⁰ Keh-ji̍t, Mô͘-se tùi jîn-bîn kóng, “Lín ū hoān tāng-chōe; hiān-chāi góa beh chiūⁿ-khì Siōng Chú hia, kiám-chhái ōe-tàng ūi lín sio̍k-chōe.”

³¹ Mô͘-se chiū tò-tńg-khì Siōng Chú hia, kóng, “Ài! Chit-ê jîn-bîn hoān tāng-chōe, ūi ka-kī chō kim ê sîn-siōng.

³² Taⁿ, khún-kiû lí sià-bián in ê chōe; lí nā m̄, kiû lí tùi lí kì-lio̍k ê chheh, kā góa ê miâ chhat-siau.”

³³ Siōng Chú tùi Mô͘-se kóng, “Sím-mi̍h-lâng tek-chōe góa, góa chiū beh tùi góa ê chheh chhat-siau i ê miâ.

³⁴ Taⁿ, lí tio̍h chhōa chit-ê jîn-bîn khì góa kā lí chí-sī ê só͘-chāi. Góa ê sù-chiá beh kā lí chhōa-lō͘; m̄-kú kàu góa sím-phòaⁿ ê ji̍t, góa beh pān in ê chōe.”

³⁵ Siōng Chú kàng chai-hō hō͘ jîn-bîn, in-ūi in kap A-lûn chòe-hé chō kim gû-á.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan