出埃及記 31 - 現代台語譯本羅馬字版

Khí-chō Hōe-bō͘ ê Sai-hū
( Chhut 35.30-36.1 )

¹ Siōng Chú tùi Mô͘-se kóng,

² “Góa í-keng tùi Iû-tāi chi-cho̍k kéng-soán Hō͘-ní ê sun, O͘-lī ê kiáⁿ Pí-sat-lia̍t.

³ Góa ēng Siōng-tè ê sîn kā i chhiong-móa, hō͘ i ū tì-hūi, chhong-bêng kap tì-sek, gâu chòe ta̍k-khoán ê kang-gē;

⁴ gâu siat-kè tô͘-àn, ēng kim, gûn, tâng chòe mi̍h-kiāⁿ;

⁵ koh gâu khek beh siuⁿ ê pó-chio̍h, gâu ēng bo̍k-châi khek ta̍k-khoán kang-gē-phín.

⁶ Góa koh tùi Tān chi-cho̍k, phài A-hi-sat-boat ê kiáⁿ A-hô-lī-a-pek kap Pí-sat-lia̍t tâng-kang. Hiah-ê ū tì-hūi ê lâng, góa beh sù in châi-lêng, hō͘ in ōe-tàng chòe góa kau-tài in chòe ê kang-chok,

⁷ chiū-sī hōe-bō͘, iok-kūi kap iok-kūi téng-bīn ê kòa, hōe-bō͘ it-chhè ê khì-khū,

⁸ toh kap toh-téng ê khì-khū, sûn-kim ê teng-tâi kap teng-tâi it-chhè ê khì-khū, hiuⁿ-tôaⁿ,

⁹ sio-hòa-chè ê chè-tôaⁿ kap tôaⁿ it-chhè ê khì-khū, sóe-tn̄g ê phûn kap phûn-chō,

¹⁰ iù-kang chòe ê lé-ho̍k, chiū-sī chè-si A-lûn kap i ê kiáⁿ chòe chè-si ho̍k-sāi teh chhēng sèng ê lé-ho̍k,

¹¹ í-ki̍p thang boah ê sèng-iû kap sèng-só͘ teh ēng phang-phang ê hiuⁿ. In tio̍h chiàu góa só͘ bēng-lēng lí--ê khì chòe.”

Chun-siú An-hioh-ji̍t

¹² Siōng Chú tùi Mô͘-se kóng,

¹³ “Lí tio̍h hoan-hù Í-sek-lia̍t-lâng kóng, ‘Lín it-tēng tio̍h siú góa ê An-hioh-ji̍t, in-ūi che sī góa kap lín tiong-kan sè-sè-tāi-tāi ê kì-hō, hō͘ lín chai góa sī kā lín hun-pia̍t-choh-sèng ê Siōng Chú.

¹⁴ Só͘-í lín tio̍h siú An-hioh-ji̍t chòe lín ê sèng-ji̍t. Bô chun-siú chit-ji̍t chòe sèng-ji̍t ê lâng, it-tēng tio̍h hō͘ i sí; tī chit-ji̍t choh-kang ê lâng, tio̍h tùi jîn-bîn ê tiong-kan kā i tû-bia̍t.

¹⁵ La̍k ji̍t tio̍h chòe kang, m̄-kú tē-chhit ji̍t sī hiàn hō͘ Siōng Chú sèng ê An-hioh-ji̍t, tio̍h oân-choân hioh-khùn; tī An-hioh-ji̍t choh-kang--ê, it-tēng tio̍h kā i chhú-sí.’

¹⁶ Só͘-í, Í-sek-lia̍t-lâng tio̍h siú An-hioh-ji̍t, sè-sè-tāi-tāi chun-siú An-hioh-ji̍t chòe éng-oán ê iok.

¹⁷ Che sī góa kap Í-sek-lia̍t-lâng tiong-kan éng-oán ê kì-hō; in-ūi Siōng Chú tī la̍k ji̍t ê tiong-kan chhòng-chō thiⁿ tōe, tē-chhit ji̍t chiū thêng-kang hioh-khùn.”

¹⁸ Siōng Chú tī Se-nāi-soaⁿ kap Mô͘-se kóng-ōe kóng soah, chiū chiong nn̄g tè chio̍h-pán kau hō͘ Mô͘-se; chit nn̄g tè chio̍h-pán téng-bīn ê kài-bēng sī Siōng-tè chhin-chhiú siá--ê.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan