Bìoball air-loidhne

出埃及記 29 - 現代台語譯本羅馬字版

Chè-si Siū-chit ê Tiâu-lē
( Lī 8.1-36 )

¹ “Lí kā A-lûn kap i ê kiáⁿ hun-pia̍t-choh-sèng, hō͘ in chòe chè-si ho̍k-sāi góa ê sî, tio̍h án-ni chòe: Tio̍h khan chi̍t chiah kang ê gû-á, nn̄g chiah bô hâ-chhû kang ê mî-iûⁿ,

² koh tio̍h the̍h ēng iù mī-hún chòe ê bô-kàⁿ-piáⁿ, chhiau-iû ê bô-kàⁿ-piáⁿ, kap boah-iû ê bô-kàⁿ po̍h-piáⁿ.

³ Chiah-ê piáⁿ tio̍h hē tī chi̍t kha nâ-á tòa--lâi, koh khan hit-chiah gû-káng-á kap nn̄g chiah mî-iûⁿ-káng lâi, hiàn hō͘ Siōng Chú.

⁴ “Tio̍h hō͘ A-lûn kap i ê kiáⁿ lâi kàu hōe-bō͘ ê ji̍p-kháu, ēng chúi kā in sóe.

⁵ Tio̍h kā A-lûn chhēng lāi-phàu, kòa í-hut-tek ê gōa-phàu, í-hut-tek, heng-tē, chiong ēng kî-khá ê chhiú-lō͘ chit ê í-hut-tek ê tòa kā i hâ--teh;

⁶ koh kā i tì lé-bō, chiong hit-tè khek ‘Sèng-hòa kui Siōng Chú’ ê kim-pâi pa̍k tī lé-bō ê téng-bīn,

⁷ jiân-āu, ēng thang boah ê sèng-iû tò tī i ê thâu-khak, kā i àn-li̍p.

⁸ “Tio̍h kiò A-lûn ê kiáⁿ lâi, kā in chhēng lāi-phàu,

⁹ hâ io-tòa, pau thâu-kun, in chiū tam-tng chè-si ê chit-hūn. Che chiū chiâⁿ-chòe éng-oán ê kui-lē. “Lí tio̍h án-ni kā A-lûn kap i ê kiáⁿ siū-chit.

¹⁰ “Lí tio̍h kā hit-chiah kang ê gû-á khan-lâi hōe-bō͘ thâu-chêng; A-lûn kap i hiah-ê kiáⁿ tio̍h hōaⁿ-chhiú tī gû ê thâu-khak.

¹¹ Lí tio̍h tī Siōng Chú ê bīn-chêng, tī hōe-bō͘ ê ji̍p-kháu, thâi hit-chiah gû,

¹² ēng chńg-thâu-á ùn huih, boah tī chè-tôaⁿ téng-bīn sì ki khiàu--khí-lâi ê kak; chiong chhun ê huih tò tī chè-tôaⁿ kha.

¹³ Tio̍h chiong pak-lāi só͘-ū ê iû, koaⁿ ê bāng-se, nn̄g lia̍p io-chí, í-ki̍p io-chí téng-bīn ê iû, lóng hē tī tôaⁿ-téng sio.

¹⁴ M̄-kú gû ê bah, phê, kap pùn, lóng tio̍h tī iâⁿ-gōa sio-tiāu. Che sī sio̍k-chōe-chè.

¹⁵ “Lí tio̍h khan chi̍t chiah kang ê mî-iûⁿ lâi; A-lûn kap i ê kiáⁿ tio̍h hōaⁿ-chhiú tī hit-chiah iûⁿ ê thâu-khak.

¹⁶ Tio̍h thâi hit-chiah iûⁿ, chiong iûⁿ ê huih hiù tī chè-tôaⁿ ê sì-chiu-ûi.

¹⁷ Tio̍h chiong iûⁿ chhiat chi̍t-tè chi̍t-tè, kā pak-lāi kap thúi sóe chheng-khì, kap kui-tè kui-tè ê bah í-ki̍p thâu hē chòe-hé.

¹⁸ Tio̍h chiong kui-chiah iûⁿ hē tī chè-tôaⁿ téng sio; che sī hiàn hō͘ Siōng Chú ê sio-hòa-chè, sī ēng hé sio hiàn hō͘ Siōng Chú phang-phang ê chè-mi̍h.

¹⁹ “Lí tio̍h kā tē-jī chiah kang ê mî-iûⁿ khan--lâi; A-lûn kap i ê kiáⁿ tio̍h hōaⁿ-chhiú tī iûⁿ ê thâu-khak.

²⁰ Lí tio̍h thâi hit-chiah iûⁿ, the̍h chi̍t-kóa huih, boah tī A-lûn kap i hiah-ê kiáⁿ chiàⁿ-pêng ê hī-chu, koh boah tī in chiàⁿ-chhiú kap chiàⁿ-kha ê tōa-thâu-bú; chiong chhun ê huih hiù tī chè-tôaⁿ ê sì-chiu-ûi.

²¹ Lí tio̍h the̍h chi̍t-kóa tôaⁿ-téng ê huih kap thang boah ê sèng-iû, hiù tī A-lûn kap i ê saⁿ, koh hiù tī i ê kiáⁿ kap in ê saⁿ; án-ni, A-lûn kap i ê saⁿ, i hiah-ê kiáⁿ kap in ê saⁿ, chiū lóng sèng-hòa kui Siōng Chú.

²² “Lí tio̍h chhú hit-chiah mî-iûⁿ-káng ê iû, pûi ê bé, pak-lāi ê iû, koaⁿ ê bāng-se, nn̄g lia̍p io-chí kap io-chí ê iû, í-ki̍p chiàⁿ-thúi; chit-chiah sī siū-chit ê sî só͘ hiàn ê kang ê mî-iûⁿ.

²³ Lí tio̍h koh tùi hit-kha hē tī Siōng Chú bīn-chêng tóe bô-kàⁿ-piáⁿ ê nâ-á, the̍h chi̍t tè piáⁿ, chi̍t tè kiáu-iû ê piáⁿ, kap chi̍t tè po̍h-piáⁿ,

²⁴ hē tī A-lûn kap i hiah-ê kiáⁿ ê chhiú, hō͘ in tī Siōng Chú ê bīn-chêng iô-iô--leh chòe chè-mi̍h.

²⁵ Lí tio̍h tùi in ê chhiú chiap--kè-lâi, hē tī tôaⁿ-téng sio-hòa-chè ê téng-bīn sio, chòe phang-phang ê chè hiàn hō͘ góa. Che sī ēng hé sio hiàn hō͘ Siōng Chú ê chè-mi̍h.

²⁶ “A-lûn siū-chit ê sî só͘ hiàn kang ê mî-iûⁿ, lí tio̍h the̍h i ê heng-khám-bah, tī Siōng Chú ê bīn-chêng iô-iô--leh chòe chè-mi̍h; chit-hūn chè-bah sī lí ê.

²⁷ “Siū-chit ê sî só͘ hiàn kang ê mî-iûⁿ tiong-kan, iô--kè hōng-hiàn ê heng-khám-bah, kap the̍h-koân hōng-hiàn ê tōa-thúi, lí tio̍h kā in sèng-hòa. Chit-hūn chè-bah sī A-lûn kap i hiah-ê kiáⁿ ê.

²⁸ Chiah-ê pō͘-hūn sī A-lûn kap i ê hō͘-tāi tùi Í-sek-lia̍t-lâng tit--tio̍h ê hūn-gia̍h; chit-ê tio̍h chòe éng-oán ê kui-lē. Che sī tùi Í-sek-lia̍t-lâng pêng-an-chè ê tiong-kan, the̍h chhut-lâi chòe hōng-hiàn hō͘ Siōng Chú ê lé-mi̍h.

²⁹ “A-lûn sèng ê lé-ho̍k tio̍h lâu hō͘ i ê hō͘-tāi, hō͘ in tī siū boah-iû kap chiap-siū chè-si ê chit-hūn ê sî thang chhēng.

³⁰ Sòa-chiap i chòe chè-si hit-ê kiáⁿ, ta̍k-piàn ji̍p hōe-bō͘ tī sèng-só͘ ho̍k-sāi ê sî, tio̍h chhēng lé-ho̍k chhit ji̍t kú.

³¹ “Siū-chit ê sî só͘ hiàn kang ê mî-iûⁿ ê bah, lí tio̍h tī hōe-bō͘ ê tiâⁿ chú.

³² A-lûn kap i ê kiáⁿ tio̍h tī hōe-bō͘ ê ji̍p-kháu chia̍h chit-chiah iûⁿ ê bah kap nâ-á lāi ê piáⁿ.

³³ In beh chiap-siū chit-ê chit-hūn, siū hun-pia̍t-choh-sèng, tio̍h chia̍h hiah-ê ūi-tio̍h in sio̍k-chōe ê mi̍h; m̄-kú kî-tha ê lâng m̄-thang chia̍h, in-ūi chiah-ê chia̍h-mi̍h sī sèng--ê.

³⁴ Siū-chit ê sî só͘ hiàn ê bah kap piáⁿ, nā lâu kàu keh-chá-khí, tio̍h ēng hé sio-tiāu; m̄-thang chia̍h, in-ūi sī sèng ê mi̍h.

³⁵ “Lí tio̍h chiàu góa ê hoan-hù, ūi-tio̍h A-lûn kap i hiah-ê kiáⁿ kú-hêng siū-chit ê lé-gî chhit ji̍t kú;

³⁶ ta̍k-ji̍t tio̍h hiàn chi̍t chiah kang ê gû chòe sio̍k-chōe-chè. Mā tio̍h ūi chè-tôaⁿ kiâⁿ kiat-chēng-lé, hō͘ i chheng-khì; koh kā i boah-iû hun-pia̍t-choh-sèng.

³⁷ Lí tio̍h ūi chè-tôaⁿ kiâⁿ kiat-chēng-lé chhit ji̍t kú, kā tôaⁿ hun-pia̍t-choh-sèng, tôaⁿ chiū chiâⁿ-chòe chì-sèng; só͘-ū bong-tio̍h tôaⁿ--ê lóng chiâⁿ-chòe sèng.”

Ta̍k-ji̍t Tio̍h Hiàn ê Chè
( Bîn 28.1-8 )

³⁸ “Lí ta̍k-ji̍t tio̍h tī chè-tôaⁿ hōng-hiàn nn̄g chiah chi̍t-hè ê iûⁿ-káng-á;

³⁹ chá-khí-sî hiàn chi̍t chiah, hông-hun ê sî koh hiàn chi̍t chiah.

⁴⁰ Lí tio̍h ēng chi̍t kong-kun ê iù mī-hún kap chiⁿ--chhut-lâi chi̍t kong-seng ê kaⁿ-ná-iû chhiau chòe-hé, kap tē-it chiah iûⁿ-á chòe-hé hiàn, koh ēng chi̍t kong-seng ê chiú chòe tiān-chiú-chè.

⁴¹ Lí tī hông-hun hiàn lēng-gōa hit-chiah iûⁿ-á ê sî, tio̍h kap chá-khí-sî kâng-khoán hiàn sò͘-chè kap tiān-chiú-chè, lóng ēng hé sio chòe phang-phang ê chè-mi̍h hiàn hō͘ Siōng Chú.

⁴² Lín sè-sè-tāi-tāi, tio̍h chiàu-sî tī hōe-bō͘ ê ji̍p-kháu hiàn sio-hòa-chè hō͘ Siōng Chú; góa beh tī hia kap lín siong-hōe, kap lí kóng-ōe.

⁴³ Góa beh tī hia kap Í-sek-lia̍t-lâng siong-hōe, hōe-bō͘ chiū in-ūi góa ê êng-kng chiâⁿ-chòe sèng.

⁴⁴ Góa beh kā hōe-bō͘ kap chè-tôaⁿ hun-pia̍t-choh-sèng; mā beh kā A-lûn kap i hiah-ê kiáⁿ hun-pia̍t-choh-sèng, hō͘ in chòe chè-si ho̍k-sāi góa.

⁴⁵ Góa beh tiàm tī Í-sek-lia̍t-lâng ê tiong-kan, chòe in ê Siōng-tè.

⁴⁶ In ōe chai, góa sī Siōng Chú — in ê Siōng-tè! Góa chhōa in chhut Ai-ki̍p, só͘-í góa beh tòa tī in tiong-kan. Góa sī Siōng Chú — in ê Siōng-tè.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan