Bìoball air-loidhne

出埃及記 25 - 現代台語譯本羅馬字版

Ūi Sèng-só͘ Hōng-hiàn
( Chhut 35.4-9 )

¹ Siōng Chú kā Mô͘-se kóng,

² “Lí tio̍h hoan-hù Í-sek-lia̍t-lâng hōng-hiàn lé-mi̍h hō͘ góa; só͘-ū kam-sim hōng-hiàn ê mi̍h, lín lóng thang siu--khí-lâi.

³ Ē-bīn sī lín thang tùi in siu ê lé-mi̍h: kim, gûn, tâng,

⁴ nâ-sek chí-sek chu-âng-sek ê se, iù-môa, soaⁿ-iûⁿ-mn̂g,

⁵ ní-chòe âng-sek ê iûⁿ-káng ê phê, siōng-téng ê phê, kim-ha̍p-hoan-bo̍k,

⁶ tiám-teng ê iû, chè-chō thang boah ê sèng-iû kap phang-hiuⁿ ê phang-liāu,

⁷ âng-bé-ló, í-ki̍p beh siuⁿ tī í-hut-tek kap heng-tē ê pó-chio̍h.

⁸ In tio̍h ūi góa khí chi̍t ê sèng ê só͘-chāi, hō͘ góa thang tiàm tī in tiong-kan.

⁹ In tio̍h chiàu góa chí-sī lí ê khoán-sit, khí-chō hōe-bō͘, chè-chō lāi-bīn só͘-ū ê khì-khū.”

Iok-kūi
( Chhut 37.1-9 )

¹⁰ “Tio̍h ēng kim-ha̍p-hoan-bo̍k chòe chi̍t ê kūi, tn̂g chi̍t-pah cha̍p kong-hun, khoah la̍k-cha̍p-la̍k kong-hun, koân la̍k-cha̍p-la̍k kong-hun.

¹¹ Lí tio̍h ēng sûn-kim pau chit-ê kūi, lāi-gōa lóng tio̍h pau; sì-piⁿ tio̍h siuⁿ kim-sòaⁿ.

¹² Lí tio̍h chù sì ê kim-khoân, an tī i ê sì ki kha; chit-pêng nn̄g ê, hit-pêng nn̄g ê.

¹³ Tio̍h ēng kim-ha̍p-hoan-bo̍k chòe nn̄g ki kǹg, ēng kim pau--teh.

¹⁴ Tio̍h chiong kǹg chhng tī iok-kūi piⁿ ê khoân--ni̍h, ēng lâi kng kūi;

¹⁵ chiah-ê kǹg tio̍h put-sî chhng tī kūi ê khoân--ni̍h, m̄-thang thiu--chhut-lâi.

¹⁶ Tio̍h chiong góa beh siúⁿ-sù lí chòe kiàn-chèng ê chio̍h-pán hē tī kūi ê lāi-bīn.

¹⁷ “Tio̍h ēng sûn-kim chòe iok-kūi ê kòa, tn̂g chi̍t-pah cha̍p kong-hun, khoah la̍k-cha̍p-la̍k kong-hun.

¹⁸ Tio̍h ēng kim phah nn̄g ê thiⁿ-sài ki-lō͘-pek, an tī kòa ê siang-thâu,

¹⁹ chi̍t thâu chi̍t ê; siang-thâu ê ki-lō͘-pek, tio̍h kap kòa liân-chòe kui-tè.

²⁰ Nn̄g ê ki-lō͘-pek tio̍h bīn sio-tùi, ǹg iok-kūi ê kòa; si̍t thí koân, jia iok-kūi ê kòa.

²¹ Tio̍h chiong kòa an tī kūi ê téng-bīn, koh chiong góa só͘ beh siúⁿ-sù lí ê chio̍h-pán hē tī kūi-lāi.

²² Góa beh tī hia kap lí siong-hōe, koh beh tī iok-kūi téng-bīn ê kòa, nn̄g ê ki-lō͘-pek tiong-kan, tùi lí kóng góa beh bēng-lēng lí thoân hō͘ Í-sek-lia̍t-lâng só͘-ū ê sū.”

Pâi Hiàn-chè ê Piáⁿ ê Toh
( Chhut 37.10-16 )

²³ “Lí tio̍h ēng kim-ha̍p-hoan-bo̍k chòe chi̍t tè toh, tn̂g poeh-cha̍p-poeh kong-hun, khoah sì-cha̍p-sì kong-hun, koân la̍k-cha̍p-la̍k kong-hun.

²⁴ Tio̍h ēng sûn-kim pau chit-tè toh, sì-ûi siuⁿ kim-sòaⁿ.

²⁵ Toh-bīn sì ê piⁿ kok chòe chhit-tiám-gō͘ kong-hun khoah ê kîⁿ, kîⁿ ê chiu-ûi siuⁿ kim-sòaⁿ.

²⁶ Lí tio̍h chòe sì ê kim-khoân, an tī toh-á sì ki kha ê kak-thâu téng-bīn.

²⁷ An khoân ê só͘-chāi tio̍h óa-kūn hoâiⁿ-koaiⁿ, thang chhng kǹg lâi kng toh.

²⁸ Tio̍h ēng kim-ha̍p-hoan-bo̍k chòe nn̄g ki kǹg, ēng kim pau--teh, thang ēng lâi kng toh.

²⁹ Koh tio̍h ēng sûn-kim chòe tóe hiuⁿ-liāu ê pôaⁿ kap phiat-á, í-ki̍p hiàn tiān-chiú-chè beh ēng ê ô͘ kap poe.

³⁰ Toh-téng tio̍h ū hiàn-chè ê piáⁿ, pâi tī góa ê bīn-chêng.”

Teng-tâi
( Chhut 37.17-24 )

³¹ “Lí tio̍h ēng sûn-kim phah chi̍t ê teng-tâi; teng-tâi ê chō, tiong-thiāu, poe, go̍k, hoe, lóng liân-chòe kui-chō.

³² Teng-tâi ê siang-pêng tio̍h chhun-chhut la̍k ki ki, chi̍t pêng saⁿ ki;

³³ múi chi̍t ki ū saⁿ ê poe, hêng-chōng chhin-chhiūⁿ hēng-hoe, ū go̍k ū hoe; teng-tâi ê la̍k ki ki lóng sī án-ni.

³⁴ Teng-tâi-thiāu ū sì ê poe, hêng-chōng chhin-chhiūⁿ hēng-hoe, ū go̍k kap hoe.

³⁵ Tio̍h tī saⁿ tùi saⁿ-liân ê ki ē-bīn kap thiāu sio-chiap ê só͘-chāi chòe go̍k; teng-tâi ê la̍k ki ki lóng sī án-ni.

³⁶ Hiah-ê go̍k kap ki lóng kap thiāu liân-chòe chi̍t ê, lóng sī ēng sûn-kim phah--ê.

³⁷ Tio̍h chòe chhit ê teng-chóaⁿ, tiám-to̍h, hō͘ i sio-tùi chiò-kng;

³⁸ koh tio̍h chòe teng-chián kap teng-pôaⁿ, lóng ēng sûn-kim chòe.

³⁹ Tio̍h ēng saⁿ-cha̍p-gō͘ kong-kun ê sûn-kim chō teng-tâi kap chiah-ê só͘-ū ê khì-khū.

⁴⁰ Lí tio̍h chiàu góa tī soaⁿ-téng chí-sī lí ê khoán-sit, sòe-jī chòe chiah-ê mi̍h-kiāⁿ.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan