Bìoball air-loidhne

出埃及記 17 - 現代台語譯本羅馬字版

Chio̍h-pôaⁿ Chhut-chúi
( Bîn 20.1-13 )

¹ Í-sek-lia̍t-lâng choân-thé hōe-chiòng sūn-thàn Siōng Chú ê bēng-lēng, tùi Sìn ê khòng-iá chi̍t-chām chi̍t-chām hiòng-chêng kiâⁿ. In tī Lī-hui-tèng chat-iâⁿ, tī hia bô chúi thang lim.

² Jîn-bîn kā Mô͘-se chhá, “Hō͘ goán chúi lim!” Mô͘-se kā in kóng, “Lín sī-án-chóaⁿ teh kā góa chhá, sī-án-chóaⁿ teh chhì-thàm Siōng Chú?”

³ Jîn-bîn tī hia chin chhùi-ta, ài-beh lim-chúi, chiū bâi-oàn Mô͘-se, kóng, “Lí sī-án-chóaⁿ chhōa goán tùi Ai-ki̍p chhut--lâi, sī beh hō͘ goán kap goán ê kiáⁿ-jî, cheng-siⁿ lóng chhùi-ta--sí sī--bô?”

⁴ Mô͘-se chiū kiû-kiò Siōng Chú kóng, “Góa beh án-chóaⁿ tùi-thāi chiah-ê jîn-bîn? In chha-put-to beh ēng chio̍h-thâu kā góa tìm-sí lah.”

⁵ Siōng Chú kā Mô͘-se kóng, “Lí chhōa Í-sek-lia̍t kúi ê tiúⁿ-ló, kiâⁿ-khì jîn-bîn ê thâu-chêng; lí ê chhiú tio̍h gia̍h chìn-chêng phah Nî-lô-hô ê koáiⁿ-á.

⁶ Lí khì, góa beh tī Hô-lia̍t ê chio̍h-pôaⁿ hia khiā tī lí ê bīn-chêng. Lí phah hit-ê chio̍h-pôaⁿ, chúi ōe tùi hia lâu--chhut-lâi, hō͘ jîn-bîn lim.” Mô͘-se chiū tī Í-sek-lia̍t tiúⁿ-ló ê bīn-chêng án-ni chòe.

⁷ I kā hit-ê só͘-chāi kiò-chòe Má-sat, mā kiò-chòe Bí-lī-pa; in-ūi Í-sek-lia̍t-lâng kā i chhá, koh chhì-thàm Siōng Chú, kóng, “Siōng Chú kiám ū tī goán tiong-kan?”

Kap A-má-le̍k-lâng Kau-chiàn

⁸ A-má-le̍k-lâng lâi Lī-hui-tèng kong-kek Í-sek-lia̍t-lâng.

⁹ Mô͘-se kā Iok-su-a kóng, “Lí tio̍h soán lâng khì kap A-má-le̍k-lâng kau-chiàn. Bîn-á-chài góa beh gia̍h Siōng-tè ê koáiⁿ-á, khiā tī soaⁿ-téng.”

¹⁰ Iok-su-a chiū chiàu Mô͘-se ê bēng-lēng khì kap A-má-le̍k-lâng kau-chiàn; Mô͘-se, A-lûn, kap Hō͘-ní lóng peh-chiūⁿ soaⁿ-téng.

¹¹ Mô͘-se chhiú gia̍h--khí-lâi ê sî, Í-sek-lia̍t-lâng chiū thâi-iâⁿ; chhiú sûi--lo̍h-khì ê sî, A-má-le̍k-lâng chiū thâi-iâⁿ.

¹² M̄-kú Mô͘-se chhiú sng, A-lûn kap Hō͘-ní chiū sóa chio̍h-thâu lâi hē tī i ê ē-bīn, hō͘ i chē--teh; in hû i ê chhiú, chi̍t ê tī chiàⁿ-pêng, chi̍t ê tī tò-pêng; i ê chhiú chiū bô sûi--lo̍h-lâi, it-ti̍t kàu ji̍t lo̍h.

¹³ Iok-su-a ēng to thâi-iâⁿ A-má-le̍k-lâng.

¹⁴ Siōng Chú kā Mô͘-se kóng, “Góa beh chiong A-má-le̍k ê miâ tùi thiⁿ-ē oân-choân chhat-siau. Lí tio̍h chiong chit-ê sū kì-lio̍k tī chheh--ni̍h thang thê-chhíⁿ hō͘-tāi, koh tha̍k hō͘ Iok-su-a thiaⁿ.”

¹⁵ Mô͘-se khí chi̍t chō chè-tôaⁿ, kā i hō-miâ kiò-chòe “Siōng Chú Nî-se”;

¹⁶ koh kóng, “Tio̍h gia̍h Siōng Chú ê kun-kî! Siōng Chú beh tāi-tāi kap A-má-le̍k-lâng kau-chiàn.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan