Bìoball air-loidhne

出埃及記 14 - 現代台語譯本羅馬字版

Kè Âng-hái

¹ Siōng Chú tùi Mô͘-se kóng,

² “Lí tio̍h hoan-hù Í-sek-lia̍t-lâng oa̍t tò-tńg, tī Bi̍t-toa̍t kap hái tiong-kan ê Pí Hap-hi-lio̍k thâu-chêng, Pa-le̍k Sé-hun tùi-bīn ê hái-piⁿ chat-iâⁿ.

³ Ai-ki̍p-ông ōe siūⁿ-kóng Í-sek-lia̍t-lâng bê-lō͘, kiâⁿ bōe chhut khòng-iá.

⁴ Góa beh hō͘ Ai-ki̍p-ông ê sim ngī, tui-jip lín; m̄-kú góa beh phah-pāi Ai-ki̍p-ông kap i ê choân-kun, hián-chhut góa ê êng-kng. Án-ni, Ai-ki̍p-lâng chiū chai góa sī Siōng Chú.” Í-sek-lia̍t-lâng chiū chiàu án-ni chòe.

⁵ Ū lâng lâi kā Ai-ki̍p-ông pò-kò, “Í-sek-lia̍t-lâng tô-cháu lah!” Ai-ki̍p-ông kap i ê jîn-sîn chiū kái-piàn sim-ì, kóng, “Lán ná ōe chòe chit-khoán tāi-chì? Sī-án-chóaⁿ beh pàng hit-ê bîn-cho̍k lī-khui bô koh ho̍k-sāi lán?”

⁶ Ai-ki̍p-ông chiū chún-pī chiàn-chhia, chhōa i ê kun-peng chòe-hé khì;

⁷ i chhōa Ai-ki̍p só͘-ū ê chiàn-chhia, pau-koat la̍k-pah tâi te̍k-soán ê chiàn-chhia chhut--khì, ta̍k-tâi chhia lóng ū chiàn-chhia-tiúⁿ.

⁸ Siōng Chú hō͘ Ai-ki̍p-ông ê sim ngī, tui-jip Í-sek-lia̍t-lâng. Í-sek-lia̍t-lâng ióng-kám tōa-táⁿ lī-khui ê sî,

⁹ Ai-ki̍p-lâng tui-jip in; Ai-ki̍p-ông só͘-ū ê chiàn-bé, chiàn-chhia, bé-peng, kap kun-tūi, tī Pí Hap-hi-lio̍k thâu-chêng, Pa-le̍k Sé-hun tùi-bīn ê hái-piⁿ, Í-sek-lia̍t-lâng chat-iâⁿ ê só͘-chāi, jip-tio̍h in.

¹⁰ Ai-ki̍p-ông óa-kūn ê sî, Í-sek-lia̍t-lâng chi̍t-ē khòaⁿ-tio̍h Ai-ki̍p-lâng jip óa--lâi, chiū chin kiaⁿ, ai-kiû Siōng Chú.

¹¹ In kā Mô͘-se kóng, “Sī Ai-ki̍p bô bōng-tōe, lí chiah chhōa goán chhut-lâi sí tī khòng-iá sī--bô? Lí sī-án-chóaⁿ án-ni tùi-thāi goán, chhōa goán chhut Ai-ki̍p?

¹² Goán tī Ai-ki̍p kiám bô kā lí kóng ‘Mài chhap--goán, chhut-chāi goán ho̍k-sāi Ai-ki̍p-lâng’? Goán lêng-khó ho̍k-sāi Ai-ki̍p-lâng, pí sí tī khòng-iá khah hó.”

¹³ Mô͘-se kā jîn-bîn kóng, “M̄-bián kiaⁿ, khiā hō͘ chāi, khòaⁿ Siōng Chú kin-á-ji̍t án-chóaⁿ kái-kiù lín. Lín kin-á-ji̍t khòaⁿ--tio̍h ê Ai-ki̍p-lâng, it-tēng éng-oán bōe koh khòaⁿ--tio̍h.

¹⁴ Siōng Chú beh ūi lín kau-chiàn; lín tio̍h an-chēng.”

¹⁵ Siōng Chú tùi Mô͘-se kóng, “Lí sī-án-chóaⁿ tùi góa âu-kiò? Tio̍h kiò Í-sek-lia̍t-lâng hiòng-chêng kiâⁿ.

¹⁶ Lí gia̍h koáiⁿ-á chhun-chhiú kí hái, kā hái pun-khui; Í-sek-lia̍t-lâng ōe tī hái-tiong kiâⁿ ta-tōe.

¹⁷ Góa beh hō͘ Ai-ki̍p-lâng ê sim ngī, in beh tè lín lo̍h--khì; góa beh phah-pāi Ai-ki̍p-ông kap i ê choân-kun, chiàn-chhia, bé-peng, hián-chhut góa ê êng-iāu.

¹⁸ Góa phah-pāi Ai-ki̍p-ông kap i ê chiàn-chhia, bé-peng, tit-tio̍h êng-iāu ê sî, Ai-ki̍p-lâng chiū chai góa sī Siōng Chú.”

¹⁹ Siōng-tè ê sù-chiá pún-lâi kiâⁿ tī Í-sek-lia̍t tāi-tūi ê thâu-chêng, hit-sî sóa-khì in āu-bīn, hûn-thiāu mā tùi in ê thâu-chêng sóa-khì āu-bīn,

²⁰ lâi tī Ai-ki̍p iâⁿ kap Í-sek-lia̍t iâⁿ ê tiong-kan; Ai-ki̍p iâⁿ hō͘ hûn tà--teh pìⁿ-chòe o͘-àm, m̄-kú Í-sek-lia̍t iâⁿ mî--sî ū kng; nn̄g pêng kui-mî bōe-tàng chiap-kūn.

²¹ Mô͘-se chhun-chhiú kí hái, Siōng Chú hō͘ chin kiông ê tang-hong chhe kui-mî, hō͘ hái-chúi thè--khì, hái chiâⁿ-chòe ta-tōe, chúi pun-chòe nn̄g pêng.

²² Í-sek-lia̍t-lâng lo̍h hái-tiong kiâⁿ ta-tōe, chúi tī in ê siang-pêng chiâⁿ-chòe chhiûⁿ-piah.

²³ Ai-ki̍p-lâng tui-jip in; Ai-ki̍p-ông só͘-ū ê chiàn-bé, chiàn-chhia, kap bé-peng lóng tè in lo̍h-khì hái-tiong.

²⁴ Kàu thiⁿ beh kng ê sî, Siōng Chú tùi hûn-thiāu kap hé-thiāu tiong-kan àⁿ-lo̍h khòaⁿ Ai-ki̍p ê kun-tūi, phah-loān in ê tūi-ngó͘,

²⁵ hō͘ in ê chiàn-chhia ê lián-á kā-tiâu--teh, kiâⁿ bōe khì; Ai-ki̍p-lâng chiū kóng, “Lán tio̍h kóaⁿ-kín cháu, lī-khui Í-sek-lia̍t-lâng, Siōng Chú ūi-tio̍h in lâi phah lán.”

²⁶ Siōng Chú kā Mô͘-se kóng, “Lí chhun-chhiú kí hái, hō͘ chúi tò-tńg-lâi im Ai-ki̍p-lâng, in ê chiàn-chhia, kap in ê bé-peng.”

²⁷ Mô͘-se chiū chhun-chhiú kí hái; kàu thiⁿ chi̍t-ē kng, hái-chúi hôe-ho̍k goân-chōng. Ai-ki̍p-lâng tô-cháu, m̄-kú Siōng Chú chiong in chhia-lo̍h hái.

²⁸ Hái-chúi lâu tò-tńg, kā chiàn-chhia kap bé-peng im-ba̍t; jip Í-sek-lia̍t-lâng lo̍h-khì hái-tiong ê Ai-ki̍p-ông choân-kun, bô chi̍t ê oa̍h--teh.

²⁹ Chóng-sī Í-sek-lia̍t-lâng tī hái-tiong kiâⁿ ta-tōe, chúi tī in ê siang-pêng chiâⁿ-chòe chhiûⁿ-piah.

³⁰ Hit-ji̍t, Siōng Chú án-ni kái-kiù Í-sek-lia̍t-lâng thoat-lī Ai-ki̍p-lâng ê chhiú; Í-sek-lia̍t-lâng khòaⁿ-tio̍h Ai-ki̍p-lâng lóng sí tī hái-piⁿ.

³¹ Í-sek-lia̍t-lâng khòaⁿ-tio̍h Siōng Chú ēng tōa khùi-la̍t tùi-hù Ai-ki̍p-lâng só͘ chòe ê sū, chiū kèng-ùi Siōng Chú, koh sìn-ho̍k Siōng Chú kap I ê po̍k-jîn Mô͘-se.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan