Bìoball air-loidhne

« Roimhe

Air adhart »

出埃及記 12 - 現代台語譯本羅馬字版

Pôaⁿ-kè-choeh

¹ Siōng Chú tī Ai-ki̍p-tōe tùi Mô͘-se kap A-lûn kóng,

² “Lín tio̍h ēng chit kò-ge̍h chòe lín ê chiaⁿ--ge̍h, chòe ta̍k-nî ê thâu chi̍t kò-ge̍h.

³ Lín tio̍h tùi Í-sek-lia̍t ê choân-thé hōe-chiòng kóng, ‘Chit kò-ge̍h chhoe-cha̍p, ta̍k-ê lâng tio̍h chiàu ka-têng chún-pī iûⁿ-á, chi̍t ke chi̍t chiah.

⁴ Nā chhù--ni̍h ê lâng chió, chi̍t chiah iûⁿ-á chia̍h bōe liáu, tio̍h kap keh-piah chhù-piⁿ chòe-hé chún-pī; chiàu jîn-sò͘, chiàu ta̍k-ê lâng chia̍h ê hūn-liōng chún-pī.

⁵ Lín tio̍h tùi mî-iûⁿ á-sī soaⁿ-iûⁿ soán chi̍t chiah chi̍t hè, bô khoat-tiám ê kang ê iûⁿ.

⁶ Lín tio̍h kā iûⁿ-á lâu kàu pún-ge̍h cha̍p-sì; tī hông-hun ê sî, Í-sek-lia̍t choân-thé hōe-chiòng tio̍h thâi iûⁿ-á.

⁷ In tio̍h the̍h chi̍t-kóa huih, boah tī in chia̍h iûⁿ-á hit-keng chhù siang-pêng ê mn̂g-khiā kap mn̂g-bâi.

⁸ Hit-àm tio̍h chia̍h iûⁿ-á ê bah; bah ēng hé hang, kap bô-kàⁿ-piáⁿ, khó͘-chhài chòe-hé chia̍h.

⁹ Bōe-ēng-tit chia̍h chhiⁿ--ê kap ēng chúi chú--ê; bah tio̍h kap thâu, kha, pak-lāi chòe-hé hang lâi chia̍h.

¹⁰ Chiah-ê lóng m̄-thang lâu kàu keh-chá-khí; nā lâu kàu keh-chá-khí, tio̍h ēng hé sio-tiāu.

¹¹ Lín chia̍h ê sî, io tio̍h hâ--teh, ôe tio̍h chhēng--teh, chhiú tio̍h gia̍h koáiⁿ-á, mā tio̍h kóaⁿ-kín chia̍h. Che sī Siōng Chú ê Pôaⁿ-kè-choeh.

¹² “‘Hit-mî, góa beh kiâⁿ-thàu Ai-ki̍p-tōe, phah-sí só͘-ū ê thâu-chiūⁿ-siⁿ--ê, bô-lūn sī lâng á-sī cheng-siⁿ; koh beh sím-phòaⁿ Ai-ki̍p só͘-ū ê sîn-bêng. Góa sī Siōng Chú.

¹³ Lín nā ū tī lín ê chhù boah-huih chòe kì-hō; góa chi̍t-ē khòaⁿ-tio̍h chit-ê huih, chiū ōe tùi lín hia pôaⁿ--kè-khì; góa phah Ai-ki̍p-tōe ê sî, húi-bia̍t ê chai-lān bōe lîm-kàu lín.’”

Tû-kàⁿ-choeh

¹⁴ Lín tio̍h ōe-kì-tit chit-ji̍t sī Siōng Chú ê choeh-ji̍t, tāi-tāi siú chit-ê choeh-ji̍t chòe éng-oán ê kui-lē.

¹⁵ Lín tio̍h chia̍h bô-kàⁿ-piáⁿ chhit ji̍t; thâu chi̍t ji̍t tio̍h tùi chhù-lāi chiong kàⁿ-bú chheng chheng-khì. Tùi thâu chi̍t ji̍t kàu tē-chhit ji̍t, só͘-ū chia̍h ū-kàⁿ ê mi̍h ê lâng, lóng tio̍h tùi Í-sek-lia̍t-lâng ê tiong-kan kek-chhut.

¹⁶ Thâu chi̍t ji̍t kap tē-chhit ji̍t, lín tio̍h kú-hêng sèng-hōe; chit nn̄g ji̍t, chún-pī chia̍h ê mi̍h-kiāⁿ í-gōa, kî-tha ê kang-chok lín lóng bōe-ēng-tit chòe.

¹⁷ Lín tio̍h siú Tû-kàⁿ-choeh, in-ūi tī chit-ji̍t góa chhōa lín ê kun-tūi tùi Ai-ki̍p-tōe chhut--lâi; só͘-í lín tio̍h siú chit-ji̍t chòe sè-sè-tāi-tāi éng-oán ê kui-lē.

¹⁸ Tùi chiaⁿ-ge̍h cha̍p-sì ē-hng kàu jī-it ē-hng, lín tio̍h chia̍h bô-kàⁿ-piáⁿ.

¹⁹ Chit chhit ji̍t lāi, lín ta̍k-ê lâng ê chhù-lāi bōe-ēng-tit ū kàⁿ; chia̍h ū-kàⁿ ê mi̍h ê lâng, bô-lūn sī lín ê tông-pau á-sī gōa-cho̍k-lâng, lóng tio̍h tùi Í-sek-lia̍t hōe-chiòng ê tiong-kan kek-chhut.

²⁰ Ū-kàⁿ ê mi̍h, lín lóng bōe-ēng-tit chia̍h; tī chit-ê choeh-kî lāi, lín bô-lūn tòa tī sím-mi̍h só͘-chāi, tio̍h chia̍h bô-kàⁿ-piáⁿ.

Siat-li̍p Pôaⁿ-kè-choeh

²¹ Mô͘-se tiàu-chi̍p Í-sek-lia̍t só͘-ū ê tiúⁿ-ló, tùi in kóng, “Lín tio̍h ūi lín ê ka-cho̍k kéng iûⁿ-á, thâi lâi kè Pôaⁿ-kè-choeh.

²² Tio̍h the̍h chi̍t pé gû-chhek-chháu, ùn phûn-lāi ê huih, boah mn̂g-bâi kap siang-pêng ê mn̂g-khiā; thiⁿ-kng í-chêng, bô-lūn sím-mi̍h-lâng lóng m̄-thang chhut-mn̂g.

²³ Siōng Chú beh kiâⁿ-thàu choân-kok, phah-sí Ai-ki̍p-lâng; I khòaⁿ-tio̍h mn̂g-bâi kap siang-pêng mn̂g-khiā ê huih, chiū ōe pôaⁿ-kè hit-ê mn̂g, put-chún húi-bia̍t-chiá ji̍p lín ê chhù kā lín phah--sí.

²⁴ Lín tio̍h chun-siú chit-ê kui-tēng, chòe lín kap lín ê hō͘-tāi éng-oán ê kui-lē.

²⁵ Chiong-lâi lín chìn-ji̍p Siōng Chú só͘ èng-ún beh sù hō͘ lín hit-ê tōe, lín tio̍h chun-siú chit-ê kui-lē.

²⁶ Lín ê kiáⁿ-jî nā mn̄g lín, ‘Sī-án-chóaⁿ beh siú chit-ê kui-lē?’

²⁷ Lín tio̍h kóng, ‘Che sī hiàn hō͘ Siōng Chú Pôaⁿ-kè-choeh ê chè-mi̍h. Siōng Chú phah-sí Ai-ki̍p-lâng ê sî, I pôaⁿ-kè tòa tī Ai-ki̍p ê Í-sek-lia̍t-lâng ê chhù, kái-kiù lán ta̍k-ê ka-cho̍k.’” Jîn-bîn chiū phak tī thô͘-kha kèng-pài Siōng Chú.

²⁸ Jiân-āu, Í-sek-lia̍t-lâng lī-khui, chiàu Siōng Chú tùi Mô͘-se kap A-lûn ê bēng-lēng khì chòe.

10. Thâu-chiūⁿ-siⁿ--ê Siū-thâi

²⁹ Tī pòaⁿ-mî, Siōng Chú thâi-sí Ai-ki̍p-tōe só͘-ū thâu-chiūⁿ-siⁿ--ê; tùi chē ông-ūi ê Ai-ki̍p-ông ê tōa-kiáⁿ kàu koaiⁿ tī kaⁿ-ga̍k ê hoān-lâng ê tōa-kiáⁿ, í-ki̍p cheng-siⁿ ê thâu-chiūⁿ-siⁿ--ê, lóng siū thâi-sí.

³⁰ Ai-ki̍p-ông kap i só͘-ū ê jîn-sîn, í-ki̍p choân-pō͘ ê Ai-ki̍p-lâng, lóng tī pòaⁿ-mî khí--lâi; tī Ai-ki̍p choân-tōe ū tōa thî-khàu ê siaⁿ, in-ūi bô chi̍t ke bô sí-lâng.

³¹ Ai-ki̍p-ông pòaⁿ-mî tiàu Mô͘-se, A-lûn lâi, kóng, “Chhut--khì! Lín kap Í-sek-lia̍t-lâng tio̍h lī-khui góa ê jîn-bîn chhut-chhut--khì! Chiàu lín só͘ kóng--ê, khì kèng-pài Siōng Chú;

³² mā chiàu lín ê iau-kiû, liân gû-kûn iûⁿ-kûn lóng tòa-tòa--khì. M̄-kú lín tio̍h kā góa chiok-hok.”

³³ Ai-ki̍p-lâng kóaⁿ Í-sek-lia̍t-lâng tio̍h kóaⁿ-kín lī-khui, kóng, “Goán lóng teh-beh sí lah.”

³⁴ Í-sek-lia̍t-lâng chiū the̍h iáu-bē khǹg kàⁿ ê mī-oân, hē tī chhiau mī-hún ê khì-khū lāi, ēng saⁿ pau--khí-lâi, khǹg tī keng-thâu téng.

³⁵ Í-sek-lia̍t-lâng chiàu Mô͘-se ê ōe, tùi Ai-ki̍p-lâng thó kim-khì, gûn-khì, kap i-ho̍k.

³⁶ Siōng Chú hō͘ Í-sek-lia̍t-lâng tit-tio̍h Ai-ki̍p-lâng hó ê tùi-thāi, in iau-kiû sím-mi̍h, Ai-ki̍p-lâng lóng hō͘ in. Án-ni, in chiū chhiúⁿ-toa̍t Ai-ki̍p-lâng ê châi-bu̍t.

Í-sek-lia̍t-lâng Chhut Ai-ki̍p

³⁷ Í-sek-lia̍t-lâng lī-khui Lân-sài, ǹg So͘-kat chhut-hoat, gín-á hū-jîn-lâng bô sǹg, kiâⁿ-lō͘ ê chòng-teng tāi-iok ū la̍k-cha̍p-bān.

³⁸ Koh ū chin chōe hūn-cha̍p ê kûn-chiòng, í-ki̍p gû-kûn, iûⁿ-kûn, chin chōe cheng-siⁿ kap in chòe-hé chhut--khì.

³⁹ In ēng tùi Ai-ki̍p tòa--chhut-lâi bô hoat-kàⁿ ê mī-oân hang chòe piáⁿ, in-ūi in siū kóaⁿ lī-khui Ai-ki̍p, chin kín-kip, bōe-tàng ūi ka-kī chún-pī chia̍h-mi̍h.

⁴⁰ Í-sek-lia̍t-lâng tòa tī Ai-ki̍p sì-pah saⁿ-cha̍p nî kú.

⁴¹ Sì-pah saⁿ-cha̍p nî chi̍t-ē móa, tú-tú hit-ji̍t, Siōng Chú chhōa I ê kun-tūi tùi Ai-ki̍p-tōe chhut--lâi.

⁴² Chit-mî Siōng Chú kui-mî kò͘-siú in, chhōa in chhut Ai-ki̍p-tōe; Í-sek-lia̍t-lâng tio̍h sè-sè-tāi-tāi tī chit-mî ǹg Siōng Chú siú-iā.

Pôaⁿ-kè-choeh ê Kui-lē

⁴³ Siōng Chú tùi Mô͘-se, A-lûn kóng, “Pôaⁿ-kè-choeh ê kui-lē sī án-ni: Pôaⁿ-kè-choeh ê chia̍h-mi̍h, gōa-cho̍k-lâng lóng m̄-thang chia̍h,

⁴⁴ m̄-kú ēng gûn bóe--lâi ê lô͘-lē, nā ū siū kat-lé chiū thang chia̍h;

⁴⁵ kià-ku--ê kap chhiàⁿ--lâi ê kang-lâng lóng m̄-thang chia̍h.

⁴⁶ Tio̍h tī chhù-lāi chia̍h, liân chi̍t tè to m̄-thang the̍h chhut-khì gōa-bīn; iûⁿ-á ê kut liân chi̍t ki to m̄-thang kòng-tn̄g.

⁴⁷ Í-sek-lia̍t só͘-ū ê hōe-chiòng lóng tio̍h án-ni siú-choeh.

⁴⁸ Nā ū kià-ku tī lín tiong-kan ê gōa-cho̍k-lâng, ài-beh siú Pôaⁿ-kè-choeh kèng-pài Siōng Chú, in ke-lāi ê ta-po͘-lâng tio̍h siū kat-lé, chiah thang kap pún-cho̍k ê lâng kâng-khoán siú-choeh; m̄-kú bô siū kat-lé ê gōa-cho̍k-lâng lóng bōe-ēng-tit chia̍h.

⁴⁹ Pún-cho̍k-lâng kap kià-ku tī lín tiong-kan ê gōa-cho̍k-lâng, siâng-khoán lóng tio̍h siú chit-ê kui-lē.”

⁵⁰ Í-sek-lia̍t chèng-lâng chiū chiàu Siōng Chú bēng-lēng Mô͘-se, A-lûn ê ōe khì chòe.

⁵¹ Chiū tī hit-ji̍t, Siōng Chú chhōa Í-sek-lia̍t-lâng, chi̍t-tūi chi̍t-tūi chhut Ai-ki̍p.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan