Bìoball air-loidhne

出埃及記 11 - 現代台語譯本羅馬字版

Tē-cha̍p ê Chai-lān ê Kéng-kò

¹ Siōng Chú tùi Mô͘-se kóng, “Góa beh koh kàng chi̍t ê chai-lān hō͘ Ai-ki̍p-ông kap Ai-ki̍p, āu-lâi i chiah ōe pàng lín lī-khui chia; i pàng lín lī-khui ê sî, ōe pek lín kóaⁿ-kín tùi chia chhut--khì.

² Lí tio̍h kā Í-sek-lia̍t-lâng kóng, bô-lūn lâm-lú, ta̍k-ê lâng lóng tio̍h tùi in ê chhù-piⁿ thó kim-khì, gûn-khì.”

³ Siōng Chú hō͘ Í-sek-lia̍t-lâng tit-tio̍h Ai-ki̍p-lâng ê hó khoán-thāi; koh Mô͘-se chit-ê lâng tī Ai-ki̍p-tōe, mā siū Ai-ki̍p-ông ê jîn-sîn kap jîn-bîn khòaⁿ-chòe úi-tāi.

⁴ Mô͘-se kóng, “Siōng Chú án-ni kóng, ‘Ē-hng-àm pòaⁿ-mî, góa beh tī Ai-ki̍p-tōe kiâⁿ-thàu-thàu.

⁵ Só͘-ū Ai-ki̍p-tōe ê tōa-kiáⁿ, tùi chē ông-ūi ê Ai-ki̍p-ông kàu oe-bō ê lú-pī ê tōa-kiáⁿ, í-ki̍p lóng-chóng thâu-chiūⁿ-siⁿ ê cheng-siⁿ, lóng ōe sí.

⁶ Ai-ki̍p choân-tōe beh ū ai-siong thî-khàu ê siaⁿ, í-chêng m̄-bat ū, chiong-lâi mā bōe koh ū.

⁷ M̄-kú tī Í-sek-lia̍t-lâng ê tōe-khu ōe chin pêng-chēng, liân káu-á to bōe kā lâng á-sī cheng-siⁿ pūi; án-ni beh hō͘ lín chai, Siōng Chú ū hun-pia̍t Ai-ki̍p-lâng kap Í-sek-lia̍t-lâng.’

⁸ Lí só͘-ū ê jîn-sîn beh lâi kìⁿ góa, phak tī góa ê bīn-chêng, kóng, ‘Pài-thok lí kap kun-tè lí ê jîn-bîn lóng lī-khui.’ Āu-lâi góa chiah beh lī-khui.” Kóng soah, Mô͘-se khì-phut-phut lī-khui Ai-ki̍p-ông chhut--khì.

⁹ Siōng Chú bat tùi Mô͘-se kóng, “Ai-ki̍p-ông bōe thiaⁿ lí ê ōe, só͘-í góa beh tī Ai-ki̍p-tōe kiâⁿ koh-khah chōe ê sîn-jiah.”

¹⁰ Mô͘-se kap A-lûn tī Ai-ki̍p-ông ê bīn-chêng kiâⁿ che it-chhè ê kî-sū; m̄-kú Siōng Chú hō͘ Ai-ki̍p-ông ê sim ngī, m̄ pàng Í-sek-lia̍t-lâng lī-khui i ê tōe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan