Bìoball air-loidhne

出埃及記 10 - 現代台語譯本羅馬字版

8. Chháu-meh ê Chai-lān

¹ Siōng Chú tùi Mô͘-se kóng, “Lí khì kìⁿ Ai-ki̍p-ông. Góa beh hō͘ i kap i ê jîn-sîn ê sim ngī, thang hō͘ góa tī in tiong-kan kiâⁿ sîn-jiah;

² mā beh hō͘ lí tùi lín ê kiáⁿ, lín ê sun kóng-khí góa án-chóaⁿ hì-lāng Ai-ki̍p-lâng, í-ki̍p góa tī in tiong-kan kiâⁿ ê sîn-jiah, hō͘ lín chai góa sī Siōng Chú.”

³ Mô͘-se kap A-lûn chiū khì kìⁿ Ai-ki̍p-ông, tùi i kóng, “Siōng Chú — Hi-pek-lâi-lâng ê Siōng-tè án-ni kóng, ‘Lí kàu taⁿ iáu m̄-khéng tī góa ê bīn-chêng khut-ho̍k. Tio̍h pàng góa ê chú-bîn chhut--khì, hō͘ in thang kèng-pài góa.

⁴ Lí nā m̄-khéng pàng góa ê chú-bîn lī-khui, bîn-á-chài, góa beh hō͘ chháu-meh chìn-ji̍p lí ê kéng-lāi;

⁵ in beh jia-khàm tōe-bīn, tì-kàu lâng khòaⁿ bōe tio̍h tōe; in koh beh chia̍h peng-pha̍uh phah chhun lâu hō͘ lín--ê, mā beh chia̍h iá-tōe ê chhiū-ba̍k.

⁶ Lí ê ông-kiong, lí ê jîn-sîn kap só͘-ū Ai-ki̍p-lâng ê chhù, chi̍t-sì-kòe lóng ū chháu-meh; chū-kó͘ í-lâi, m̄-bat ū lâng khòaⁿ-tio̍h án-ni.’” Kóng-liáu, Mô͘-se chiū oa̍t-tńg-sin, lī-khui Ai-ki̍p-ông chhut--khì.

⁷ Ai-ki̍p-ông ê jîn-sîn tùi ông kóng, “Chit-ê lâng chhē mâ-hoân hāi lán beh kàu tī-sî? Tio̍h pàng chit-ê bîn-cho̍k khì kèng-pài Siōng Chú — in ê Siōng-tè. Ai-ki̍p í-keng teh-beh bia̍t-bông lah, lí kiám m̄ chai?”

⁸ Tùi án-ni, Ai-ki̍p-ông tiàu Mô͘-se kap A-lûn tò-tńg--lâi, tùi in kóng, “Lín thang khì kèng-pài Siōng Chú — lín ê Siōng-tè, m̄-kú sī sím-mi̍h-lâng beh khì?”

⁹ Mô͘-se kóng, “Goán lóng beh khì; goán ê siàu-liân-lâng kap lāu-lâng, goán ê hāu-siⁿ cha-bó͘-kiáⁿ, goán ê gû-kûn iûⁿ-kûn lóng beh chòe-hé khì; in-ūi goán tio̍h siú-choeh kèng-pài Siōng Chú.”

¹⁰ Ai-ki̍p-ông tùi in kóng, “Khì ah, góa nā pàng lín ê gín-á kap hū-jîn-lâng tè lín khì, goān Siōng Chú kā lín pó-pì lah! Lín tio̍h chai, chai-hō í-keng tī lín ê ba̍k-chiu chêng.

¹¹ M̄-kú bōe-ēng--tit! Góa kan-ta chún lín ta-po͘-lâng khì kèng-pài Siōng Chú, lín pún-lâi chiū-sī án-ni iau-kiû.” Ai-ki̍p-ông chiū kā in kóaⁿ--chhut-khì.

¹² Siōng Chú kā Mô͘-se kóng, “Lí chhun-chhiú kí Ai-ki̍p-tōe, hō͘ chháu-meh khàm-móa choân-kok, chia̍h peng-pha̍uh phah chhun ê si̍t-bu̍t.”

¹³ Mô͘-se gia̍h i ê koáiⁿ-á kí Ai-ki̍p-tōe, Siōng Chú chiū hō͘ tang-hong kui-mî kui-ji̍t chhe Ai-ki̍p-tōe; kàu keh-ji̍t chá-khí, tang-hong chiong chháu-meh chhe--lâi.

¹⁴ Chháu-meh chhim-hoān Ai-ki̍p choân-tōe, hioh tī Ai-ki̍p sù-kéng; chháu-meh chiah-ni̍h chōe, sò͘-liōng khong-chiân-choa̍t-hō͘.

¹⁵ Chháu-meh jia-khàm tōe-bīn, tì-kàu choân-tōe lóng o͘-àm; in koh chia̍h tōe-chiūⁿ só͘-ū hō͘ peng-pha̍uh phah chhun ê chhài-soe kap chhiū-téng ê ké-chí. Ai-ki̍p choân-tōe, bô-lūn chhiū-ba̍k, á-sī hn̂g--ni̍h ê chhài-soe, liân chi̍t-sut-á chhiⁿ-chhùi ê mi̍h to bô lâu--teh.

¹⁶ Ai-ki̍p-ông kóaⁿ-kín kiò Mô͘-se kap A-lûn lâi, kóng, “Góa ū tek-chōe Siōng Chú — lín ê Siōng-tè, mā tek-chōe lín.

¹⁷ Taⁿ, chhiáⁿ lín kî-kiû Siōng Chú — lín ê Siōng-tè, koh chi̍t piàn sià-bián góa ê chōe, hō͘ góa thoat-lī chit-piàn tì-kàu sí-bông ê chai-lān.”

¹⁸ Mô͘-se chiū lī-khui Ai-ki̍p-ông, khì kî-kiû Siōng Chú.

¹⁹ Siōng Chú chiū thàu chin kiông ê sai-hong, chiong chháu-meh chhe lo̍h-khì Âng-hái; Ai-ki̍p sù-kéng liân chi̍t chiah chháu-meh to bô lâu--teh.

²⁰ M̄-kú Siōng Chú hō͘ Ai-ki̍p-ông ê sim ngī, m̄ pàng Í-sek-lia̍t-lâng lī-khui.

9. O͘-àm ê Chai-lān

²¹ Siōng Chú koh kā Mô͘-se kóng, “Lí chhun-chhiú kí thiⁿ, hō͘ o͘-àm jia-khàm Ai-ki̍p-tōe, àm kah tio̍h ēng bong--ê chiah ōe-kiâⁿ--tit.”

²² Mô͘-se chhun-chhiú kí thiⁿ, Ai-ki̍p choân-tōe chiū saⁿ ji̍t kú o͘-o͘-àm-àm;

²³ saⁿ ji̍t kú lâng hō͘-siōng khòaⁿ bōe tio̍h, mā bōe-tàng lī-khui chhù; m̄-kú Í-sek-lia̍t-lâng tòa ê só͘-chāi lóng ū kng-bêng.

²⁴ Ai-ki̍p-ông chiū kiò Mô͘-se lâi, kóng, “Lín khì kèng-pài Siōng Chú, lín ê gín-á kap hū-jîn-lâng mā thang kap lín chòe-hé khì, m̄-kú lín ê gû-kûn iûⁿ-kûn tio̍h lâu--lo̍h-lâi.”

²⁵ Mô͘-se ìn i kóng, “Lí tio̍h chiong chè-mi̍h kap sio-hòa-chè ê mi̍h hō͘ goán, hō͘ goán thang ǹg Siōng Chú — goán ê Siōng-tè hiàn-chè.

²⁶ Goán ê cheng-siⁿ mā tio̍h kap goán khì, liân chi̍t chiah to bōe-tàng lâu--teh, in-ūi goán iáu m̄ chai tio̍h ēng sím-mi̍h cheng-siⁿ ho̍k-sāi Siōng Chú — goán ê Siōng-tè; kàu hia goán chiah ōe chai.”

²⁷ M̄-kú Siōng Chú hō͘ Ai-ki̍p-ông ê sim ngī, m̄-khéng pàng in lī-khui.

²⁸ Ai-ki̍p-ông kā Mô͘-se kóng, “Lí kā góa chhut--khì! Lí tio̍h sòe-jī, m̄-thang koh hō͘ góa khòaⁿ--tio̍h; hō͘ góa khòaⁿ--tio̍h hit-ji̍t, lí ōe sí.”

²⁹ Mô͘-se kóng, “Chiàu lí kóng--ê, góa bô beh koh kìⁿ lí ê bīn.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan