Bìoball air-loidhne

使徒行傳 9 - 現代台語譯本羅馬字版

Sò-lô Kui Chú
( Tô͘ 22.6-16 ; 26.12-18 )

¹ Sò-lô kè-sio̍k khióng-hat beh sat-hāi Chú ê bûn-tô͘. I khì kìⁿ tōa-chè-si,

² iau-kiû tōa-chè-si siá kong-hâm hō͘ Tāi-má-sū-kek ta̍k-ê hōe-tn̂g, chún i so͘-cha, nā ū chhē-tio̍h sìn-hōng chit-ê Tō-lō͘ ê lâng, bô-lūn lâm lú, thang kā in pa̍k--khí-lâi, ah-khì Iâ-lō͘-sat-léng.

³ I chiū khì, teh-beh kàu Tāi-má-sū-kek ê sî, hut-jiân ū kng tùi thiⁿ lâi, sì-bīn kā i chiò.

⁴ I chiū poa̍h-lo̍h thô͘-kha, thiaⁿ-kìⁿ ū siaⁿ tùi i kóng, “Sò-lô, Sò-lô, lí sī-án-chóaⁿ teh pek-hāi góa?”

⁵ I mn̄g kóng, “Chú ah, lí sī sím-mi̍h-lâng?” Hit-ê siaⁿ ìn kóng, “Góa chiū-sī lí teh pek-hāi ê Iâ-so͘.

⁶ Khí--lâi, ji̍p-khì siâⁿ-lāi, lí tio̍h chòe ê sū, ū lâng ōe kā lí kóng.”

⁷ Tâng-kiâⁿ ê lâng chiū khiā--teh, gāng-gāng bōe kóng-ōe; in ū thiaⁿ-tio̍h siaⁿ, m̄-kú bô khòaⁿ-tio̍h lâng.

⁸ Sò-lô tùi thô͘-kha peh--khí-lâi, ba̍k-chiu thí-khui, soah sím-mi̍h lóng khòaⁿ bōe tio̍h. In chiū khan i ê chhiú, chhōa i ji̍p-khì Tāi-má-sū-kek.

⁹ I saⁿ ji̍t kú bô khòaⁿ--kìⁿ, mā bô chia̍h, bô lim.

¹⁰ Tī Tāi-má-sū-kek ū chi̍t ê bûn-tô͘ miâ kiò-chòe A-ná-nî-a. Tī īⁿ-siōng tiong Chú kā i kiò, “A-ná-nî-a!” I ìn kóng, “Chú ah, góa tī chia.”

¹¹ Chú kóng, “Khí--lâi, khì hit-tiâu Ti̍t-koe, tī Iû-tāi ê chhù chhē chi̍t ê Tāi-sò͘-lâng kiò-chòe Sò-lô; i tú-teh kî-tó.

¹² I tī īⁿ-siōng tiong ū khòaⁿ-kìⁿ chi̍t ê lâng kiò-chòe A-ná-nî-a ji̍p-lâi kā i hōaⁿ-chhiú, hō͘ i ōe-tàng koh khòaⁿ--kìⁿ.”

¹³ A-ná-nî-a ìn kóng, “Chú ah, góa ū thiaⁿ-tio̍h chin chōe lâng kóng-khí chit-ê lâng tī Iâ-lō͘-sat-léng tùi lí ê sìn-tô͘ chòe chin chōe ok-to̍k ê tāi-chì.

¹⁴ I ū chè-si-tiúⁿ ê siū-koân thang lia̍h só͘-ū kiû-kiò lí ê miâ ê lâng, hiān-chāi lâi tī chia.”

¹⁵ Chú tùi i kóng, “Lí khì, i sī góa kéng-soán ê khì-khū, beh tùi Gōa-pang-lâng, kun-ông, kap Í-sek-lia̍t-lâng soan-iông góa ê miâ.

¹⁶ Góa mā beh hō͘ i chai, ūi-tio̍h góa ê miâ i it-tēng tio̍h siū chin chōe khó͘-lān.”

¹⁷ A-ná-nî-a chiū khì, ji̍p-khì hit-keng chhù, kā Sò-lô hōaⁿ-chhiú, kóng, “Sò-lô hiaⁿ-tī, lí lâi ê lō͘-tiong tùi lí hián-hiān ê Chú Iâ-so͘, chhe góa lâi beh hō͘ lí ōe-tàng koh khòaⁿ--kìⁿ, koh siū Sèng Sîn chhiong-móa.”

¹⁸ Sûi-sî ū chhin-chhiūⁿ hî-lân ê mi̍h-kiāⁿ tùi Sò-lô ê ba̍k-chiu lak--lo̍h-lâi, i chiū koh ōe khòaⁿ--kìⁿ. I khí--lâi, niá-siū sóe-lé;

¹⁹ chia̍h pá liáu-āu, thé-le̍k chiū ho̍k-goân. Sò-lô kap tī Tāi-má-sū-kek ê bûn-tô͘ chòe-hé tòa kúi-nā ji̍t.

Sò-lô tī Tāi-má-sū-kek Thoân-tō

²⁰ I sûi-sî tī ta̍k-ê hōe-tn̂g soan-káng Iâ-so͘, kóng, “I sī Siōng-tè ê Kiáⁿ.”

²¹ Thiaⁿ--tio̍h ê lâng lóng tio̍h-kiaⁿ, kóng, “Tī Iâ-lō͘-sat-léng siau-bia̍t kiû-kiò chit-ê miâ--ê, kiám m̄-sī chit-ê lâng? I lâi chia kiám m̄-sī beh lia̍h sìn-tô͘, kā in ah-khì kau hō͘ chè-si-tiúⁿ?”

²² Sò-lô ná kóng ná ū la̍t, chèng-bêng Iâ-so͘ sī Ki-tok, hō͘ tòa tī Tāi-má-sū-kek ê Iû-thài-lâng bô thang piān-pok.

²³ Chin chōe ji̍t āu, Iû-thài-lâng tàu-tīn kè-bô͘ beh thâi Sò-lô,

²⁴ in ê kè-bô͘ ū hō͘ Sò-lô thiaⁿ--tio̍h. In mî-ji̍t tī siâⁿ-mn̂g tng-tán beh kā i thâi.

²⁵ M̄-kú i ê bûn-tô͘ tī àm-sî kā i chhōa--chhut-lâi, ēng chi̍t ê nâ-á tùi siâⁿ-chhiûⁿ téng kā i lūi--lo̍h-khì.

Sò-lô tī Iâ-lō͘-sat-léng

²⁶ Sò-lô kàu Iâ-lō͘-sat-léng, siūⁿ-beh kap bûn-tô͘ kau-pôe, in lóng kiaⁿ i, in-ūi bô siong-sìn i sī bûn-tô͘.

²⁷ Put-kò Pa-ná-pa chiap-la̍p i, chhōa i khì kìⁿ sù-tô͘, kā in soat-bêng Sò-lô tī lō͘-tiong khòaⁿ-kìⁿ Chú ê keng-kè, kap Chú tùi i kóng-ōe, í-ki̍p i tī Tāi-má-sū-kek jōa-á-ni̍h ióng-kám hōng Iâ-so͘ ê miâ thoân-tō ê tāi-chì.

²⁸ Sò-lô tī Iâ-lō͘-sat-léng kap sù-tô͘ ū chhut-ji̍p lâi-óng, hōng Chú ê miâ hó-táⁿ thoân-tō.

²⁹ I mā ū kap kóng Hi-la̍h-gú ê Iû-thài-lâng kóng-ōe piān-lūn, in iáu-kú put-sî kè-bô͘ beh kā i thâi.

³⁰ Sìn-tô͘ chai-iáⁿ chit-ê tāi-chì, chiū chhōa i lo̍h-khì Khái-sat-lī-a, tùi hia sàng i khì Tāi-sò͘.

³¹ Hit-sî, Iû-thài, Ka-lī-lī, kap Sat-má-lī-a ta̍k só͘-chāi ê kàu-hōe lóng ū pêng-an, ná kian-kò͘ hoat-tián, só͘-kiâⁿ-só͘-chòe kèng-ùi Chú, tit-tio̍h Sèng Sîn ê kó͘-lē, jîn-sò͘ it-ti̍t ke-thiⁿ.

Pí-tek tī Lū-tāi kap Iok-phà

³² Pí-tek khì ta̍k só͘-chāi hóng-būn, mā ū hóng-būn tiàm tī Lū-tāi ê sìn-tô͘.

³³ I tī hia tú-tio̍h chi̍t ê lâng miâ kiò-chòe Í-nî-ngá; chit-ê lâng poàn-sin-put-sūi, í-keng tó-chhn̂g poeh nî kú.

³⁴ Pí-tek tùi i kóng, “Í-nî-ngá, Iâ-so͘ Ki-tok kā lí i-hó lah. Khí--lâi, chéng-lí ka-kī ê bîn-chhn̂g.” Í-nî-ngá sûi-sî khí--lâi.

³⁵ Só͘-ū tòa tī Lū-tāi kap Sa-lûn ê lâng lóng ū khòaⁿ--tio̍h, chiū sìn lâi kui Chú.

³⁶ Tī Iok-phà ū chi̍t ê lú sìn-tô͘, miâ kiò-chòe Tāi-pí-tāi, Hi-la̍h-gú sī To-ka, i ū chòe chin chōe hó-sū, chín-chè sàn-chhiah-lâng.

³⁷ I phòa-pīⁿ sí--khì, lâng sóe i ê si-thé liáu-āu, kā i hē tī lâu-téng ê pâng-keng.

³⁸ In-ūi Lū-tāi lī Iok-phà bô hn̄g, bûn-tô͘ thiaⁿ-tio̍h Pí-tek tī hia, chiū chhe nn̄g ê lâng khì hia, kiû i kóng, “Chhiáⁿ lí kóaⁿ-kín lâi goán hia.”

³⁹ Pí-tek chiū khí--lâi, kap in chòe-hé khì. I chi̍t-ē kàu-ūi, ū lâng chhōa i khì lâu-téng ê pâng-keng. Só͘-ū ê kóaⁿ-hū lóng ûi tī Pí-tek ê sin-piⁿ thî-khàu, the̍h To-ka siⁿ-chêng chòe ê lāi-saⁿ gōa-saⁿ hō͘ i khòaⁿ.

⁴⁰ Pí-tek kiò tāi-ke lóng chhut--khì, chiū kūi lo̍h-khì kî-tó, jiân-āu oa̍t kè-khì tùi si-thé kóng, “Tāi-pí-tāi, khí--lâi!” To-ka ba̍k-chiu thí-khui, khòaⁿ-tio̍h Pí-tek chiū khí-lâi chē.

⁴¹ Pí-tek chhun-chhiú kā i hû--khí-lâi, āu-lâi kiò hiah-ê sìn-tô͘ kap kóaⁿ-hū lóng ji̍p--lâi, hō͘ koh oa̍h--khí-lâi ê To-ka kap in kìⁿ-bīn.

⁴² Chit-ê siau-sit thoân-piàn Iok-phà, chiū ū chin chōe lâng lâi sìn Chú.

⁴³ Pí-tek tī Iok-phà chi̍t ê hoan-phê sai-hū Se-bûn ê chhù tòa chin chōe ji̍t.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan