Bìoball air-loidhne

使徒行傳 8 - 現代台語譯本羅馬字版

¹ Thâi-sí Sū-thê-hoán ê tāi-chì Sò-lô mā chàn-sêng. Kâng hit-ji̍t, Iâ-lō͘-sat-léng ê kàu-hōe siū-tio̍h chin tōa ê pek-hāi. Sù-tô͘ í-gōa só͘-ū ê sìn-tô͘ lóng hun-sòaⁿ khì Iû-thài kap Sat-má-lī-a ê ta̍k só͘-chāi.

Sò-lô Pek-hāi Kàu-hōe

² M̄-kú ū chi̍t-kóa khiân-sêng ê lâng kā Sū-thê-hoán bâi-chòng, ūi-tio̍h i tōa pi-siong.

³ Hit-sî Sò-lô hē-chhiú chân-hāi kàu-hōe, chi̍t-hō͘ chi̍t-hō͘ ji̍p--khì, bô-lūn lâm lú lóng thoa--chhut-lâi, kā in sàng-khì koaiⁿ-lo̍h kaⁿ.

Hok-im Thoân kàu Sat-má-lī-a

⁴ Hiah-ê hun-sòaⁿ ê sìn-tô͘ khì ta̍k só͘-chāi thoân-tō.

⁵ Hui-le̍k khì Sat-má-lī-a ê chi̍t ê siâⁿ, tùi hia ê lâng soan-iông Ki-tok.

⁶ Kûn-chiòng thiaⁿ-tio̍h Hui-le̍k só͘ kóng ê ōe, koh khòaⁿ-tio̍h i só͘ kiâⁿ ê sîn-jiah, chiū choan-sim thiaⁿ i só͘ kóng ê ōe.

⁷ Ū chin chōe lâng hō͘ siâ-sîn hū-sin, hiah-ê siâ-sîn tōa-siaⁿ hoah, tùi in só͘ hū-sin ê lâng chhut--khì. Ū chin chōe poàn-sin-put-sūi--ê kap kha-pái--ê mā tit-tio̍h i-hó.

⁸ Hit-ê siâⁿ ê lâng lóng tōa hoaⁿ-hí.

⁹ Ū chi̍t ê lâng miâ kiò-chòe Se-bûn, í-chêng bat tī hit-ê siâⁿ kiâⁿ siâ-su̍t, ka-kī chū-khoa choh-tōa, hō͘ Sat-má-lī-a ê lâng tio̍h-kiaⁿ kî-koài.

¹⁰ Siâⁿ-lāi ê lâng tōa-tōa-sòe-sòe lóng choan-sim thiaⁿ-thàn i, kóng, “Chit-ê lâng ū Siōng-tè ê koân-lêng, sī lâng teh kóng ê ‘Tāi-lêng-chiá’.”

¹¹ In lóng choan-sim thiaⁿ-thàn i, in-ūi i chin kú ū ēng siâ-su̍t hō͘ in tio̍h-kiaⁿ kî-koài.

¹² Put-kò in sìn Hui-le̍k só͘ thoân Siōng-tè-kok ê hok-im kap Iâ-so͘ Ki-tok ê miâ liáu-āu, lâm--ê lú--ê lóng chiap-siū sóe-lé.

¹³ Liân Se-bûn pún-sin mā sìn; i siū sóe-lé í-āu chiū kā Hui-le̍k tè-tiâu-tiâu. I khòaⁿ-kìⁿ Hui-le̍k só͘ kiâⁿ ê sîn-jiah kap só͘ chòe tōa koân-lêng ê kî-sū, kám-kak chin tio̍h-kiaⁿ.

¹⁴ Iâ-lō͘-sat-léng ê sù-tô͘ thiaⁿ-tio̍h Sat-má-lī-a-lâng í-keng chiap-siū Siōng-tè ê sìn-sit, chiū phài Pí-tek kap Iok-hān khì in hia.

¹⁵ In lo̍h--khì, chiū ūi-tio̍h hiah-ê sìn-tô͘ kî-tó, hō͘ in thang tit-tio̍h Sèng Sîn,

¹⁶ in-ūi hiah-ê sìn-tô͘ tú siū sóe-lé, kui tī Chú Iâ-so͘ ê miâ; Sèng Sîn iáu-bē kàng-lo̍h tī in tiong-kan jīm-hô-lâng.

¹⁷ Pí-tek kap Iok-hān kā in hōaⁿ-chhiú, in chiū tit-tio̍h Sèng Sîn.

¹⁸ Se-bûn khòaⁿ-tio̍h sù-tô͘ hōaⁿ-chhiú ê lâng lóng tit-tio̍h Sèng Sîn, chiū the̍h chîⁿ hō͘ in,

¹⁹ kóng, “Chhiáⁿ lín mā chiong chit-ê koân-lêng hō͘ góa, hō͘ góa só͘ hōaⁿ-chhiú ê lâng lóng ōe-tàng tit-tio̍h Sèng Sîn.”

²⁰ Pí-tek tùi i kóng, “Lí ê chîⁿ kap lí chòe-hé khì sí! Lí káⁿ siūⁿ-beh ēng chîⁿ bóe Siōng-tè ê un-sù!

²¹ Che bô lí ê hūn, kap lí bô koan-hē; in-ūi tī Siōng-tè ê bīn-chêng lí chûn-sim put-liông.

²² Só͘-í, tio̍h hóe-kái tû-khì chit-ê siâ-liām, kî-kiû Chú hō͘ lí sim-lāi ê ì-liām ōe-tàng tit-tio̍h sià-bián.

²³ Góa khòaⁿ-tio̍h lí sim-lāi chhiong-móa tham-sim oàn-tò͘, siū-tio̍h chōe-ok khu-sok.”

²⁴ Se-bûn ìn kóng, “Chhiáⁿ lí ūi-tio̍h góa tùi Chú kî-kiû, hō͘ lí só͘ kóng ê tāi-chì bōe lîm-kàu góa.”

²⁵ Pí-tek kap Iok-hān chòe kiàn-chèng, soan-káng Chú ê sìn-sit, jiân-āu tò-khì Iâ-lō͘-sat-léng, iân-lō͘ tī Sat-má-lī-a ê chin chōe chng-siā thoân hok-im.

Hui-le̍k kap I-soh-phit-a ê Thài-kàm

²⁶ Chú ê thiⁿ-sài kā Hui-le̍k kóng, “Khí--lâi, ǹg lâm-pêng khì, kiâⁿ tùi Iâ-lō͘-sat-léng lo̍h-khì Ka-sat hit-tiâu lō͘.” Hit-tiâu lō͘ í-keng hong-hòe.

^27-28 Hui-le̍k khí--lâi, chiū khì. I tī lō͘-tiong tú-tio̍h chi̍t ê I-soh-phit-a ê thài-kàm; chit-ê lâng sī I-soh-phit-a lú-ông Kam-tāi-ki ê châi-bū tāi-sîn. I chiūⁿ Iâ-lō͘-sat-léng khì kèng-pài Siōng-tè, tú-beh tò--khì, chē tī chhia-téng teh tha̍k sian-ti Í-sài-a ê chheh.

²⁹ Sèng Sîn kā Hui-le̍k kóng, “Lí chìn-chêng óa-khì tè hit-tâi chhia.”

³⁰ Hui-le̍k cháu óa--khì, thiaⁿ-tio̍h i teh tha̍k sian-ti Í-sài-a ê chheh, chiū mn̄g, “Lí teh tha̍k--ê, ū liáu-kái--bô?”

³¹ I ìn kóng, “Bô lâng kā góa kóe-seh, góa ná ōe liáu-kái?” Thài-kàm chiū chhiáⁿ Hui-le̍k chiūⁿ-chhia, kap i chòe-hé chē.

³² I teh tha̍k ê hit-tōaⁿ keng-bûn sī án-ni: I chhin-chhiūⁿ iûⁿ hō͘ lâng khan-khì thâi, chhin-chhiūⁿ iûⁿ-á tī chián-mn̂g ê lâng bīn-chêng bô chhut-siaⁿ, lóng bô khui-chhùi.

³³ I jím-siū lêng-jio̍k ê sî bô lâng thòe I chú-chhî kong-tō. Sím-mi̍h-lâng ōe-tàng soat-bêng I ê sè-hē? In-ūi I ê sìⁿ-miā tùi tōe-chiūⁿ siau-bia̍t.

³⁴ Thài-kàm mn̄g Hui-le̍k, “Chhiáⁿ mn̄g, sian-ti chit-ê ōe sī chí sím-mi̍h-lâng kóng--ê? Sī chí i ka-kī á-sī chí pa̍t-lâng?”

³⁵ Hui-le̍k chiū tùi hit-tōaⁿ keng-bûn khai-sí tùi i thoân Iâ-so͘ ê hok-im.

³⁶ In tùi hit-tiâu lō͘ lo̍h--khì, kàu ū chúi ê só͘-chāi, thài-kàm kóng, “Chia ū chúi, góa kiám bōe-ēng-tit tī chia niá-siū sóe-lé?”

³⁸ Thài-kàm kiò chhia thêng--teh, Hui-le̍k kap thài-kàm nn̄g ê chòe-hé lo̍h-khì chúi--ni̍h, Hui-le̍k chiū kā i sóe-lé.

³⁹ In tùi chúi--ni̍h khí--lâi ê sî, Chú ê Sîn kā Hui-le̍k chiap--khì; thài-kàm bô koh khòaⁿ-tio̍h i, m̄-kú iáu hoaⁿ-hoaⁿ-hí-hí kè-sio̍k i ê lú-thêng.

⁴⁰ Āu-lâi ū lâng tī A-só-to͘ khòaⁿ-tio̍h Hui-le̍k; i iân-lō͘ tī ta̍k-ê siâⁿ-chhī thoân hok-im it-ti̍t kàu Khái-sat-lī-a.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan