Bìoball air-loidhne

使徒行傳 7 - 現代台語譯本羅馬字版

Sū-thê-hoán ê Tap-piān

¹ Tōa-chè-si mn̄g Sū-thê-hoán, “Sū-si̍t sī án-ni sī--bô?”

² Sū-thê-hoán ìn kóng, “Kok-ūi hū-ló hiaⁿ-tī, chhiáⁿ thiaⁿ! Lán ê chó͘-sian A-pek-la-hán sóa-khì Hap-lân í-chêng, iáu tòa tī Bí-soh-put-ta̍t-bí-a ê sî, êng-kng ê Siōng-tè tùi i hián-hiān,

³ kā i kóng, ‘Tio̍h lī-khui lí ê kò͘-hiong kap chhin-cho̍k, khì góa beh chí-sī lí ê só͘-chāi.’

⁴ A-pek-la-hán chiū lī-khui Ka-le̍k-tí-lâng ê tōe-hng, khì tòa tī Hap-lân. I ê lāu-pē sí liáu-āu, Siōng-tè tùi hia kā i chhian-sóa lâi hiān-chāi lín teh tòa chit-ê tōe.

⁵ M̄-kú Siōng-tè lóng bô sán-gia̍p hō͘ i, liân li̍p-chiok-chi-tōe to bô. Sui-jiân hit-sî i iáu bô kiáⁿ, m̄-kú Siōng-tè èng-ún beh sù i chit-ê thó͘-tōe, hō͘ i kap i ê hō͘-tāi chòe sán-gia̍p.

⁶ Siōng-tè ū án-ni kóng, ‘Lí ê hō͘-tāi ōe khì kià-ku tī gōa-kok, chòe lô͘-châi siū ge̍k-thāi sì-pah nî kú.’

⁷ I koh kóng, ‘M̄-kú góa beh sím-phòaⁿ hit-ê hō͘ in chòe lô͘-châi ê kok-ka, āu-lâi góa ōe hō͘ in chhut--lâi, tī chit-ê só͘-chāi kèng-pài góa.’

⁸ Jiân-āu Siōng-tè ū kap i li̍p-iok, ēng kat-lé chòe kì-hō. In-ūi án-ni, A-pek-la-hán siⁿ Í-sat liáu-āu tē-poeh ji̍t kā i kat-lé. Āu-lâi Í-sat siⁿ Ngá-kok, Ngá-kok siⁿ cha̍p-jī ê cho̍k-tiúⁿ.

⁹ “Chiah-ê cho̍k-tiúⁿ oàn-tò͘ Iok-sek, kā i bōe-khì Ai-ki̍p, m̄-kú Siōng-tè kap i tông-chāi,

¹⁰ kiù i thoat-lī it-chhè ê chai-lān, koh sù i tì-hūi, hō͘ i tit-tio̍h Ai-ki̍p-ông Hoat-ló ê koan-ài, chí-phài i chòe Ai-ki̍p ê siú-siòng kap ông-kiong ê chóng-koán.

¹¹ Āu-lâi Ai-ki̍p kap Ka-lâm choân-tōe hoat-seng ki-hng, ín-khí tōa chai-lān, lán ê chó͘-sian bô niû-si̍t thang chia̍h.

¹² Ngá-kok thiaⁿ-tio̍h Ai-ki̍p ū niû-si̍t, chiū chhe lán ê chó͘-sian khì hia; che sī thâu chi̍t piàn.

¹³ Tē-jī piàn in khì ê sî, Iok-sek tùi i ê hiaⁿ-tī piáu-pe̍k i ê sin-hūn; tùi án-ni Hoat-ló chiah bat Iok-sek ê ka-cho̍k.

¹⁴ Iok-sek chhe lâng khì chhiáⁿ i ê lāu-pē Ngá-kok kap choân ka-cho̍k chhit-cha̍p-gō͘ ê lâng lóng khì Ai-ki̍p.

¹⁵ Ngá-kok chiū lo̍h-khì Ai-ki̍p, āu-lâi i kap lán ê chó͘-sian lóng sí tī hia;

¹⁶ in ê ûi-thé hō͘ lâng ūn kàu Sī-kiàm, bâi-chòng tī A-pek-la-hán ēng chîⁿ tùi Hap-boat ê kiáⁿ-sun bóe hit-ê bōng-tōe.

¹⁷ “Siōng-tè tùi A-pek-la-hán ê èng-ún teh-beh si̍t-hiān ê sî, Í-sek-lia̍t-lâng tī Ai-ki̍p ê jîn-kháu ke-thiⁿ chin chōe.

¹⁸ Āu-lâi ū lēng-gōa chi̍t ê m̄ bat Iok-sek ê ông khí-lâi thóng-tī Ai-ki̍p.

¹⁹ I ēng khúi-kè tùi-hù lán ê bîn-cho̍k, ge̍k-thāi lán ê chó͘-sian, kiông-pek in kā eⁿ-á tàn tī gōa-bīn, hō͘ in sí.

²⁰ Tú chit-ê sî Mô͘-se chhut-sì, siⁿ-chòe hui-siông chheng-siù tit-lâng-thiàⁿ. I tī lāu-pē ê chhù siū iúⁿ-chhī saⁿ ge̍h-ji̍t kú.

²¹ I siū pàng-sak ê sî, Hoat-ló ê cha-bó͘-kiáⁿ kā i khioh-khì chòe ka-kī ê kiáⁿ iúⁿ-chhī.

²² I siū chai-pôe ha̍k-si̍p Ai-ki̍p it-chhè ê tì-hūi, kóng-ōe chòe tāi-chì lóng ū châi-lêng.

²³ “Mô͘-se móa sì-cha̍p hè ê sî, siūⁿ-beh khì thàm ka-kī ê hiaⁿ-tī Í-sek-lia̍t tông-pau.

²⁴ I khòaⁿ-tio̍h chi̍t ê hiaⁿ-tī hō͘ Ai-ki̍p-lâng khi-hū, chiū khì kā i pó-hō͘, phah-sí hit-ê Ai-ki̍p-lâng, thòe i pò-ho̍k.

²⁵ I siūⁿ-kóng ka-kī ê hiaⁿ-tī ōe liáu-kái Siōng-tè beh ēng i ê chhiú lâi kái-kiù in, m̄-kú in bô liáu-kái.

²⁶ Keh-ji̍t, i khòaⁿ-tio̍h nn̄g ê Í-sek-lia̍t-lâng teh oan-ke, siūⁿ-beh kā in tiâu-kái, kóng, ‘Pêng-iú, lín sī hiaⁿ-tī, ná teh hō͘-siōng siong-hāi?’

²⁷ M̄-kú hit-ê teh khi-hū lâng--ê kā Mô͘-se sak--khui, kóng, ‘Siáⁿ-lâng jīm-bēng lí choh goán ê thâu-lâng, choh goán ê phòaⁿ-koaⁿ?

²⁸ Lí mā beh thâi góa chhin-chhiūⁿ chā-hng thâi hit-ê Ai-ki̍p-lâng o͘h?’

²⁹ Mô͘-se chi̍t-ē thiaⁿ-tio̍h chit-ê ōe chiū tô-cháu, khì Bí-tiân-lâng ê tōe kià-ku; i tī hia siⁿ nn̄g ê kiáⁿ.

³⁰ “Sì-cha̍p nî āu, tī Se-nāi-soaⁿ ê khòng-iá ū chi̍t ê thiⁿ-sài tī chhì-phè ê hé-iām tiong tùi Mô͘-se hián-hiān.

³¹ Mô͘-se khòaⁿ-kìⁿ chit-ê kéng-siōng kám-kak chin hi-kî, beh kiâⁿ óa-khì khòaⁿ khah siông-sè ê sî, thiaⁿ-kìⁿ Chú ê siaⁿ kóng,

³² ‘Góa sī lín chó͘-sian ê Siōng-tè, sī A-pek-la-hán, Í-sat, Ngá-kok ê Siōng-tè.’ Mô͘-se kiaⁿ kah phi̍h-phi̍h-chhoah, m̄-káⁿ khòaⁿ.

³³ Chú tùi i kóng, ‘Ôe thǹg--khí-lâi, in-ūi lí só͘ khiā ê só͘-chāi sī sîn-sèng ê tōe.

³⁴ Góa ê chú-bîn tī Ai-ki̍p só͘ siū ê thòng-khó͘, góa khak-si̍t ū khòaⁿ--tio̍h, mā ū thiaⁿ-tio̍h in ê ai-kiò, góa lo̍h-lâi beh chín-kiù in. Taⁿ lí lâi, góa beh chhe lí khì Ai-ki̍p.’

³⁵ “Chit-ê Mô͘-se, Í-sek-lia̍t-lâng bat kā i kū-choa̍t, mn̄g i kóng ‘Siáⁿ-lâng jīm-bēng lí choh thâu-lâng, choh phòaⁿ-koaⁿ’; chit-ê lâng Siōng-tè khiok thong-kè tī hé-iām tiong hián-hiān ê thiⁿ-sài chhe-phài i choh léng-siù, choh chín-kiù-chiá.

³⁶ I chhōa in chhut--lâi, tī Ai-ki̍p, tī Âng-hái, tī khòng-iá sì-cha̍p nî kú, kiâⁿ chin chōe kî-sū sîn-jiah.

³⁷ Chit-ê Mô͘-se bat tùi Í-sek-lia̍t kiáⁿ-sun kóng, ‘Siōng-tè beh tùi lín tông-pau ê tiong-kan kā lín heng-khí chi̍t ê chhin-chhiūⁿ góa chit-khoán ê sian-ti.’

³⁸ Mô͘-se mā bat kap tī Se-nāi-soaⁿ tùi i kóng-ōe hit-ê thiⁿ-sài í-ki̍p lán ê chó͘-sian tī khòng-iá chū-hōe; i ū chiong só͘ niá-siū oa̍h ê sìn-sit thoân hō͘ lán.

³⁹ Lán ê chó͘-sian m̄-khéng thiaⁿ-thàn, tian-tò kā i kū-choa̍t, siūⁿ-beh tò-tńg-khì Ai-ki̍p.

⁴⁰ In tùi A-lûn kóng, ‘Lí tio̍h chō chi̍t-kóa sîn-bêng lâi kā goán chhōa-lō͘, in-ūi chhōa goán chhut Ai-ki̍p hit-ê Mô͘-se m̄-chai tú-tio̍h sím-mi̍h tāi-chì.’

⁴¹ Hit-sî in chō chi̍t ê gû-á-kiáⁿ ê siōng, tùi hit-ê ngó͘-siōng hiàn-chè, ūi-tio̍h ka-kī ê chhiú só͘ chō ê ngó͘-siōng khèng-chiok.

⁴² M̄-kú Siōng-tè oa̍t-thâu m̄ khòaⁿ in, chhut-chāi in khì pài thiⁿ-téng ê chhiⁿ-sîn, chiàu sian-ti-su só͘ kóng: Í-sek-lia̍t-lâng ah, lín tī khòng-iá sì-cha̍p nî kú, kiám bat hiàn seng-lé á-sī chè-mi̍h hō͘ góa?

⁴³ Lín kng Mô͘-lo̍k ê pò͘-pîⁿ, í-ki̍p Lí-hoan-sîn ê chhiⁿ, chiū-sī lín chō lâi pài ê siōng; só͘-í góa beh kā lín hòng-tio̍k khì Pa-pí-lûn hit-pêng!

⁴⁴ “Lán ê chó͘-sian tī khòng-iá ū kiàn-chèng Siōng-tè tông-chāi ê hōe-bō͘, chiū-sī Siōng-tè tùi Mô͘-se kóng-ōe ê sî chí-sī i, chiàu i só͘ khòaⁿ--kìⁿ ê bô͘-hêng kiàn-chō--ê.

⁴⁵ Āu-lâi lán ê chó͘-sian sêng-chiap chit-ê hōe-bō͘. Siōng-tè tùi in bīn-chêng kā gōa-cho̍k kóaⁿ-cháu; in chiàm-léng hit-ê thó͘-tōe í-āu chiah kap Iok-su-a chiong hōe-bō͘ sóa-khì hia, it-ti̍t kàu Tāi-pi̍t ê sî-tāi.

⁴⁶ Tāi-pi̍t ū tit-tio̍h Siōng-tè hoaⁿ-hí, thang kiû Siōng-tè chún i ūi-tio̍h Ngá-kok ê ke chhē chi̍t ê khiā-khí ê só͘-chāi.

⁴⁷ M̄-kú āu-lâi ūi-tio̍h Siōng-tè khí Sèng-tiān--ê sī Só͘-lô-bûn.

⁴⁸ “Kî-si̍t Chì-koân ê Siōng-tè pèng bô tòa tī lâng ê chhiú só͘ khí ê chhù, chhin-chhiūⁿ sian-ti só͘ kóng:

⁴⁹ Chú kóng: Thiⁿ sī góa ê pó-chō, tōe sī góa ê kha-tiam. Lín beh kā góa khí sím-mi̍h khoán chhù? Tó-ūi sī góa an-hioh ê só͘-chāi?

⁵⁰ Che it-chhè kiám m̄-sī góa chhin-chhiú chhòng-chō--ê?

⁵¹ “Lín chiah-ni̍h kò͘-chip! Lín ê sim ngī, hī-khang m̄ thiaⁿ! Lín kap lín ê chó͘-sian sio-siâng, put-sî hoán-khòng Sèng Sîn!

⁵² Tó chi̍t ê sian-ti bô siū-tio̍h lín ê chó͘-sian pek-hāi? Ū-giân hit-ê Kong-gī ê Po̍k-jîn lâi-lîm hiah-ê lâng lóng hō͘ lín thâi-sí. Taⁿ lín chiâⁿ-chòe chhut-bōe koh thâi-sí hit-ūi Po̍k-jîn ê lâng.

⁵³ Lín sī tùi thiⁿ-sài niá-siū Siōng-tè Lu̍t-hoat ê lâng, kèng-jiân bô chun-siú!”

Sū-thê-hoán Siū Tìm-sí

⁵⁴ In thiaⁿ-tio̍h Sū-thê-hoán chiah-ê ōe hui-siông siū-khì, tùi i kā-gê-chhiat-chhí.

⁵⁵ M̄-kú Sū-thê-hoán hō͘ Sèng Sîn chhiong-móa, gia̍h-thâu khòaⁿ thiⁿ, khòaⁿ-kìⁿ Siōng-tè ê êng-kng, mā khòaⁿ-tio̍h Iâ-so͘ khiā tī Siōng-tè ê chiàⁿ-pêng.

⁵⁶ I kóng, “Lín khòaⁿ! Góa khòaⁿ-kìⁿ thiⁿ khui, Jîn-chú khiā tī Siōng-tè ê chiàⁿ-pêng!”

⁵⁷ Chèng-lâng ng hī-khang, tōa-siaⁿ hoah, chòe-hé chhi̍h óa--khì,

⁵⁸ kā i thoa chhut-khì siâⁿ-gōa, ēng chio̍h-thâu kā i tìm. Hiah-ê chèng-jîn chiong ka-kī ê gōa-saⁿ kau hō͘ chi̍t ê kiò-chòe Sò-lô ê siàu-liân-lâng kò͘.

⁵⁹ In ēng chio̍h-thâu tìm Sū-thê-hoán ê sî, Sū-thê-hoán kiû-kiò kóng, “Chú Iâ-so͘, kiû lí chiap-la̍p góa ê lêng-hûn!”

⁶⁰ I koh kūi--lo̍h-khì, tōa-siaⁿ hoah, “Chú ah, m̄-thang chiong chit-ê chōe kui hō͘ in!” I kóng-liáu chiū sí.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan