Bìoball air-loidhne

使徒行傳 6 - 現代台語譯本羅馬字版

Soán Chhit Ê Chip-sū

¹ Kè bô-jōa-kú, bûn-tô͘ ê jîn-sò͘ it-ti̍t ke-thiⁿ, kóng Hi-la̍h-gú ê Iû-thài-lâng bâi-oàn hiah-ê kóng Hi-pek-lâi-gú ê Iû-thài-lâng, in-ūi tī hun-phòe ji̍t-siông seng-oa̍h ê su-iàu ū hut-lio̍k in ê kóaⁿ-hū.

² Cha̍p-jī sù-tô͘ chiū tiàu-chi̍p choân-thé bûn-tô͘, tùi in kóng, “Goán chiong soan-káng Siōng-tè sìn-sit ê kang-chok pàng-hē--teh, khì koán hun-phòe ji̍t-siông seng-oa̍h ê su-iàu bô ha̍h.

³ Só͘-í, hiaⁿ-tī ah, tio̍h tùi lín tiong-kan soán chhit ê ū hó miâ-siaⁿ, siū Sèng Sîn chhiong-móa, koh ū tì-hūi ê lâng, goán thang jīm-bēng in pān-lí chit-ê tāi-chì.

⁴ Goán beh choan-sim tī kî-tó kap thoân-tō ê kang-chok.”

⁵ Sù-tô͘ ê ì-kiàn tit-tio̍h choân hōe-chiòng chàn-sêng, in chiū soán Sū-thê-hoán, i sī chhiong-móa sìn-sim kap Sèng Sîn ê lâng; koh soán Hui-le̍k, Pek-lô-ko-lô, Nî-ka-ná, Thê-bûn, Pa-bí-ná, kap kái-chong ji̍p Iû-thài-kàu ê An-thê-o-lâng Nî-ko-la.

⁶ In hō͘ chiah-ê lâng khiā tī sù-tô͘ bīn-chêng, sù-tô͘ chiū ūi-tio̍h in kî-tó, kā in àn-chhiú.

⁷ Siōng-tè ê sìn-sit kè-sio̍k thoân-khui; tī Iâ-lō͘-sat-léng bûn-tô͘ ê jîn-sò͘ ke-thiⁿ chin chōe, koh ū chin chōe chè-si mā thiaⁿ-thàn chit-ê sìn-gióng.

Sū-thê-hoán Siū Lia̍h

⁸ Sū-thê-hoán chhiong-móa un-sù kap lêng-le̍k, tī bîn-chiòng ê tiong-kan kiâⁿ tōa kî-sū kap sîn-jiah.

⁹ Put-kò ū chi̍t-kóa lâng khí-lâi kap Sū-thê-hoán piān-lūn, in sī tùi Kó͘-lī-nāi kap A-le̍k-san-tāi lâi, sio̍k “Chū-iû-jîn” hōe-tn̂g ê hōe-oân, í-ki̍p tùi Ki-lī-ka kap A-sè-a lâi ê lâng.

¹⁰ Sèng Sîn sù tì-hūi hō͘ Sū-thê-hoán, hō͘ in bô hoat-tō͘ thang piān-pok.

¹¹ Āu-lâi, in bóe-siu chi̍t-kóa lâng chhut-lâi kóng, “Goán bat thiaⁿ-tio̍h i kóng húi-pòng Mô͘-se kap siat-to̍k Siōng-tè ê ōe.”

¹² In siàn-tōng bîn-chiòng, tiúⁿ-ló, kap keng-ha̍k-kàu-su, chhiong-khì lia̍h Sū-thê-hoán, kā i kau hō͘ gī-hōe.

¹³ In kiò chi̍t-kóa ké chèng-jîn chhut--lâi, kóng, “Chit-ê lâng put-sî kóng-ōe kong-kek chit-ê Sèng-tiān kap Mô͘-se ê Lu̍t-hoat.

¹⁴ Goán bat thiaⁿ-tio̍h i kóng, chit-ê Ná-sat-le̍k-lâng Iâ-so͘ beh húi-hoāi chit-ê Sèng-tiān, koh kái-piàn Mô͘-se thoân hō͘ lán ê kui-lē.”

¹⁵ Hit-sî chē tī gī-hōe ê lâng lóng chù-ba̍k khòaⁿ Sū-thê-hoán, khòaⁿ-tio̍h i ê bīn chhin-chhiūⁿ thiⁿ-sài ê bīn-māu.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan