Bìoball air-loidhne

使徒行傳 5 - 現代台語譯本羅馬字版

A-ná-nî-a kap Sat-hui-lat

¹ Ū chi̍t ê lâng miâ kiò-chòe A-ná-nî-a, i kap i ê bó͘ Sat-hui-lat bōe chi̍t-kóa chhân-hn̂g;

² i tit-tio̍h bó͘ ê tông-ì, chiong só͘ tit--tio̍h ê chîⁿ lâu chi̍t-kóa khí--lâi, chhun--ê the̍h-lâi kau hō͘ sù-tô͘.

³ Pí-tek tùi i kóng, “A-ná-nî-a, lí ná hō͘ Sat-tàn khòng-chè lí ê sim lâi khi-phiàn Sèng Sîn, kā bōe chhân-hn̂g ê chîⁿ lâu chi̍t-pō͘-hūn khí--lâi?

⁴ Chhân-hn̂g iáu-bē bōe sī lí ê, bōe liáu só͘ tit--tio̍h ê chîⁿ lí ū koân thang chhú-lí, lí ná chòe chit-khoán tāi-chì? Lí m̄-sī khi-phiàn lâng, sī khi-phiàn Siōng-tè!”

⁵ A-ná-nî-a chi̍t-ē thiaⁿ-tio̍h chit-ê ōe, lek--lo̍h-khì chiū sí. Thiaⁿ-tio̍h chit-ê tāi-chì ê lâng lóng chin kiaⁿ-hiâⁿ.

⁶ Ū kúi-nā ê siàu-liân-lâng lâi, kā i ê si-thé pau--khí-lâi, kng chhut-khì bâi-chòng.

⁷ Chha-put-to saⁿ tiám-cheng āu, i ê bó͘ ji̍p--lâi, m̄ chai só͘ hoat-seng ê tāi-chì.

⁸ Pí-tek mn̄g i, “Lí kā góa kóng, lín bōe chhân-hn̂g só͘ tit--tio̍h ê chîⁿ kan-ta chiah-ê sī--bô?” I ìn kóng, “Sī, chiah-ê nā-tiāⁿ.”

⁹ Pí-tek tùi i kóng, “Lín ná tâng-sim chhì-thàm Chú ê Sîn? Lí khòaⁿ, bâi-chòng lí ê tiōng-hu ê lâng tú tńg-lâi kàu mn̂g-kháu, in mā beh kā lí kng--chhut-khì!”

¹⁰ Sat-hui-lat sûi-sî lek--lo̍h-khì, tī Pí-tek ê kha-chêng sí--khì. Hiah-ê siàu-liân-lâng ji̍p--lâi, khòaⁿ-tio̍h i í-keng sí, chiū kā i kng--chhut-khì, bâi-chòng tī i tiōng-hu ê sin-piⁿ.

¹¹ Choân kàu-hōe kap thiaⁿ-tio̍h chiah-ê tāi-chì ê lâng lóng chin kiaⁿ-hiâⁿ.

Sîn-jiah Kî-sū

¹² Sù-tô͘ tī bîn-kan kiâⁿ chin chōe sîn-jiah kî-sū. Sìn-tô͘ lóng tâng-sim-ha̍p-ì tī Só͘-lô-bûn Cháu-lông chū-hōe.

¹³ Bîn-chiòng lóng chin chun-tiōng in, m̄-kú m̄-káⁿ kap in chiap-kūn.

¹⁴ Sìn Chú ê lâng it-ti̍t ke-thiⁿ, lâm--ê lú--ê lóng chin chōe.

¹⁵ Ū lâng chiong pīⁿ-lâng khǹg tī bîn-chhn̂g á-sī chhn̂g-pho͘, kng chhut-lâi hē tī lō͘-piⁿ, tī Pí-tek keng-kè ê sî thang hō͘ i ê iáⁿ ìm--tio̍h.

¹⁶ Koh ū kui-kûn lâng chhōa phòa-pīⁿ--ê í-ki̍p hō͘ siâ-sîn khó͘-chhó͘ ê lâng tùi Iâ-lō͘-sat-léng chiu-ûi ê hiong-tìn chū-chi̍p óa--lâi, in lóng ū tit-tio̍h i-hó.

Sù-tô͘ Siū Pek-hāi

¹⁷ Tōa-chè-si í-ki̍p kap i kâng-tóng, chiū-sī Sat-to͘-kai-phài ê lâng, tùi sù-tô͘ móa-sim oàn-tò͘.

¹⁸ In hē-chhiú lia̍h sù-tô͘, kā in koaiⁿ-lo̍h kaⁿ.

¹⁹ Hit-mî, Chú ê thiⁿ-sài phah-khui kaⁿ-mn̂g, kā in chhōa--chhut-lâi, tùi in kóng,

²⁰ “Lín khì, khiā tī Sèng-tiān chiong chit-ê sù oa̍h-miā ê sìn-sit choân-pō͘ tùi bîn-chiòng soan-káng.”

²¹ Sù-tô͘ thiaⁿ i ê ōe, thiⁿ beh kng ê sî ji̍p-khì Sèng-tiān kà-sī lâng. Tōa-chè-si kap i kâng-tóng ê lâng kàu-ūi, chiū tiàu-chi̍p só͘-ū Í-sek-lia̍t-lâng ê tiúⁿ-ló khui-hōe, jiân-āu chhe lâng khì kaⁿ-ga̍k chhōa sù-tô͘ lâi.

²² Siú-ōe kàu ê sî, hoat-kiàn sù-tô͘ bô tī kaⁿ--ni̍h, chiū tò-lâi pò-kò kóng,

²³ “Goán hoat-kiàn kaⁿ-pâng só-tiâu-tiâu, khàn-siú khiā tī mn̂g-kháu, goán chi̍t-ē khui kaⁿ-mn̂g, lāi-bīn lóng bô khòaⁿ-tio̍h pòaⁿ-lâng.”

²⁴ Sèng-tiān ê siú-ōe-koaⁿ kap chè-si-tiúⁿ thiaⁿ-tio̍h chit-ê pò-kò, m̄ chai tāi-chì ōe án-chóaⁿ ián-piàn chiū chin tio̍h-kip.

²⁵ Hit-sî, ū chi̍t ê lâng ji̍p-lâi kā in kóng, “Lín kā in lia̍h-khì koaiⁿ tī kaⁿ--ni̍h hiah-ê lâng, hiān-chāi khiā tī Sèng-tiān teh kà-sī bîn-chiòng!”

²⁶ Hit-ê siú-ōe-koaⁿ kap i ê pō͘-hā chiū khì kā sù-tô͘ chhōa--lâi; in bô ēng pō-le̍k, in-ūi kiaⁿ bîn-chiòng ēng chio̍h-thâu kā in tìm.

²⁷ In chhōa sù-tô͘ ji̍p--lâi, hō͘ in khiā tī gī-hōe bīn-chêng. Tōa-chè-si chiū kā in sím-mn̄g,

²⁸ kóng, “Goán ū giâm-giâm kìm-chí lín m̄-thang hōng chit-ê miâ kà-sī lâng, lín tian-tò chiong chit-ê tō-lí thoân-piàn Iâ-lō͘-sat-léng, siūⁿ-beh chiong lâu chit-ê lâng ê huih ê chek-jīm kui hō͘ goán.”

²⁹ Pí-tek kap kî-tha ê sù-tô͘ ìn kóng, “Goán tio̍h sūn-ho̍k Siōng-tè, m̄-sī sūn-ho̍k lâng.

³⁰ Lín kā I tèng-sí tī si̍p-jī-kè téng ê Iâ-so͘, lán chó͘-sian ê Siōng-tè ū hō͘ I koh-oa̍h.

³¹ Chit-ūi Iâ-so͘, Siōng-tè ko-kú I chē tī ka-kī ê chiàⁿ-pêng, choh Siú-léng, choh Kiù-chú, thang hō͘ Í-sek-lia̍t-lâng hóe-kái, chōe tit-tio̍h sià-bián.

³² Goán sī chiah-ê tāi-chì ê kiàn-chèng-jîn. Siōng-tè sù hō͘ sūn-ho̍k I ê lâng ê Sèng Sîn mā ūi-tio̍h chiah-ê tāi-chì choh chèng-jîn.”

³³ Gī-hōe ê gī-oân thiaⁿ-tio̍h chiah-ê ōe hui-siông siū-khì, ài-beh thâi in.

³⁴ M̄-kú in tiong-kan ū chi̍t ê Hoat-lī-sài-phài ê lâng, kiò-chòe Ka-má-lia̍t, sī chèng-lâng chun-kèng ê lu̍t-hoat-kàu-su. I khiā--khí-lâi, hoan-hù sù-tô͘ chiām-sî chhut--khì,

³⁵ jiân-āu tùi gī-hōe kóng, “Í-sek-lia̍t-lâng, lín beh pān chiah-ê lâng tio̍h chin kín-sīn!

³⁶ Í-chêng Tō͘-ta̍t khí--lâi, chū-chheng tōa-jîn-bu̍t, iok ū sì-pah lâng tè i, āu-lâi i hō͘ lâng thâi-sí, só͘-ū tè i ê lâng lóng sì-sòaⁿ, siau-sit--khì.

³⁷ Āu-lâi ū chi̍t ê Ka-lī-lī-lâng Iû-tāi tī hō͘-kháu-phó͘-cha ê sî chhut-hiān, chhōa chi̍t-kóa lâng tè i, i mā hō͘ lâng thâi-sí; tè i ê lâng lóng sì-sòaⁿ.

³⁸ Taⁿ koan-hē chit-hāng tāi-chì, góa kā lín kóng, chiah-ê lâng lín m̄-thang chhap, chhut-chāi in khì. In só͘ kè-ōe só͘ chòe--ê nā chhut tī lâng, it-tēng ōe sit-pāi;

³⁹ nā chhut tī Siōng-tè, lín chiū bōe-tàng kā in siau-bia̍t, kiaⁿ-liáu lín soah kap Siōng-tè choh tùi-thâu!” Gī-hōe chiap-la̍p i ê ì-kiàn.

⁴⁰ In kiò sù-tô͘ ji̍p--lâi, ēng piⁿ kā in phah, bēng-lēng in bōe-ēng-tit koh hōng Iâ-so͘ ê miâ káng-tō, jiân-āu pàng in chhut--khì.

⁴¹ Sù-tô͘ lī-khui gī-hōe, móa-sim hoaⁿ-hí, in-ūi in hō͘ lâng khòaⁿ-chòe ōe-kham-tit ūi-tio̍h Chú ê miâ siū lêng-jio̍k.

⁴² In ta̍k-ji̍t tī Sèng-tiān kap jîn-ke-chhù kè-sio̍k kà-sī lâng, thoân Ki-tok Iâ-so͘.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan