Bìoball air-loidhne

使徒行傳 28 - 現代台語譯本羅馬字版

Tī Má-ní-tha-tó

¹ Goán an-choân chiūⁿ-lio̍k liáu-āu chiah chai hit-ê tó-sū kiò-chòe Má-ní-tha.

² Tong-tōe ê goân-chū-bîn tùi goán hui-siông chhin-chhiat, in-ūi lo̍h-hō͘ koh kôaⁿ, chiū khí-hé kā goán chiap-thāi.

³ Pó-lô khioh chi̍t khún chhâ, hiat-lo̍h hé, hit-chūn ū chi̍t bé to̍k-chôa in-ūi hé sio sô--chhut-lâi, tîⁿ tī i ê chhiú.

⁴ Tong-tōe ê goân-chū-bîn khòaⁿ-tio̍h hit-bé chôa tiàu tī Pó-lô ê chhiú--ni̍h, chiū kóng-lâi-kóng-khì, “Chit-ê lâng it-tēng sī sat-jîn-hoān, sui-jiân tùi hái--ni̍h khioh-tio̍h miā, thian-lí bô iông-ún i oa̍h.”

⁵ Pó-lô chiong hit-bé chôa hiù-lo̍h hé--ni̍h, lóng bô siū-siong.

⁶ Hiah-ê lâng lóng kim-kim teh khòaⁿ i ê chhiú ōe chéng--khí-lâi, á-sī i ōe hut-jiân lek--lo̍h-khì, sí--khì á bōe. In thèng-hāu chin kú, khòaⁿ i lóng bô tāi-chì, chiū tian-tò siūⁿ-kóng i sī sîn-bêng.

⁷ Hái-sū ê thâu-ba̍k Pō͘-pek-liû ū chi̍t tè tōe lī hit só͘-chāi bô jōa hn̄g. I hoan-gêng goán tī hia tòa saⁿ ji̍t, chin chhin-chhiat chiap-thāi goán.

⁸ Tng-sî, Pō͘-pek-liû ê lāu-pē hoān-tio̍h jia̍t-pīⁿ kap chhiah-lī, tó tī bîn-chhn̂g. Pó-lô ji̍p--khì, kā i hōaⁿ-chhiú kî-tó, kā i i-hó.

⁹ In-ūi chit-ê tāi-chì, tong-tōe kî-tha ê pīⁿ-lâng mā lâi, mā lóng tit-tio̍h i-hó.

¹⁰ In sàng goán chin chōe lé-mi̍h; goán beh khui-chûn ê sî, chiong goán su-iàu ê mi̍h-kiāⁿ sàng kàu chûn-téng hō͘ goán.

Tùi Má-ní-tha-tó Kàu Lô-má

¹¹ Saⁿ ge̍h-ji̍t āu, goán chē tùi A-le̍k-san-tāi lâi, miâ kiò-chòe “Siang-siⁿ-á-sîn” ê chûn chhut-hoat. Chit-chiah chûn tú tī chit-ê tó-sū kè tang-thiⁿ.

¹² Goán tī Sū-la-kó͘ chiūⁿ-hōaⁿ, tī hia thêng-liû saⁿ ji̍t,

¹³ āu-lâi tùi hia khui-chûn kàu Lī-ki-ong, keh-ji̍t ū thàu lâm-hong, tē-jī ji̍t chiū kàu Pō͘-tiu-lī.

¹⁴ Goán tī hia tú-tio̍h chi̍t-kóa hiaⁿ-tī chí-bē, in chhiáⁿ goán kap in tòa chi̍t lé-pài. Āu-lâi goán lâi kàu Lô-má.

¹⁵ Lô-má ê hiaⁿ-tī chí-bē thiaⁿ-tio̍h siau-sit, chiū lâi A-pí-o͘-chhī kap Sam-koán gêng-chiap. Pó-lô kìⁿ-tio̍h in chiū kám-siā Siōng-tè, koh-khah ū ióng-khì.

Pó-lô tī Lô-má

¹⁶ Goán kàu Lô-má liáu-āu, Pó-lô tit-tio̍h ún-chún kap kò͘-siú i ê peng lēng-gōa tòa.

¹⁷ Saⁿ ji̍t āu, Pó-lô chhiáⁿ tong-tōe Iû-thài-lâng ê léng-siù lâi. In chū-chi̍p ê sî, i tùi in kóng, “Kok-ūi hiaⁿ-tī, góa sui-jiân bô chòe ûi-pōe tông-pau ê tāi-chì á-sī chó͘-sian ê kui-lē, m̄-kú tī Iâ-lō͘-sat-léng siū lia̍h, sàng-kau hō͘ Lô-má tong-kio̍k.

¹⁸ In sím-mn̄g góa, khòaⁿ góa bô hoān-tio̍h kai-sí ê chōe, ū siūⁿ-beh pàng góa;

¹⁹ put-kò Iû-thài-lâng hoán-tùi, góa chiah ko͘-put-chiong tùi hông-tè siōng-sò͘; kî-si̍t góa bô ì-sù beh khòng-kò ka-kī ê tông-pau.

²⁰ In-ūi án-ni, góa chiah iau-kiû kap lín kìⁿ-bīn, kap lín tâm-lūn. Góa sī ūi-tio̍h Í-sek-lia̍t-lâng só͘ ǹg-bāng Hit-ūi chiah siū thih-liān liān--teh.”

²¹ In tùi i kóng, “Koan-hē lí ê tāi-chì, goán pèng bô tùi Iû-thài chiap-tio̍h phoe-sìn, mā bô hiaⁿ-tī lâi tùi goán pò-kò, á-sī kóng lí ê pháiⁿ-ōe.

²² Put-kò goán ài thiaⁿ lí ê kiàn-kái, in-ūi goán chai lín chit-phài ê lâng tī ta̍k só͘-chāi hō͘ lâng hoán-tùi.”

²³ In kap Pó-lô iok-tēng chi̍t ji̍t, kàu sî ū chin chōe lâng lâi Pó-lô tòa ê só͘-chāi. Tùi chá kàu àm, Pó-lô ūi-tio̍h Siōng-tè-kok chòe kiàn-chèng, ín-iōng Mô͘-se ê Lu̍t-hoat kap sian-ti ê chheh khǹg in sìn Iâ-so͘.

²⁴ I só͘ kóng ê ōe ū lâng sìn, ū lâng m̄ sìn.

²⁵ In tiong-kan ê ì-kiàn bô it-tì; in lī-khui í-chêng, Pó-lô kóng chit-kù ōe: “Sèng Sîn thok sian-ti Í-sài-a tùi lín ê chó͘-sian kóng-liáu chin tio̍h!

²⁶ I kóng: Lí khì kā chit-ê chú-bîn kóng: Lín thiaⁿ koh thiaⁿ mā bōe liáu-kái; lín khòaⁿ koh khòaⁿ mā bōe khòaⁿ--kìⁿ.

²⁷ In-ūi chit-ê chú-bîn ê sim í-keng tūn, hī-khang tāng, ba̍k-chiu khoeh. Nā m̄-sī án-ni, in ê ba̍k-chiu ōe khòaⁿ--kìⁿ, hī-khang ōe thiaⁿ--kìⁿ, sim ōe bêng-pe̍k, ōe hôe-sim-tńg-ì, góa chiū kā in i-hó.

²⁸ “Só͘-í, lín tio̍h chai, Siōng-tè chit-ê chín-kiù ê sìn-sit í-keng thoân hō͘ Gōa-pang-lâng. In ōe thiaⁿ-thàn!”

³⁰ Pó-lô tòa tī ka-kī cho͘ ê chhù chiok-chiok nn̄g nî kú. Lâi hóng-būn ê lâng, i lóng kā in chiap-thāi.

³¹ I hó-táⁿ soan-iông Siōng-tè-kok ê sìn-sit, koh kà-sī koan-hē Chú Iâ-so͘ Ki-tok ê sū, lóng bô siū chó͘-tòng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan