Bìoball air-loidhne

使徒行傳 27 - 現代台語譯本羅馬字版

Pó-lô Chē-chûn Khì Lô-má

¹ Hui-su-to͘ í-keng koat-tēng goán tio̍h chē-chûn khì Ì-tāi-lī, in chiū chiong Pó-lô kap kî-tha ê hoān-lâng kau hō͘ hông-ka kìm-ōe-kun chi̍t ê miâ kiò Iû-liû ê kun-koaⁿ.

² Goán chē chi̍t chiah tùi A-tāi-bí-tiân lâi ê chûn; chit-chiah chûn tú-á beh iân A-sè-a-séng kúi-nā ê káng-kháu khui-chûn. Ū chi̍t ê tùi Thiap-sat-lô-nî-ka lâi ê Má-kî-tùn-lâng A-lí-ta̍t-kó͘ kap goán chòe-hé khì.

³ Keh-ji̍t goán kàu Se-tùn. Iû-liû chin chhin-chhiat tùi-thāi Pó-lô, chún i khì kìⁿ i ê pêng-iú, siū in chiau-thāi.

⁴ Goán tùi hia koh khui-chûn, in-ūi ge̍k-hong, chiū sūn Sài-phó͘-lō͘-su-tó óa siám-hong hit-pêng kiâⁿ.

⁵ Goán keng-kè Ki-lī-ka kap Pông-hui-lī-a ê gōa-hái, lâi kàu Lū-ka ê Múi-la.

⁶ Tī hia, kun-koaⁿ Iû-liû chhē-tio̍h chi̍t chiah tùi A-le̍k-san-tāi lâi ê chûn beh khui-khì Ì-tāi-lī, chiū kiò goán chiūⁿ hit-chiah chûn.

⁷ Liân-sòa kúi-nā ji̍t, chûn kiâⁿ chin bān, bián-kióng chiah lâi kàu Kek-nî-thó͘ ê gōa-hái. In-ūi siū-tio̍h hong ê chó͘-tòng, goán chiū sūn Khek-lí-te̍k-tó lâm-pêng óa siám-hong hit-pêng hōaⁿ kiâⁿ tùi Sat-mô͘-nî-kak kè--khì.

⁸ Goán ê chûn sūn hái-kîⁿ kiâⁿ, bián-kióng lâi kàu lī La-se-a bô jōa hn̄g chi̍t ê kiò-chòe An-choân-káng ê só͘-chāi.

⁹ Goán í-keng chhiân chin chōe ji̍t, koh in-ūi kìm-chia̍h ê choeh-kî mā kè-liáu, kiâⁿ-chûn gûi-hiám, só͘-í Pó-lô khǹg tāi-ke,

¹⁰ kóng, “Kok-ūi sian-siⁿ, góa khòaⁿ lán kè-sio̍k kiâⁿ-chûn, m̄-nā hè-mi̍h kap chûn, liân lán ê sìⁿ-miā to ōe tú-tio̍h gûi-hiám koh tōa sún-sit.”

¹¹ M̄-kú kun-koaⁿ lêng-khó siong-sìn chûn-tiúⁿ kap chûn-chú, m̄ thiaⁿ Pó-lô kóng ê ōe.

¹² Koh chit-ê káng-kháu mā bô sek-ha̍p kè tang-thiⁿ, tōa-pō͘-hūn ê lâng chàn-sêng khui-chûn, ǹg-bāng ōe-tàng kóaⁿ-khì Hui-nî-ki kè tang-thiⁿ. Hui-nî-ki sī Khek-lí-te̍k-tó ê chi̍t ê káng-kháu, chi̍t bīn ǹg sai-lâm, chi̍t bīn ǹg sai-pak.

Tú-tio̍h Tōa-hong

¹³ Hit-sî, lâm-hong bî-bî-á chhe--lâi, tāi-ke siūⁿ-kóng ōe sūn-lī kàu bo̍k-te̍k-tōe chiū khí-tiàⁿ, óa Khek-lí-te̍k-tó ê hái-kîⁿ kiâⁿ.

¹⁴ Bô kú ū chi̍t chūn kiò-chòe Iú-la-kek-lô ê tang-pak tōa-hong tùi Khek-lí-te̍k-tó sàu--lo̍h-lâi.

¹⁵ Chûn hō͘ hong sàu, sái bōe kiâⁿ, chiū chhut-chāi i phiau-liû.

¹⁶ Goán lâi kàu chi̍t ê sió-tó kiò-chòe Ko-tāi ê lâm-pêng, siám-hong ê hit-pêng hōaⁿ, bián-kióng chiong kiù-seng-thêng pa̍k hó-sè.

¹⁷ Jiân-āu chúi-siú chiong kiù-seng-thêng thoa khí-lâi chûn-téng, ēng tōa-soh kā i khún--teh. In kiaⁿ-liáu chûn tī Sài-ní-tí ê soa-chiu khò-chhián, chiū lo̍h-phâng, chhut-chāi i phiau-liû.

¹⁸ Pō-hong kè-sio̍k chhe, keh-ji̍t in khai-sí chiong hè-mi̍h tàn-lo̍h hái.

¹⁹ Tē-saⁿ ji̍t, in koh chhin-chhiú chiong chûn-téng ê khì-khū tàn-tiāu.

²⁰ Chin chōe ji̍t, ji̍t-thâu khòaⁿ bōe tio̍h, chhiⁿ mā khòaⁿ bōe tio̍h; hong-éng kè-sio̍k phah kah chin lī-hāi, chòe-āu goán oân-choân hòng-khì tit-kiù ê ǹg-bāng.

²¹ Chèng-lâng chin kú lóng bô chia̍h, Pó-lô khiā tī in tiong-ng, kóng, “Kok-ūi sian-siⁿ, lín chá nā thiaⁿ góa ê ōe, bô tùi Khek-lí-te̍k khui-chûn, chiū bōe tú-tio̍h chit-khoán ê gûi-hiám kap sún-sit.

²² Hiān-chāi góa khǹg lín tio̍h ióng-kám; lín tiong-kan bô kah chi̍t ê lâng ōe sòng-sit sìⁿ-miā; kan-ta ōe sit-lo̍h chit-chiah chûn nā-tiāⁿ.

²³ In-ūi góa só͘ sio̍k só͘ kèng-pài ê Siōng-tè, chā-àm ū chhe I ê thiⁿ-sài lâi tùi góa

²⁴ kóng, ‘Pó-lô, bián kiaⁿ! Lí it-tēng tio̍h khiā tī hông-tè bīn-chêng. Siōng-tè í-keng chiong chûn-lāi lóng-chóng ê lâng kau-thok lí lah.’

²⁵ Só͘-í, tio̍h ióng-kám, in-ūi góa siong-sìn tāi-chì it-tēng ōe chiàu Siōng-tè kā góa kóng án-ni si̍t-hiān.

²⁶ Put-kò lán it-tēng ōe tī chi̍t ê tó-sū khò-chhián.”

²⁷ Kàu tē-cha̍p-sì ji̍t ê àm-sî, goán iáu tī A-tek-lí-a-hái teh phiau-liû. Kàu pòaⁿ-mî, chúi-siú siūⁿ-kóng goán teh-beh óa-kūn lio̍k-tōe,

²⁸ chiū tàn chhek-liōng-soh lo̍h-khì thàm, thàm-chhut ū sì-cha̍p kong-chhioh chhim; khah chìn-chêng, koh thàm chi̍t piàn, thàm-chhut ū saⁿ-cha̍p kong-chhioh chhim.

²⁹ In kiaⁿ-liáu chûn lôe-tio̍h àm-chiau, chiū tùi chûn-bé pha sì ê tiàⁿ, pek-chhiat thèng-hāu thiⁿ kín kng.

³⁰ Chúi-siú siūⁿ-beh pàng-sak chûn tô-cháu, chiong kiù-seng-thêng lūi lo̍h-khì hái--ni̍h, ké-chòe beh tùi chûn-thâu pha-tiàⁿ.

³¹ Pó-lô tùi kun-koaⁿ kap peng-teng kóng, “Chiah-ê lâng nā bô lâu tī chûn-téng, lín chiū bô kiù.”

³² Peng-teng chiū chām-tn̄g kiù-seng-thêng ê soh, hō͘ i lâu--khì.

³³ Thiⁿ beh kng ê sî, Pó-lô khǹg chèng-lâng tio̍h chia̍h. I kóng, “Lín í-keng thèng-hāu cha̍p-sì ji̍t kú lóng bô chia̍h,

³⁴ só͘-í góa khǹg lín tio̍h chia̍h chi̍t-kóa mi̍h-kiāⁿ chiah ōe-tàng oa̍h--lo̍h-khì. Lín liân chi̍t ki thâu-mn̂g to bōe sit-lo̍h.”

³⁵ Pó-lô kóng liáu-āu, the̍h piáⁿ, tī chèng-lâng ê bīn-chêng kám-siā Siōng-tè, peh-khui, chia̍h.

³⁶ Chèng-lâng sim chiū tiāⁿ--lo̍h-lâi, the̍h mi̍h-kiāⁿ chia̍h.

³⁷ Kap goán tâng-chûn ê lâng lóng-chóng ū nn̄g-pah chhit-cha̍p-la̍k ê.

³⁸ Tāi-ke chia̍h pá liáu-āu, chiong be̍h-á tàn-lo̍h hái, hō͘ chûn khah khin.

Chûn Khò-chhián

³⁹ Thiⁿ-kng ê sî, chúi-siú m̄ bat hit-ê só͘-chāi, put-kò in khòaⁿ-tio̍h ū chi̍t ê hái-oan ū soa-than, chiū siūⁿ-khòaⁿ ōe-tàng chiong chûn sái chiūⁿ-than á bōe.

⁴⁰ In kā soh chām-tn̄g, chiong tiàⁿ hiat-lo̍h hái, koh tháu-khui chûn-tōa ê soh, kā chûn-thâu ê phâng tiàu--khí-lâi, hō͘ i chia̍h-hong, hō͘ chûn sái-chiūⁿ than.

⁴¹ M̄-kú chûn lôe-tio̍h soa-phiâⁿ soah khò-chhián; chûn-thâu kā tiâu--teh bōe tín-tāng, chûn-bé hō͘ tōa-éng phah-phòa.

⁴² Peng-teng kiaⁿ-liáu hoān-lâng siû-chúi tô-cháu, siūⁿ-beh kā in lóng thâi-sí.

⁴³ M̄-kú kun-koaⁿ ài-beh kiù Pó-lô, chiū kā in chó͘-chí. I bēng-lēng ōe-hiáu siû ê lâng seng thiàu-lo̍h chúi, siû chiūⁿ-hōaⁿ;

⁴⁴ kî-tha ê lâng chiah lī-iōng chûn-pang á-sī chûn ê phòa-phìⁿ chiūⁿ-lio̍k. Chòe-āu, chèng-lâng lóng an-choân chiūⁿ-hōaⁿ.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan