Bìoball air-loidhne

使徒行傳 26 - 現代台語譯本羅馬字版

Pó-lô ūi Ka-kī Piān-hō͘

¹ A-ki-phà tùi Pó-lô kóng, “Chún lí ūi-tio̍h ka-kī piān-hō͘.” Pó-lô chiū chhun-chhiú khai-sí piān-hō͘:

² “A-ki-phà-ông, kin-á-ji̍t ōe-tàng tī lí ê bīn-chêng ūi-tio̍h Iû-thài-lâng khòng-kò góa it-chhè ê sū sin-piān, góa kám-kak bān-hēng.

³ In-ūi lí tùi Iû-thài-lâng ê koàn-lē kap cheng-lūn ê būn-tôe te̍k-pia̍t cheng-thong, só͘-í góa khún-kiû lí nāi-sim thiaⁿ.

⁴ “Góa tùi siàu-liân kàu taⁿ, khí-thâu tī góa pún-kok, āu-lâi tī Iâ-lō͘-sat-léng, choh-lâng án-chóaⁿ, só͘-ū ê Iû-thài-lâng lóng chai.

⁵ In í-keng bat góa chin kú, nā khéng, ōe-tàng ūi-tio̍h góa choh-chèng. Góa choh chi̍t ê Hoat-lī-sài-lâng, ū chiàu goán ê chong-kàu siōng giâm-keh kàu-phài ê iau-kiû teh seng-oa̍h.

⁶ Hiān-chāi góa khiā tī chia siū sím-phòaⁿ, sī in-ūi góa ǹg-bāng Siōng-tè tùi goán chó͘-sian ê èng-ún ōe si̍t-hiān;

⁷ goán cha̍p-jī chi-cho̍k ê tông-pau mî-ji̍t jia̍t-sim kèng-pài mā-sī ūi-tio̍h beh hō͘ chit-ê ǹg-bāng si̍t-hiān. Ông ah, ūi-tio̍h chit-ê ǹg-bāng, góa chiah siū Iû-thài-lâng khòng-kò.

⁸ Siōng-tè hō͘ sí-lâng koh-oa̍h chit-hāng tāi-chì, lín sī-án-chóaⁿ toàn-tēng bōe-tàng siong-sìn?

⁹ “Í-chêng góa pún-sin mā siūⁿ-kóng tio̍h ēng ta̍k-khoán ê hong-hoat lâi hoán-tùi Ná-sat-le̍k-lâng Iâ-so͘ ê miâ.

¹⁰ Góa tī Iâ-lō͘-sat-léng khak-si̍t ū án-ni chòe, m̄-nā ū tùi chè-si-tiúⁿ niá-siū koân-pèng lia̍h chin chōe sìn-tô͘ koaiⁿ-kaⁿ, koh tī in siū chhú-sí ê sî mā piáu-sī chàn-sêng.

¹¹ Góa sî-siông tī kok-tōe ê hōe-tn̂g kā in hêng-hoa̍t, kiông-pek in siat-to̍k chit-ê sìn-gióng, koh ēng pō-le̍k tùi-thāi in, sīm-chì khì kàu gōa-kok ê siâⁿ-chhī kā in pek-hāi.”

Pó-lô Hóe-kái ê Keng-kè
( Tô͘ 9.1-19 ; 22.6-16 )

¹² “Ū chi̍t piàn, góa tòa chè-si-tiúⁿ ê koân-pèng kap bēng-lēng khì Tāi-má-sū-kek.

¹³ Ông ah, tī pòaⁿ-lō͘, tiong-tàu ê sî, góa khòaⁿ-tio̍h pí ji̍t-thâu koh-khah kiông ê kng tùi thiⁿ-téng chiò--lo̍h-lâi, kā góa kap tâng-kiâⁿ ê lâng tà--teh.

¹⁴ Goán lóng poa̍h lo̍h-khì thô͘-kha. Góa ū thiaⁿ-tio̍h chi̍t ê siaⁿ, ēng Hi-pek-lâi-ōe tùi góa kóng, ‘Sò-lô, Sò-lô, lí sī-án-chóaⁿ teh pek-hāi góa? Lí án-ni chòe, chhin-chhiūⁿ ēng kûn-thâu-bú teh cheng chio̍h-sai, ka-kī thó phê thiàⁿ.’

¹⁵ Góa mn̄g kóng, ‘Chú ah, lí sī sím-mi̍h-lâng?’ Chú kóng, ‘Góa chiū-sī lí teh pek-hāi ê Iâ-so͘.

¹⁶ Khí--lâi, khiā--teh; góa tùi lí hián-hiān sī beh phài lí chòe góa ê po̍k-jîn ūi-tio̍h só͘ khòaⁿ--kìⁿ koan-hē góa ê sū, í-ki̍p chiong-lâi beh tùi lí hián-hiān ê sū choh-chèng.

¹⁷ Góa beh tùi Í-sek-lia̍t-lâng kap Gōa-pang-lâng ê tiong-kan kā lí kiù--chhut-lâi, chhe-khián lí khì in hia,

¹⁸ khui in ê ba̍k-chiu, hō͘ in lī-khui o͘-àm chìn-ji̍p kng-bêng, lī-khui Sat-tàn ê koân-sè kui-ǹg Siōng-tè, hō͘ in tùi sìn góa tit-tio̍h sià-chōe, koh sêng-siū choh Siōng-tè soán-bîn ê tōe-ūi.’”

Pó-lô Soat-bêng I ê Kang-chok

¹⁹ “Só͘-í, A-ki-phà-ông, góa bô ûi-pōe tùi thiⁿ lâi ê īⁿ-siōng.

²⁰ Góa tāi-seng tùi Tāi-má-sū-kek kap Iâ-lō͘-sat-léng ê lâng, āu-lâi tùi Iû-thài choân-tōe ê lâng, mā tùi Gōa-pang-lâng thoân-tō, khǹg in tio̍h hóe-kái lâi kui-ǹg Siōng-tè, koh tio̍h ēng hêng-ûi chèng-bêng in ū chin-chiàⁿ hóe-kái.

²¹ Ūi-tio̍h chit-ê iân-kò͘, Iû-thài-lâng tī Sèng-tiān lāi lia̍h góa, siūⁿ-beh thâi góa.

²² Kàu kin-á-ji̍t, góa tit-tio̍h Siōng-tè ê pang-chān, ōe-tàng khiā tī chia tùi chun-kùi kap pi-bî ê lâng chòe kiàn-chèng. Góa só͘ kóng--ê, kap sian-ti í-ki̍p Mô͘-se só͘ kóng--ê kâng-khoán, sī koan-hē chiong-lâi beh hoat-seng ê sū,

²³ chiū-sī Ki-tok it-tēng tio̍h siū-khó͘, chiâⁿ-chòe thâu chi̍t ê tùi sí-lâng tiong koh-oa̍h--ê, thang chiong chín-kiù ê kng thoân hō͘ Iû-thài-lâng kap Gōa-pang-lâng.”

²⁴ Pó-lô án-ni ūi-tio̍h ka-kī teh piān-hō͘ ê sî, Hui-su-to͘ tùi i tōa-siaⁿ hoah, “Pó-lô, lí khí-kông lah; lí ê phok-ha̍k hō͘ lí khí-kông lah!”

²⁵ Pó-lô kóng, “Hui-su-to͘ kok-hā! Góa pèng bô khí-kông; góa só͘ kóng ê ōe chin-si̍t koh ha̍p-lí.

²⁶ In-ūi ông chai chiah-ê tāi-chì, góa chiah káⁿ tōa-táⁿ tùi ông kóng. Góa siong-sìn ông tùi chiah-ê tāi-chì lóng chin chheng-chhó, in-ūi só͘ hoat-seng chiah-ê tāi-chì bô lâng m̄ chai.

²⁷ A-ki-phà-ông, lí ū siong-sìn sian-ti--bô? Góa chai lí ū.”

²⁸ A-ki-phà tùi Pó-lô kóng, “Lí kóng kúi-kù-á ōe chiū beh sòe-ho̍k góa chòe Ki-tok-tô͘ o͘h!”

²⁹ Pó-lô ìn kóng, “Bô-lūn kúi-kù-á ōe á-sī chin chōe ōe, góa kî-kiû Siōng-tè, m̄-nā sī lí, liân kin-á-ji̍t tī chia só͘-ū thiaⁿ góa kóng-ōe ê lâng mā lóng ōe kap góa kâng-khoán, m̄-kú bô chhin-chhiūⁿ góa hō͘ lâng ēng thih-liān liān--teh.”

³⁰ Ông, chóng-tok, Pek-nî-ki, kap tâng chē ê lâng lóng khiā--khí-lâi.

³¹ In thè-chhut liáu-āu hō͘-siōng tâm-lūn kóng, “Chit-ê lâng pèng bô hoān-tio̍h sím-mi̍h kai-sí á-sī tio̍h koaiⁿ-kaⁿ ê chōe.”

³² A-ki-phà tùi Hui-su-to͘ kóng, “Chit-ê lâng nā bô tùi hông-tè siōng-sò͘, chá chiū thang kā i pàng lah.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan