Bìoball air-loidhne

使徒行傳 23 - 現代台語譯本羅馬字版

¹ Pó-lô chù-ba̍k khòaⁿ gī-oân, kóng, “Kok-ūi hiaⁿ-tī, góa tī Siōng-tè ê bīn-chêng chiàu oân-choân chheng-pe̍k ê liông-sim seng-oa̍h, ti̍t-kàu kin-á-ji̍t.”

² Tōa-chè-si A-ná-nî-a bēng-lēng khiā tī Pó-lô sin-piⁿ ê lâng kā i siàn chhùi-phóe.

³ Pó-lô tùi i kóng, “Lí chit-ê chhat kah pe̍h-pe̍h ê chhiûⁿ, Siōng-tè beh phah lí! Lí khui-têng eng-kai chiàu hoat-lu̍t kā góa sím-phòaⁿ, lí kèng-jiân ûi-hoat bēng-lēng lâng phah góa!”

⁴ Khiā tī Pó-lô piⁿ--á ê lâng kóng, “Lí káⁿ mē Siōng-tè ê tōa-chè-si?”

⁵ Pó-lô ìn kóng, “Hiaⁿ-tī ah, góa m̄ chai i sī tōa-chè-si; Sèng-keng ū kì-chài kóng, ‘M̄-thang bú-jio̍k tī-lí jîn-bîn ê tiúⁿ-koaⁿ.’”

⁶ Pó-lô chi̍t-ē chai-iáⁿ in tiong-kan ū-ê sī Sat-to͘-kai-phài ê lâng, ū-ê sī Hoat-lī-sài-phài ê lâng, chiū tī gī-hōe hoah kóng, “Hiaⁿ-tī, góa sī Hoat-lī-sài-phài ê lâng, sī Hoat-lī-sài-lâng ê kiáⁿ, góa siū sím-mn̄g sī in-ūi ǹg-bāng sí-lâng ê koh-oa̍h!”

⁷ I chi̍t-ē án-ni kóng, Hoat-lī-sài-phài ê lâng kap Sat-to͘-kai-phài ê lâng chiū khí cheng-lūn, gī-hōe mā hun-lia̍t.

⁸ In-ūi Sat-to͘-kai-phài ê lâng kóng bô koh-oa̍h, bô thiⁿ-sài, mā bô kúi-sîn, m̄-kú Hoat-lī-sài-phài ê lâng chit saⁿ hāng lóng ū sìn.

⁹ Soan-jióng ê siaⁿ ná lâi ná tōa, kúi-nā ê Hoat-lī-sài-phài ê keng-ha̍k-kàu-su khiā--khí-lâi, ke̍k-le̍k khòng-gī kóng, “Goán chhē bōe chhut chit-ê lâng ū sím-mi̍h chhò-gō͘. Káⁿ chin-chiàⁿ ū kúi-sîn á-sī thiⁿ-sài tùi i kóng-ōe ô͘?”

¹⁰ Cheng-lūn ná lâi ná ke̍k-lia̍t, chí-hui-koaⁿ kiaⁿ-liáu Pó-lô hō͘ in thiah-chhùi, chiū bēng-lēng peng lo̍h-khì tùi chèng-lâng tiong-kan kā Pó-lô chhiúⁿ--chhut-lâi, chhōa ji̍p-khì iâⁿ-pâng.

¹¹ Hit-mî, Chú khiā tī Pó-lô ê sin-piⁿ, kóng, “Tio̍h ióng-kám! Lí í-keng ū tī Iâ-lō͘-sat-léng ūi-tio̍h góa chòe kiàn-chèng, mā it-tēng tio̍h tī Lô-má ūi-tio̍h góa chòe kiàn-chèng.”

Thâi Pó-lô ê Im-bô͘

¹² Keh-chá-khí, Iû-thài-lâng tàu-tīn kè-bô͘, chiù-chōa nā bô thâi-sí Pó-lô m̄-chia̍h-m̄-lim.

¹³ Ū sì-cha̍p gōa ê lâng chham-ka chit-ê im-bô͘.

¹⁴ In khì kìⁿ chè-si-tiúⁿ kap tiúⁿ-ló, kóng, “Goán í-keng chiù tāng-chōa, nā bô thâi-sí Pó-lô lóng m̄ chia̍h!

¹⁵ Hiān-chāi lín kap gī-hōe tio̍h iau-kiû chí-hui-koaⁿ chhōa Pó-lô lâi hō͘ lín, ké-chòe beh khah siông-sè chhâ-mn̄g i ê àn-kiāⁿ; goán ōe chún-pī hó-sè, tī i kàu chia í-chêng kā i thâi-sí.”

¹⁶ Pó-lô ê gōe-seng thiaⁿ-tio̍h chit-ê bâi-ho̍k ê im-bô͘, chiū ji̍p-khì peng-iâⁿ kā Pó-lô kóng.

¹⁷ Pó-lô chiū chhiáⁿ chi̍t ê kun-koaⁿ lâi, kā i kóng, “Chhiáⁿ chhōa chit-ê siàu-liân-lâng khì kìⁿ chí-hui-koaⁿ, i ū tāi-chì beh kā i pò-kò.”

¹⁸ Kun-koaⁿ chiū chhōa siàu-liân-lâng khì kìⁿ chí-hui-koaⁿ, kóng, “Hit-ê hoān-lâng Pó-lô kiò góa lâi, iau-kiû góa chhōa chit-ê siàu-liân-lâng lâi kìⁿ lí, in-ūi i ū tāi-chì beh kā lí kóng.”

¹⁹ Chí-hui-koaⁿ khan i ê chhiú khì piⁿ--á mn̄g i, “Lí ū sím-mi̍h tāi-chì beh kā góa pò-kò?”

²⁰ I kóng, “Iû-thài-lâng í-keng kóng hó-sè, ké-chòe beh koh-khah siông-sè tiâu-cha Pó-lô ê àn-kiāⁿ, beh chhiáⁿ lí bîn-á-chài kā i sàng-khì gī-hōe.

²¹ Chhiáⁿ lí m̄-thang thiaⁿ in ê ōe, in-ūi ū sì-cha̍p gōa ê lâng bâi-ho̍k teh tán i. In chiù-chōa, nā bô thâi-sí Pó-lô m̄-chia̍h-m̄-lim. Hiān-chāi in lóng chún-pī hó-sè, teh thèng-hāu lí ún-chún.”

²² Chí-hui-koaⁿ chiū hoan-hù siàu-liân-lâng kóng “M̄-thang tùi lâng kóng lí ū pò góa chai chit-hāng tāi-chì”, jiân-āu kiò i tńg--khì.

Hō͘-sàng Pó-lô Khì Hui-le̍k-su Chóng-tok Hia

²³ Chí-hui-koaⁿ kiò nn̄g ê kun-koaⁿ lâi, kā in kóng, “Khì chún-pī pō͘-peng nn̄g-pah ê, bé-peng chhit-cha̍p ê, kap gia̍h-chhiuⁿ ê peng nn̄g-pah ê, thang tī kim-àm káu tiám chhut-hoat khì Khái-sat-lī-a.

²⁴ Koh khì chún-pī bé hō͘ Pó-lô khiâ, hō͘-sàng i an-choân kàu Hui-le̍k-su chóng-tok hia.”

²⁵ Chí-hui-koaⁿ chiū siá chi̍t tiuⁿ phoe án-ni kóng:

²⁶ “Khek-lô-tē Lū-se-a kā chóng-tok Hui-le̍k-su kok-hā chhéng-an.

²⁷ Chit-ê lâng hō͘ Iû-thài-lâng lia̍h--khì, teh-beh hō͘ in thâi-sí ê sî, góa chi̍t-ē chai i sī Lô-má kong-bîn, chiū tòa peng khì kā i kiù.

²⁸ Góa siūⁿ-beh bêng-pe̍k in khòng-kò i ê lí-iû chiū sàng i khì in ê gī-hōe.

²⁹ Góa hoat-kiàn i hō͘ lâng kò sī koan-hē in Lu̍t-hoat ê cheng-lūn, pèng bô hoān-tio̍h sím-mi̍h kai-sí á-sī tio̍h koaiⁿ-kaⁿ ê chōe.

³⁰ Āu-lâi ū lâng kā góa pò-kò Iû-thài-lâng kè-bô͘ beh hāi i, só͘-í góa sûi-sî sàng i khì lí hia, siâng-sî bēng-lēng kò i ê lâng mā tio̍h tī lí ê bīn-chêng kā i khòng-kò.”

³¹ Pō͘-peng chip-hêng bēng-lēng, thàu-mî chiong Pó-lô tòa-khì An-thê-phà-tí.

³² Keh-ji̍t pō͘-peng tńg-khì iâⁿ--ni̍h, hō͘ bé-peng kè-sio̍k hō͘-sàng.

³³ In kàu Khái-sat-lī-a, chiong hit-tiuⁿ phoe the̍h hō͘ chóng-tok, mā chiong Pó-lô kau hō͘ i.

³⁴ Chóng-tok tha̍k hit-tiuⁿ phoe liáu, mn̄g Pó-lô sī tó chi̍t séng ê lâng, chai-iáⁿ sī Ki-lī-ka-séng ê lâng,

³⁵ chiū kóng, “Kò lí ê lâng kàu-ūi ê sî, góa chiah chhú-lí lí ê àn-kiāⁿ.” Āu-lâi chóng-tok bēng-lēng chiong Pó-lô khu-liû tī Hi-lu̍t ê kong-sú.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan