Bìoball air-loidhne

使徒行傳 22 - 現代台語譯本羅馬字版

¹ Pó-lô kóng, “Kok-ūi hū-ló hiaⁿ-tī, chhiáⁿ thiaⁿ góa chit-chūn beh ūi-tio̍h ka-kī piān-hō͘ ê ōe.”

² In chi̍t-ē thiaⁿ-tio̍h Pó-lô ēng Hi-pek-lâi-ōe tùi in kóng-ōe, chiū koh-khah an-chēng. Pó-lô kóng:

³ “Góa sī Iû-thài-lâng, tī Ki-lī-ka ê Tāi-sò͘ chhut-sì, tī Iâ-lō͘-sat-léng tōa-hàn, chòe Ka-má-lia̍t ê ha̍k-seng, kap kin-á-ji̍t tī chia ê chu-ūi kâng-khoán ū siū lán chó͘-sian Lu̍t-hoat giâm-keh ê kàu-io̍k, jia̍t-sim ho̍k-sāi Siōng-tè.

⁴ Góa bat pek-hāi sìn-hōng chit-ê Tō-lō͘ ê lâng, hō͘ in tì-kàu sí, bô-lūn lâm, lú, lóng kā in lia̍h-khì koaiⁿ-kaⁿ.

⁵ Tōa-chè-si kap gī-hōe lóng-chóng ê tiúⁿ-ló ōe-tàng ūi góa choh-chèng. Góa mā ū tùi in tit-tio̍h hō͘ Tāi-má-sū-kek Iû-thài tông-pau ê phoe. Āu-lâi góa ū khì hia beh pa̍k tòa tī hia ê sìn-tô͘, kā in lia̍h-lâi Iâ-lō͘-sat-léng siū hêng-hoa̍t.

Pó-lô Kui Chú ê Keng-kè
( Tô͘ 9.1-19 ; 26.12-18 )

⁶ “Góa kiâⁿ beh kàu Tāi-má-sū-kek ê sî, chha-put-to sī tiong-tàu, hut-jiân ū chin kiông ê kng tùi thiⁿ-téng chiò tī góa ê chiu-ûi.

⁷ Góa poa̍h lo̍h-khì thô͘-kha, thiaⁿ-tio̍h ū siaⁿ tùi góa kóng, ‘Sò-lô, Sò-lô! Lí sī-án-chóaⁿ teh pek-hāi góa?’

⁸ Góa mn̄g kóng, ‘Chú ah, lí sī sím-mi̍h-lâng?’ I ìn góa kóng, ‘Góa chiū-sī lí teh pek-hāi ê Ná-sat-le̍k-lâng Iâ-so͘.’

⁹ Hiah-ê kap góa chòe-tīn kiâⁿ ê lâng ū khòaⁿ-tio̍h hit-ê kng, bô thiaⁿ-tio̍h tùi góa kóng-ōe Hit-ūi ê siaⁿ.

¹⁰ Góa koh mn̄g kóng, ‘Chú ah, góa tio̍h chòe sím-mi̍h?’ Chú tùi góa kóng, ‘Khí--lâi, ji̍p-khì Tāi-má-sū-kek, tī hia ū lâng ōe chiong góa beh chí-phài lí khì chòe lóng-chóng ê tāi-chì kā lí kóng.’

¹¹ In-ūi hit-ê kng chin chha̍k-ba̍k, góa soah bōe khòaⁿ--kìⁿ, góa ê tâng-phōaⁿ chiū khan góa ji̍p-khì Tāi-má-sū-kek.

¹² “Tī hia ū chi̍t ê lâng kiò-chòe A-ná-nî-a, sī chi̍t ê chun-siú Mô͘-se Lu̍t-hoat khiân-sêng ê lâng, put-chí siū Tāi-má-sū-kek ê Iû-thài-lâng chun-kèng.

¹³ I lâi chhē góa, khiā tī góa ê sin-piⁿ, kóng, ‘Sò-lô hiaⁿ-tī, hō͘ lí ōe koh khòaⁿ--kìⁿ!’ Hit-chūn góa sûi-sî ōe khòaⁿ--kìⁿ, ū khòaⁿ-tio̍h i.

¹⁴ I kóng, ‘Lán chó͘-sian ê Siōng-tè í-keng kéng-soán lí, hō͘ lí chai I ê chí-ì, thang khòaⁿ-kìⁿ I hit-ūi Kong-gī ê Po̍k-jîn, koh thiaⁿ-tio̍h I ê chhùi só͘ chhut ê siaⁿ,

¹⁵ in-ūi lí ōe chiong lí só͘ khòaⁿ--kìⁿ só͘ thiaⁿ--tio̍h-ê tùi bān-bîn chòe kiàn-chèng.

¹⁶ Ná iáu-teh iân-chhiân, khí-lâi niá-siū sóe-lé, kiû-kiò I ê miâ thang hō͘ lí ê chōe tit-tio̍h chheng-khì!’”

Pó-lô Siū Tiàu tùi Gōa-pang-lâng Thoân-tō

¹⁷ “Āu-lâi, góa tò-khì Iâ-lō͘-sat-léng; tī Sèng-tiān teh kî-tó ê sî ji̍p-sîn,

¹⁸ khòaⁿ-tio̍h Chú kā góa kóng, ‘Kóaⁿ-kín, sûi-sî lī-khui Iâ-lō͘-sat-léng, in-ūi chit só͘-chāi ê lâng bōe chiap-siū lí ūi-tio̍h góa só͘ chòe ê kiàn-chèng.’

¹⁹ Góa ìn kóng, ‘Chú ah, in ka-kī chai góa í-chêng khì ta̍k-ê hōe-tn̂g lia̍h sìn lí ê lâng koaiⁿ-lo̍h kaⁿ, koh kā in phah.

²⁰ Lí ê kiàn-chèng-jîn Sū-thê-hoán hō͘ lâng sat-hāi ê sî, góa mā khiā tī piⁿ--á, chàn-tông in, koh kā hāi-sí i ê lâng kò͘ gōa-saⁿ.’

²¹ Chú tùi góa kóng, ‘Lí khì, in-ūi góa beh chhe lí khì hn̄g-hn̄g ê Gōa-pang-lâng hia.’”

²² Chèng-lâng it-ti̍t chù-ì thiaⁿ, kàu Pó-lô kóng chit-kù ōe ê sî, in tōa-siaⁿ hoah, “Chit-khoán lâng tio̍h tùi tōe-chiūⁿ siau-bia̍t! M̄-thang hō͘ i oa̍h!”

²³ In tōa-siaⁿ jióng, thiah-phòa gōa-saⁿ, ǹg khong-tiong iā thô͘-hún ê sî,

²⁴ Lô-má ê chí-hui-koaⁿ bēng-lēng lâng chiong Pó-lô ah ji̍p-khì iâⁿ-pâng, ēng piⁿ kā i phah, ūi-tio̍h beh khak-si̍t chai Iû-thài-lâng sī-án-chóaⁿ teh kā i jióng.

²⁵ In kā i pa̍k khí-lâi beh piⁿ-phah ê sî, Pó-lô tùi khiā tī piⁿ--á ê kun-koaⁿ kóng, “Tùi chi̍t ê bô siū phòaⁿ-chōe ê Lô-má kong-bîn, lín ēng piⁿ kā i phah kiám ū ha̍p-hoat?”

²⁶ Hit-ê kun-koaⁿ chi̍t-ē thiaⁿ--tio̍h chiū khì kìⁿ chí-hui-koaⁿ, tùi i kóng, “Taⁿ beh án-chóaⁿ? Chit-ê lâng sī Lô-má kong-bîn!”

²⁷ Chí-hui-koaⁿ khì kìⁿ Pó-lô, mn̄g i kóng, “Kā góa kóng, lí sī Lô-má ê kong-bîn sī--bô?” Pó-lô ìn kóng, “Sī.”

²⁸ Chí-hui-koaⁿ kóng, “Góa ēng chin chōe chîⁿ chiah tit-tio̍h chit-ê kong-bîn-koân.” Pó-lô kóng, “Góa chhut-sì chiū-sī Lô-má kong-bîn.”

²⁹ Hiah-ê beh sím-mn̄g Pó-lô ê lâng sûi-sî lī-khui. Chí-hui-koaⁿ chi̍t-ē chai Pó-lô sī Lô-má kong-bîn, koh in-ūi kā i pa̍k--teh, chiū chin kiaⁿ.

Pó-lô tī Gī-hōe Sin-sò͘

³⁰ Keh-ji̍t, Chí-hui-koaⁿ ài chai Iû-thài-lâng khòng-kò Pó-lô khak-si̍t ê lí-iû, chiū kā i tháu-khui, koh bēng-lēng chè-si-tiúⁿ kap choân gī-hōe chū-chi̍p, chhōa Pó-lô chhut--lâi, hō͘ i khiā tī in bīn-chêng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan