Bìoball air-loidhne

使徒行傳 21 - 現代台語譯本羅馬字版

Pó-lô Chiūⁿ Iâ-lō͘-sat-léng

¹ Lī-pia̍t chèng-lâng liáu-āu, goán khui-chûn it-ti̍t kàu Ko-sū, keh-ji̍t kàu Lô-tí, tùi hia khì Phà-tāi-lat,

² tī hia tú-tio̍h chi̍t chiah beh kè-khì Hui-nî-ki ê chûn, goán chiū chiūⁿ-chûn chhut-hoat.

³ Goán lâi kàu khòaⁿ ōe tio̍h Sài-phó͘-lō͘-su ê sî, tùi lâm-pêng se̍h--kè, khì Sū-lī-a, tī Thài-ní lo̍h-chûn, in-ūi chûn beh tī hia lo̍h-hè.

⁴ Goán chhē-tio̍h chi̍t-kóa bûn-tô͘, tī hia kap in tòa chhit ji̍t. In tit-tio̍h Sèng Sîn ê chí-sī, khǹg Pó-lô m̄-thang chiūⁿ Iâ-lō͘-sat-léng.

⁵ Goán kap in lī-pia̍t ê sî-kan kàu chiū lī-khui, kè-sio̍k goán ê lō͘-thêng. In lóng chhōa in ê bó͘-kiáⁿ sàng goán kàu siâⁿ-gōa, tī hái-piⁿ kūi lo̍h-khì kî-tó,

⁶ hō͘-siōng saⁿ-sî liáu-āu goán chiūⁿ-chûn, in tò-khì in tau.

⁷ Goán kè-sio̍k hâng-thêng tùi Thài-ní khì kàu To-lī-mái, tī hia kā sìn-tô͘ chhéng-an, kap in tòa chi̍t ji̍t.

⁸ Keh-ji̍t, goán chhut-hoat khì Khái-sat-lī-a, tī hia tòa tī thoân hok-im ê Hui-le̍k ê chhù, i sī Iâ-lō͘-sat-léng hit chhit ê chip-sū ê chi̍t ê.

⁹ I ū sì ê iáu-bē kiat-hun ê cha-bó͘-kiáⁿ, lóng chòe sian-ti ōe kóng ū-giân.

¹⁰ Goán tòa tī hia kúi-nā ji̍t ê tiong-kan, ū chi̍t ê sian-ti kiò-chòe A-ka-pò͘ tùi Iû-thài lo̍h--lâi.

¹¹ I lâi chhē goán, the̍h Pó-lô ê io-tòa pa̍k ka-kī ê kha kap chhiú, kóng, “Sèng Sîn án-ni kóng, ‘Chit-tiâu io-tòa ê chú-lâng ōe tī Iâ-lō͘-sat-léng chhin-chhiūⁿ án-ni hō͘ Iû-thài-lâng pa̍k--khí-lâi, jiân-āu kau hō͘ Gōa-pang-lâng.’”

¹² Goán chi̍t-ē thiaⁿ--tio̍h, chiū kap hit só͘-chāi ê lâng khó͘-khǹg Pó-lô m̄-thang chiūⁿ Iâ-lō͘-sat-léng.

¹³ Pó-lô ìn kóng, “Lín ná khàu kah án-ni, hō͘ góa ê sim kiông-beh chhùi--khì? Góa ūi-tio̍h Chú Iâ-so͘ ê miâ, m̄-nā tī Iâ-lō͘-sat-léng hō͘ lâng pa̍k, sīm-chì tī hia sí mā kam-goān.”

¹⁴ I m̄ siū khó͘-khǹg, goán chiū tiām-tiām, chí-ū kóng, “Goān Chú ê chí-ì si̍t-hiān!”

¹⁵ Kúi-nā ji̍t āu, goán chún-pī hó-sè, chiū chiūⁿ Iâ-lō͘-sat-léng.

¹⁶ Ū chi̍t-kóa tùi Khái-sat-lī-a lâi ê bûn-tô͘ mā kap goán khì, chhōa goán khì Sài-phó͘-lō͘-su-lâng Ná-sun ê chhù tòa; i sī chá-kî ê bûn-tô͘.

Pó-lô Hóng-būn Ngá-kok

¹⁷ Goán kàu Iâ-lō͘-sat-léng ê sî, sìn-tô͘ jia̍t-sêng chiap-thāi goán.

¹⁸ Keh-ji̍t, Pó-lô kap goán khì hóng-būn Ngá-kok; kàu-hōe ê chèng tiúⁿ-ló lóng tī hia.

¹⁹ Pó-lô kā in chhéng-an, jiân-āu chiong Siōng-tè thong-kè i tī Gōa-pang-lâng ê tiong-kan só͘ chòe ê kang-chok chi̍t-hāng chi̍t-hāng tùi in pò-kò.

²⁰ In thiaⁿ-liáu lóng kui êng-kng hō͘ Siōng-tè, tùi Pó-lô kóng, “Hiaⁿ-tī, lí chai, tī chia ū kúi-nā bān Iû-thài-lâng chiâⁿ-chòe sìn-tô͘, in lóng jia̍t-sim chun-siú Lu̍t-hoat.

²¹ In ū thiaⁿ-tio̍h lí kà-sī tòa tī Gōa-pang ê Iû-thài-lâng, kiò in hòng-khì Mô͘-se ê Lu̍t-hoat, m̄-bián kā in ê gín-á kiâⁿ kat-lé, mā m̄-bián siú Iû-thài-lâng ê hong-sio̍k si̍p-koàn.

²² In it-tēng ōe thiaⁿ-tio̍h lí lâi chia ê siau-sit, án-ni beh án-chóaⁿ?

²³ Taⁿ tio̍h chiàu goán kā lí kóng--ê khì chòe. Chia ū sì ê hē-goān ê ta-po͘-lâng;

²⁴ lí chhōa in chòe-hé khì chham-ka kiat-chēng-lé, thòe in la̍p só͘-hùi, hō͘ in thang thì-thâu. Lí án-ni chòe, chèng-lâng chiū chai, in só͘ thiaⁿ--tio̍h koan-hē lí ê sū m̄-sī sū-si̍t, koh chai lí ka-kī mā ū teh chun-siú Mô͘-se ê Lu̍t-hoat.

²⁵ Put-kò tùi í-keng chòe sìn-tô͘ ê Gōa-pang-lâng, goán í-keng ū siá-phoe kā in kóng, goán ū chhâi-koat kiò in m̄-thang chia̍h chè ngó͘-siōng ê mi̍h, huih, kap ni̍h-sí ê cheng-siⁿ, mā m̄-thang ū îm-loān.”

²⁶ Keh-ji̍t, Pó-lô chhōa hit sì ê ta-po͘-lâng kap in chòe-hé khì chham-ka kiat-chēng-lé, jiân-āu ji̍p-khì Sèng-tiān pò-kò kiat-chēng-lé sím-mi̍h sî móa, thang ūi-tio̍h in ta̍k-ê lâng hiàn chè-mi̍h.

Pó-lô tī Sèng-tiān Siū Lia̍h

²⁷ Chhit ji̍t ê kî teh-beh móa ê sî, chi̍t-kóa tùi A-sè-a lâi ê Iû-thài-lâng ū khòaⁿ-tio̍h Pó-lô tī Sèng-tiān lāi, chiū siàn-tōng kûn-chiòng lia̍h Pó-lô,

²⁸ hoah kóng, “Í-sek-lia̍t-lâng, lâi tàu-saⁿ-kāng chi̍t-ē! Chit-ê lâng ta̍k só͘-chāi kà lâng hoán-tùi Í-sek-lia̍t-lâng kap Mô͘-se ê Lu̍t-hoat, mā hoán-tùi chit-ê Sèng-tiān. Hiān-chāi i koh káⁿ chhōa Hi-la̍h-lâng chìn-ji̍p Sèng-tiān, ù-jiám chit-ê sîn-sèng ê só͘-chāi.”

²⁹ In-ūi in ū khòaⁿ-tio̍h Í-hut-só͘-lâng Te̍k-lô-hui-mô͘ kap Pó-lô chòe-hé tī siâⁿ-lāi, siūⁿ-kóng Pó-lô ū chhōa i ji̍p-khì Sèng-tiān.

³⁰ Choân-siâⁿ jiáu-loān--khí-lâi, bîn-chiòng lóng cháu óa--lâi; in lia̍h Pó-lô, kā i thoa chhut-khì Sèng-tiān ê gōa-bīn, tiān ê mn̂g sûi-sî koaiⁿ--khí-lâi.

³¹ In tú siūⁿ-beh thâi Pó-lô ê sî, ū siau-sit thoân kàu Lô-má kun-iâⁿ ê chí-hui-koaⁿ hia, kóng choân Iâ-lō͘-sat-léng teh khí jiáu-loān.

³² Chí-hui-koaⁿ sûi-sî tòa peng kap kun-koaⁿ cháu kàu bîn-chiòng hia. Bîn-chiòng chi̍t-ē khòaⁿ-tio̍h chí-hui-koaⁿ kap peng chiū thêng-chhiú, bô koh phah Pó-lô.

³³ Chí-hui-koaⁿ óa-khì lia̍h Pó-lô, kiò lâng ēng nn̄g tiâu thih-liān kā i liān--teh, koh mn̄g i sī siáⁿ-lâng, ū chòe sím-mi̍h tāi-chì.

³⁴ Kûn-chiòng chi̍t ê hoah chi̍t khoán, in-ūi loān-chhau-chhau, chí-hui-koaⁿ bô hoat-tō͘ thang chai si̍t-chêng, chiū bēng-lēng peng ah Pó-lô ji̍p-khì iâⁿ-pâng.

³⁵ Pó-lô teh-beh peh gîm-á ê sî, in-ūi kûn-chiòng hiông-kài-kài, peng soah tio̍h kā Pó-lô kng--ji̍p-khì.

³⁶ Kûn-chiòng tè tī āu-bīn hoah kóng, “Hō͘ i sí!”

Pó-lô ūi Ka-kī Piān-hō͘

³⁷ Pó-lô tú-beh hō͘ lâng ah ji̍p-khì iâⁿ-pâng ê sî tùi chí-hui-koaⁿ kóng, “Góa ōe-tàng kā lí kóng chi̍t kù ōe bōe?” Chí-hui-koaⁿ mn̄g kóng, “Lí bat Hi-la̍h-gú o͘h!

³⁸ Án-ni lí chiū m̄-sī hit-ê bô kú í-chêng chō-hoán, chhōa sì chheng ê sat-chhiú cháu-khì khòng-iá ê Ai-ki̍p-lâng lo͘h.”

³⁹ Pó-lô ìn kóng, “Góa sī Iû-thài-lâng, chhut-sì tī Ki-lī-ka ê Tāi-sò͘, sī chi̍t ê put-chí ū-miâ ê siâⁿ-chhī ê chhī-bîn. Chhiáⁿ lí chún góa tùi bîn-chiòng kóng-ōe.”

⁴⁰ Chí-hui-koaⁿ ún-chún, Pó-lô chiū khiā tī gîm-á téng tùi bîn-chiòng pí chhiú-sè. Chèng-lâng lóng tiām--lo̍h-khì, Pó-lô chiū ēng Hi-pek-lâi-ōe tùi in kóng-ōe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan