Bìoball air-loidhne

使徒行傳 20 - 現代台語譯本羅馬字版

Pó-lô Hóng-būn Má-kî-tùn kap Hi-la̍h

¹ Jiáu-loān pêng-chēng liáu-āu, Pó-lô tiàu-chi̍p bûn-tô͘, kā in bián-lē, kap in saⁿ-sî, chiū lī-khui hia khì Má-kî-tùn.

² I keng-kè hiah-ê tōe-khu, kóng chin chōe ōe bián-lē sìn-tô͘, jiân-āu khì Hi-la̍h,

³ tī hia tòa saⁿ kò-ge̍h. I chún-pī beh chē-chûn khì Sū-lī-a ê sî, Iû-thài-lâng kè-bô͘ beh hāi i, chiū koat-tēng keng-kè Má-kî-tùn tńg--khì.

⁴ Kap i chòe-hé khì--ê, ū Pì-lí-a-lâng Pit-lô-su ê kiáⁿ Só͘-pa-te̍k, koh ū Thiap-sat-lô-nî-ka-lâng A-lí-ta̍t-kó͘ kap Se-kong-to͘, Te̍k-pì-lâng Kai-iû, koh ū Thê-mô͘-thài kap A-sè-a-lâng Chhui-ki-kó͘ kap Te̍k-lô-hui-mô͘.

⁵ Chiah-ê lâng seng chhut-hoat, tī Te̍k-lô-a teh thèng-hāu goán.

⁶ Tû-kàⁿ-choeh kè-liáu, goán tùi Hui-li̍p-pí khui-chûn, gō͘ ji̍t āu kàu Te̍k-lô-a kap in hōe-ha̍p, tī hia tòa chhit ji̍t.

Pó-lô Chòe-āu Chi̍t Piàn Hóng-būn Te̍k-lô-a

⁷ Pài-la̍k àm, goán tāi-ke chū-hōe peh-piáⁿ ê sî, Pó-lô kap tāi-ke tâm-lūn, in-ūi keh-ji̍t chiū beh lī-khui, só͘-í kóng kàu pòaⁿ-mî.

⁸ Goán teh chū-hōe hit-keng lâu-téng ê pâng-keng ū tiám chin chōe teng-hé.

⁹ Ū chi̍t ê siàu-liân-lâng, kiò-chòe Iû-chhui-kó͘, chē tī thang-á-mn̂g, Pó-lô kè-sio̍k kóng chin kú, i soah khùn tāng-bîn, tùi saⁿ-lâu poa̍h--lo̍h-khì, tāi-ke kā i hû--khí-lâi ê sî í-keng sí.

¹⁰ Pó-lô lo̍h-khì, phak tī i ê seng-khu, kā i lám--teh, kóng, “M̄-bián tio̍h-kip, i iáu ū khùi.”

¹¹ Jiân-āu i koh peh-khì lâu-téng, peh-piáⁿ, chia̍h, kè-sio̍k kap in tâm-lūn chin kú, kàu thiⁿ-kng chiah lī-khui.

¹² In kā hit-ê oa̍h--khí-lâi ê siàu-liân-lâng chhōa--tńg-khì, tāi-ke siū chin tōa ê an-ùi.

Tùi Te̍k-lô-a Khì Bí-lī-to͘

¹³ Goán seng chiūⁿ-chûn, khui-khì A-sok, thang tī hia chiap Pó-lô chiūⁿ-chûn; in-ūi i beh kiâⁿ lio̍k-lō͘ khì hia, só͘-í ū án-ni an-pâi.

¹⁴ I tī A-sok kap goán hōe-ha̍p, goán chiū chiap i chiūⁿ-chûn khì Bí-chhui-lī-nî.

¹⁵ Goán tùi hia khui-chûn, keh-ji̍t kàu Ki-o ê tùi-bīn-hōaⁿ, chi̍t ji̍t āu tī Sat-mô͘ khò-hōaⁿ, koh keh-ji̍t kàu Bí-lī-to͘.

¹⁶ Pó-lô í-keng koat-tēng bô ài tī Í-hut-só͘ thêng-liû, chiah bián tī A-sè-a chhiân sî-kan. I beh kóaⁿ-kín khì Iâ-lō͘-sat-léng, khòaⁿ ōe-tàng tī Gō͘-sûn-choeh í-chêng kàu-ūi bōe.

Pó-lô Khoàn-bián Í-hut-só͘ ê Tiúⁿ-ló

¹⁷ Pó-lô tùi Bí-lī-to͘ chhe lâng khì Í-hut-só͘, tiàu-chi̍p kàu-hōe ê tiúⁿ-ló lâi.

¹⁸ In kàu-ūi ê sî, Pó-lô tùi in kóng, “Tùi góa lâi kàu A-sè-a hit-ji̍t khí it-ti̍t kàu hiān-chāi, góa kap lín án-chóaⁿ chòe-hé seng-oa̍h, lín lóng chai.

¹⁹ Sui-jiân góa ū tùi Iû-thài-lâng ê kè-bô͘ siū-tio̍h chhì-liān, iáu-kú hui-siông khiam-pi koh lâu ba̍k-sái teh ho̍k-sāi Chú.

²⁰ Bô-lūn tī kong-kiōng ê tiûⁿ-ha̍p á-sī kò-pia̍t ê ka-têng, nā tùi lín ū lī-ek--ê, góa m̄-bat bô tùi lín thoân, bô kā lín kà;

²¹ tùi Iû-thài-lâng kap Hi-la̍h-lâng, góa lóng giâm-giâm khoàn-kò in tio̍h hóe-kái kui-ǹg Siōng-tè, koh sìn lán ê Chú Iâ-so͘.

²² Hiān-chāi, góa sūn-ho̍k Sèng Sîn beh khì Iâ-lō͘-sat-léng, tī hia ōe tú-tio̍h sím-mi̍h tāi-chì, góa m̄ chai,

²³ put-kò góa chai, Sèng Sîn kā góa kéng-kò, kóng tī ta̍k-ê siâⁿ-chhī ū kaⁿ-ga̍k kap hoān-lān teh thèng-hāu góa.

²⁴ M̄-kú ūi-tio̍h beh kiâⁿ-oân góa ê lō͘-thêng, oân-sêng Chú Iâ-so͘ kau-tài góa ê jīm-bū, thang kiàn-chèng Siōng-tè un-tián ê hok-im, góa oân-choân bô sioh ka-kī ê sìⁿ-miā.

²⁵ “Góa it-ti̍t tī lín tiong-kan chhut-ji̍p teh soan-iông Siōng-tè-kok, hiān-chāi góa chai, í-āu lín bōe-tàng koh kìⁿ-tio̍h góa.

²⁶ Só͘-í, kin-á-ji̍t góa kā lín kóng chheng-chhó, lín tiong-kan nā ū lâng tîm-lûn, m̄-sī góa ê chek-jīm,

²⁷ in-ūi góa í-keng chiong Siōng-tè ê chí-ì lóng-chóng thoân hō͘ lín lah.

²⁸ Lín ka-kī tio̍h kín-sīn, mā tio̍h chiàu-kò͘ Sèng Sîn kau-thok hō͘ lín lóng-chóng ê iûⁿ-kûn, choh kam-tok lâi bo̍k-ióng Siōng-tè ê kàu-hōe, chiū-sī I ēng ka-kī ê Kiáⁿ ê sí lâi sio̍k-hôe--ê.

²⁹ Góa chai góa lī-khui liáu-āu ū hiong-ok ê chhâi-lông ōe ji̍p-lâi lín tiong-kan siong-hāi iûⁿ-kûn.

³⁰ Sīm-chì tī lín tiong-kan ū lâng ōe chhut-lâi khiok-kái chin-lí, ín-iú bûn-tô͘ khì tè in.

³¹ Só͘-í, lín tio̍h kéng-séng, ōe-kì-tit góa saⁿ nî kú mî-ji̍t lâu ba̍k-sái khoàn-kài lín ta̍k-ê lâng.

³² “Hiān-chāi góa chiong lín kau-thok hō͘ Siōng-tè, thang tùi I un-tián ê sìn-sit tit-tio̍h chō-chiū, hō͘ lín kap sèng-hòa kui Chú ê lâng lóng thang kè-sêng I só͘ sù ê hok-hūn.

³³ Góa m̄-bat tham lâng ê kim, gûn, á-sī i-ho̍k.

³⁴ Lín ka-kī chai, góa ēng chit nn̄g ki chhiú chòe kang lâi kiong-kip ka-kī kap tâng-phōaⁿ ê su-iàu.

³⁵ Ta̍k-hāng sū góa lóng ū chòe hō͘ lín khòaⁿ, ài lín it-tēng tio̍h phah-piàⁿ chòe kang lâi pang-chān loán-jio̍k ê lâng. Tio̍h ōe-kì-tit Chú Iâ-so͘ ka-kī só͘ kóng ê ōe: ‘Hō͘-lâng--ê pí niá-siū--ê khah ū hok-khì.’”

³⁶ Chiah-ê ōe kóng soah, Pó-lô kap in tāi-ke lóng kūi lo̍h-khì kî-tó.

³⁷ Tāi-ke tōa-siaⁿ háu, kā i lám, kā i chim;

³⁸ in-ūi Pó-lô kóng “Í-āu bōe-tàng koh saⁿ-kìⁿ” chit-kù ōe hō͘ in hui-siông siong-sim. Jiân-āu in sàng i chiūⁿ-chûn.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan