Bìoball air-loidhne

使徒行傳 19 - 現代台語譯本羅馬字版

Pó-lô tī Í-hut-só͘

¹ A-pho-lô tī Ko-lîm-to ê sî, Pó-lô keng-kè lōe-lio̍k ê tōe-khu, lâi kàu Í-hut-só͘, tī hia ū tú-tio̍h kúi-nā ê bûn-tô͘.

² I mn̄g in, “Lín sìn Chú ê sî ū niá-siū Sèng Sîn bô?” In ìn kóng, “Bô, goán kàu taⁿ m̄-bat thiaⁿ-tio̍h kóng ū Sèng Sîn.”

³ Pó-lô koh mn̄g kóng, “Án-ni, lín niá-siū--ê sī sím-mi̍h sóe-lé?” In ìn kóng, “Sī Iok-hān ê sóe-lé.”

⁴ Pó-lô kóng, “Iok-hān ê sóe-lé sī hóe-kái ê sóe-lé; i kiò Í-sek-lia̍t-lâng tio̍h sìn tè tī i āu-bīn lâi Hit-ūi, chiū-sī tio̍h sìn Iâ-so͘.”

⁵ In thiaⁿ-liáu chiū hōng Chú Iâ-so͘ ê miâ niá-siū sóe-lé.

⁶ Pó-lô chi̍t-ē kā in hōaⁿ-chhiú, Sèng Sîn chiū kàng-lîm tī in sin-chiūⁿ, in chiū ēng lêng-gú kóng-ōe, koh soan-káng Siōng-tè ê sìn-sit.

⁷ In lóng-chóng ū cha̍p-jī ê lâng.

⁸ Pó-lô liân-sòa saⁿ ge̍h-ji̍t kú ji̍p-khì hōe-tn̂g hó-táⁿ thoân-tō, kap lâng piān-lūn Siōng-tè-kok ê sū, khó͘-khǹg in sìn Chú.

⁹ Put-kò ū chi̍t-kóa lâng kò͘-chip m̄ sìn, tī hōe-chiòng bīn-chêng húi-pòng Chú ê Tō-lō͘. Pó-lô chiū chhōa bûn-tô͘ lī-khui in, ta̍k-ji̍t tī Chhui-lat-lô͘ ê káng-tn̂g kap lâng tâm-lūn.

¹⁰ Án-ni kè-sio̍k nn̄g nî kú, só͘-ū tòa tī A-sè-a-séng ê lâng, bô-lūn Iû-thài-lâng á-sī Hi-la̍h-lâng, lóng ū thiaⁿ-kìⁿ Chú ê sìn-sit.

Sū-ki-óa ê Kiáⁿ

¹¹ Siōng-tè ēng Pó-lô ê chhiú kiâⁿ kî-īⁿ ê sîn-jiah;

¹² sīm-chì ū lâng the̍h Pó-lô ēng--kè ê chhiú-kun á-sī ûi-kûn khǹg tī pīⁿ-lâng sin-chiūⁿ, in ê pīⁿ chiū hó--khì, siâ-sîn chiū tùi in chhut--khì.

¹³ Hit-sî ū kúi-nā ê kiâⁿ-kang-ô͘ teh kóaⁿ-kúi ê Iû-thài-lâng, mā siūⁿ-beh chioh Chú Iâ-so͘ ê miâ chè-ap siâ-sîn hū-sin ê lâng, kóng, “Góa hōng Pó-lô só͘ thoân Iâ-so͘ ê miâ bēng-lēng lín chhut--khì!”

¹⁴ Iû-thài ê chè-si-tiúⁿ Sū-ki-óa ê chhit ê kiáⁿ mā teh chòe chit-khoán tāi-chì.

¹⁵ M̄-kú siâ-sîn ìn kóng, “Iâ-so͘ góa bat, Pó-lô góa mā bat, lín leh, lín sī sím-mi̍h-lâng?”

¹⁶ Hit-ê hō͘ siâ-sîn hū-sin ê lâng chhi̍h óa-khì kong-kek hiah-ê kiâⁿ-kang-ô͘--ê, kā in chè-ho̍k, hō͘ in siū-siong, chhiah-sin-lō͘-thé tùi hit-keng chhù tô-cháu.

¹⁷ Tòa tī Í-hut-só͘ só͘-ū ê Iû-thài-lâng kap Hi-la̍h-lâng thiaⁿ-tio̍h chit-hāng tāi-chì lóng chin tio̍h-kiaⁿ; Chú Iâ-so͘ ê miâ tōa siū chun-chông.

¹⁸ Ū chin chōe í-keng sìn ê lâng chhut--lâi, kong-khai sêng-jīn koh pò lâng chai in kè-khì só͘ chòe ê tāi-chì.

¹⁹ Ū chin chōe kiâⁿ siâ-su̍t ê lâng the̍h in ê chheh lâi, khǹg kui-tui, tī chèng-lâng ê bīn-chêng pàng-hé sio. In kè-sǹg chheh ê kè-ta̍t, tāi-iok ū gō͘-bān ê gûn-goân.

²⁰ Tùi án-ni, Chú ê sìn-sit it-ti̍t thoân-khui, tōa-tōa heng-ōng.

Tī Í-hut-só͘ ê Pō-tōng

²¹ Chiah-ê tāi-chì liáu-āu, Pó-lô siū Sèng Sîn kám-tōng, koat-tēng beh keng-kè Má-kî-tùn kap A-kai-a khì Iâ-lō͘-sat-léng. I kóng, “Góa kàu hia í-āu mā it-tēng tio̍h khì hóng-būn Lô-má.”

²² I chiū chhe nn̄g ê chō͘-chhiú Thê-mô͘-thài kap Í-la-to͘ khì Má-kî-tùn, ka-kī chiām-sî lâu tī A-sè-a.

²³ Tú hit-sî, koan-hē Chú ê Tō-lō͘ tī Í-hut-só͘ ín-khí giâm-tiōng ê jiáu-loān.

²⁴ Ū chi̍t ê kiò-chòe Tí-bí-te̍k ê phah-kim sai-hū, i ēng gûn chō lú-sîn A-tí-bí ê biō ê bô͘-hêng, hō͘ chi̍t-kóa sai-hū thàn bōe chió chîⁿ.

²⁵ Tí-bí-te̍k kā hiah-ê sai-hū kap só͘-ū ê tông-gia̍p chi̍p óa--lâi, tùi in kóng, “Kok-ūi, lín chai lán sī khò chit-ê kang-gē teh thàn-chîⁿ.

²⁶ Hiān-chāi lín ū khòaⁿ--tio̍h koh ū thiaⁿ-tio̍h chit-ê Pó-lô teh chòe ê tāi-chì. I kóng, ‘Lâng ê chhiú só͘ chō--ê lóng m̄-sī sîn.’ Chiah-ê ōe m̄-nā tī Í-hut-só͘, mā chha-put-to tī choân A-sè-a-séng, ū hō͘ chin chōe lâng siū kiau-so khì tè in.

²⁷ Án-ni, m̄-nā lán chit-ê sū-gia̍p ōe phah-pháiⁿ miâ-siaⁿ, liân úi-tāi ê lú-sîn A-tí-bí ê biō to ōe hō͘ lâng khin-sī, choân A-sè-a-séng kap choân sè-kài só͘ teh pài chit-ê lú-sîn ê chun-giâm mā ōe siū phò-hoāi!”

²⁸ Kûn-chiòng chi̍t-ē thiaⁿ-tio̍h chiah-ê ōe hui-siông siū-khì, tōa-siaⁿ hoah, “Í-hut-só͘-lâng ê A-tí-bí chin úi-tāi!”

²⁹ Choân-siâⁿ lóng loān--khí-lâi; chèng-lâng thoa Pó-lô ê tâng-phōaⁿ Má-kî-tùn-lâng Kai-iû kap A-lí-ta̍t-kó͘, kui-tīn chòe-chi̍t-ē chhiong ji̍p-khì kio̍k-tiûⁿ.

³⁰ Pó-lô siūⁿ-beh ji̍p-khì kûn-chiòng lāi-bīn, m̄-kú bûn-tô͘ kā i chó͘-chí.

³¹ Ū kúi-nā ê A-sè-a-séng ê koaⁿ-oân, sī Pó-lô ê pêng-iú, mā chhe lâng khì khǹg Pó-lô m̄-thang ji̍p-khì kio̍k-tiûⁿ.

³² Hit-sî kui-ê hōe-tiûⁿ loān-chhau-chhau, chi̍t lâng hoah chi̍t hāng; tōa-pō͘-hūn ê lâng m̄ chai in sī-án-chóaⁿ teh chū-chi̍p.

³³ Kûn-chiòng tiong-kan ū lâng chiong jiáu-loān ê chek-jīm kui hō͘ A-le̍k-san-tāi, in-ūi Iû-thài-lâng kā i sak chhut-khì thâu-chêng. A-le̍k-san-tāi chiū pí chhiú-sè kiò in an-chēng, siūⁿ-beh kā in piān-bêng.

³⁴ In chi̍t-ē jīn-chhut i sī Iû-thài-lâng, chiū lóng chôe-siaⁿ hoah, “Í-hut-só͘-lâng ê A-tí-bí chin úi-tāi!” Án-ni ti̍t-ti̍t hoah, hoah nn̄g tiám-cheng kú.

³⁵ Hit-ê siâⁿ ê su-kì-koaⁿ hō͘ kûn-chiòng lóng an-chēng liáu-āu, kóng, “Í-hut-só͘-lâng, siáⁿ-lâng m̄ chai Í-hut-só͘-siâⁿ sī úi-tāi ê A-tí-bí-biō kap tùi thiⁿ lak--lo̍h-lâi hit-tè sèng-chio̍h ê siú-hō͘-chiá?

³⁶ Kì-jiân bô lâng ōe-tàng hó͘-jīn chit-ê tāi-chì, lín eng-kai an-chēng, m̄-thang chhiong-tōng.

³⁷ Lín thoa chiah-ê lâng lâi chia, m̄-kú in pèng bô chhiúⁿ sī-biō, mā bô siat-to̍k lán ê lú-sîn.

³⁸ Tí-bí-te̍k kap i ê sai-hū nā beh khòng-kò, ū khui-têng ê ji̍t-chí kap chú-chhî sò͘-siōng ê koaⁿ-tiúⁿ, in thang thê-chhut kò-sò͘.

³⁹ Lín nā ū kî-tha ê iau-kiû, thang tī tēng-kî ê hōe-gī kái-koat.

⁴⁰ Kin-á-ji̍t só͘ hoat-seng ê tāi-chì, lán kiaⁿ-liáu ōe hō͘ lâng tui-kiù chek-jīm, koh tùi chit-khoán ê hūn-loān, lán mā the̍h bōe chhut lí-iû thang piān-kái.”

⁴¹ Kóng chiah-ê ōe liáu-āu, I chiū soan-pò͘ sòaⁿ-hōe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan