Bìoball air-loidhne

使徒行傳 16 - 現代台語譯本羅馬字版

Thê-mô͘-thài Tè Pó-lô kap Se-la Khì Thoân-tō

¹ Pó-lô koh khì Te̍k-pì kap Lō͘-su-tek, tī hia ū chi̍t ê bûn-tô͘ kiò-chòe Thê-mô͘-thài, lāu-bú sī Iû-thài-lâng, sī sìn-tô͘, lāu-pē sī Hi-la̍h-lâng.

² Lō͘-su-tek kap Í-ko-liām ê sìn-tô͘ lóng chheng-chàn i.

³ Pó-lô siūⁿ-beh chhōa i chòe-hé khì, chiū kā i kiâⁿ kat-lé, in-ūi hit só͘-chāi ê Iû-thài-lâng lóng chai i ê lāu-pē sī Hi-la̍h-lâng.

⁴ In chi̍t ê siâⁿ kè chi̍t ê siâⁿ chiong Iâ-lō͘-sat-léng ê sù-tô͘ kap tiúⁿ-ló só͘ gī-koat ê kui-lē kau hō͘ in khì chun-siú.

⁵ Tùi án-ni, ta̍k kàu-hōe ê sìn-sim ná kian-kò͘, jîn-sò͘ ji̍t-ji̍t ke-thiⁿ.

Má-kî-tùn ê Ho͘-siaⁿ

⁶ In-ūi Sèng Sîn chó͘-chí Pó-lô kap Se-la tī A-sè-a-séng thoân-tō, in chiū tùi Hut-lū-ka kap Ka-lia̍p-thài ê tōe-hng keng-kè.

⁷ In lâi kàu Múi-se-a pian-kài ê sî, siūⁿ-beh ji̍p-khì Pì-chhui-nî-séng, put-kò Iâ-so͘ ê Sîn m̄-chún,

⁸ in chiū se̍h-kè Múi-se-a, lo̍h-khì Te̍k-lô-a.

⁹ Hit-àm, Pó-lô khòaⁿ-kìⁿ īⁿ-siōng, ū chi̍t ê Má-kî-tùn-lâng khiā--teh, kā i khún-kiû kóng, “Chhiáⁿ kè-lâi Má-kî-tùn pang-chān goán!”

¹⁰ Pó-lô khòaⁿ-kìⁿ chit-ê īⁿ-siōng liáu-āu, goán sûi-sî chún-pī beh khì hia, in-ūi khak-sìn Siōng-tè ū ho͘-tiàu goán khì thoân hok-im hō͘ Má-kî-tùn-lâng.

Lū-tí-a Kui Chú

¹¹ Goán tùi Te̍k-lô-a khui-chûn, ti̍t-ti̍t khui-khì Sat-mô͘-te̍k-lat, keh-ji̍t kàu Nî-a-pho-lí.

¹² Goán tùi hia lâi kàu Má-kî-tùn tē-it khu ê siâⁿ Hui-li̍p-pí; chit-ê siâⁿ sī Lô-má ê si̍t-bîn-khu. Goán tī hia tòa kúi-nā ji̍t.

¹³ Tī An-hioh-ji̍t, goán chhut-siâⁿ khì hô-piⁿ, siūⁿ-kóng tī hia ū kî-tó ê só͘-chāi. Goán chē--lo̍h-khì, chiū tùi chū-chi̍p tī hia ê hū-lú kóng tō-lí.

¹⁴ Ū chi̍t ê bōe chí-sek-pò͘ ê Chhui-ngá-chhui-lat ê hū-lú, miâ kiò-chòe Lū-tí-a, sī kèng-ùi Siōng-tè ê lâng, i mā lâi thiaⁿ. Chú khui i ê sim, hō͘ i choan-sim thiaⁿ Pó-lô só͘ kóng ê ōe.

¹⁵ I kap choân-ke lóng siū sóe-lé, āu-lâi i khún-kiû goán kóng, “Lín nā khòaⁿ góa ū chin-si̍t sìn Chú, chhiáⁿ lâi tòa goán tau.” I án-ni kā goán kiông lâu--teh, goán chiū lâu--lo̍h-lâi.

Pó-lô kap Se-la tī Hui-li̍p-pí Chē-kaⁿ

¹⁶ Ū chi̍t ji̍t, goán beh khì kî-tó ê só͘-chāi, ū tú-tio̍h chi̍t ê hō͘ pok-kòa ê sîn hū-sin ê cha-bó͘ lô͘-lē, i khò pok-kòa hō͘ chú-lâng thàn chin chōe chîⁿ.

¹⁷ I tè tī Pó-lô kap goán āu-bīn, tōa-siaⁿ hoah, “Chiah-ê lâng sī Chì-koân Siōng-tè ê po̍k-jîn, beh tùi lín soan-pò͘ tit-kiù ê tō-lō͘.”

¹⁸ I chin chōe ji̍t lóng án-ni hoah; Pó-lô kám-kak chin thó-ià, chiū oa̍t kè-khì kā hit-ê siâ-sîn kóng, “Góa hōng Iâ-so͘ Ki-tok ê miâ bēng-lēng lí tùi i chhut--khì!” Siâ-sîn sûi-sî tùi i chhut--khì.

¹⁹ Cha-bó͘ lô͘-lē ê chú-lâng khòaⁿ-tio̍h in thàn-chîⁿ ê ǹg-bāng lóng bô--khì, chiū kā Pó-lô kap Se-la khiú--teh, thoa in khì chhī-tiong-sim kìⁿ koaⁿ-oân,

²⁰ kau hō͘ Lô-má koaⁿ-tiúⁿ, khòng-kò in, kóng, “Chiah-ê lâng lâi teh jiáu-loān lán ê siâⁿ; in sī Iû-thài-lâng,

²¹ teh thoân lán Lô-má-lâng m̄ eng-kai chiap-siū á-sī chun-siú ê hong-sio̍k si̍p-koàn.”

²² Kûn-chiòng chham-teh kong-kek, koaⁿ-tiúⁿ chiū pak Pó-lô kap Se-la ê saⁿ, bēng-lēng lâng ēng kùn-á kā in kòng.

²³ Peng-teng kā in kòng chin chōe ē liáu-āu, kā in koaiⁿ-lo̍h kaⁿ, koh bēng-lēng kò͘-kaⁿ ê lâng giâm-bi̍t khàn-siú.

²⁴ Kò͘-kaⁿ ê lâng chiap-tio̍h bēng-lēng, chiū kā in koaiⁿ-lo̍h lāi-kaⁿ, siang-kha khàu tī chhâ-kông.

²⁵ Chha-put-to pòaⁿ-mî, Pó-lô kap Se-la teh kî-tó, gîm-si o-ló Siōng-tè, kî-tha ê hoān-lâng lóng chù-ì teh thiaⁿ.

²⁶ Hut-jiân ū tōa tōe-tāng, tì-kàu kaⁿ-ga̍k ê tōe-ki iô-choah; só͘-ū ê kaⁿ-mn̂g sûi-sî khui, hoān-lâng ê só-liān lóng lak--khì.

²⁷ Kò͘-kaⁿ ê lâng chhíⁿ--khí-lâi, khòaⁿ-tio̍h kaⁿ-mn̂g khui-khui, siūⁿ-kóng hoān-lâng lóng tô-cháu, chiū pu̍ih to beh chū-sat.

²⁸ Pó-lô tōa-siaⁿ hoah, “M̄-thang siong-hāi ka-kī, goán lóng tī chia.”

²⁹ Kò͘-kaⁿ ê lâng kiò lâng gia̍h-teng lâi, chông--ji̍p-khì, phi̍h-phi̍h-chhoah phak tī Pó-lô kap Se-la ê kha-chêng,

³⁰ jiân-āu chhōa in chhut--khì, mn̄g kóng, “Sian-siⁿ, góa tio̍h chòe sím-mi̍h chiah ōe tit-tio̍h kiù?”

³¹ In kóng, “Tio̍h sìn Chú Iâ-so͘, lí kap lí ê ke chiū ōe tit-tio̍h kiù.”

³² In chiū chiong Chú ê tō-lí kóng hō͘ i kap in choân-ke ê lâng thiaⁿ.

³³ Hit-mî, kò͘-kaⁿ ê lâng chhōa Pó-lô kap Se-la khì sóe khang-chhùi, jiân-āu i kap choân-ke ê lâng lóng sûi-sî siū sóe-lé.

³⁴ I chhōa in ji̍p-khì i ê chhù, chún-pī mi̍h-kiāⁿ hō͘ in chia̍h. I kap choân-ke lóng tōa hoaⁿ-hí, in-ūi in í-keng sìn Siōng-tè.

³⁵ Keh-chá-khí, Lô-má ê koaⁿ-tiúⁿ phài kéng-koaⁿ lâi, kóng, “Kā hit nn̄g ê lâng pàng--chhut-khì.”

³⁶ Kò͘-kaⁿ ê lâng chiong chiah-ê ōe kā Pó-lô kóng, “Koaⁿ-tiúⁿ ū kau-tài beh pàng lín chhut--khì; taⁿ lín chhut--lâi, pêng-an lī-khui.”

³⁷ M̄-kú Pó-lô tùi kéng-koaⁿ kóng, “Goán sī Lô-má kong-bîn, bô siū sím-mn̄g chiū tī chèng-lâng ê bīn-chêng ēng kùn-á kā goán kòng, koh kā goán koaiⁿ-lo̍h kaⁿ, chit-chūn in beh tiām-tiām-á kā goán kóaⁿ--chhut-khì sī--bô? Bōe-ēng--tit! Kiò Lô-má koaⁿ-tiúⁿ chhin-sin lâi chhōa goán chhut--khì!”

³⁸ Kéng-koaⁿ chiong chiah-ê ōe tùi Lô-má ê koaⁿ-tiúⁿ pò-kò. In chi̍t-ē thiaⁿ-tio̍h Pó-lô kap Se-la sī Lô-má kong-bîn chiū chin kiaⁿ-hiâⁿ,

³⁹ lâi kaⁿ--ni̍h khǹg in, chhōa in chhut--lâi, chhiáⁿ in lī-khui hit-ê siâⁿ.

⁴⁰ Pó-lô kap Se-la lī-khui kaⁿ-ga̍k, chiū khì Lū-tí-a in tau, kap sìn-tô͘ kìⁿ-bīn, kā in kó͘-lē liáu-āu chiah lī-khui.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan