Bìoball air-loidhne

使徒行傳 15 - 現代台語譯本羅馬字版

Iâ-lō͘-sat-léng Hōe-gī

¹ Ū kúi-nā ê lâng tùi Iû-thài lo̍h-lâi An-thê-o teh kà-sī sìn-tô͘ kóng, “Lín nā bô chiàu Mô͘-se ê kui-kú siū kat-lé chiū bōe tit-tio̍h kiù.”

² Pó-lô í-ki̍p Pa-ná-pa kap in ū ke̍k-lia̍t ê cheng-piān. Ūi-tio̍h chit-ê būn-tôe, tāi-ke koat-tēng phài Pó-lô, Pa-ná-pa, kap in tiong-kan kúi-nā ê lâng chiūⁿ Iâ-lō͘-sat-léng khì kìⁿ sù-tô͘ í-ki̍p tiúⁿ-ló, kap in chham-siông.

³ Kàu-hōe ê lâng sàng in chhut-hoat. In keng-kè Hui-nî-ki kap Sat-má-lī-a, tùi chèng sìn-tô͘ pò-kò Gōa-pang-lâng kui Chú ê sū. Tāi-ke thiaⁿ-liáu lóng chin hoaⁿ-hí.

⁴ In kàu Iâ-lō͘-sat-léng ê sî, siū-tio̍h kàu-hōe, sù-tô͘, kap tiúⁿ-ló hoan-gêng. In chiong Siōng-tè kap in tông-chāi só͘ chòe it-chhè ê sū kā tāi-ke pò-kò.

⁵ Put-kò ū kúi-nā ê sio̍k Hoat-lī-sài-phài ê sìn-tô͘ khiā khí-lâi kóng, “Gōa-pang-lâng it-tēng tio̍h siū kat-lé, koh tio̍h bēng-lēng in chun-siú Mô͘-se ê Lu̍t-hoat.”

⁶ Ūi-tio̍h chit-ê būn-tôe, sù-tô͘ kap tiúⁿ-ló khui-hōe thó-lūn.

⁷ Piān-lūn chin kú liáu-āu, Pí-tek khiā--khí-lâi, kóng, “Kok-ūi hiaⁿ-tī, lín chai Siōng-tè chá chiū tùi lín tiong-kan kéng-soán góa, thang hō͘ Gōa-pang-lâng thiaⁿ góa só͘ thoân hok-im ê sìn-sit lâi sìn.

⁸ Hit-ūi chai lâng lāi-sim ê Siōng-tè sù Sèng Sîn hō͘ Gōa-pang-lâng, kap ū sù hō͘ lán kâng-khoán, chèng-bêng I ū chiap-la̍p in.

⁹ Tùi sìn, I ū kā in ê sim sóe chheng-khì; I tùi-thāi lán kap in lóng bô chha-pia̍t.

¹⁰ Kì-jiân sī án-ni, lín sī-án-chóaⁿ iáu-teh chhì-thàm Siōng-tè, chiong lán ê chó͘-sian kap lán taⁿ bōe khí ê tàⁿ khòa tī hiah-ê bûn-tô͘ ê keng-thâu téng?

¹¹ M̄ eng-kai án-ni, lán siong-sìn tio̍h thong-kè Chú Iâ-so͘ ê un-tián chiah ōe tit-tio̍h kiù; in mā-sī án-ni.”

¹² Tāi-ke lóng chēng-chēng thiaⁿ Pa-ná-pa kap Pó-lô kóng-khí Siōng-tè thong-kè in tī Gōa-pang-lâng ê tiong-kan só͘ kiâⁿ it-chhè ê sîn-jiah kî-sū.

¹³ In kóng soah, Ngá-kok kóng, “Kok-ūi hiaⁿ-tī, chhiáⁿ thiaⁿ góa kóng.

¹⁴ Tú-chiah Se-bûn ū kóng-tio̍h Siōng-tè tong-chho͘ án-chóaⁿ khòaⁿ-kò͘ Gōa-pang-lâng, tùi in tiong-kan kéng lâng lâi kui-sio̍k I ka-kī.

¹⁵ Sian-ti ū kóng-khí kap chit-ê siâng-khoán ì-sù ê ōe. Chiàu Sèng-keng só͘ kì-chài:

¹⁶ Chú kóng: Chiah-ê sū í-āu góa beh tò-tńg--lâi, beh tiông-kiàn í-keng tó-hoāi ê Tāi-pi̍t ê ke. Góa beh tùi hong-hòe tiong koh kā i khí-chō, beh têng-sin kā i kiàn-li̍p--khí-lâi,

^17-18 thang hō͘ só͘ chhun ê lâng, chiū-sī só͘-ū siū ho͘-tiàu kui góa ê Gōa-pang-lâng, lóng ōe chhē-kiû Chú. Hit-ūi chiong chiah-ê sū tùi kó͘-chá chiū hō͘ lâng chai ê Chú án-ni soan-pò͘.

¹⁹ “Só͘-í, chiàu góa ê phòaⁿ-toàn, lán m̄-thang kā hiah-ê kui-ǹg Siōng-tè ê Gōa-pang-lâng tiau-lân,

²⁰ put-kò tio̍h siá-phoe hoan-hù in m̄-thang chia̍h pài ngó͘-siōng bô chheng-khì ê mi̍h; m̄-thang îm-loān; m̄-thang chia̍h ni̍h-sí ê cheng-siⁿ kap huih.

²¹ In-ūi tùi kó͘-chá í-lâi, Mô͘-se ê Lu̍t-hoat tī ta̍k-ê siâⁿ-chhī lóng ū lâng soan-káng, ta̍k-ê An-hioh-ji̍t, tī ta̍k-ê hōe-tn̂g lóng ū lâng soan-tho̍k.”

Kià Hō͘ Gōa-pang-lâng Sìn-tô͘ ê Phoe

²² Hit-sî, sù-tô͘ kap tiúⁿ-ló, í-ki̍p choân kàu-hōe koat-tēng beh tùi in tiong-kan kéng lâng, chhe in kap Pó-lô, Pa-ná-pa chòe-hé khì An-thê-o. In só͘ soán-phài--ê sī kiò-chòe Pa-sat-pa ê Iû-tāi kap Se-la. Chit nn̄g ê lâng tī hiaⁿ-tī ê tiong-kan sī léng-tō jîn-bu̍t.

²³ Sù-tô͘ kau-tài in tòa--khì ê phoe án-ni siá: “Goán chiah-ê choh sù-tô͘ kap tiúⁿ-ló ê hiaⁿ-tī, kā tòa tī An-thê-o, Sū-lī-a, kap Ki-lī-ka ê Gōa-pang-lâng sìn-tô͘ chhéng-an!

²⁴ Thiaⁿ-kóng ū tùi goán chia chhut--khì ê lâng khì lín hia, in ēng goán bô chí-sī in kóng ê ōe kā lín kiáu-jiáu, hō͘ lín ê sim siū-tio̍h jiáu-loān.

²⁵ Ūi-tio̍h án-ni, goán tâng-sim-ha̍p-ì koat-tēng kéng lâng, chhe in kap goán só͘ kèng-ài ê Pó-lô í-ki̍p Pa-ná-pa khì lín hia;

²⁶ chit nn̄g ê lâng ūi-tio̍h lán ê Chú Iâ-so͘ Ki-tok kam-goān hiàn sìⁿ-miā.

²⁷ Só͘-í, goán chhe-phài Iû-tāi kap Se-la khì, in ōe chhin-chhùi kā lín kóng kap phoe-lāi só͘ siá kâng-khoán ê tāi-chì.

²⁸ In-ūi Sèng Sîn kap goán koat-tēng, ē-bīn chiah-ê tiōng-iàu sū-hāng í-gōa, bô koh ke-thiⁿ lín ê hū-tam:

²⁹ Chiū-sī m̄-thang chia̍h pài ngó͘-siōng ê mi̍h; m̄-thang chia̍h huih kap ni̍h-sí ê cheng-siⁿ; mā m̄-thang îm-loān. Chiah-ê tāi-chì lín nā bô hoān--tio̍h chiū hó. Goān lín pêng-an!”

³⁰ In siū-phài lo̍h-khì An-thê-o, tī hia tiàu-chi̍p choân-thé sìn-tô͘, chiong phoe kau hō͘ in.

³¹ Chèng-lâng tha̍k-tio̍h hit-tiuⁿ phoe, in-ūi kó͘-lē ê ōe móa-sim hoaⁿ-hí.

³² Iû-tāi kap Se-la, in pún-sin mā-sī sian-ti, ū tùi sìn-tô͘ kóng chin chōe kó͘-lē ê ōe, kian-kò͘ in ê sìn-sim.

³³ In tī hia tòa chi̍t tōaⁿ sî-kan liáu-āu, siū sìn-tô͘ hoan-sàng, pêng-an tò-khì chhe in lâi ê lâng ê só͘-chāi.

³⁵ Pó-lô kap Pa-ná-pa kè-sio̍k tòa tī An-thê-o; in kap kî-tha chin chōe lâng chòe-hé kà-sī koh soan-káng Chú ê sìn-sit.

Pó-lô kap Pa-ná-pa Hun-khui

³⁶ Kúi-nā ji̍t āu, Pó-lô tùi Pa-ná-pa kóng, “Lán koh lâi-khì chêng thoân Chú ê sìn-sit hiah-ê siâⁿ-chhī thàm sìn-tô͘, khòaⁿ in ê chêng-hêng.”

³⁷ Pa-ná-pa ài-beh chhōa kiò-chòe Má-khó ê Iok-hān chòe-hé khì,

³⁸ m̄-kú Pó-lô siūⁿ-kóng bô sek-ha̍p, in-ūi Má-khó bat tī Pông-hui-lī-a lī-khui in, bô kè-sio̍k kap in chòe kang.

³⁹ In nn̄g ê lâng ì-kiàn ke̍k-lia̍t chhiong-tu̍t, tì-kàu tio̍h hun-khui. Pa-ná-pa chhōa Má-khó chē-chûn khì Sài-phó͘-lō͘-su;

⁴⁰ Pó-lô kéng Se-la, sìn-tô͘ chiong i kau-thok tī Chú ê un-tián, i chiū chhut-hoat.

⁴¹ I kiâⁿ-thàu Sū-lī-a kap Ki-lī-ka, kian-kò͘ ta̍k kàu-hōe ê sìn-sim.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan