Bìoball air-loidhne

使徒行傳 14 - 現代台語譯本羅馬字版

Pó-lô kap Pa-ná-pa tī Í-ko-liām

¹ Siâng-khoán ê tāi-chì mā hoat-seng tī Í-ko-liām. Pó-lô kap Pa-ná-pa ji̍p-khì Iû-thài-lâng ê hōe-tn̂g káng-tō, kiat-kó ū chin chōe Iû-thài-lâng kap Hi-la̍h-lâng lâi sìn.

² M̄-kú hiah-ê m̄-sìn ê Iû-thài-lâng siàn-tōng Gōa-pang-lâng, hō͘ in iàm-ò͘ⁿ sìn-tô͘, tùi in khí hoán-kám.

³ Put-kò in nn̄g lâng tī hia tòa chin kú, khò Chú ióng-kám soan-káng; Chú sù in lêng-le̍k kiâⁿ sîn-jiah kî-sū, chèng-bêng in só͘ thoân un-tián ê sìn-sit sī chin-si̍t.

⁴ Siâⁿ-lāi ê kûn-chiòng soah hun-lia̍t, ū-ê óa Iû-thài-lâng, ū-ê óa sù-tô͘.

⁵ Hit-sî, Gōa-pang-lâng kap Iû-thài-lâng í-ki̍p in ê koaⁿ-tiúⁿ kè-bô͘ siong-hāi sù-tô͘, beh ēng chio̍h-thâu kā in tìm.

⁶ Sù-tô͘ chai chit-ê tāi-chì, chiū tô-pī khì Lū-ko-nî ê Lō͘-su-tek kap Te̍k-pì nn̄g ê siâⁿ í-ki̍p chiu-ûi ê tōe-hng,

⁷ tī hia kè-sio̍k thoân hok-im.

Tī Lō͘-su-tek kap Te̍k-pì

⁸ Tī Lō͘-su-tek, ū chi̍t ê lâng nńg-kha, put-sî chē--teh, tùi chhut-sì chiū bōe kiâⁿ.

⁹ I thiaⁿ Pó-lô káng-tō; Pó-lô chù-ba̍k kā i khòaⁿ, khòaⁿ-kìⁿ i ū sìn-sim thang tit-tio̍h i-tī,

¹⁰ chiū tōa-siaⁿ kóng, “Khiā--khí-lâi, khiā ti̍t-ti̍t!” Hit-ê lâng chiū thiàu khí-lâi kiâⁿ.

¹¹ Kûn-chiòng khòaⁿ-tio̍h Pó-lô ê só͘-chòe, chiū ēng Lū-ko-nî ê ōe tōa-siaⁿ hoah, “Ū sîn-bêng hòa-sin chòe lâng kàng-lîm tī lán tiong-kan lah!”

¹² In chheng-ho͘ Pa-ná-pa chòe Tiū-su, chheng Pó-lô chòe Hi-ní-bí, in-ūi i sī chú-káng-chiá.

¹³ Siâⁿ-gōa ū chi̍t ê Tiū-su-biō ê chè-si, i khan gû koh the̍h hoe-khoân lâi kàu siâⁿ-mn̂g-kháu, beh kap chèng-lâng chòe-hé hiàn-chè.

¹⁴ Pa-ná-pa kap Pó-lô nn̄g ê sù-tô͘ thiaⁿ--tio̍h chiū thiah-phòa saⁿ, chông ji̍p-khì kûn-chiòng lāi-bīn, hoah kóng,

¹⁵ “Lín ná teh chòe chit-khoán tāi-chì? Goán mā-sī lâng, kap lín lóng kâng-khoán. Goán lâi chia thoân hok-im sī beh hō͘ lín lī-khui hu-ké ê ngó͘-siōng, lâi kui-ǹg hit-ūi oa̍h-oa̍h ê Siōng-tè; I sī thiⁿ, tōe, hái, kap kî-tiong bān-mi̍h ê Chhòng-chō-chú.

¹⁶ Chá-chêng ê sè-tāi, I iông-ún bān-bîn kiâⁿ ka-kī ê lō͘.

¹⁷ Put-kò I it-ti̍t ū thong-kè só͘ chòe ê hó-sū lâi hián-bêng I ka-kī, chiū-sī tùi thiⁿ lo̍h-hō͘, hō͘ lín chiàu-sî siu-sêng, chia̍h-mi̍h chhiong-chiok, sim-lāi hoaⁿ-hí boán-chiok.”

¹⁸ Sù-tô͘ kóng chiah-ê ōe chiah lím-lím-á chó͘-chí kûn-chiòng tùi in hiàn-chè.

¹⁹ Ū chi̍t-kóa tùi Pí-se-tí ê An-thê-o kap Í-ko-liām lâi ê Iû-thài-lâng siàn-tōng kûn-chiòng ēng chio̍h-thâu tìm Pó-lô, siūⁿ-kóng i í-keng sí, chiū kā i thoa chhut-khì siâⁿ-gōa.

²⁰ Bûn-tô͘ ûi óa-lâi ê sî, i khiā--khí-lâi, kiâⁿ ji̍p-khì siâⁿ-lāi. Keh-ji̍t, i kap Pa-ná-pa chòe-hé khì Te̍k-pì.

Tò-khì Sū-lī-a ê An-thê-o

²¹ Pó-lô kap Pa-ná-pa tī Te̍k-pì thoân hok-im, hō͘ chin chōe lâng chiâⁿ-chòe bûn-tô͘. Āu-lâi in tò-khì Lō͘-su-tek, Í-ko-liām, kap An-thê-o,

²² iân-lō͘ kian-kò͘ bûn-tô͘ ê sìn-sim, kó͘-lē in chhî-siú sìn-gióng, koh tùi in kóng, “Lán tio̍h keng-kè chin chōe khó͘-lān chiah ōe-tàng chìn-ji̍p Siōng-tè-kok.”

²³ In nn̄g lâng tī ta̍k-ê kàu-hōe soán-phài tiúⁿ-ló, ēng kìm-chia̍h kî-tó chiong in kau-thok hō͘ só͘ sìn ê Chú.

²⁴ In nn̄g lâng keng-kè Pí-se-tí lâi kàu Pông-hui-lī-a,

²⁵ tī Pia̍t-ka káng-tō liáu-āu lo̍h-khì A-tāi-lī,

²⁶ tùi hia chē-chûn tò-khì An-thê-o; chiū-sī tī chia kàu-hōe ū chiong in kau-thok tī Siōng-tè ê un-tián, chhe in chhut-khì chòe hiān-chāi í-keng oân-sêng ê kang-chok.

²⁷ In kàu An-thê-o chiū tiàu-chi̍p kàu-hōe ê chèng sìn-tô͘, chiong Siōng-tè kap in chòe-hé chòe ê it-chhè, í-ki̍p I kā Gōa-pang-lâng khui sìn-gióng ê mn̂g ê keng-kè, lóng tùi in pò-kò.

²⁸ Āu-lâi in kap chèng bûn-tô͘ tòa chi̍t tōaⁿ sî-kan.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan