Bìoball air-loidhne

使徒行傳 13 - 現代台語譯本羅馬字版

Sèng Sîn Chí-phài Pa-ná-pa kap Sò-lô

¹ An-thê-o ê kàu-hōe ū kúi-nā ê sian-ti kap kàu-su, chiū-sī Pa-ná-pa, hō͘ lâng kiò-chòe “O͘-lâng” ê Se-biān, Kó͘-lī-nāi-lâng Lō͘-kiû, kap hun-hong ê ông Hi-lu̍t chòe-hé tōa-hàn ê Má-liām, í-ki̍p Sò-lô.

² In teh kèng-pài Chú, kìm-chia̍h ê sî, Sèng Sîn kā in kóng, “Tio̍h ūi-tio̍h góa chí-phài Pa-ná-pa kap Sò-lô khì chòe góa ho͘-tiàu in chòe ê kang-chok.”

³ In kìm-chia̍h kî-tó liáu-āu, kā in àn-chhiú, chhe-phài in chhut--khì.

Pa-ná-pa kap Sò-lô tī Sài-phó͘-lō͘-su

⁴ Pa-ná-pa kap Sò-lô í-keng siū Sèng Sîn chhe-phài, chiū lo̍h-khì Se-liû-ki, tùi hia chē-chûn khì Sài-phó͘-lō͘-su.

⁵ In kàu Sat-lia̍p-bí, chiū tī Iû-thài-lâng ê hōe-tn̂g soan-káng Siōng-tè ê sìn-sit. Iok-hān Má-khó mā khì hia kā in hia̍p-chō͘.

⁶ In kiâⁿ-thàu choân-tó, lâi kàu Phà-hut, tī hia tú-tio̍h chi̍t ê kiâⁿ hoat-su̍t ê lâng, sī Iû-thài-lâng ê ké sian-ti, kiò-chòe Pa-iâ-so͘.

⁷ I kap chóng-tok Sū-kiû Pó-lô ū kau-pôe; chit-ê chóng-tok sī hiân-bêng ê lâng, i chhiáⁿ Pa-ná-pa kap Sò-lô lâi, beh tùi in thiaⁿ Siōng-tè ê sìn-sit.

⁸ Put-kò hit-ê kiâⁿ hoat-su̍t ê Í-lū-má — Í-lū-má sī i ê Hi-la̍h-miâ — hoán-tùi in nn̄g lâng, siūⁿ-beh chó͘-tòng chóng-tok chiap-siū chit-ê sìn-gióng.

⁹ M̄-kú Sò-lô, mā kiò-chòe Pó-lô, hō͘ Sèng Sîn chhiong-móa, ti̍t-ti̍t kā i siòng,

¹⁰ kóng, “Lí chit-ê mô͘-kúi-á-kiáⁿ, lí sī it-chhè kong-gī ê tùi-te̍k, chhiong-móa ta̍k-khoán siâ-ok kap khúi-chà, kò͘-ì oai-khiok Chú ê chèng-ti̍t ê tō-lō͘!

¹¹ Taⁿ, lí khòaⁿ, Chú beh kā lí hêng-hoa̍t, lí ōe chhiⁿ-mî, chiām-sî bōe khòaⁿ-kìⁿ ji̍t-kng.” Í-lū-má ê ba̍k-chiu sûi-sî hō͘ o͘-àm tà--teh, khí ian-n̄g; i sì-kòe bong, chhē lâng kā i khan.

¹² Chóng-tok khòaⁿ-tio̍h só͘ hoat-seng ê tāi-chì chiū sìn, tùi Chú ê kà-sī kám-kak chin hi-kî.

Tī Pí-se-tí ê An-thê-o

¹³ Pó-lô kap i ê tâng-phōaⁿ tùi Phà-hut khui-chûn, kàu Pông-hui-lī-a ê Pia̍t-ka; Iok-hān Má-khó tī hia lī-khui in, tò-khì Iâ-lō͘-sat-léng.

¹⁴ In tùi Pia̍t-ka kè-sio̍k hêng-thêng lâi kàu Pí-se-tí ê An-thê-o. Tī An-hioh-ji̍t in ji̍p-khì hōe-tn̂g, chē--lo̍h-khì.

¹⁵ Tha̍k Mô͘-se ê Lu̍t-hoat kap sian-ti-su liáu-āu, hōe-tn̂g ê chú-koán chhe lâng lâi kā in kóng, “Hiaⁿ-tī, lín nā ū ōe beh khoàn-bián tāi-ke, chhiáⁿ lín kóng.”

¹⁶ Pó-lô chiū khiā--khí-lâi, pí chhiú-sè, kóng: “Í-sek-lia̍t-lâng kap kèng-ùi Siōng-tè ê chèng-lâng, chhiáⁿ thiaⁿ!

¹⁷ Í-sek-lia̍t-lâng ê Siōng-tè ū kéng-soán lán ê chó͘-sian, tī in kià-ku Ai-ki̍p ê sî hō͘ in chiâⁿ-chòe tōa ê bîn-cho̍k, ēng I tōa koân-lêng ê chhiú chhōa in chhut Ai-ki̍p,

¹⁸ koh tī khòng-iá khoan-iông in sì-cha̍p nî kú.

¹⁹ I húi-bia̍t Ka-lâm tōe-khu chhit ê bîn-cho̍k liáu-āu, chiong hit-ê thó͘-tōe hō͘ in chòe sán-gia̍p,

²⁰ iok sì-pah gō͘-cha̍p nî kú. “Í-āu Siōng-tè ū ūi-tio̍h in siat-li̍p sū-su, it-ti̍t kàu sian-ti Sat-bó-ní ê sî.

²¹ Āu-lâi in iau-kiû ài ū chi̍t ê ông, Siōng-tè chiū tùi Piān-ngá-bín chi-cho̍k soán-chhut Ki-sū ê kiáⁿ Sò-lô, hō͘ i choh-ông sì-cha̍p nî kú.

²² Siōng-tè hòe Sò-lô liáu-āu, jīm-bēng Tāi-pi̍t chòe in ê ông. Koan-hē Tāi-pi̍t, I ū án-ni kóng, ‘Góa chhē-tio̍h Iâ-se ê hō͘-tāi Tāi-pi̍t, i sī ha̍h góa sim-ì ê lâng, ta̍k-hāng tāi-chì chun-thàn góa ê chí-ì.’

²³ Siōng-tè chiàu I ê èng-ún, tùi Tāi-pi̍t ê hō͘-tāi hō͘ Í-sek-lia̍t-lâng chi̍t ūi Kiù-chú, chiū-sī Iâ-so͘.

²⁴ Iâ-so͘ chhut--lâi í-chêng, Iok-hān tùi chèng Í-sek-lia̍t-lâng thoân-tō, kiò in tio̍h hóe-kái lâi niá-siū sóe-lé.

²⁵ Iok-hān teh-beh kiat-sok i ê kang-chok ê sî, tùi chèng-lâng kóng, ‘Lín siūⁿ góa sī sím-mi̍h-lâng? Góa m̄-sī lín teh thèng-hāu Hit-ūi, m̄-kú ū chi̍t ūi tè tī góa āu-bīn teh lâi, góa liân kā I tháu ôe-tòa to bōe-kham--tit.’

²⁶ “Kok-ūi hiaⁿ-tī, A-pek-la-hán ê kiáⁿ-sun kap lín tiong-kan kèng-ùi Siōng-tè ê chèng-lâng, chit-ê chín-kiù ê sìn-sit í-keng ū thoân hō͘ lán.

²⁷ In-ūi tòa tī Iâ-lō͘-sat-léng ê lâng kap in ê koaⁿ-tiúⁿ m̄ bat Iâ-so͘, mā bô bêng-pe̍k ta̍k-ê An-hioh-ji̍t só͘ tha̍k sian-ti ê ōe, chiū kā I tēng-chōe, che tú èng-giām sian-ti ê ū-giân.

²⁸ Sui-jiân in chhē bōe chhut kā I tēng sí-chōe ê lí-iû, iáu-kú iau-kiû Pí-lia̍p-to kā I chhú sí-hêng.

²⁹ Sèng-keng só͘ kì-chài koan-hē Iâ-so͘ it-chhè ê sū lóng oân-sêng, in chiū chiong I tùi si̍p-jī-kè téng hû--lo̍h-lâi, hē tī bōng--ni̍h.

³⁰ Chóng-sī Siōng-tè ū hō͘ I tùi sí-lâng tiong koh-oa̍h,

³¹ ū chi̍t tōaⁿ sî-kan, I hián-hiān hō͘ hiah-ê tùi Ka-lī-lī tè I lâi Iâ-lō͘-sat-léng ê lâng khòaⁿ--kìⁿ. Chiah-ê lâng hiān-chāi tī chèng-lâng tiong teh choh Iâ-so͘ ê kiàn-chèng-jîn.

³² Goán chiong Siōng-tè èng-ún hō͘ chó͘-sian ê hok-im thoân hō͘ lín,

³³ in-ūi I hō͘ Iâ-so͘ koh-oa̍h, chit-ê èng-ún í-keng ū tùi lán chiah-ê choh kiáⁿ-sun--ê èng-giām, chhin-chhiūⁿ Si-phian tē-jī phiⁿ só͘ kì-chài: Lí sī góa ê Kiáⁿ, góa kin-á-ji̍t siⁿ lí.

³⁴ Koan-hē hō͘ I tùi sí-lâng tiong koh-oa̍h bô koh hiú-nōa ê sū, Siōng-tè kóng: Góa beh chiong tùi Tāi-pi̍t só͘ èng-ún hit-ê sîn-sèng khó-khò ê un-tián sù hō͘ lín.

³⁵ Só͘-í, tī Si-phian pa̍t-ê só͘-chāi mā án-ni kóng: Lí bōe hō͘ lí ê Sèng-chiá hiú-nōa.

³⁶ Tāi-pi̍t chāi-siⁿ ê sî ū chun-thàn Siōng-tè ê kè-ōe. I sí liáu-āu bâi-chòng tī chó͘-sian ê piⁿ--á, hiú-nōa lah.

³⁷ M̄-kú Siōng-tè hō͘ I tùi sí-lâng tiong koh-oa̍h Hit-ūi bô hiú-nōa.

^38-39 Só͘-í, kok-ūi hiaⁿ-tī, lín eng-kai chai, sià-chōe ê sìn-sit sī tùi chit-ūi Iâ-so͘ thoân hō͘ lín; lín khò Mô͘-se ê Lu̍t-hoat bōe-tàng hō͘ lín thoat-lī chōe, m̄-kú só͘-ū sìn Iâ-so͘ ê lâng lóng ōe-tàng tùi chōe tit-tio̍h tháu-pàng.

⁴⁰ Só͘-í lín tio̍h kín-sīn, chiah bián hō͘ sian-ti só͘ kóng--ê lîm-kàu lín:

⁴¹ Biáu-sī Siōng-tè ê lâng ah, tio̍h khòaⁿ, tio̍h kiaⁿ, tio̍h bia̍t-bông! In-ūi tī lín ê sî-tāi góa só͘ chòe ê sū, ū lâng kā lín soat-bêng, lín mā m̄ sìn.”

⁴² Pó-lô kap Pa-ná-pa tùi hōe-tn̂g chhut--khì ê sî, chèng-lâng iau-chhiáⁿ in tī ē chi̍t ê An-hioh-ji̍t koh lâi kóng chiah-ê tāi-chì hō͘ in thiaⁿ.

⁴³ Sòaⁿ-hōe āu, chin chōe Iû-thài-lâng kap kái-chong ji̍p Iû-thài-kàu hiah-ê khiân-sêng ê Gōa-pang-lâng chiū tè Pó-lô kap Pa-ná-pa chhut--khì. Nn̄g ê sù-tô͘ kap in tâm-ōe, khoàn-bián in tio̍h khîⁿ-tiâu Siōng-tè ê un-tián.

⁴⁴ Koh lo̍h-khì ê An-hioh-ji̍t, choân-siâⁿ ê lâng lóng chū-chi̍p, beh thiaⁿ Chú ê tō.

⁴⁵ Iû-thài-lâng khòaⁿ-tio̍h lâng hiah chōe, sim-lāi chhiong-móa oàn-tò͘, hoán-pok Pó-lô só͘ kóng ê ōe, koh kā i bú-jio̍k.

⁴⁶ M̄-kú Pó-lô kap Pa-ná-pa ióng-kám soan-káng kóng, “Siōng-tè ê tō tio̍h seng thoân hō͘ lín, lín kèng-jiân kū-choa̍t, ka-kī toàn-tēng bô chu-keh tit-tio̍h éng-oán ê oa̍h-miā, só͘-í goán chiah choán-ǹg Gōa-pang-lâng.

⁴⁷ In-ūi Chú bat án-ni bēng-lēng goán kóng: Góa í-keng chí-tēng lí chòe Gōa-pang-lâng ê kng, thang hō͘ lí chiong góa ê chín-kiù tòa kàu thiⁿ-piⁿ-hái-kak.”

⁴⁸ Gōa-pang-lâng thiaⁿ-tio̍h chiah-ê ōe lóng chin hoaⁿ-hí, kui êng-kng hō͘ Chú ê sìn-sit. Hiah-ê í-keng siū Siōng-tè kéng-soán thang tit-tio̍h éng-oán ê oa̍h-miā ê lâng lóng chiâⁿ-chòe sìn-tô͘.

⁴⁹ Tùi án-ni Chú ê sìn-sit thoân-piàn hit tōe-hng.

⁵⁰ M̄-kú Iû-thài-lâng siàn-tōng khiân-sêng chun-kùi ê hū-lú kap siâⁿ-lāi ū tōe-ūi ê jîn-sū lâi pek-hāi Pó-lô kap Pa-ná-pa, chiong in kóaⁿ chhut-kéng.

⁵¹ In nn̄g lâng chiū tī chèng-lâng ê bīn-chêng kā kha--ni̍h ê thô͘-hún pōaⁿ hiat-ka̍k piáu-sī khòng-gī, jiân-āu khì Í-ko-liām.

⁵² Bûn-tô͘ móa-sim hoaⁿ-hí, koh siū Sèng Sîn chhiong-móa.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan