使徒行傳 12 - 現代台語譯本羅馬字版

Kàu-hōe Siū Koh-khah Tōa ê Pek-hāi

¹ Chha-put-to hit-ê sî, Hi-lu̍t-ông hē-chhiú pek-hāi kàu-hōe ê chi̍t-kóa lâng,

² ēng to thâi-sí Iok-hān ê hiaⁿ-ko Ngá-kok.

³ I khòaⁿ-chhut chit-ê tāi-chì ū hō͘ Iû-thài-lâng hoaⁿ-hí, chiū sòa lo̍h-khì lia̍h Pí-tek. Chit-ê tāi-chì tī Tû-kàⁿ-choeh ê kî-kan hoat-seng.

⁴ I lia̍h Pí-tek, kā i koaiⁿ-lo̍h kaⁿ, kau hō͘ sì pan ê kéng-ōe kò͘-siú, ta̍k-pan ū sì ê peng. Hi-lu̍t àn-sǹg beh tī Pôaⁿ-kè-choeh āu kā i ah chhut-lâi tī chèng-lâng ê bīn-chêng sím-phòaⁿ.

⁵ Pí-tek chiū án-ni hō͘ lâng koaiⁿ tī kaⁿ--ni̍h; kàu-hōe ūi-tio̍h i tùi Siōng-tè pek-chhiat kî-tó.

Pí-tek tùi Kaⁿ--ni̍h Siū Kiù-chhut

⁶ Hi-lu̍t beh ah Pí-tek chhut-lâi sím-phòaⁿ ê chêng chi̍t àm, Pí-tek khùn tī nn̄g ê kéng-ōe ê tiong-kan, hō͘ lâng ēng nn̄g tiâu thih-liān liān--teh, koh ū kéng-ōe tī mn̂g-gōa kò͘-siú.

⁷ Hut-jiân Chú ê thiⁿ-sài khiā tī hia, ū kng teh chiò kaⁿ-pâng. Thiⁿ-sài tah Pí-tek ê keng-thâu, kā i kiò-chhíⁿ, kóng, “Kín khí--lâi!” Thih-liān chiū tùi i ê chhiú lak--lo̍h-khì.

⁸ Thiⁿ-sài tùi i kóng, “Io-tòa hâ--leh, ôe chhēng--leh.” Pí-tek chiū chiàu án-ni chòe. Thiⁿ-sài koh kóng, “Gōa-saⁿ moa--leh, tè góa lâi!”

⁹ Pí-tek chiū tè i chhut--khì, m̄ chai-iáⁿ thiⁿ-sài teh chòe ê sī chin--ê, siūⁿ-chòe sī teh khòaⁿ īⁿ-siōng.

¹⁰ In keng-kè kéng-ōe-só͘ tē-it koan kap tē-jī koan, lâi kàu thàng ji̍p-siâⁿ hit-ê thih-mn̂g, mn̂g chū-tōng khui, in chiū chhut--khì, kiâⁿ-kè chi̍t tiâu koe; thiⁿ-sài sûi-sî lī-khui Pí-tek.

¹¹ Pí-tek chi̍t-ē chhíⁿ, kóng, “Taⁿ góa chin-chiàⁿ chai, Chú chhe I ê thiⁿ-sài lâi kiù góa thoat-lī Hi-lu̍t ê chhiú kap Iû-thài-lâng it-chhè ê kè-bô͘.”

¹² I bêng-pe̍k chit-ê chêng-hêng, chiū khì Iok-hān, mā kiò-chòe Má-khó ê lāu-bú Má-lī-a ê chhù; tī hia ū chin chōe lâng chū-chi̍p teh kî-tó.

¹³ Pí-tek phah gōa-mn̂g, ū chi̍t ê lú-pī kiò-chòe Lô-tāi chhut-lâi beh khui-mn̂g.

¹⁴ I jīn-tit Pí-tek ê siaⁿ, hoaⁿ-hí kah bōe-kò͘-tit khui-mn̂g, chiū cháu ji̍p-khì pò-kò kóng Pí-tek khiā tī mn̂g-kháu.

¹⁵ In kóng, “Lí teh khí-kông!” I kian-chhî kóng ū-iáⁿ. In chiū kóng, “Án-ni it-tēng sī i ê thiⁿ-sài.”

¹⁶ Pí-tek it-ti̍t phah-mn̂g. In khui-mn̂g, khòaⁿ-tio̍h Pí-tek, hui-siông tio̍h-kiaⁿ.

¹⁷ Pí-tek pí-chhiú kiò in an-chēng, kā in soat-bêng Chú chhōa i tùi kaⁿ-ga̍k chhut--lâi ê keng-kè. Pí-tek koh hoan-hù in chiong chit-ê siau-sit pò-kò Ngá-kok kap chèng sìn-tô͘, chiū lī-khui khì pa̍t-ê só͘-chāi.

¹⁸ Thiⁿ-kng ê sî, peng-sū m̄ chai Pí-tek khì tó-ūi, chiū loān-chhau-chhau.

¹⁹ Hi-lu̍t kiò lâng khì chhē, m̄-kú chhē bô, chiū sím-mn̄g khàn-siú, hā-lēng kā in chhú-sí. Chit-ê tāi-chì í-āu, Hi-lu̍t lī-khui Iû-thài khì Khái-sat-lī-a, tòa tī hia.

Hi-lu̍t ê Sí

²⁰ Tng-sî, Hi-lu̍t tùi Thài-ní kap Se-tùn ê jîn-bîn hui-siông siū-khì, in chiū phài tāi-piáu cho͘-thoân khì kìⁿ i. In tāi-seng sòe-ho̍k kiong-têng ê chóng-koán Pek-la-su-to͘, siat-hoat hō͘ in thang khì kìⁿ Hi-lu̍t, tùi i kiû-hô, in-ūi in ê niû-si̍t khò ông koán-hat ê tōe-khu teh kiong-èng.

²¹ Tī iok-tēng ê ji̍t-chí, Hi-lu̍t chhēng ông-ho̍k, chē tī chō-ūi, tùi jîn-bîn ián-káng.

²² Chèng-lâng it-ti̍t hoah kóng, “Che sī sîn-bêng ê siaⁿ, m̄-sī lâng ê siaⁿ!”

²³ Chú ê thiⁿ-sài sûi-sî kā Hi-lu̍t phah-tó, in-ūi i bô kui êng-kng hō͘ Siōng-tè; āu-lâi i hō͘ thâng kā, chiū sí--khì.

²⁴ Siōng-tè ê tō jú thoân-khui jú heng-ōng.

²⁵ Pa-ná-pa kap Sò-lô oân-sêng in ê jīm-bū, chiū chhōa kiò-chòe Má-khó ê Iok-hān chòe-hé lī-khui Iâ-lō͘-sat-léng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan