使徒行傳 11 - 現代台語譯本羅馬字版

Pí-tek tùi Iâ-lō͘-sat-léng ê Kàu-hōe Pò-kò

¹ Sù-tô͘ kap tòa tī Iû-thài ê sìn-tô͘ lóng ū thiaⁿ-tio̍h Gōa-pang-lâng mā chiap-siū Siōng-tè ê tō.

² Pí-tek chiūⁿ Iâ-lō͘-sat-léng ê sî, hiah-ê siū kat-lé ê Iû-thài-lâng sìn-tô͘ kā i phoe-phêng, kóng,

³ “Lí kèng-jiân ji̍p-khì bô siū kat-lé ê lâng ê chhù kap in chòe-hé chia̍h-pn̄g!”

⁴ Pí-tek chiū chiong só͘ hoat-seng ê tāi-chì tùi thâu chi̍t-hāng chi̍t-hāng kā in soat-bêng:

⁵ “Góa tī Iok-phà-siâⁿ teh kî-tó ê sî ū ji̍p-sîn khòaⁿ-kìⁿ īⁿ-siōng, ū chi̍t ê mi̍h-kiāⁿ chhin-chhiūⁿ chi̍t tè tōa tè pò͘, sì-kak-thâu tiàu--teh, tùi thiⁿ-téng lūi lo̍h-lâi kàu góa bīn-chêng.

⁶ Góa siông-sè khòaⁿ, lāi-bīn ū tōe-chiūⁿ ê cheng-siⁿ, iá-siù, thâng-thōa, kap khong-tiong ê chiáu-lūi.

⁷ Góa koh thiaⁿ-tio̍h ū siaⁿ kā góa kóng, ‘Pí-tek, khí--lâi, thâi lâi chia̍h!’

⁸ Góa kóng, ‘Chú ah, choa̍t-tùi bōe-ēng--tit! Góa m̄-bat chia̍h ù-òe bô chheng-khì ê mi̍h.’

⁹ Hit-ê siaⁿ tē-jī piàn tùi thiⁿ-téng ìn góa kóng, ‘Siōng-tè hō͘ i chheng-khì--ê, lí m̄-thang khòaⁿ-chòe ù-òe.’

¹⁰ Chit-ê tāi-chì kè-sio̍k ū saⁿ piàn, hiah-ê mi̍h-kiāⁿ chiū lóng koh siu tò-tńg-khì thiⁿ-téng.

¹¹ Tú hit-sî, tùi Khái-sat-lī-a phài-lâi chhē góa hit saⁿ ê lâng lâi kàu goán teh tòa hit-keng chhù.

¹² Sèng Sîn kiò góa tio̍h kap in khì, m̄-thang tiû-tû. Hit la̍k ê sìn-tô͘ mā kap góa chòe-hé khì Khái-sat-lī-a. Goán chiū lóng ji̍p-khì Ko-nî-liû ê chhù.

¹³ Ko-nî-liû kā goán kóng i ū khòaⁿ-kìⁿ chi̍t ê thiⁿ-sài khiā tī i ê chhù-lāi, tùi i kóng, ‘Tio̍h chhe lâng khì Iok-phà chhiáⁿ hit-ê kiò-chòe Pí-tek ê Se-bûn lâi.

¹⁴ I ū ōe beh kā lí kóng, thang hō͘ lí kap lí ê choân-ke lóng tit-tio̍h kiù.’

¹⁵ Góa khai-sí kóng-ōe ê sî, Sèng Sîn kàng-lîm tī in sin-chiūⁿ, kap tong-chho͘ kàng-lîm tī lán sin-chiūⁿ kâng-khoán.

¹⁶ Góa chiū siūⁿ-khí Chú só͘ kóng ê ōe: Iok-hān ēng chúi kā lín sóe-lé, m̄-kú lín ōe niá-siū Sèng Sîn ê sóe-lé.

¹⁷ Kì-jiân Siōng-tè ū chiong lán sìn Chú Iâ-so͘ Ki-tok ê sî só͘ niá-siū siâng-khoán ê un-sù sù hō͘ Gōa-pang-lâng, góa sǹg siáⁿ-lâng, ná ōe-tàng chó͘-tòng Siōng-tè ê só͘-chòe?”

¹⁸ In thiaⁿ-tio̍h chiah-ê ōe chiū tiām--khì, kui êng-kng hō͘ Siōng-tè, kóng, “Siōng-tè mā ū hō͘ Gōa-pang-lâng hóe-kái lâi tit-tio̍h oa̍h-miā.”

An-thê-o ê Kàu-hōe

¹⁹ In-ūi Sū-thê-hoán ê tāi-chì siū pek-hāi sì-sòaⁿ ê sìn-tô͘, ū-ê kàu Hui-nî-ki, Sài-phó͘-lō͘-su, kap An-thê-o, in bô tùi pa̍t-lâng, chí-ū tùi Iû-thài-lâng thoân-tō.

²⁰ M̄-kú kî-tiong ū chi̍t-kóa Sài-phó͘-lō͘-su kap Kó͘-lī-nāi ê sìn-tô͘ kàu An-thê-o, mā ǹg Hi-la̍h-lâng thoân, tùi in kóng-khí Chú Iâ-so͘ ê hok-im.

²¹ Chú ê khùi-la̍t kap in tông-chāi, sìn lâi kui Chú ê lâng-gia̍h chin chōe.

²² Chit-ê siau-sit thoân kàu Iâ-lō͘-sat-léng ê kàu-hōe, in chiū phài Pa-ná-pa khì An-thê-o.

²³ I chi̍t-ē kàu-ūi, khòaⁿ-tio̍h Siōng-tè ū sù in un-hūi, chiū hoaⁿ-hí, khoàn-bián in tāi-ke tio̍h choân-sim chi̍t-ì sìn-khò Chú.

²⁴ Pa-ná-pa sī hó-lâng, hō͘ Sèng Sîn chhiong-móa, koh ū sìn-sim. Hit-sî ū chin chōe lâng sìn Chú.

²⁵ Āu-lâi, Pa-ná-pa khì Tāi-sò͘ chhē Sò-lô,

²⁶ chhē--tio̍h chiū chhōa i khì An-thê-o. Chiok-chiok chi̍t nî kú, in nn̄g ê kap kàu-hōe ê lâng chū-hōe, kà-sī chin chōe lâng. Bûn-tô͘ kiò-chòe “Ki-tok-tô͘” sī tùi An-thê-o khai-sí.

²⁷ Hit-sî, ū kúi-nā ê sian-ti tùi Iâ-lō͘-sat-léng lo̍h-khì An-thê-o.

²⁸ Kî-tiong chi̍t ê miâ kiò-chòe A-ka-pò͘; i tit-tio̍h Sèng Sîn ê chí-sī, khiā khí-lâi ū-giân kóng choân sè-kài teh-beh ū tōa ki-hng. Chit-ê tāi-chì tī Khek-lô-tē thóng-tī ê nî-kan kó-jiân hoat-seng.

²⁹ Bûn-tô͘ chiū koat-tēng ta̍k-ê lâng chiàu ka-kī ê lêng-le̍k koan-hiàn, thang sàng-khì chín-chè tòa tī Iû-thài ê sìn-tô͘.

³⁰ In chiū chiàu án-ni chòe, chiong koan-hiàn thok Pa-ná-pa kap Sò-lô kau hō͘ hia ê tiúⁿ-ló.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan