Bìoball air-loidhne

使徒行傳 10 - 現代台語譯本羅馬字版

Pí-tek kap Ko-nî-liû

¹ Tī Khái-sat-lī-a ū chi̍t ê lâng, miâ kiò-chòe Ko-nî-liû, sī Lô-má kun-tūi kiò-chòe “Ì-tāi-lī-iâⁿ” ê kun-koaⁿ.

² I sī khiân-sêng ê lâng, kap choân-ke lóng kèng-ùi Siōng-tè; i khóng-khài chín-chè sàn-chhiah ê Iû-thài-lâng, koh put-sî tùi Siōng-tè kî-tó.

³ Ū chi̍t ji̍t, chha-put-to ē-po͘ saⁿ tiám, i tī īⁿ-siōng tiong bêng-bêng khòaⁿ-kìⁿ Siōng-tè ê thiⁿ-sài ji̍p--lâi, kā i kiò, “Ko-nî-liû!”

⁴ I kā thiⁿ-sài ti̍t-ti̍t siòng, hui-siông kiaⁿ-hiâⁿ, kóng, “Chú ah, sím-mi̍h tāi-chì?” Thiⁿ-sài kóng, “Lí ê kî-tó kap chín-chè í-keng lóng tit-tio̍h Siōng-tè hoaⁿ-hí chiap-la̍p.

⁵ Taⁿ tio̍h chhe lâng khì Iok-phà, chhiáⁿ hit-ê chheng-chòe Pí-tek ê Se-bûn lâi.

⁶ I choh lâng-kheh tòa tī hoan-phê sai-hū Se-bûn ê chhù; i ê chhù tī hái-piⁿ.”

⁷ Tùi i kóng-ōe ê thiⁿ-sài lī-khui liáu-āu, Ko-nî-liû kiò nn̄g ê po̍k-jîn kap chi̍t ê pêng-siông teh sū-hāu i kèng-ùi Siōng-tè ê peng lâi,

⁸ chiong chiah-ê tāi-chì lóng kā in kóng, chiū chhe in khì Iok-phà.

⁹ Keh-ji̍t, chha-put-to tiong-tàu, chit saⁿ ê lâng kiâⁿ beh kàu Iok-phà ê sî, Pí-tek peh-khì chhù-téng kî-tó.

¹⁰ I pak-tó͘ iau, siūⁿ-beh chia̍h. Lâng teh ūi i chún-pī chia̍h-mi̍h ê sî, i ji̍p-sîn,

¹¹ khòaⁿ-kìⁿ thiⁿ khui, ū chi̍t ê mi̍h-kiāⁿ chhin-chhiūⁿ chi̍t tè tōa tè pò͘, sì-kak-thâu tiàu--teh, lūi lo̍h-lâi thô͘-kha,

¹² lāi-bīn ū tōe-chiūⁿ ta̍k-chióng ê cháu-siù, thâng-thōa, kap khong-tiong ê chiáu-lūi.

¹³ Ū siaⁿ tùi i kóng, “Pí-tek, khí--lâi, thâi lâi chia̍h.”

¹⁴ M̄-kú Pí-tek kóng, “Chú ah, choa̍t-tùi bōe-ēng--tit! Góa m̄-bat chia̍h ù-òe bô chheng-khì ê mi̍h.”

¹⁵ Hit-ê siaⁿ tē-jī piàn tùi i kóng, “Siōng-tè hō͘ i chheng-khì--ê, lí m̄-thang khòaⁿ-chòe ù-òe.”

¹⁶ Chit-ê tāi-chì kè-sio̍k ū saⁿ piàn, hit-ê mi̍h-kiāⁿ sûi-sî koh siu tò-khì thiⁿ-téng.

¹⁷ Pí-tek kám-kak kî-koài, tú-teh siūⁿ chit-ê īⁿ-siōng sī sím-mi̍h ì-sù ê sî, Ko-nî-liû chhe--lâi ê lâng í-keng chhē-tio̍h Se-bûn ê chhù, lâi khiā tī mn̂g-kháu,

¹⁸ tōa-siaⁿ mn̄g, “Ū chi̍t ê kiò-chòe Pí-tek ê Se-bûn tòa tī chia--bô?”

¹⁹ Pí-tek iáu-teh siūⁿ chit-ê īⁿ-siōng sī sím-mi̍h ì-sù ê sî, Sèng Sîn kā i kóng, “Ū saⁿ ê lâng lâi beh chhē lí!

²⁰ Lí khí--lâi, lo̍h--khì, kap in chòe-hé khì; m̄-thang tiû-tû, in-ūi in sī góa chhe--lâi-ê.”

²¹ Pí-tek chiū lo̍h-khì kìⁿ hiah-ê lâng, kā in kóng, “Góa chiū-sī lín teh chhē ê lâng. Lín lâi ū sím-mi̍h kùi-sū?”

²² In ìn kóng, “Goán ê tiúⁿ-koaⁿ Ko-nî-liû chhe goán lâi, i sī chèng-ti̍t koh kèng-ùi Siōng-tè ê lâng, siū choân-thé Iû-thài-lâng ê chun-kèng. I tit-tio̍h sèng thiⁿ-sài ê chí-sī, lâi chhiáⁿ lí khì in tau beh niá-siū lí ê kà-sī.”

²³ Pí-tek chiū chhiáⁿ in ji̍p--khì, lâu in tòa hia kè-mî. Keh-ji̍t, Pí-tek khí-lâi kap in chòe-hé khì; mā ū kúi-nā ê Iok-phà ê sìn-tô͘ chòe-hé khì.

²⁴ Koh keh-ji̍t, in kàu Khái-sat-lī-a, Ko-nî-liû í-keng iau-chhiáⁿ i ê chhin-lâng kap pêng-iú teh thèng-hāu.

²⁵ Pí-tek ji̍p--khì, Ko-nî-liû chiū chìn-chêng gêng-chiap, phak tī i ê kha-chêng kā i pài.

²⁶ Pí-tek kā i khan--khí-lâi, kóng, “Khí--lâi, góa ka-kī mā-sī lâng.”

²⁷ Pí-tek kap i ná kiâⁿ ná kóng-ōe ji̍p-khì lāi-bīn, khòaⁿ-tio̍h chin chōe lâng í-keng chū-chi̍p tī hia,

²⁸ chiū tùi in kóng, “Lín chai-iáⁿ, chiàu goán ê kui-tēng, Iû-thài-lâng bōe-ēng-tit kap Gōa-pang-lâng kau-pôe lâi-óng, m̄-kú Siōng-tè í-keng chí-sī góa, bô-lūn sím-mi̍h cho̍k-kûn ê lâng to m̄-thang khòaⁿ i chòe bô chheng-khì á-sī ù-òe.

²⁹ Só͘-í lín chhiáⁿ góa lâi, góa bô the-sî chiū lâi. Taⁿ chhiáⁿ mn̄g, lín ūi-tio̍h sím-mi̍h tāi-chì chhiáⁿ góa lâi?”

³⁰ Ko-nî-liû kóng, “Sì ji̍t chêng, tú chit-ê sî-chūn, chha-put-to ē-po͘ saⁿ tiám, góa tī chhù-lāi teh kî-tó ê sî, hut-jiân ū chi̍t ê lâng chhēng kng-iàⁿ-iàⁿ ê saⁿ khiā tī góa ê bīn-chêng,

³¹ kóng, ‘Ko-nî-liû! Siōng-tè í-keng ū thiaⁿ-kìⁿ lí ê kî-tó, mā ōe-kì-tit lí só͘ chòe chín-chè lâng ê sū.

³² Lí tio̍h chhe lâng khì Iok-phà, chhiáⁿ kiò-chòe Pí-tek ê Se-bûn lâi; i choh lâng-kheh tòa tī hái-piⁿ hoan-phê sai-hū Se-bûn in tau.’

³³ Góa chiū sûi-sî chhe lâng khì chhiáⁿ lí lâi; taⁿ lí lâi lah, si̍t-chāi chin hó. Hiān-chāi goán lóng chū-chi̍p tī Siōng-tè bīn-chêng, beh thiaⁿ Chú bēng-lēng lí só͘ beh kóng lóng-chóng ê ōe.”

Pí-tek tī Ko-nî-liû ê Chhù Káng-tō

³⁴ Pí-tek khui-chhùi kóng, “Taⁿ góa khak-si̍t chai, Siōng-tè bô phian-thāi lâng.

³⁵ Bô-lūn tó chi̍t ê bîn-cho̍k, kèng-ùi I, hêng-ûi chèng-ti̍t ê lâng, I lóng hoaⁿ-hí chiap-la̍p.

^36-37 Lín chai: Í-chêng Siōng-tè ū thong-kè bān-bîn ê Chú Iâ-so͘ Ki-tok tùi Í-sek-lia̍t-lâng thoân hô-pêng ê hok-im; Iok-hān thoân sóe-lé ê tō-lí í-āu, chit-ê hok-im ū tùi Ka-lī-lī khai-sí thoân-piàn Iû-thài choân-tōe;

³⁸ chiū-sī, Ná-sat-le̍k-lâng Iâ-so͘, Siōng-tè ū án-chóaⁿ ēng Sèng Sîn kap tōa lêng-le̍k kā I boah-iû jīm-bēng, ū án-chóaⁿ hō͘ I khì ta̍k só͘-chāi chòe hó-sū, i-hó só͘-ū siū Mô͘-kúi ap-chè ê lâng, in-ūi Siōng-tè kap I tông-chāi.

³⁹ Goán chiū-sī I tī Iû-thài ta̍k só͘-chāi kap Iâ-lō͘-sat-léng só͘ chòe ê sū ê kiàn-chèng-jîn. In kā I tèng-sí tī si̍p-jī-kè téng,

⁴⁰ tē-saⁿ ji̍t Siōng-tè hō͘ I koh-oa̍h, koh hō͘ I hián-hiān,

⁴¹ m̄-sī tùi só͘-ū ê lâng, chí-ū tùi goán chiah-ê siū Siōng-tè kéng-soán lâi chòe kiàn-chèng ê lâng hián-hiān; goán bat tī I tùi sí-lâng tiong koh-oa̍h liáu-āu kap I chòe-hé lim-chia̍h.

⁴² I bēng-lēng goán thoân hok-im hō͘ só͘-ū ê lâng, chèng-si̍t I sī Siōng-tè só͘ jīm-bēng choh oa̍h-lâng kap sí-lâng ê sím-phòaⁿ-chiá.

⁴³ Só͘-ū ê sian-ti lóng ūi-tio̍h I chòe kiàn-chèng kóng, sìn I ê lâng lóng ōe in-ūi I ê miâ tit-tio̍h sià-chōe.”

Gōa-pang-lâng Niá-siū Sèng Sîn

⁴⁴ Pí-tek iáu-teh kóng-ōe ê sî, Sèng Sîn kàng-lîm tī só͘-ū thiaⁿ tō-lí ê lâng.

⁴⁵ Kap Pí-tek tùi Iok-phà chòe-hé lâi hiah-ê siū kat-lé ê sìn-tô͘ lóng tōa tio̍h-kiaⁿ, in-ūi Sèng Sîn ê un-sù mā ū piàⁿ-lo̍h tī Gōa-pang-lâng ê sin-chiūⁿ;

⁴⁶ in-ūi in ū thiaⁿ-tio̍h hiah-ê lâng kóng lêng-gú koh chheng-chàn Siōng-tè ê úi-tāi. Jiân-āu Pí-tek kóng,

⁴⁷ “Chiah-ê lâng kap lán kâng-khoán í-keng ū niá-siū Sèng Sîn, kiám ū lâng ōe-tàng kìm-chí in niá-siū chúi ê sóe-lé?”

⁴⁸ I chiū bēng-lēng in hōng Iâ-so͘ Ki-tok ê miâ niá-siū sóe-lé. Āu-lâi, in chhiáⁿ Pí-tek kap in koh tòa kúi-nā ji̍t.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan