Bìoball air-loidhne

Thê-to-su 1 - 現代台語譯本羅馬字版

¹ Góa sī Pó-lô, choh Siōng-tè ê po̍k-jîn kap Iâ-so͘ Ki-tok ê sù-tô͘, siū soán-phài pang-chān Siōng-tè soán-bîn ê sìn-gióng, hō͘ in jīn-bat ha̍h tī kèng-khiân ê chin-lí;

² chit-ê chin-lí hō͘ lán tùi éng-oán ê oa̍h-miā ū ǹg-bāng, chiū-sī bōe kóng pe̍h-chha̍t ê Siōng-tè tī bān-sè í-chêng èng-ún beh hō͘ lán--ê.

³ I tī sî-ki sêng-se̍k ê sî, thong-kè sìn-sit ê soan-káng chiong chit-ê èng-ún hián-bêng--chhut-lâi. Góa ū siū-thok, hōng lán ê Kiù-chú Siōng-tè ê bēng-lēng soan-káng chit-ê hok-im.

⁴ Thê-to, góa siá-phoe hō͘ lí, tī lán kiōng-tông ê sìn-gióng lí sī góa chin ê kiáⁿ. Goān Pē Siōng-tè kap lán ê Kiù-chú Ki-tok Iâ-so͘ sù lí un-tián kap pêng-an!

Thê-to tī Khek-lí-te̍k ê Kang-chok

⁵ Góa kā lí lâu tī Khek-lí-te̍k, sī beh hō͘ lí chhú-lí iáu-bē pān chheng-chhó ê tāi-chì, koh chiàu góa só͘ chí-sī, tī ta̍k-ê siâⁿ-chhī soán-phài lâng chòe tiúⁿ-ló.

⁶ Choh tiúⁿ-ló--ê tio̍h bô thang chí-chek, chí-ū chi̍t ê bó͘, kiáⁿ-jî lóng sī sìn-tô͘, koh bô lâng khòng-kò sī hòng-tōng á-sī m̄ sūn-ho̍k.

⁷ Kàu-hōe ê kam-tok, kì-jiân choh Siōng-tè ê koán-ke, it-tēng tio̍h bô thang chí-chek, bô chū-ko, bô pháiⁿ sèng-tē, bô chiú-chùi, bô hiong-pō, bô tham-châi.

⁸ Tio̍h gâu khoán-thāi chhut-gōa-lâng, gâu chòe hó-sū, siú-kí, chèng-ti̍t, sèng-kiat, chiat-chè.

⁹ I tio̍h kian-siú hit-ê khó-khò hû-ha̍p kàu-gī ê sìn-sit, án-ni chiah ōe-tàng ēng kiān-choân ê kà-sī khoàn-bián lâng, piān-tó hoán-tùi ê lâng.

¹⁰ In-ūi ū chin chōe m̄ sūn-ho̍k ê lâng, te̍k-pia̍t sī hiah-ê chú-tiuⁿ tio̍h siū kat-lé ê lâng, in ài kóng bô lō͘-ēng ê ōe, koh khi-phiàn lâng.

¹¹ Chit-khoán lâng it-tēng tio̍h kìm-chí in kóng-ōe, in-ūi in ūi-tio̍h beh tham put-gī ê chîⁿ-châi, ēng bô eng-kai kà-sī ê ōe phò-hoāi chi̍t-kóa ka-têng.

¹² In Khek-lí-te̍k-lâng ū chi̍t ê sian-ti bat án-ni kóng, “Khek-lí-te̍k-lâng ài kóng pe̍h-chha̍t, sī hiong-ok ê iá-siù, tham-chia̍h koh pîn-tōaⁿ.”

¹³ I kóng--ê sī sū-si̍t. Só͘-í lí tio̍h giâm-keh kā in chek-pī, thang hō͘ in ū kiān-choân ê sìn-gióng,

¹⁴ bô thiaⁿ-thàn Iû-thài-lâng bô-iáⁿ-chiah ê thoân-soat kap pōe-ge̍k chin-lí ê lâng ê kui-lē.

¹⁵ Tùi chheng-khì ê lâng lâi kóng, it-chhè lóng chheng-khì; m̄-kú tùi ù-òe kap m̄-sìn ê lâng lâi kóng, bô chi̍t hāng sī chheng-khì, in-ūi in ê sim-su kap liông-ti lóng sī ù-òe.

¹⁶ In kong-khai kóng bat Siōng-tè, khiok ēng hêng-ûi hó͘-jīn I. In khó-ò͘ⁿ, pōe-ge̍k, bōe-tàng chòe sím-mi̍h hó-sū.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan