Bìoball air-loidhne

Sū-su-kì 2 - 現代台語譯本羅馬字版

Siōng Chú ê Sù-chiá tī Pho-kim Hián-hiān

¹ Siōng Chú ê sù-chiá tùi Kiat-kah lâi kàu Pho-kim, tùi Í-sek-lia̍t-lâng kóng, “Góa hō͘ lín tùi Ai-ki̍p chhut--lâi, chhōa lín lâi kàu góa tùi lín ê lia̍t-chó͘ li̍p-sè èng-ún ê tōe; góa bat kóng, ‘Góa kap lín li̍p ê iok, góa éng-oán bōe ûi-pōe;

² lín mā m̄-thang kap chit só͘-chāi ê chū-bîn li̍p-iok; tio̍h thiah-húi in ê chè-tôaⁿ.’ Lín kèng-jiân m̄ thiaⁿ góa ê ōe! Lín sī-án-chóaⁿ án-ni chòe?

³ In-ūi án-ni, góa kā lín kóng, ‘Góa bô beh tùi lín ê bīn-chêng kā in kóaⁿ-cháu; in beh chiâⁿ-chòe lín ê tùi-te̍k, in ê sîn-bêng beh chiâⁿ-chòe hāi lín ê lô-bāng.’”

⁴ Siōng Chú ê sù-chiá kóng chiah-ê ōe liáu-āu, Í-sek-lia̍t chèng-lâng chiū tōa-siaⁿ thî-khàu.

⁵ In kā hit só͘-chāi hō-miâ kiò-chòe Pho-kim; in tī hia hiàn-chè hō͘ Siōng Chú.

Iok-su-a Sí
( Su 24.28-31 )

⁶ Iok-su-a kái-sàn Í-sek-lia̍t-lâng; in chiū tò-khì ka-kī pun--tio̍h ê ke-gia̍p, chiàm-léng hiah-ê thó͘-tōe.

⁷ Iok-su-a oa̍h--teh ê sî, jîn-bîn ho̍k-sāi Siōng Chú; i sí liáu-āu, hiah-ê chhin-ba̍k khòaⁿ-tio̍h Siōng Chú ūi Í-sek-lia̍t-lâng só͘ chòe úi-tāi ê sū ê tiúⁿ-ló iáu oa̍h--teh ê sî, jîn-bîn iû-goân ho̍k-sāi Siōng Chú.

⁸ Siōng Chú ê po̍k-jîn, Lūn ê kiáⁿ Iok-su-a sí, hióng-liân chi̍t-pah cha̍p hè.

⁹ Í-sek-lia̍t-lâng kā i an-chòng tī Í-hoat-liân soaⁿ-khu, Ka-si̍t-soaⁿ pak-pêng ê Têng-ná Se-la i pun--tio̍h ê thó͘-tōe.

¹⁰ Hit-tāi ê lâng lóng sí-liáu; āu chi̍t tāi ê lâng khí--lâi, in m̄ bat Siōng Chú, mā m̄ chai I ūi-tio̍h Í-sek-lia̍t-lâng só͘ chòe ê sū.

Í-sek-lia̍t-lâng Khì-sak Siōng Chú

¹¹ Í-sek-lia̍t-lâng chòe Siōng Chú khòaⁿ-chòe pháiⁿ ê sū, khì ho̍k-sāi Pa-le̍k.

¹² In khì-sak chhōa in chhut Ai-ki̍p ê Siōng Chú — in lia̍t-chó͘ ê Siōng-tè, khì tè sì-ûi gōa-cho̍k ê sîn-bêng, kā in kūi-pài, jiá Siōng Chú siū-khì.

¹³ Í-sek-lia̍t-lâng khì-sak Siōng Chú, khì ho̍k-sāi Pa-le̍k kap A-su-tha-lio̍k.

¹⁴ Siōng Chú tùi in hoat tōa siū-khì, chiong in kau hō͘ chhiúⁿ-lia̍h in ê lâng; I koh chiong in kau hō͘ sì-ûi ê tùi-te̍k, Í-sek-lia̍t-lâng chiū bōe-tàng tí-khòng in ê tùi-te̍k.

¹⁵ In ta̍k-piàn chhut-chiàn, Siōng Chú lóng chiàu I só͘ kóng só͘ li̍p-sè--ê, kàng chai-hō kong-kek in; in chiū hui-siông khùn-khó͘.

¹⁶ Siōng Chú heng-khí sū-su, sū-su chiū kái-kiù jîn-bîn thoat-lī chhiúⁿ-lia̍h in ê lâng ê chhiú.

¹⁷ M̄-kú in bô thiaⁿ-thàn in ê sū-su, kèng-jiân pōe-poān Siōng Chú, khì tè pa̍t-ê sîn-bêng kā in kūi-pài; in ê lia̍t-chó͘ sūn-thàn Siōng Chú ê bēng-lēng só͘ kiâⁿ ê lō͘, in chin-kín phian-lī, bô chiàu án-ni kiâⁿ.

¹⁸ Siōng Chú ta̍k-piàn ūi-tio̍h in heng-khí sū-su, I lóng kap sū-su tông-chāi; tī sū-su iáu oa̍h--teh ê sî, Siōng Chú kiù jîn-bîn thoat-lī tùi-te̍k ê chhiú. In siū ap-chè, ai-chhan thó͘-khùi ê sî, Siōng Chú chiū lîn-bín in.

¹⁹ Sū-su sí liáu-āu, in oa̍t tńg-khì choh-pháiⁿ, pí in ê lia̍t-chó͘ koh-khah giâm-tiōng; tè pa̍t-ê sîn-bêng, kā in ho̍k-sāi kūi-pài, ngī-sim m̄ hòng-khì só͘ chòe ê pháiⁿ kap pāi-hoāi ê hêng-ûi.

²⁰ Siōng Chú chiū tùi Í-sek-lia̍t-lâng siū-khì, kóng, “Chit-ê chú-bîn ûi-pōe góa bēng-lēng in ê lia̍t-chó͘ eng-kai siú ê iok, m̄ thiaⁿ-thàn góa ê ōe,

²¹ só͘-í, Iok-su-a sí ê sî lâu--lo̍h-lâi ê gōa-cho̍k-lâng, góa liân chi̍t cho̍k to bô beh kā in kóaⁿ-cháu;

²² ēng chiah-ê gōa-cho̍k-lâng lâi chhì-giām Í-sek-lia̍t-lâng, khòaⁿ in khéng chhin-chhiūⁿ in ê lia̍t-chó͘ chun-hêng Siōng Chú ê tō-lō͘ á bô.”

²³ Só͘-í, Siōng Chú lâu chiah-ê cho̍k, bô chiong in kau hō͘ Iok-su-a, mā bô tī Iok-su-a sí liáu-āu chin kín kā in kóaⁿ-cháu.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan