Si-phian 96 - 現代台語譯本羅馬字版

Siōng Chú Sī Chòe Ko Thóng-sòe
( 1 Tāi 16.23-33 )

¹ Tio̍h tùi Siōng Chú chhiùⁿ sin ê koa! Choân-tōe lóng tio̍h tùi Siōng Chú chhiùⁿ-koa!

² Tio̍h tùi Siōng Chú chhiùⁿ-koa, chheng-chàn I ê miâ! Tio̍h ji̍t-ji̍t soan-pò͘ I chín-kiù ê hó siau-sit!

³ Tio̍h tùi bān-kok soan-iông I ê êng-iāu! Tio̍h tùi bān-bîn kóng-khí I úi-tāi ê chok-ûi!

⁴ In-ūi Siōng Chú chì-tōa, eng-kai siū ke̍k-tōa ê chheng-chàn; I pí só͘-ū ê sîn-bêng eng-kai koh-khah siū kèng-ùi.

⁵ In-ūi gōa-pang ê sîn-bêng put-kò sī ngó͘-siōng; m̄-kú Siōng Chú chhòng-chō chiah-ê thiⁿ.

⁶ Chun-kùi kap ui-giâm pau-ûi I; koân-lêng kap êng-kng chhiong-móa I ê sèng-só͘.

⁷ Tōe-chiūⁿ bān-bîn lóng tio̍h chheng-chàn Siōng Chú! Tio̍h chiong êng-iāu kap koân-lêng kui hō͘ I!

⁸ Tio̍h chiong Siōng Chú èng-tit ê êng-iāu kui hō͘ I! Tio̍h tòa chè-mi̍h chìn-ji̍p I ê tiâⁿ!

⁹ Tio̍h chhēng sèng-kiat chòe lé-ho̍k kèng-pài Siōng Chú! Choân-tōe tio̍h tī I bīn-chêng kiaⁿ-hiâⁿ phi̍h-phi̍h-chhoah!

¹⁰ Tio̍h tùi bān-kok soan-pò͘, “Siōng Chú choh-ông! Sè-kài kian-kò͘ bōe tōng-iâu; I beh ēng kong-gī sím-phòaⁿ bān-bîn.”

¹¹ Thiⁿ tio̍h hoaⁿ-hí, tōe tio̍h khoài-lo̍k! Hái kap hit lāi-bīn ê oa̍h-mi̍h lóng tio̍h chhut tōa-siaⁿ!

¹² Chhân-hn̂g kap kî-tiong só͘-ū--ê lóng tio̍h khoài-lo̍k! Hit-sî, chhiū-nâ lāi ê chhiū-ba̍k lóng beh tī Siōng Chú bīn-chêng hoaⁿ-hí chhiùⁿ-koa.

¹³ Siōng Chú teh lâi lah; I beh lâi sím-phòaⁿ phó͘-thiⁿ-ē. I beh ēng kong-gī sím-phòaⁿ sè-kài; I beh ēng sìn-si̍t sím-phòaⁿ bān-bîn.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan