Si-phian 95 - 現代台語譯本羅馬字版

O-ló ê Koa

¹ Lâi ah, lán lâi chhiùⁿ-koa o-ló Siōng Chú! Lán lâi chheng-chàn chín-kiù lán ê pó-hō͘-chiá!

² Lán tio̍h ēng kám-siā lâi kàu I ê bīn-chêng! Tio̍h tùi I chhiùⁿ hoaⁿ-hí ê koa!

³ In-ūi Siōng Chú sī úi-tāi ê Siōng-tè, sī iâⁿ-kè it-chhè sîn-bêng ê tōa Kun-ông.

⁴ I thóng-hat tōe ke̍k-chhim ê só͘-chāi; ke̍k-koân ê soaⁿ-hong mā tī I chhiú-lāi.

⁵ I chhòng-chō hái-iûⁿ, tōa-hái sio̍k I; I mā chhin-chhiú chhòng-chō lio̍k-tōe.

⁶ Lâi ah, lán lâi kiok-kiong kèng-pài I! Lán lâi kūi-pài chhòng-chō lán ê Siōng Chú!

⁷ In-ūi I sī lán ê Siōng-tè; lán sī I bo̍k-ióng ê iûⁿ-kûn, sī I chiàu-kò͘ ê chú-bîn. Kin-á-ji̍t, lín eng-kai tio̍h thiaⁿ I ê ōe.

⁸ Lín m̄-thang ngī-sim, chhin-chhiūⁿ tī Bí-lī-pa ê sî, chhin-chhiūⁿ tī khòng-iá ê Má-sat hit chi̍t ji̍t.

⁹ Hit-sî, lín ê chó͘-sian khó-giām góa; sui-jiân in ū khòaⁿ-tio̍h góa ê chok-ûi, iáu-kú chhì-thàm góa.

¹⁰ Sì-cha̍p nî kú, góa thó-ià hit sè-tāi ê lâng. Góa kóng, “In sī sim-sîn bô-tiāⁿ ê chú-bîn; in m̄ bat góa ê tō-lō͘.”

¹¹ Só͘-í, góa tī siū-khì tiong li̍p-sè, kóng, “In choa̍t-tùi bōe-tàng chìn-ji̍p góa ê thó͘-tōe an-hioh.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan