Si-phian 94 - 現代台語譯本羅馬字版

Jîn-lūi ê Sím-phòaⁿ-chiá Siōng-tè

¹ Siōng Chú, lí sī sin-oan ê Siōng-tè; sin-oan ê Siōng-tè ah, kiû lí hoat-chhut kng.

² Sím-phòaⁿ sè-kài ê Chú ah, kiû lí khí--lâi, hō͘ kiau-ngō͘ ê lâng siū eng-kai siū ê pò-èng.

³ Siōng Chú ah, pháiⁿ-lâng beh koh jōa kú, pháiⁿ-lâng iông-iông-tek-ì beh koh jōa kú?

⁴ In ê chhùi thò͘-chhut kiau-ngō͘ ê ōe; chòe pháiⁿ ê lâng lóng teh tián ka-kī.

⁵ Siōng Chú ah, in khi-ap lí ê chú-bîn, khó͘-chhó͘ lí ê sán-gia̍p Í-sek-lia̍t.

⁶ In hāi-sí ko͘-jî kóaⁿ-hū, koh sat-hāi chhut-gōa-lâng.

⁷ In kóng, “Siōng Chú it-tēng bô teh chù-ì; Ngá-kok ê Siōng-tè it-tēng bô teh khòaⁿ.”

⁸ Lín chiah-ê chhin-chhiūⁿ cheng-siⁿ ê lâng tio̍h siūⁿ; lín chiah-ê gû-gōng ê lâng tī-sî chiah ōe ū tì-hūi?

⁹ Chō hī-khang ê Siōng-tè ka-kī kiám bōe thiaⁿ--kìⁿ? Chō ba̍k-chiu ê Siōng-tè ka-kī kiám bōe khòaⁿ--kìⁿ?

¹⁰ Koán-kàu lia̍t-pang ê Siōng-tè kiám bōe chhú-hoa̍t? Kàu-tō lâng ê Siōng-tè kiám ōe bô tì-sek?

¹¹ Siōng Chú chai lâng ê sim-su, chai in só͘ siūⁿ--ê lóng bô lō͘-ēng.

¹² Siōng Chú ah, siū lí koán-kàu ê lâng chin ū hok-khì! Lí ēng lu̍t-hoat kā i kàu-tō,

¹³ beh hō͘ i tī hoān-lān ê ji̍t an-ún chū-chāi, ti̍t-kàu beh tâi pháiⁿ-lâng ê bōng ku̍t hó-sè.

¹⁴ Siōng Chú it-tēng bōe pàng-sak I ê chú-bîn, mā bōe hòng-khì I ê sán-gia̍p Í-sek-lia̍t.

¹⁵ I ōe koh chiàu kong-gī sím-phòaⁿ, sim chèng-ti̍t ê lâng lóng ōe tè I.

¹⁶ Siáⁿ-lâng ōe ūi góa khí-lâi kong-kek pháiⁿ-lâng? Siáⁿ-lâng ōe ūi góa khiā khí-lâi kong-kek chòe pháiⁿ ê lâng?

¹⁷ Nā m̄-sī Siōng Chú pang-chān góa, góa chin kín chiū lo̍h-khì éng-oán chēng-be̍k ê só͘-chāi.

¹⁸ Góa kóng “Góa ê kha ta̍h chhū--khì”; hit-sî, Siōng Chú ah, lí ēng chû-ài hû-chhî góa.

¹⁹ Góa sim-lāi ū chin chōe iu-būn khòa-lū, lí ê an-ùi hō͘ góa sim-sîn khoài-lo̍k.

²⁰ Hú-pāi ê koaⁿ-tiúⁿ lī-iōng hoat-lu̍t chè-chō kan-ok, in kiám ōe kap lí khiā kâng-pêng?

²¹ In tàu-tīn kè-bô͘ beh hāi gī-lâng ê sìⁿ-miā, kā bô chōe ê lâng tēng sí-chōe.

²² M̄-kú Siōng Chú chòe góa ê pó-lúi; góa ê Siōng-tè chòe góa ê pī-lān-só͘.

²³ I hō͘ in ê chōe-ok siū-tio̍h pò-èng; in chòe pháiⁿ ê sî, I beh châu-bia̍t in. Siōng Chú — lán ê Siōng-tè beh châu-bia̍t in.

The Bible Society in Taiwan

Lean sinn:

Ceanglaichean taic

Sanasan