Si-phian 92 - 現代台語譯本羅馬字版

Siōng-chàn Siōng Chú ê Kong-chèng kap Chû-ài
An-hioh-ji̍t ê si-koa.

¹ Siōng Chú ah, goán kám-siā lí; Chì-koân-chiá ah, chhiùⁿ-koa chheng-chàn lí ê miâ si̍t-chāi chin hó!

² Goán chá-khí-sî pò-iông lí ê chû-ài, ē-hng-sî pò-iông lí ê sìn-si̍t,

³ tôaⁿ cha̍p tiâu hiân ê khiā-khîm, ēng ga̍k-khì bí-biāu ê siaⁿ-im phōaⁿ-chàu.

⁴ Siōng Chú ah, lí ēng lí ê chok-ûi hō͘ góa hoaⁿ-hí; góa beh in-ūi lí ê chhiú ê só͘-chòe chhiùⁿ-koa khoài-lo̍k.

⁵ Siōng Chú ah, lí ê chok-ûi hiah-ni̍h úi-tāi, lí ê ì-liām hiah-ni̍h chhim-ò;

⁶ bô tì-sek ê lâng bōe liáu-kái, gû-gōng ê lâng mā bōe bêng-pe̍k.

⁷ Pháiⁿ-lâng chhin-chhiūⁿ chháu bō͘-sēng; chòe pháiⁿ ê lâng sui-jiân heng-ōng, it-tēng lóng ōe bia̍t-bông.

⁸ Chóng-sī Siōng Chú lí chì-chun, éng-oán chiáng-koân.

⁹ Siōng Chú ah, lí ê tùi-te̍k it-tēng bia̍t-bông; só͘-ū chòe pháiⁿ ê lâng lóng ōe siū phah-sòaⁿ.

¹⁰ Chóng-sī lí ū ke-thiⁿ góa ê khùi-la̍t, hō͘ góa chhin-chhiūⁿ iá-gû hiah-ni̍h ióng-chòng, in-ūi lí ū ēng sin ê iû tò tī góa sin-chiūⁿ.

¹¹ Góa chhin-ba̍k khòaⁿ-tio̍h góa ê tùi-te̍k siū pò-èng, chhin-hī thiaⁿ-tio̍h kong-kek góa ê pháiⁿ-lâng siū hêng-hoa̍t.

¹² Gī-lâng ōe heng-ōng chhin-chhiūⁿ chang-chhiū, ōe seng-tióng chhin-chhiūⁿ Lê-pa-lūn ê pek-hiuⁿ-chhiū;

¹³ chiah-ê chhiū chai tī Siōng Chú ê tiān, tī lán Siōng-tè ê tiâⁿ bō͘-sēng.

¹⁴ Chhiū lāu ê sî iáu ōe kiat ké-chí, chiap chin chōe, sek chhiⁿ-chhùi,

¹⁵ teh hián-sī Siōng Chú kong-chèng, lóng bô put-gī; I sī pó-hō͘ góa ê chio̍h-pôaⁿ.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan